Matiyu 23

Lɛɛro wó yi pipiri-nyena

Maake 12:38-40; Luka 20:45-47; 11:37-54

1Yezu laam ma ŋɔɔne de o kwaga tɔgena bam de nɔn-kɔgɔ kom maama. 2O ma ta de-ba o we, “Ko ná ye Farisi tiina bam de Wɛ nia zamesem tiina bam, banto mo tu ba leiri Moses yuu ne, ye ba jege chwoŋa se ba pa nɔɔna lɔre o berem dem kuri. 3Konto ŋwaane, á jege se á ta‑á tɔge kolo maama ba na bere abam to. Ko nam ná ye ba kikia yam, se á yé zaŋe á ta‑á lwoni-ya, kolo ŋwaane ba tete nam ba tɔge kolo ba na bere nɔɔna to. 4Ba na yeini ba ke tei to, ko nye de ba fe nɔɔna se ba zeŋe zela yalo dum na dwoi ba zeŋem to, ye ba tete yiga tera se ba twori zela yam fenfee de ba zeiŋi. 5Ko ta woli da, ba yeini ba bere ba kikia mo jaja se nɔɔna maama taa nae. Ba yeini ba bere ba tete nɔɔna tei ne we ba jege Wɛ tɔnɔ kom swono, de ba na tiini ba vɔ-ko ba yera ne jaja to. Ba maa tiini ba ke zɔla ba gwaaro nia ne se ko pa nɔɔna taa nege-ba.#Jeelim 15:38 6Ba ná yeini ba vo nɔɔno sɔŋɔ se ba di kuri, ko ye jei-laao jei ne mo ba lage se ba taa jei da. Ba ná zo ba jeerim di sem, ba daa ta lage jei-kamunu mo se ba jeini yiga ne. 7Ba ná vei yaga, ba lage se nɔɔna maama taa tui ba tei-ba mo, ye ba ta lage se nɔɔna taa bwoi-ba we ‘Berem tu’.

8Ko nam ná ye abam, á yé ta‑á boŋe se nɔɔna taa bwoi abam we ‘Berem tu’, kolo ŋwaane á maama ye nu-bia mo daane, ye á jege Berem Tu dedoa mo. 9Á na ye nu-bia logo baŋa ne to, se á yé ta‑á jege á wolowolo á bwoi we á kwo. Abam maama ye Kwo dedoa mo. Wonto ye Baŋa Wɛ mo. 10Ko woli da, á yé ta‑á boŋe se nɔɔna taa bwoi abam we ‘Yiga tiina’, kokuri á Yiga tu ye dedoa mo. Wonto maa ye Wɛ Dam Tu Krista wom.

11Abam nɔn-kamunu mo ye wolo na ye tontoŋeno á wone to. 12Wolo maama ná zeiŋi o tete, konto tu wó ba o tu tega mo. Wolo nam ná tu o tete, Wɛ wó zeiŋi konto tu.#1 Piita 5:6

13Wɛ nia zamesem tiina bam de Farisi tiina bam, lɛɛro yi abam! Abam ye pipiri-nyena mo. Á yeini á che chwoŋa á pa nɔɔna ware se ba zo Wɛ telaao paare dem wone. Abam tete ba sɛ se á vo á zo da, ye á daare á che balo maama na boŋe se ba zo da to chwoŋa.

[14Wɛ nia zamesem tiina bam de Farisi tiina bam, lɛɛro yi abam! Abam ye pipiri-nyena mo. Á yeini á gane kadeina se á jwoŋi wonnu ba tei ne. Á maa bere á tete de á na tiini á ware Wɛ tei to. Konto ŋwaane Wɛ wó tiini o waare abam se ko dwoni á dwonna.]

15Wɛ nia zamesem tiina bam de Farisi tiina bam, lɛɛro yi abam! Abam ye pipiri-nyena mo. Á yeini á beeri logo jei maama mo se á nii, á wó wane á na dwi-gɛ tu dedoa se o ba o sɛ Wɛ na. Wonto nam ná tu o sɛ, á maa wó bere‑o á tete chullu tem pa se o tiini o ji te-seŋa nyem se ko dwoni abam tete na ye tei to.

16Lɛɛro yi abam! Abam nye de lilwoa na vaŋe ba dwonna lilwoa to mo. Á yeini á bere nɔɔna we, nɔɔno ná dugi duuri Wɛ diga kam ŋwaane, konto ba bere kolokolo. Á ma daare á bere we, nɔɔno nam ná dugi de sabu-seŋa kalo na wo Wɛ diga kam wone to, ko ye fefeo mo konto tu tei ne. 17Abam ye jworru telo yia na ware wonnu ya lɔre to mo. Ko ye diga kam na ye Wɛ tete nyem to ŋwaane mo pa se sabu-seŋa kam de ye o nyem. Ko bere we tento wone kɔ mo damma ko dwoi? 18Abam daa ta bere we, nɔɔno ná dugi de Wɛ kaanem bimbini dem, konto ba bere kolokolo. Á ma daare á bere we, nɔɔno ná dugi de pɛɛra yalo maama na tigi bimbini dem baŋa ne to, ko ye fefeo mo ko pa konto tu. 19Abam yia ware ya na kolo na ye chega to. Ko ye bimbini dem na ye Wɛ nyem to mo pa se pɛɛra yam de ye Wɛ nyem. Tento wone kɔ mo damma ko dwoi? 20Mo kokuri, nɔɔno wolo ná dugi de bimbini dem, ko bere we konto tu dugi de bimbini dem tete ko woli de woŋo kolo maama na tigi de baŋa ne to mo. 21Wolo de na dugi de Wɛ diga kam to seene o du de Wɛ tete de mo, Wɛ na zoore ka wone to ŋwaane. 22Nɔɔno wolo daa ta ná dugi de Wɛ telaao kom, konto tu dugi de Wɛ paare dim jei mo. Wɛ tete na jeini dáane to, ko bere we konto tu dugi de Baŋa Wɛ de mo.

23Wɛ nia zamesem tiina bam de Farisi tiina bam, lɛɛro yi abam! Abam ye pipiri-nyena mo. Ko ná ye dwoa wo-sworru, te ná maŋe te ye fenfee tei de, á yeini á pɔɔre Wɛ-teiri á pa‑o. Ko lamma. Ko daare á yiga tera de Wɛ nia yadaara yalo na tiini ya jege yuu to, nenɛɛne chega tɔgem, de da-ŋwaŋa durim, de wo-pwoŋo kikia. Ko ya maŋe se á ta‑á ke wonnu tem konto mo á woli tedaara tem wone.#Mika 6:8 24Abam seene á nye de lilwoa balo na vaŋe ba dwonna lilwoa to mo. Abam ná yeini á lage á nyɔ na, á kwaane mo se á leeri-ba, se pwoŋo-memeeno kolo ná wora, se á le-ko á yage. Á yiga nam tera de wo-kamunu kolo á na lage á li to, ko ná maŋe ko ma de kone de.

25Wɛ nia zamesem tiina bam de Farisi tiina bam, lɛɛro yi abam! Abam ye pipiri-nyena mo. Á ná lage á di wodiu, á yeini á tɔge á chullu tem á fɔge á se á na-zwe de á kabeili, ko ná maŋe ko ye se kwɛ mo de. Ko daare wodiu kolo á na di se wone to maa ye kampina de puseŋa. 26Farisi tu, nmo nye de lilwei mo tei. Nmo maŋe se n da yiga n se n zoŋa wo mo, se ka kwaga de daa yé taa jege digiru.

27Wɛ nia zamesem tiina bam de Farisi tiina bam, lɛɛro yi abam! Abam ye pipiri-nyena mo. Á nye de yibeela yalo ba na fɔge ya kwaga se ya taa lamma nɔɔna yia ne to mo. Yibeela yam konto wo ma su de twa kwi, ye ya tiini ya ye digiru yerane. 28Abam de nam ye konto mo. Á pae á jege chega nɔɔna yia ne, ye lwarem yerane mo su á wo, dedaane pipira kikia.

29Wɛ nia zamesem tiina bam de Farisi tiina bam, lɛɛro yi abam! Abam ye pipiri-nyena. Á yeini á fɔge á ke faŋa faŋa Wɛ sampwori sem yibeela, ye á daare á pa se nɔn-ŋona bam de yibeela yam tiini ya kwɛ lanyerane. 30Á ma daare á bere we, á ya ná wora á kwoa nakwa bam maŋa kam ne, á bá sɛ á tɔge de-ba á go Wɛ sampwori sem. 31Abam tete ni mo bere we á ye balo na go Wɛ sampwori sem to bia. Bia nam tɔge ba kwoa kikia mo. 32Tɔ. Nam kwaane á toŋe á kwoa nakwa bam na ke wo-lwanno telo ba daare to se ko vo ko ti. 33Abam nye de basankwe mo de á kwoa maama. Á bere á bá lu te-seŋa waarem dem wone. 34Mo kokuri a lage a toŋe a sampwori abam tei ne, de yi-pore-nyena, de Wɛ tɔnɔ zamesem tiina de. Abam wó ja ba badaara á go, ye ko wó taa ye dagara yuu ne mo á wó go badaara de. Á ma‑á wó ja badaara á jeerim di sem ne á fere, ye á daare á pare-ba á ja kaage teene. 35Á na wó bɛɛse Wɛ nɔɔna konto to, Wɛ waarem dem wó ba á baŋa, nenɛɛne ko ye abam tete mo go nɔn-ŋona balo maama ba na maŋe ba go logo baŋa ne to. Konto zege Abel wolo na ye nɔn-ŋom ye Kain go‑o to, se ko ba ko woli de Barakia bu Zekaria abam kwoa na go‑o Wɛ kaanem bimbini dem de o tete diga kam tetare laŋa ne to.#Pulim 4:8; 2 Tigisim 24:21; Zekaria 1:1 36A tɛ abam chega ŋwaane to, kikia yam konto waarem dem maama jege se de ba zem nɔɔna bam baŋa ne mo.

Yezu wo chɔge Jerusalem tiina ŋwaane

Luka 13:34-35

37Ei! Jerusalem tiina bam, á yeini á go Wɛ sampwori selo o na toŋe abam tei ne to ye á dole-ba de kandwa. Kuni dedɛ mo a ya lage se a la abam nɔn-bia a ke daane se a taa nii á baŋa ne, nenɛɛne chworo na kukwori ko bia ko ke ko vɔna kuri ne tei to. Abam maa ba sɛa. 38Tɔ. Wɛ laam wó dɔne o je abam teo kom baŋa ne se ko ji di-dwonnu. 39Nam ta‑á yei-na we, á daa bá na-ne se ko taa vei maŋa kalo á na wó ta we, ‘Dé Teiru Wɛ wó swɛ wolo na tu o yere ŋwaane to swolim.’ ”#Lei 118:26

Currently Selected:

Matiyu 23: xsmKBG

Highlight

Copy