ÂTHAONA 50

1Zawsi cha a paw hmia a khu thlu ta, cha ta, a pahnâ ta. 2Zawsi ta a chakaotuhpa dawhtyzy hnohta a paw ri cha thu thei leipa ta tao awpa ta biepie ta. Dawhtyzy ta Izarei ri cha thu thei leipa ta tao ei ta. 3Noh sypalih chhôh tao ei ta, thu thei leipa ta tao awpa ta, noh cha zie cha ama hryuh tyhpa rai a châ. Izi mo ta Zakaw châta noh sysari mâchhiesa ei ta.

4Ama mâchhiesana nohzy a chhâ tawhta, Zawsi ta Phiraoh chhôhkha hnohta, “Nama modypa ei châ khiahta cha, ngiachhiepa ta Phiraoh nakhaoh theina liata, hetana heta na chhopa muh vy. 5#Âtn 47.29-31Ei paw ta ei hnohta, ‘Pachâ teh, thi daihmâ ha na ta, Kâna râh liata thlâ ei chao chiehpa liata, cha lia tlai ta na pabu mah y,’ tahpa ta bie na pataihsa ha ta. Chavâta ngiachhiepa ta khy aw sah la, ei paw cha kaw pabu aw na ta, ei zâ lie heih aw,” tah ta. 6Phiraoh ta Zawsi hnohta, “Bie a cha pataihsa hapa hawhna chata khy la, na paw cha kaw pabu mah y,” tah ta.

7Chatanachata Zawsi cha a paw pabu awpa ta khy ta, Phiraoh chakaotuhpa zydua, a o liata machâzy nata Izi râh machâ zydua chhao a hnohta khy ei ta, 8Zawsi chhôhkha zydua, a unawhzy nata a paw chhôhkhazy chhao a hnohta khy khai ei ta. Ama hawtizy, ama mietaku zawzy nata ama viahchao hrizy deita Kôse râh liata ama siesai. 9Talailihzy nata arâ a kiahpazy chhao a hnohta khy ei ta, py lai ngaitapa ama châ.

10Zawdâh haosâ liata Atadâ sawhri tlô ei ta, cha liata chaphôtuna vâsâh chhih ngaitapa ta thata chakhei ei ta, cha liata a paw mâchhiesana châta noh sari hmâh ta. 11Cha râh liata a pahrâpa Kâna mo ta Atadâ sawhri liata mâchhiesapa cha ama hmô nahta, “He he Izi mo mâchhiesana ru ngaitapa a châ hih,” tah ei ta. Chavâta cha su cha a moh Abelamizarai#50.11 “Abela Mizrai” tahpa cha, “Izi chyhsazy mâchhiesana” tahna a châ. ama bi. Cha su cha Zawdâh haosâ liata a ypa a châ. 12A sawchapawzy ta a bie ryuhipa hawhta taopa ei ta. 13#Hmt 7.16Kâna râh lâ phaoh ei ta, Abarahâ ta thlâ su châta hnei awpa ta, Hiti chyhsa Epharaw liata a lyu chhaota a chaleipa, Kâna râh Mamre kiapâh ta a ypa Mâkâpelâ lyu lôpu liata pabu ei ta. 14A paw a pabu khai tawhta, Zawsi cha a unawhzy nata a paw pabu awpa ta a hnohta a khypa zydua chhaota Izi râh lâ a zâ lie ta.

Zawsi ta a unawhzy thlah a palôh

15Ama paw a thi hapa ama hmô nahta, Zawsi unawhzy ta, “Zawsi ta miah a hao aw ta, a chô liata hmo pha leipa eima taopa zydua kha viari miah a thô bâ aw,” tah ei ta. 16Zawsi lâ chyhsa tuah ei ta, a hnohta, “Na paw ta a thi chy ta, 17‘Na unawhzy paraona nata ama moleina zy a ngiahthai mah y, na chô liata hmo ama parao haw, tahpa ta Zawsi nama chho aw,’ miah tah ta. Chavâta tahmâ na paw Zakaw Khazohpa chakaotuhpazy paraona cha rie a ngiahthai mah y,” tah ei ta. Cha hawhta a hnohta bie ama reipa a thei nahta, Zawsi cha cha ta. 18A unawhzy cha vawh ei ta, a hmiakô liata a bôh ei ta, “Moh teh, châ chakaotuhpazy eima châ,” tah ei ta. 19Zawsi ta ama hnohta, “Chi khah u, kei he Khazohpa duahmo liata â duahpa ma ei châ? 20Nâmo ta la ei chô liata hmo pha leipa tao a chhuah ei chi ta, châhrasala Khazohpa ta kha hmo kha hmo phapa châta tlao â chhuahpa a châ. Tanoh ta hmo a ypa hawhna heta, chyhsa hrona hluhpi pachhapa a châ thei nawpa ta, Khazoh hmochhuahpa a châ. 21Chavâta chi khuh vy. Nâmo nata nama hawtizy ei cha mohôh lymâ aw ei,” tah ta. A unawhzy cha ama thlah palôhpa ta, reikah phapa ta âmo cha bie a chho ta.

Zawsi thina

22Zawsi cha a paw chhôhkha chhaota Izi râh liata pahrâ lymâ ta. Zawsi cha kô 110 hroh ta. 23Zawsi cha Epharai sawzy chhâ thôhna taihta hmô ta, Manase sawchapawpa Mâkhi sawzy chhao Zawsi byh chô liata a pihpa ama châ. 24Zawsi ta a unawhzy hnohta, “Kei cha thi daihmâ ha na ta, châhrasala Khazohpa ta cha vaw tly aw ei ta. Khazohpa ta he râh tawhta châ chhi papua aw ei ta, Abarahâ, Aisika nata Zakaw zy hnohta bie â taihpa râh lâ a châ chhi aw ei,” tah ta. 25#Pua 13.19; Zsua 24.32; Heb 11.22Chatawhcha Zawsi ta Izarei sawzy bie pataihsa ta, ama hnohta, “Khazohpa ta cha vaw tly tlai aw ei ta, he su tawhna heta ei ruzy phaoh ha muh vy,” tah ta. 26Chatanachata Zawsi cha, kô 110 uhtheipa ta thi ta, thu thei leipa ta tao ei ta, Izi râh liata ri byh liata ama paso haw.

Currently Selected:

ÂTHAONA 50: MARVBSI

Highlight

Copy