HMOTAOPAZY 16

Pawla nata Sila hnohta Timawthy a sie

1Pawla cha Derbe nata Lystâ lâzy chhao sie ta. Cha liata Timawthy ama tahpa pachupa pakha y ta. Timawthy cha Zu chanô ngiapâtuhpa sawchapaw châ ta, a paw deikua cha Krikâh chyhsa a châ. 2Lystâ nata Ikônia liata unawhzy ta ano cha reithai kaw ei ta. 3Pawla ta Timawthy cha a hnohta sie hra awpa khoh ta. Cha suzy liata a ypa Zuzy ta Timawthy paw cha Krikâh chyhsa a châpa ama pahno khaipa vâta, Zuzy vâna chata Pawla ta Timawthy cha a chhi ta, a chopaw pataisa ta. 4Khihpizy chahryh ei ta, Zerusale liata lyuhchâpazy nata machâzy biepathlupa kha zyh awpa ta unawhzy ama chho lymâ. 5Chatanachata Awnanopazy cha ngiapâna liata thapatlôpa ta y ei ta, noh charei ta pôh via lymâ ei ta.

Mâsidônia awna

6Thlahpa Pathaihpa ta Asia râh liata bie chho awpa a pakhâ hapa vâta, Pharuzia nata Kalatia râhzy chahry ei ta. 7Mysia râh ama tlô nahta, Bithunia râh liata a ngia a chhuah ei ta, châhrasala Zisu Thlahpa ta pasai leipa ta. 8Mysia râh cha siepahlie ei ta, Tarôsa khih lâ zu ei ta. 9Zâ ta Pawla ta aluahna hmô ta. Mâsidônia chyhsa pakha a vaw duah thlâh ha ta, ano chata, “Masidônia râh lâ a vy la, miah vaw bao teh,” tahpa ta a haw ta. 10Cha aluahna cha Pawla ta a hmô nahta, ama hnohta Thâtihpha chho awpa ta Khazohpa ta miah a aw tahpa pahno pi ta, chatanachata Mâsidônia râh lâ cha thlai sie a chhuah pi ta.

Lydia pipathina

11Tarôsa tawhta balyh ta pua pi ta, Samôthe khihpi lâ palâh pi ta, a mylâ ta Nipôli khihpi lâ sie pi ta. 12Cha tawhna chata Philipi lâ sie pi ta. Philipi cha Mâsidônia râh liata khihpi peimawhpa châ ta, Rawma a vaopa khihpi a châ. Cha khihpi liata noh khazie tlyma châh pi ta. 13Pahânoh ta thokhy chhikao khôtho lâ pua pi ta, chavah kiah liata thlahchhâna su a châ awpa ta eima pangiasapa lâ zu pi ta, a tyuh pi ta, chanô a vy pakhypa sahlaozy hnohta bie reih pi ta. 14Eima bie a theipazy hry liata pakha cha, Thiatirâ zuah Lydia ama tahpa a châ. Ano cha poh nohsaihpa a zuahpa châ ta, Khazohpa a chhytuhpa chanô a châ. Pawla bie reipa a phapa ta pachâ awpa ta Abeipa ta a palôh pahy ta. 15Ano nata a chhôhkhazy bâti ama châ khai nahta, eima hnohta, “Abeipa châta ngâchhihpa ta eina rao khiah ei chi ta la, ei o lâ a vy u la, vaw tlô teh u,” tahpa ta miah a haw ta. Chatanachata miah thlyu ha ta.

Pawla nata Sila patâhna o liata

16Thlahchhâna su lâ eima sie nota, sei laihsa pakha ta miah a vaw tyh ta. Ano cha pachaothaina thlahpa a hneipa châ ta, pachaona bie a reipazy tawhta a zibeipa châta sôh hluhpi a hmô tyhpa a châ. 17Cha chanô chata Pawla nata keimo miah zi ta, “He chyhsazy he Chônôchai Khazohpa chakaotuhpazy ama châ, pachhana lâpi ama cha vaw chho hih,” tahpa ta awh ta. 18Cha hawhna chata noh hluhpi tao ta. Pawla cha a palôh châ khao leipa ta, a heih ta, thlahpa hnohna chata, “A chhôh tawhta pua awpa ta, Zisu Krista moh ta bie ei cha pie,” tah ta. Cha dawh lia tlai chata pua ha ta.

19A zibeipazy ta ama sôh hmôna a lei haw tahpa ama pahno nahta, Pawla nata Sila cha patu ei ta, sôhdao su liata ryureituhpazy hmiakô lâ a daophi ei ta. 20Bie pachiatuhpazy lâ a chhi ei ta, “He chyhsazy he Zuzy châ ei ta, eima khihpi he ama patypamâ ngaita. 21Keimo Rawma chyhsazy châta ânapa nata tao pasai leipa ryhpazy ama pachu lymâ,” tah ei ta. 22Zawpizy chhao vaw pua ei ta, lyuhchâpazy cha a vaw dyuh hra ei ta. Bie pachiapatuhpazy ta lyuhchâpazy cha ama pohzy hrie ta, sôsi ta tu awpa ta biepie ei ta. 23Ei hluhpi ama chhei khai tawhta, patâhna o liata khô ei ta, patâhna o vaituhpa hnohta â bohpa ta vaih awpa ta biepie ei ta. 24Cha tlatlu ta ama biepiepa â ipa vâna chata, âmo cha patâhna chhôh chaipa liata khô ta, ama pheizy liata keihrai dai ta.

Patâhna o hyutuhpa pipathina

25Zâcho ta Pawla nata Sila cha Khazohpa lâ thlahchhâpa ta hlazy sa ei ta, atâhpazy ta nathlie ei ta. 26Eikhapi ta alo thata a vaw sih ta, patâhna o abônazy taihta a vaw chalyu ta. Ochhi zydua thlai a vaw pahy ta, atâhpazy keihrai cha a vaw pathlâ khai ha ta. 27Patâhna o vaituhpa cha â môpa a vaw hra ta, patâhna o ochhi a pahypazy cha hmô ta, atâhpazy cha amâ râ ha khiah ma tah ta, a zaozi phia ta a thie a chhuah ta. 28Pawla cha ao paro ngaitapa ta awh ta, “Kheihta hmah a pasasa khah y, eima zydua ta eima y khai thlâh haw!” tah ta. 29Patâhna o vaituhpa cha meiôh pado ta, thlai a ngia ta, chipa ta a chalyuna chôta Pawla nata Sila hmiakô liata â khu lâta pao ta. 30Âmo cha puakhei ta, “Pâpuh saih u, pachha ei châ thei nawpa ta khâpa ei tao aw?” tah ta. 31Âmo ta, “Abeipa Zisu a ngiapâ la, pachhapa ta na y aw, nâ nata na chhôhkhazy chhaota,” tah ei ta. 32Chatawhcha ano hnohta nata a o liata a ypa zydua hnohta Abeipa bie chho ei ta. 33Zâcho ta âmo cha a chhi ta, ama chheina hmahzy cha pasi ta, ano nata a chhôhkhazy cha bâti châ ha ei ta. 34Lyuhchâpazy cha a o lâ a chhi ta, âmo châta pati taopa ta, Khazohpa amâ ngiapâ hapa vâta ano nata a chhôhkha zydua ta a ly ngaita ei ta.

35Noh a vaw chhi nahta, bie pachiatuhpazy ta, “Kha chyhsazy kha papua teh,” tahpa ta pheisaihzy tuah ei ta. 36Cha bie cha patâhna o vaituhpa ta, Pawla chho ta, “Cha papua awpa ta, bie pachiatuhpazy ta chyhsa ama vaw tuah. Chavâta tahmâ vaw pua u la, thlalôhpa ta sie teh u,” tah ta. 37Châhrasala Pawla ta pheisaihzy hnohta, “Rawma chyhsa châ pi ta, thailei a châpa chhao châ leipa pi ta, vâtlâh mohmô ta miah chhei ei ta, patâhna o liata miah khô ei ta, tahmâ arulâta papua awpa zua miah amâ chhuah mâ? Châ bao va! Âmo tlai ta a vy ei sala, miah vaw papua mawh ei sy,” tah ta. 38Cha biezy cha pheisaihzy ta bie pachiatuhpazy hnohta tlôkhei ei ta, Rawma chyhsa ama châpa ama pahno nahta, chi kaw ei ta. 39Vawh ei ta, reihpha cheih ei ta, papua ei ta, khihpi puasai awpa ta a haw ei ta. 40Pawla nata Sila cha patâhna o tawhta pua ei ta, Lydia kei tly ei ta. Cha liata unawhzy hmô ei ta, thlah ama palôh khai nahta, sie ha ei ta.

Currently Selected:

HMOTAOPAZY 16: MARVBSI

Highlight

Copy