ÂTHAONA 28

Zakaw Lâbâ yna lâ a sie

1Aisika ta Zakaw cha aw ta, byhnâ a awpa khai tawhta biepie ta, a hnohta, “Kâna zuah lapinô ta na hnei awpa châ vei. 2Thyu la, Pâdâ-Aramia liata na nô paw Bethua o lâ sie la, cha liata na nô rilâhpa Lâbâ sawchanôzy hry tawhta pakha lapinô ta kei hnei mah y. 3Khazohpa Atotaotheipa ta byhnâ cha pie sala, phopi hluhpi na vaw châ thei nawpa ta, chi hluhpi cha pathlasa sala, cha papôh mawh sy. 4#Âtn 17.4-8Na khichhai châna râh, Khazohpa ta Abarahâ hnohta a piepa râh he, ryuto châta na hnei thei nawpa ta, Abarahâ byhnâ cha, Khazohpa Atotaotheipa ta nâ nata na hnohta a ypa na pathlazy hnohta cha pie mawh ei sy,” tah ta. 5Aisika ta Zakaw cha pasiesa ta. Pâdâ-Aramia râh liata Zakaw nata Esaw zy nô Rebekâ rilâhpa, Aramia chyhsa Bethua sawchapawpa Lâbâ o lâ sie ta.

Esaw lapinô hropa a hnei

6Zakaw cha Aisika ta byhnâ awpa ta, lapinô hnei awpa ta Pâdâ-Aramia lâ pasiesa ta, byhnâ a awpa nota, “Kâna zuah lapinô ta na hnei awpa châ vei,” tahpa ta bie a piepa kyh nata, 7Zakaw chhao ta a nô nata a paw rei a ngiah ta, Pâdâ-Aramia lâ a sie haw tahpa Esaw ta pahno ta. 8Esaw ta Kâna zuahzy ta a paw Aisika palôh ama patlâh leizie pahno ta. 9Esaw cha Ismela lâ vawh ta, lapinô a hnei chiehpazy thota, Abarahâ sawchapawpa Ismela sawchanô, Nebaiô sietanô, Mâhalâ cha lapinô ta hnei ta.

Bethel liata Zakaw mâsapa

10Zakaw cha Besebâ tawhta pua ta, Harânâ pangaipa ta sie ta. 11Su miakha kei tlô ta, noh a tla hapa vâta, cha liata a rie ta. Cha su liata alô miakha la ta, a lahuah ta hmâh ta, cha liata a zia ta. 12#Zhn 1.51Mâ sa ta, alei chô liata hleidy a vaw daopa hmô ta, hleidy pawhmao cha avâ daih ta. Khazohpa vâlyuhchâpazy ta hleidy chô liata kiah heih, chô heih, ama tah ngâpa hmô ta. 13#Âtn 13.14,15Abeipa cha hleidy chô lâta a duah ta, “Kei he Abeipa, na paw Abarahâ Khazohpa nata Aisika Khazohpa ei châ. Nâ ziana râh kha, nâ nata na pathlazy ei cha pie aw ei. 14#Âtn 12.3; 22.18Na pathlazy cha alei liata dohlei zie châ aw ei ta, notla lâ, nochhi lâ, maw nata chho lâzy lia nama pôh lymâ aw. Nâ nata na chipathla liata khizaw pho to ama hu â hieh aw. 15Pachâ teh, na hnohta ei y. Na siena maihta cha vaih lymâ aw na ta, he râh lâ he ei châ vaw chhi heih aw. Na hnohta bie ei taihpa he, ei patlô hlâlei cha, cha siesai cheita aw va na,” tah ta. 16Zakaw cha â môpa a kaw hra ta, “He su liata Abeipa a vaw y tlai na, vaw pahno leipa na ta,” tah ta. 17Zakaw cha chi kaw ta, “He su he chi â chhih kaw dia! He he su hropa châ vei, Khazohpa o tlai na a vaw châ, he he vârâh chhikao a châ hih,” tah ta.

18Zakaw cha mydi kari ta thyu ta, a lahuah ta a hmâpa alô la ta, lôbô châta bô ta, a chô liata sathaw bao ta, 19a su moh Bethel#28.19 “Bethel” tahpa cha, “Khazohpa o” tahna a châ. a bi. Cha khih moh cha Luzi vaw tah tuapa a châ. 20Zakaw ta, “Khazohpa cha ei hnohta y sala, ei siena lâpi liana heta na vaih sala, viahchhâ nie awpa nata chysia a tao awpa na piepa ta, 21ei paw o lâ thlalôhpa ta ei vaw kua heih khiahta cha, Abeipa cha ei Khazohpa châ aw ta, 22he alô, lôbô ta ei bôpa he Khazohpa o a châ aw. Chatanachata nâ ta eina piepa chi zydua tawhta su hrawh su kha â kipa ta ei cha pie lymâ aw,” tahpa ta bie a taih ta.

Currently Selected:

ÂTHAONA 28: MARVBSI

Highlight

Copy