ÂTHAONA 48

Zakaw ta Epharai nata Manase châta byhnâ a aw

1Cha hnôhlâ ta Zawsi cha, “Na paw tlâh vei,” tahpa chho ei ta. A sawchapawpa pano, Manase nata Epharai a hnohta a chhi ta. 2Zakaw hnohta, “Na sawchapawpa Zawsi nâ lâ â vy,” tahpa ta chho ei ta. Izarei cha a pasaipa ta rakhô liata a kaw tyuh ta. 3#Âtn 28.13,14Zakaw ta Zawsi hnohta, “Kâna râh Luzi khih liata ei y nota, Khazohpa Atotaotheipa ta ei hnohta a vaw luah ta, byhnâ na awpa ta, 4ei hnohta, ‘Pachâ teh, chi hluhpi cha pathlasa aw na ta, ei cha papôh aw. Phopi hluhpi ta cha tao aw na ta, na hnôhlâ ta na pathla hnohta, he râh he chhâzaw ryuto châta ei pie aw,’ na tah ta. 5Na yna Izi râh lâ ei zu hlâta, Izi râh liata na sapa na sawchapaw panozy cha keima eih ama châ. Rubena nata Simeôna hawh tlai ta, Epharai nata Manase cha keima eih ama châ aw. 6Âmo hnôhlâ ta saw na hneipazy deikua cha, nâma eih châ aw ei ta, ama unawhzy moh ta ryuto râh piepa ama châ aw. 7#Âtn 35.16-19Keima kyh liata cha, Pâdâ tawhta ei vaw sie no kha, Râkheli cha lâpi liata Kâna râh liata na thisai ha ta. Epharâ khih tlô nawpa a hla kaw chy ta, chavâta Râkheli cha Epharâ lâpi liata ei pabu. Epharâ cha Bethlehe a châ,” tah ta.

8Izarei ta Zawsi sawchapawzy cha moh ta, “Hezy he ahyzy ma ama châ?” tah ta. 9Zawsi ta a paw hnohta, “Hezy he Khazohpa ta he liata eina piepa ei sawchapawzy ama châ,” tah ta. Zakaw ta, “Ngiachhiepa ta âmo kha kei lâ a vykhei teh, byhnâ ei awpa aw ei,” tah ta. 10Izarei cha a pawpi hapa vâta a mo zoh ha ta, chavâta hmô thei khao vei. Zawsi ta a sawchapawzy cha vaw pahnia ta, Izarei ta âmo cha a pahnâpa ta, a pyh ta. 11Izarei ta Zawsi hnohta, “Na hmia hmô awpa hnabeiseih khao leipa na ta, châhrasala Khazohpa ta na pathlazy hmia taih chhao eina pahmôsa ha hih,” tah ta. 12Zawsi ta a sawchapawzy cha a paw pakhu likawh tawhta pasie ta, alei lâ a bôh ta, a paw cha a naoh ta. 13Zawsi ta a sawchapawzy cha ama pano ta chaao ta, Epharai cha a ku chachâh lâta chaaopa ta Izarei ku chavei lâ paduasa ta, Manase cha a ku chavei lâta chaaopa ta Izarei ku chachâh lâ a paduasa. 14Châhrasala Izarei ta a bâh vâhchapia raruah ta, Manase cha sawchapaw uhtheipa a châ tarawpa ta, a chachâh lâ ku pazawh ta a seihnai viapa Epharai luh chahnao ta, a chavei lâ ku ta Manase luh chahnao ta. 15Zawsi cha byhnâ awpa ta,

“Nâ pathlatuhpa Abarahâ nata Aisika zy ta

A hmiakô liata ama y tyhpa Khazohpa,

Ei hroh chhôh zydua ta na vaih ta,

Tanoh taihta nâ vaituhpa Khazohpa,

16Hmo pha leipa zydua tawhta nâ chatlaituhpa Vâlyuhchâpa ta,

Hawtizy he byhnâ pie sala,

Âmo liata ei moh phaoh lymâpa châ mawh sy.

Nâ pathlatuhpa Abarahâ nata Aisika zy moh chhao,

Phaoh lymâpa châ sala;

Alei chô liata thata vaw pôh mawh ei sy,”

tah ta.

17Zawsi cha a paw ta a chachâh lâ ku ta Epharai luh a chahnaopa a hmô nahta, a palôh châ khao leipa ta, a paw ku cha Epharai luh tawhta Manase luh lâta pasie awpa ta chalo ta. 18Zawsi ta a paw hnohta, “Ei pâ, kha hawhta châ vei, Manase he sawchapaw uhtheipa a châ, chavâta na ku chachâh lâ kha ano luh liata pahnieh mah y,” tah ta. 19Châhrasala a paw ta khoh leipa ta, “Ei pahno na, ei sawchapawpa y, ei pahno na. Manase chhao phopi miakha vaw châ hra aw ta, a vaw rônah hra aw. Châhrasala a nawhta he ano hlâta rônah via aw ta, a chipathla cha phopi hluhpi a vaw châ aw,” tah ta.

20 # Heb 11.21 Cha noh ta Zakaw ta Epharai nata Manase cha byhnâ awpa ta,

“‘Epharai nata Manase hawhta,

Khazohpa ta cha tao mawh sy,’ tahpa ta,

Nama moh reipa ta,

Izarei sawzy ta byhnâ ama aw tyh aw,”

tah ta. Chatanachata Epharai cha Manase hmia lâta a paysa haw.

21Chatawhcha Izarei ta Zawsi hnohta, “Pachâ teh, kei cha thi daihmâ ha na ta, châhrasala Khazohpa nama hnohta y aw ta, châ pathlatuhpazy râh lâ a châ chhi heih aw ei. 22Cha dei châ vei, nâ cha na unawhzy tovyuh hlâta tovyuh miakha ta hluh viapa ta cha pie na ta, ei zaozi nata ei libaw ta Amawri mo ku tawhta ei lapa râh cha nâ ei cha pie,” tah ta.

Currently Selected:

ÂTHAONA 48: MARVBSI

Highlight

Copy