ÂTHAONA 29

Râkheli nata Liah châta Zakaw ta Lâbâ a chakao

1Zakaw cha sie lymâ ta, nochhi chyhsazy râh kei tlô ta. 2Mohmia pasaih ta, lyurâhpa liata tikhaoh vaw y ta, a kiapâh liata mietaku zaw hri thôh a byu thlâh ha ei ta. Cha tikhaoh ti cha mietaku zawzy ti ama padosa tyhpa a châ. Tikhaoh paka ama pamaina alô cha lai ngaita ta. 3Cha liata mietaku zaw zydua pahmaoh tyh ei ta, tikhaoh paka liata alô cha pahluah ei ta, mietakuzy ti ama padosa khai nahta, alô cha tikhaoh paka liata a yna ualua liata ama soh heih tyh.

4Zakaw ta ama hnohta, “Ei unawh saih u, khataih lâ chyhsa ma nama châ,” tah ta. Âmo ta, “Harânâ mo eima châ,” tah ei ta. 5Zakaw ta ama hnohta, “Nâhaw sawchapawpa Lâbâ nama pahno ma?” tah ta. Âmo ta, “Eima pahno,” tah ei ta. 6Zakaw ta ama hnohta, “A tlâh no a châ ma?” tah ta. Âmo ta, “A tlâh no na a châ. Moh tua, a sawchanô Râkheli chhao mietakuzy chhaota â vy ngâ kaw huh,” tah ei ta. 7Zakaw ta, “Noh y thlâh chy ta, sahroh pasy daihti châ mâh vei hih. Mietakuzy ti padosa u la, a lao pabâsa chy teh u,” tah ta. 8Âmo ta, “Mietaku zaw zydua pahmaohpakhy ta, tikhaoh paka liata alô he pasiepa a châ hlâlei cha, mietaku zawzy ti padosa thei ma pi. Cha hawhta tao khai tawhta, mietakuzy cha ti eima padosa tyh,” tah ei ta.

9Âmo bie â chho hai nota, Râkheli cha a paw mietakuzy chhaota vaw tlô ta. Ano cha mietaku vaituhpa a châ. 10Zakaw ta a nô rilâhpa Lâbâ sawchanô Râkheli nata a nô rilâhpa Lâbâ mietakuzy a hmô nahta, a kei hnia ta, alô cha tikhaoh paka tawhta pasie ta, a nô rilâhpa Lâbâ mietakuzy cha ti a padosa. 11Zakaw ta Râkheli cha a pahnâ ta, aoh tlili ta cha ta. 12Zakaw ta Râkheli hnohta a paw Lâbâ chhôhkhapa a châzie nata Rebekâ sawchapawpa a châzie zy chho ta. Chatawhcha Râkheli cha a râ ta, a paw kei chho ta.

13Lâbâ cha a sietanô sawchapawpa Zakaw thâtih a theipata nahta, dy awpa ta a râ ta. Zakaw cha a pyh ta, a pahnâ ta, o lâ a chhi ta. Zakaw ta hmo yzie zydua Lâbâ chho ta. 14Lâbâ ta a hnohta, “Ei rupa nata ei sapa tlai na châ cha zaw!” tah ta. Chatanachata Zakaw cha thla kha chhôh Lâbâ hnohta y ta.

15Lâbâ ta Zakaw hnohta “Ei tupapa hmah châ hra la, a saipa ta eina chakao awpa chi châ vei. Na hlao awpa khâpa a châ aw, na chho teh?” tah ta. 16Lâbâ cha sawchanô pano hnei ta, a uhtheinô moh cha Liah châ ta, a seihnainô moh cha Râkheli a châ. 17Liah cha a mo pha leipa châ ta,#29.17 He liata “Mo pha leipa” he, mo tha naipa vâta mopadeizie a ngia tu leipa reina a châ. Râkheli deikua cha chhithai kawpa nata pizie a ngia kawpa a châ. 18Zakaw ta Râkheli cha kyhpachâ ta. Lâbâ hnohta, “Na sawchanô seihnainô Râkheli hnei awpa ta kô sari ei cha chakao aw,” tah ta. 19Lâbâ ta, “Ano cha chyhsa hropa ei pie awpa hlâta, nâ ei cha pie awpa cha a pha via. Ei hnohta y thlâh ha mah y,” tah ta. 20Chatanachata Zakaw cha Râkheli hnei awpa ta kô sari chakao ta, a kyh a pachâ kawpa vâta, noh chyhta hawhta pachâ ta.

21Zakaw ta Lâbâ hnohta, “Ei daihti â ki haw. Ei zialâh thei nawpa ta, ei lapinô cha na pie bâ teh,” tah ta. 22Lâbâ ta kyhchhi tao ta, cha khih liata chyhsa zydua awpakhy ta. 23Zâ a vaw châ nahta, a sawchanô Liah cha Zakaw lâ a chhi ta, Zakaw ta Liah cha a zialâh ta. 24Lâbâ ta a seichanô Zilpâ cha, a sawchanô Liah hnohta a seichanô châta pie ta. 25My vaw châ ta, moh ta, Liah vaw châ thlâh ha ta. Zakaw ta Lâbâ hnohta, “Ei chô liata na hmotaopa he khâpa ma a châ tly? Râkheli hnei awpa ta cha chakao va na mâ? Khazia eina dôvei chi?” tah ta. 26Lâbâ ta, “Saw uhtheipa dyhchâ hlâta seihnaipa dyh pachâ tuapa cha, eima râh taozie châ vei. 27Ano châta hâta patloh ha tua la, cha khai tawhta a nawhta chhao cha eima cha pie aw. A nawhta châna chata kô sari hropa eina chakao heih aw chi,” tah ta. 28Zakaw cha, cha hawhta tao ta, Liah hnohta y nawpa hâta cha patloh ta. Cha khai tawhta Lâbâ ta a sawchanô Râkheli cha a lapinô châta pie ta. 29Lâbâ ta seichanô Bilhâ cha a sawchanô Râkheli hnohta a seichanô châta pie ta. 30Zakaw ta Râkheli cha a zialâh hra ta, Liah hlâta Râkheli kyhpachâ via ta, Lâbâ cha kô sari hropa a chakao via heih.

Zakaw sawzy

31Liah cha a haopa a châpa Abeipa ta a hmô nahta, a chhi pahy ta, Râkheli deikua cha choh ha ta. 32Liah cha saw phaoh ta, sawchapaw sa ta, “Abeipa ta ei pasataozie a hmôpa vâta a châ, tahmâ cha ei vahpa ta kyh eina pachâ ha aw,” tah ta, a moh Rubena#29.32 Hebrai reih ta “Rubena” (Reuben) tahpa cha, “Moh teh u, sawchapaw a châ” tahna a châ. a bi. 33Saw phaoh heih ta, sawchapaw sa ta, “Ahaopa ei châpa Abeipa ta a pahnopa vâta, he sawchapawpa chhao he eina pie,” tah ta, a moh Simeôna#29.33 “Simeôna” tahpa cha, “Nah ta a thei” tahna a châ. a bi. 34Saw phaoh heih ta, sawchapaw sa ta, “Tahmâ la sawchapaw pathôh ei sapa hapa vâta, ei vahpa ta eina tlaichhai ha aw,” tah ta, a moh Livai#29.34 “Livai” tahpa cha, “Chahry pâ, chaty pâ, patu” tahna a châ. a bi. 35Saw phaoh heih ta, sawchapaw sa ta, “Tahmâ cha Abeipa ei reithai aw,” tah ta, a moh Zudâh#29.35 “Zudâh” tahpa cha, “Reithai” tahna a châ. a bi. Cha khai tawhta Liah cha saw sa khao vei.

Currently Selected:

ÂTHAONA 29: MARVBSI

Highlight

Copy