HMOTAOPAZY 17

Thysalawnika liata tyhreihna

1Amphipôli nata Apôlônia khihpizy chapiapa ta Thysalawnika khihpi tlô ei ta, cha liata Zuzy pakhyna o y ta. 2Pawla cha a taozietyhpa hawhta a pakhy hra ta, Pahânoh ei thôh Biehrai pakhâta ta âmo a laichadaikhei ta. 3Mesia cha riethei a tao awpa a châna nata athihpa hry tawhta a thyu heih awpa kyhzy chhopasiapa ta, pahmô pasiasa tyh ta, “He Zisu, a thâtih ei cha chhopa ei he, Mesia cha a châ,” tah ta. 4Chatanachata ama hry liata thokha cha pahniepa châ ei ta, Pawla nata Sila cha a pahlao ha ei ta, Khazohpa a pachâpa Krikâh chyhsa hluhpi nata chanô zachhihpa hluhpi chhao ta a ngiapâ ha ei ta. 5Zuzy deikua cha ama hiatlia ta, sôhdaohna su liata moleipa thathipazy pakhy ei ta, zawpi pahmaohpa ta khihpi zydua patypamâ ei ta. Lyuhchâpazy cha zawpi lâ a chhi a chhuahpa ta, Zasaw o liata a ngiahnao ei ta. 6Châhrasala lyuhchâpazy cha hmô leipa ei ta, Zasaw nata unawh hropa thokhazy cha khihpi biehneituhpazy lâ a daophi ei ta, “He sahlao, khizaw a palie patheih khai hapazy heta, he lâ chhao vaw tlô ei ta. 7Zasaw heta a o liata patlôsa ei ta, ‘Zisu ama tahpa bei hropa a y,’ tah ei ta, ama zydua ta Kaisarâ chakhiapa ta hmo ama tao,” tahpa ta awh ei ta. 8Cha biezy cha ama thei nahta, zawpi nata khihpi biehneituhpazy cha a tymâ ngaita ei ta. 9Zasaw nata mohropazy tawhta amâ cheikâna sôh ama la khai nahta, pathlie ha ei ta.

Lyuhchâpazy Beria liata

10Unawhzy ta azo ta Pawla nata Sila cha Beria khih lâ thlai pasiesa ei ta, ama kei tlô nahta, Zuzy pakhyna o liata a ngia ei ta. 11Beria mo cha Thysalawnika mo hlâta pha via ei ta, pahâ ngaitapa ta bie cha dao ei ta, ama reipa cha â do nata do lei pasia nawpa ta noh chareih ta Biehrai a chu pasia tyhpa ama châ. 12Chavâta chyhsa hluhpi ta a ngiapâ ei ta, Krikâh chanô zachhihpazy nata chapawzy chhao ta amâ ngiapâ ha hra. 13Thysalawnika liata Zuzy ta Pawla cha Beria lia chhao ta Khazohpa bie a chho tahpa ama thei nahta, cha lâ chhao cha vawh ei ta, zawpizy hnapaona bie reipa ta pasyu ei ta. 14Chavâta Pawla cha pasiesa ha awpa ta unawhzy ta tilaipi lâ thlai siekhei ei ta. Sila nata Timawthy deikua cha, cha liata y pazao ei ta. 15A pathlietuhpazy ta Pawla cha Atheni taih kei pathlie ei ta. Sila nata Timawthy cha a chatlie thei chaipa hawhta ano lâ a vy awpa ta Pawla tawhta biepiepa phaopa ta, a vaw pathlietuhpazy cha a lie ha ei ta.

Pawla Atheni liata

16Pawla cha Atheni liata Sila nata Timawthy a hâ chhôhta, khihpi cha khazoh nothlahpa ta a bie thlâh hapa hmô ta, a palôh pasa ngaita ta. 17Chatanachata pakhyna o liata Zuzy nata Khazohpa a pachâpazy cha Biehrai a laichadaikhei tyh ta, sôdaohna su liata a ypazy chhao noh chareih ta Biehrai â laichadaikhei tyh ei. 18Epikuria nata Stôika chyhsa sopa thokhazy chhao Pawla cha a dyuh ei ta. Thokha ta, “He reih hluhpa heta khâpa ma rei â chhuah?” tah ei ta. Thokha ta Zisu kyh nata thyuheihna kyh a reipa vâta, “Chihropa khazohzy biechhotuhpa a châ ei aw,” tah ei ta. 19Pawla cha a chhi ei ta, Areôpaku#17.19 “Areôpaku” tahpa cha, “Mars Tlâh” tahna châ ta, ahmaohna nata ryureina supipipa a châ. Mars cha awhsi laipa miakha moh a châ. lâ vawkhei ei ta, a hnohta, “He pachuna thiehpa na rei tyhpa he khâpa ma a châ tahpa miah na chho thei aw ma? 20Hmo nano kawpazy eima nakhaoh liata na vaw tlôkhei. Chavâta he hmozy yzie he eima pahno khoh,” tah ei ta. 21Atheni mo zydua nata cha liata a ypa chihropazy cha, hmo hropa tao leipa ta, hmo thiehpa reipa nata nathliena liata ama daihtizy a hmâh tyhpa ama châ.

Areôpaku liata Pawla biereipa

22Pawla cha Areôpaku liah khophie liata a duah ta, “Nâmo, Atheni mo saih u, ato liata zyhna kyh a pachâ peimawh ngaitapa nama châ tahpa ei pahno. 23Ei chareina liata, namâ chhypazy moh na ta, maisâh miakha, a chô liata, ‘Pahno leipa Khazohpa châta,’ tahpa ropa ei hmô. Pahno leipa ta namâ chhy tyhpa, cha Khazohpa thâtih cha ei cha vaw chho ei. 24#1 Abei 8.27; Isai 42.5; Hmt 7.48Khizaw nata a chhôh liata hmo a ypa zydua a taotuhpa Khazohpa cha, alei nata avâ Beipa a châpa vâta, ku ta sapa achhyna ozy liata pahrâ vei. 25Hmo a phahlapa hawhta, chyhsapa ku ta chakao a ngiahpa châ hra vei. Ano tlai cha chyhsa zydua hnohta hrona nata husona nata hmo zydua a pietuhpa tlao a châ. 26Alei chô zydua liata pahrâ awpa ta, chyhsa pakha tawhta phopi to tao ta, ama châta daihtizy rao ta, ama y nawpa râhrizy a pakhâh. 27Khazohpa tluapa ta, a kô daih ei sala, ama hmô lylia thei nawpa ta, cha hawhta a taopa a châ. Ano cha keimo tawhta a hla vei.

28“Ano vâta hroh pi ta,

A pielyu pi ta,

Eima ypa a châ.”#17.28 He bieso he Krite chyhsa sopa Epimenide reipa bie a châ thlyu aw.

Nama hlaphôh phi thaipa thokha chhao ta,

“‘Keimo chhao he,

A pathlazy eima châ,’

tahpa ta ama reih hra.

29“Khazohpa pathla eima châ tlôh khiahta cha, Khazohpa cha ngôh tlyma, tâkâ tlyma, alô tlyma, chyhsa patuapaluapa nata zôthaipa ta taopa nothlahpa hawhpa he khiah ma, tahpa ta eima pachâ awpa châ vei. 30Pahno leina daihtizy kha cha Khazohpa ta pahno lei â pachâ tyh, tahmâ deikua cha su to liata chyhsa zydua ro awpa ta bie a pie haw. 31Ano ta â tlyhpa hmâpa ta, siana ta khizaw a pachia nawpa noh a rao haw. Â tlyhpa chyhsa cha athihpa hry tawhta a pathyuna liata, pachiana a y tlai awpa a châzie chyhsa zydua hnohta a pa-i haw,” tah ta.

32Athihpa thyuheihna kyh ama thei nahta, thokha ta pahneisao ei ta, ahropazy ta, “Cha kyh cha nâma tawhta eima nathlie heih aw,” tah ei ta. 33Chatawhcha Pawla cha ama hry tawhta pua ha ta. 34Chyhsa thokha cha Pawla a pahlaopa ta a ngiapâ ha ei ta. Chazy hry liata Areôpaku chyhsa Diônesia nata Dâmâri ama tahpa chanô pakha a hlao ei ta, mohropazy chhao amâ hlao.

Currently Selected:

HMOTAOPAZY 17: MARVBSI

Highlight

Copy