ÂTHAONA 30

1Râkheli ta Zakaw châta saw a sapa leipa â pahno nahta, a narônô cha uahva kaw ta. Zakaw hnohta, “Saw na pie teh, chataleipatala ei thi aw,” tah ta. 2Zakaw cha Râkheli chô liata a hiehâh kaw ta, “Kei he chhi thei châ pakhâpatuhpa Khazohpa duahmo liata a duahpa ma ei châ?” tah ta. 3Râkheli ta, “Ei seichanô Bilhâ he a zialâh teh. Chatanachata saw na sapa aw ta, ano hmâpa ta chhôhkha ei padua thei aw,” tah ta.#30.3 Bilhâ ta Râkheli châta saw a sapa hawhpa he Mongyuh reih ta surrogacy tah ei ta, chanô ta ano vyuhpa ta chanô hropa saw paphaosa ta, nawh a pi nahta ano saw châta â lapa reina a châ. 4Chatanachata a seichanô Bilhâ cha, a lapinô châta pie ta, Zakaw ta ano cha a zialâh ta. 5Bilhâ cha saw phaoh ta, Zakaw châta sawchapaw sapa ta. 6Râkheli ta, “Khazohpa ta na pachia ta, ei ao thei hra ta, sawchapaw eina pie haw,” tah ta, a moh Dânâ#30.6 “Dânâ” tahpa cha, “Khazohpa ta eina pachia” tahna a châ. a bi. 7Râkheli seichanô Bilhâ cha saw phaoh heih ta, Zakaw châta sawchapaw panona sapa ta. 8Râkheli ta, “Thatlôpa châhpia a piapa hawhta ei narônô a pia na ta, ei pahnie haw,” tah ta, a moh Nâthalai#30.8 “Nâthalai” tahpa cha, “Khazohpa nata châhpia a pia” tahna a châ. a bi.

9Liah ta a sawsa a chhâ hapa a pahno nahta, a seichanô Zilpâ a chhi ta, Zakaw hnohta a lapinô châta pie ta. 10Liah seichanô Zilpâ ta Zakaw cha sawchapaw sapa ta. 11Liah ta, “Vâpha â chhih kaw dia,” tah ta, a moh Kâdâ#30.11“Kâdâ” tahpa cha, “Nohlao, vâpha, byhnâ” tahna a châ. bi ta. 12Liah seichanônô Zilpâ ta Zakaw châta sawchapaw panona sa heih ta. 13Liah ta, “Ei ly kaw dia! Chanôzy ta nohlao eina tah aw ei,” tah ta, a moh Asera#30.13 “Asera” tahpa cha, “Thapha, a ly, palôhtlâh” tahna a châ. a bi.

14Chatawhcha sâh hria daihti liata, Rubena ta lyu liata khoiah#30.14 Khoiah he Mizo reih ta Zâwlaidi ama tahpa hawhpa he a châ ei aw. Athaipa thokha ta khoiah he thokô tlyma, zôhripa tlyma, a paw chhao a hneipa hawhta pangiasa ei ta, thokha ta thokôpa hna tlyma, zôhripa hna tlyma châ leipa ta, tho tharipa châ ta, chanô chapaw châna kyh liata thatlôna a pie theipa hawhta ama pachâ. hmô ta, a nô Liah châta vaw phaoh ta. Râkheli ta Liah hnohta, “Ngiachhiepa ta na sawchapawpa khoiah hmôpa kha na pie hra teh,” tah ta. 15Châhrasala Liah ta a hnohta, “Ei vahpa eina chhupa chi a daih vei ma? Ei sawchapawpa khoiah chhao taih na chhu awpa ma nâ chhuah?” tah ta. Râkheli ta, “Cha khiahta la, na sawchapawpa khoiah vyuhpa ta tazâ châ zialâh lah vâ,” tah ta. 16Zâlâ ta Zakaw cha lyu tawhta vaw tlô ta, Liah cha dy awpa ta pua ta, “Einâ zialâh awpa chi a châ, ei sawchapawpa khoiah ta ei cha chalei haw,” tah ta. Cha zâ cha a zialâh ta. 17Khazohpa ta Liah thlahchhâna cha thei ta, saw phaoh ta, Zakaw châta sawchapaw papangawhna sapa ta. 18Liah ta, “Ei vahpa hnohta ei seichanô ei piepa vâta, Khazohpa ta ei tovyuh eina pie hri hih,” tah ta, a moh Iskâra#30.18 “Iskâra” tahpa cha, “A ty a hneipa, hria hlao” tahna a châ. a bi. 19Liah cha saw phaoh heih ta, Zakaw châta sawchapawpa pacharuna sapa ta. 20Liah ta, “Khazohpa ta hmosai sôhpa na pie ta, ei vahpa châta sawchapaw pacharu ei sapa haw, tahmâ cha ei hnohta a pahrâ bâ aw,” tah ta, a moh Zebulawna#30.20 “Zebulawna” tahpa cha, “palyupalih, a pyh” tahna a châ. a bi. 21Cha hnôhlâ ta sawchanô sa ta, a moh Dinâ a bi.

22Khazohpa ta Râkheli cha a thei thlâh ha ta. Khazohpa ta a thlahchhâna thei ta, a chhi pahy ta. 23Saw phaoh ta, sawchapaw sa ta, “Khazohpa ta ei moh chhiepa a phiehru haw,” tah ta. 24“Abeipa ta sawchapaw hropa na pie heih mawh sy!” tah ta, a moh Zawsi#30.24 “Zawsi” tahpa cha, “ahropa eina pie heih aw” tahna tlyma, “a la haw” tahna tlyma a châ. a bi.

Zakaw nata Lâbâ amâ paryh

25Râkheli ta Zawsi a sa tawhta, Zakaw ta Lâbâ hnohta, “Ei o nata ei râh lâ ei di thei nawpa ta na pasiesa bâ mah y. 26Ei cha chakaona chhâpa ei lapinôzy nata ei sawzy he na pie la, na pasiesa mah y. A phapa ta ei cha chakaozie kha na pahno khai,” tah ta. 27Lâbâ ta a hnohta, “Na modypa ei châ khiahta cha, ngiachhiepa ta y chy mah y. Nâma zawhzi ta Abeipa ta byhnâ eina pie tahpa aluahna ta ei hmô haw,” tah ta. 28Zakaw hnohta, “Na hlao awpa zie reih la, na chho mah y, ei cha pie aw,” tah ta. 29Zakaw ta a hnohta, “Kheihta ma ei cha chakao tahpa pahno chi ta, ei mohôhna ry liata na sahrohzy ama phazie na pahno khai. 30Ei vaw tlô no kha a chyhta dei hnei chi ta, tahmâ cha a hluhpi ama vaw châ ha hih. Ei siena lâ maihta Abeipa ta byhnâ a cha pie lymâ. Khatita ma ei chhôhkha châta ei patohpatia thei hra aw?” tah ta. 31Lâbâ ta, “Khâpa ei cha pie aw?” tah ta. Zakaw ta, “Khâpa hmah eina pie awpa chi byuh vei. He hmo he eina taopa khiah chi ta cha, na sahroh zaw pasa heih aw na ta, ei vaih heih aw. 32Tanoh na sahroh zaw zydua chahlô khai aw na ta, a cheichapaipa nata a kaorâhpazy a tlyh aw na ta, mietaku vyhpa maih nata mie cheichapaipa nata kaorâhpa maih, cha zydua cha ei hlao a châ aw. 33He he hmialâ daihti liata ei siana palâsana a châ aw. Hlao eina piepa chi mopasia awpa ta nâ vy tita, ei miezy hry liata cheichapai leipa nata kaorâh leipa nata ei mietakuzy hry liata a vyh leipa na hmô khiahta cha, ei parupa hawhta pachâpa a châ aw,” tah ta. 34Lâbâ ta, “A pha na, na reipa hawhta châ mawh sy,” tah ta. 35Cha noh lia tlai ta, Lâbâ ta mie tôhpa cheichapaipa nata kaorâhpa maih, mie panô cheichapaipa nata kaorâhpa maih, arâhpa a hlaopa maih nata mietaku vyhpa maih panano ta, a sawchapawzy ku liata hlâ ta. 36Ano nata Zakaw likawh cha noh thôh lâsie a hlapa ta tao ta. Zakaw cha Lâbâ sahroh zaw hropazy vaih pazao ta.

37Zakaw ta vâdei tho, kuasâh tho nata hnaphiapa thochiah palâpazy chhawh ta, a hyhkuazy hlaih ta, a sapa râhpa palâsa ta, arâhpa ta a cheichapaipa chôchahreizy tao ta. 38A hyhkua a hlaipa chôchahreizy cha, sahroh zawzy ti do tyhna châki liata zy, ti lona liata zy, sahroh zawzy dady lymâ ta soh ta. Sahrohzy cha ti do awpa ta amâ vy tita vô tyh ei ta. 39Chatanachata sahroh zawzy cha chôchahrei dady liata ama paw kiah ei ta, vô lymâ ei ta, kaorâhpa, cheichapaipa nata chei dipa ta a chapaicharupazy ta taw pataw lymâ ei ta. 40Zakaw ta mietakutawzy cha anano ta soh ta, mietaku zawzy cha, Lâbâ mietaku zawzy hry liata a kaorâhpa nata a vyhpazy lâta paheisa lymâ ta. Ano sahroh zawzy cha anano ta soh ta, Lâbâ sahroh hry liata pahlao leipa ta. 41Sahroh thatlô viapazy ta paw ama kia tita, chôchahrei hry liata ama vô thei nawpa ta, Zakaw ta chôchahreizy cha sahrohzy hmô thei awpa ti lona liata soh tyh ta. 42Sahroh zaw chiehleipazy deikua, cha liata soh vei. Chatanachata sahroh chiehlei viapazy cha Lâbâ eih châ lymâ ta, thatlô viapazy cha Zakaw eih a châ lymâ. 43Chatanachata Zakaw cha thata vaw hneirôh ta, sahroh zaw hluhpi, seichanôzy, seichapawzy, râraoseihpazy nata alâzy hnei ta.

Currently Selected:

ÂTHAONA 30: MARVBSI

Highlight

Copy