HMOTAOPAZY 18

Pawla Kawrini liata

1Cha hmozy hnôhlâ ta, Pawla cha Atheni tawhta pua ta, Kawrini lâ sie ta. 2Cha liata Akuilâ ama tahpa Zu chyhsa pakha hmô ta. Cha chyhsa cha Pawntu râh liata a pihpa châ ta, Klaudia ta Zu chyhsa zydua Rawma khih tawhta pua awpa ta bie a piepa vâta, a lapinô Priskilâ nata Itali râh tawhta atlia ta a vaw tlôpa ama châ. Pawla cha âmo a hmô awpa ta vawh ta. 3Pawla nata Akuilâ chhôhkha he poh o a taopa châ chyu ei ta, ama raihria â lyupa vâta, Pawla cha Akuilâ nata Priskilâ o liata tlô ta, rai a hriakhei tyh ei. 4Pahânoh maihta pakhyna o liata bie reih tyh ta, Zuzy nata Krikâhzy pahnie â chhuah tyh.

5Mâsidônia tawhta Sila nata Timawthy ama vaw tlô nahta, Pawla cha biechho chakaona liata a hmâh hluh via ta, Zisu kha Mesia a châ tahpa ta Zuzy hnohta â châhkhei tyh. 6Châhrasala Zuzy ta a dyuh ei ta, ama reipachhie nahta, Pawla cha a poh chatho ta, ama hnohta, “Nama thisaih maoh cha nâmo luh liata y mawh sy! Kei deikua la, ei pathaih. Tahmâ tawhta la, Zenitaizy lâ ei sie aw,” tah ta. 7Cha tawhtapa cha pua ta, Titu Zustâ ama tahpa, Khazohpa a chhy tyhpa o liata a ngia ta. A o chhao pakhyna o kiapâh liata a ypa a châ. 8Pakhyna o hyutuhpa Krispâ nata a chhôhkha zydua cha Abeipa a ngiapâ ha ei ta. Kawrini mo hluhpi chhao ta, Pawla biereipa ama thei nahta, a ngiapâpa ta, bâti châ ei ta. 9Zâ kha cha Pawla ta aluahna hmô ta, Abeipa ta a hnohta, “Chi leipa la, a chalih leipa ta bie reih lymâ mah y. 10Na hnohta ei y mâh tâh, cha pasasa awpa ta ahy hmahta na chô liata ama ku hy aw veih ei, he khihpi liata chyhsa hluhpi ei hnei,” tah ta. 11Pawla cha ama hry liata Khazohpa bie pachupa ta, cha liata kô kha nata thla charu y ta.

12Kâliô cha Akai râhvaotuhpa a châ nota, Zuzy cha a paraohpa ta Pawla tei ei ta, ryureina hmiakô lâ a chhi ei ta. 13“He chyhsa heta ryhpa chakhiapa ta, Khazohpa a chhy awpa ta chyhsazy a pasyu ei,” tah ei ta. 14Pawla cha bie rei awpa â chhuah hai nota, Kâliô ta Zuzy hnohta, “Zuzy saih u, hmo doleipa kyh tlyma, hmo paraopa kyh tlyma châ sala cha, nama leihna he ei pachâ awpa tlai a châ. 15Châhrasala biezy, mohzy nata nama ryhpa kyhzy a châpa vâta, nâmo ta pachia thlâh ha teh u. Kei la, cha hawhpa kyh liata pachiatuhpa châ awpa khoh va na,” tah ta. 16Chatanachata ryureina tawhta âmo cha papua ha ta. 17Ama zydua ta pakhyna o hyutuhpa Sôsthene cha patu ei ta, ryureina hmiakô liata chhei ei ta. Châhrasala Kâliô ta ama hmotaopa cha uasa a chhuah hlei vei.

Pawla Antiôkâ lâ â lie

18 # Maluh 6.18 Cha hnôhlâ ta, Pawla cha Kawrini liata bohpi y via ta, cha khai tawhta unawhzy cha reih phapa ta a chhaih ta, cha tawhna chata Suria râh lâ balyh ta sie ta. Priskilâ nata Akuilâ chhao a hnohta sie hra ei ta. Pawla cha a bietai#18.18 He liata Pawla bietai he, kheihawhpa bietai tlai ma a châ tahpa pahnopa châ vei. Maluh Reina Bo 6-na liata Nâzarai bietai hawhpa he a châ thei (1 Kaw 9-10). a patlô hapa vâta, Kenkaria khih liata a sâ a ngyu ta. 19Ephesi khih tlô ei ta, cha liata âmo cha siesai ta. Pawla deikua cha pakhyna o liata a ngia ta, Zuzy cha Biehrai a laichadaikhei ta. 20Châh chy awpa ta a haw ei ta, châhrasala paryhsa leipa ta. 21“Khazohpa ta a pasaih khiahta cha, nâmo lâ ei vy heih aw,” tahpa ta reih phapa ta âmo cha siesai ta, Ephesi tawhta balyh ta sie ha ta. 22Kaisaria liata balyh â pahâ nota, Zerusale lâ Awnanopa a kaw naoh ta, cha khai tawhta Antiôkâ lâ zu ta. 23Cha liata khachâ rakha tlyma a y tawhta, sie heih ta, pachupa sahlao zydua thapatlô laihpa ta, Kalatia râh nata Pharuzia râhzy chahryh ta.

Apawlôsâ Ephesi liata bie a chho

24Alezandria khihpa Zu chyhsa Apawlôsâ ama tahpa Ephesi lâ a vy ta. Ano cha a pakah paleih a thlâzi kawpa nata Biehrai a pahno kawpa a châ. 25Abeipa lâpi kyh pachu hapa chyhsa châ ta. Zawhâna bâtina deita a pahnopa chhao ta, thlahpa thapasana hneipa ta, Zisu thâtih â do kawpa ta a pachu tyh. 26Pakhyna o liata riahpha ngaitapa ta bie reih ta. Priskilâ nata Akuilâ ta a biereipa cha ama thei nahta, ama o lâ a chhi ei ta, Khazohpa lâpi a sia viapa ta chhopasia ei ta. 27Apawlôsâ cha Akai lâ sie awpa â chhuah nahta, unawhzy ta a thapatlô ei ta, ano a vaw ly awpa ta pachupazy lâ châ ropa ei ta. A tlô nahta, ngiachhiena vâta ngiapâtuhpazy cha thata bao ta. 28Vâtlâh pahnopa ta Zuzy cha thatlô ngaitapa ta ama bie padei lymâ ta, Biehrai a tlychakapa ta, Zisu cha Mesia a châ tahpa a chhopasia tyh ei.

Currently Selected:

HMOTAOPAZY 18: MARVBSI

Highlight

Copy