Matiyu 24

Lɛɛro wó ba logo baŋa

Maake 13:1-23; Luka 21:5-24

1Yezu laam ma nwoŋi Wɛ diga kam ne se o viiri. O na maa kɛ konto to, o kwaga tɔgena bam ma ba o tei se ba pa o maane Wɛ diga kam lɔɔm dem na ye tei to. 2O ma ta de-ba o we, “Á nɛ ka na ye tei to na? A tɛ abam chega ŋwaane to, ka maama wó ba ka to ka saare tega ne. Kandwɛ dedwe daa bá daare de dwoŋi baŋa ne.”

3Yezu déem ma vo o jeini Olivi peo kom yuu ne. O na wora konto to, o kwaga tɔgena bam yerane ma vo o tei, ye ba bwei‑o ba we, “Maŋa kɔ mo Wɛ diga kam lage ka ba ka chɔge konto? Bɛ mo lage ko pa debam maana se dé lɔre we maŋa kam yi se n jwoori n ba logo baŋa, se ko maama laam ba ko kweeli?” 4Yezu ma leiri-ba o we, “Fɔge-na á che á tete se á yé pa nɔɔn-nɔɔno chwoŋa se o gane abam. 5Kokuri nɔɔna dedɛ wó ba abam tei ye ba ma amo yere ba ta de abam we, banto mo ye Wɛ Dam Tu Krista wom. Konto dwoŋi mo ba wó gane nɔɔna dedɛ. 6Ko ta woli da, á wó ba á na tigura na wora abam jei sem ne, ye á kwori á ni ka ŋwa teene dedwonna ne. Nam yé pa-na se lwia taa jege abam, kokuri wonnu tem konto jege se te ke mo, ye ko dae we ko yi logo kom tiim mo. 7Dwi tiina wó zaŋe ba ke jara de ba dwonna dwi-gɛ tiina, ye teo de ko dwoŋi teo wó zaŋe te mage jara. Kana de maa wó ba ka taa wora jei dedɛ ne, ye tega de wó ziziŋi jei sedwonna ne. 8Wonnu tem konto maama nam nye de kaane na virigi puga, ye cham daa ta wo kwaga ne to mo.

9Konto maŋa kam ne nɔɔna wó ja abam ba ke dedɛɛra jeŋa ne se ba bɛɛse abam, ye ba daare ba go abam. Abam na ye amo nyem to ŋwaane, logo baŋa nɔɔna maama wó taa chuli abam.#Matiyu 10:17-18 10Nɔɔna dedɛ wó ba ba za ba boboŋa de amo. Nɔɔna badaara maa wó ko da-kura ba bere daane, ye ba badwonna de wó taa chuli daane. 11Nɔɔna dedɛ wó ba ba bere we ba ye Wɛ sampwori ye ba seene ba dae. Ba maa wó gane nɔɔna dedɛ. 12Totoŋ-lwanno maa wó ba te tiini te gaale, ye nɔɔna dedɛ swono de chɔge. 13Wolo maama nam ná jege pu-dɛa se ko vo ko kweeli, Wɛ wó jwoŋi konto tu ŋwea. 14Ko woli da, nɔɔna wó beeri logo baŋa jei maama ba tɔɔle Wɛ kwor-ywoŋa kam we, Wɛ lage o di paare o nɔɔna baŋa ne, se ko taa ye maana nabiina maama tei ne, se logo kom kweelim laam yi.

15Abam nam wó ba á na wo-zɔɔne delo na chɔge Wɛ yere to na wó ba ko zege Wɛ tete diga kam ne. Wɛ sampwora Danyeli maŋe o ta wo-zɔɔne dem konto taane.”#Danyeli 9:27; 11:31; 12:11 A tɛ abam wolo ná gaga, se n kwaane n ni ko kuri lanyerane.

16“Abam ná nɛ wo-lɔŋɔ kom konto, se abam balo na zoore Judea ne to ke lela á nwoŋi á duri á vo peero jei á seigi da. 17Nɔɔno nam ná wo nayuu ne, se o yé tu o zege se o kwaleme o wonnu o diga wone. 18Nɔɔno wolo nam ná wo kara ne, se o daa yé jwoori sɔŋɔ se o kwei o gare-laao o zo. 19Kanto maŋa kam ne ko wó tiini ko taa ye lɛɛro kaana balo na jege pwi to tei ne, de balo na jege bia ye ba ŋɔge yele to tei ne. 20Nam ta‑á lwoori-na Wɛ se cham durim dem konto yé ba doa nenem maŋa ne, naa á siu dɛ dem ne. 21Kokuri yaara yalo na lage ya ba maŋa kam konto ne to wó taa chamma ya dwoi yalo na maŋe ya ke boboa ne se ko ba ko yi zem to. Yanto nam ná kea, ya dwoŋi daa tera ya na wó ba konto dwoŋi.#Danyeli 12:1 22Wɛ ya ná wo pɛ se yaara yam da yam tiri, nɔɔn-nɔɔno ya bá wori. O nam wó pa se yaara yam da yam tiri, o tete nɔɔna bam o na kuri to ŋwaane.

23Kanto maŋa kam ne, nɔɔno wolo maama ná tage de abam o we, ‘Nii Wɛ Dam Tu Krista wom, o wo ywo-seeni’, se á yé sɛ konto tu. 24Nɔɔna badaara wó zaŋe ba bere we ba ye Wɛ Dam Tu Krista wom ye ba dae, ye ba badwonna de bere we banto mo ye Wɛ sampwori ye ba dae. Ba maa wó ke wo-kenkagela yalo na wó so nɔɔna to, ye chwoŋa ya ná wora, yanto ya wó wane ya soge Wɛ tete nɔɔna balo o na kuri to de.#2 Tɛsaloni 2:9 25Nii-na, amo nam wuuri a ta a bere abam mo ye ka maŋa kam ta wo yi.

26Ko woli da, nɔɔna ná tage de abam ba we, ‘Nii-na Wɛ Dam Tu wom na tu o wora kagoa yuu ne’, se á yé zaŋe á vo dáane. Ba nam daa ta ná we, ‘Nii‑o da, o zo sɔŋɔ konto o seigi’, se á yé sɛ. 27Kokuri amo Nabiin-bu wom ná seene a lage a ba logo baŋa dɛ delo ne, ko wó taa nye de doa na pepele wɛyuu ne se ko zege bira-kwaga ne ko vo ko yi sam-yiga to. 28Chega ŋwaane to, wo-too na tigi mɛ to, duura de wó gilimi da mo.

Nabiin-bu wom tutuuri dem taane

Maake 13:24-37; Luka 21:25-33; 17:26-30, 34-36; 12:41-48

29Yaara yam konto maŋa kam ná tu ka kɛ,

ko bá dáane ye wea kam laam ji nazwono tim-tim.

Chana kam de daa bá fuŋi

se pwooni taa wora.

Chalechwe sem de wó kwori wɛyuu ne se to tega ne,

ye wɛ-baŋa de wó ziziŋi pa se ko wonnu maama leiri.#Izaya 13:10; 34:4; Joweli 3:15

30Nɔɔna laam wó na wo-kenkagele wɛyuu ne se ko bere we Nabiin-bu wom maa beena. Logo baŋa dwi tiina maama maa wó taa keera, de ba na nɛ Nabiin-bu wom na maa beene to. O wó taa dɔge kunkwonnu baŋa ne o beena de dam, ye nenɔŋ-fɔrɔ tiini ko wo o tei ne. 31Nabɔnɔ maa wó tiini ko taa wui wɛ-wɛ, ye o laam pa se Wɛ malese sem nwoŋi se ba se zege logo baŋa dɛ sena sem ne, se se la nɔɔna balo Wɛ na kuri ye ba wo jei maama ne to se ke daane.#Izaya 27:13

32Nam maane-na á nii kaporo na ye tei to. Konto ná yeini ko wora ko kwi vɔɔro, á yeini á lɔre we ko twɛ yadɛ maŋa mo. 33Ko maa ye bedwe mo de á ná nɛ wonnu tento maama ná wora te ke, se á lɔre we maŋa kam laam twɛ ka ti mo. 34A tɛ abam chega ŋwaane to, wonnu tem konto maama wó ba te ke ye abam dwi dem ta wo ti. 35Wɛyuu de tega baŋa maama wó ba te jei, ye amo taane dem ta wó taa jege chega se ko taa vei wuu.

36Nɔɔn-nɔɔno nam yeiri dɛ delo Nabiin-bu wom na lage o jwoori o ba to, ye nɔɔn-nɔɔno yeiri dɛ dem wone maŋa kam o na wó ba to, ko ná maŋe ko ye Wɛ malese sem naa o Bu wom tete de. Ko nam ye a Kwo Baŋa Wɛ yerane mo yei. 37Nabiin-bu wom na wó ba to, ko dɛ dem wó pɔpɔ de ba nɔɔna baŋa nenɛɛne ko déem na ke Noah maŋa kam ne tei to mo. 38Kanto maŋa kam ne ye na-fɔrɔ daa ta wo wɛɛle ko lim tega kam to, nɔɔna wora yɔɔ yerane mo. Ba maa yɔɔre ba di ba wodiiru, ye ba daare ba di kaana, ye kaana de zoore banna, se ko vo ko yi dɛ dem Noah na zo nabwor-kamunu kom wone to. 39Ba ta maa wo lɔre woŋo kolo na lage ko ba ko ke to, ye na bam wɛɛlem dem laam pɔpɔ de ba de pɛ ba maama. Nabiin-bu wom de wó pɔpɔ o ba konto dwoŋi mo.#Pulim 6:5-8 40Kanto maŋa kam ne nɔɔna balei ná wo kara ne ba toŋa, Wɛ wó chaale ba dedoa o daare wodwoŋi wom. 41Kaana balei de ná wora ba choe muni nɔŋɔ ne, Wɛ wó chaale ba dedoa o daare wodwoŋi wom.

42Konto ŋwaane fɔge-na á che á tete, se á yeiri dɛ dem á Teiru wom na wó ba to.#1 Tɛsaloni 5:1-3 43Á nam maŋe á yei we, sɔŋɔ tu ya ná lɔre maŋa kalo ŋweeno na lage o ba tete ne to, o ya wó taa nii o sɔŋɔ kom se ŋweeno wom yé na chwoŋa o ba o ŋɔ. 44Konto ŋwaane abam jege se á che á tete mo, se Nabiin-bu wom lage o ba maŋa kam á na ba jege o teena to mo.#1 Tɛsaloni 5:2

45Abam jege se á ta‑á tɔge chega de á boboŋ-dɛɛra, nenɛɛne tontoŋeno wolo yuu tu na yage o totoŋa o pa‑o ye o daare o beeri to. O tu wom ma le‑o se o taa nii o dwonna tontoŋena bam baŋa ne se o daare o taa pa-ba ba ni-wodiu. 46Kotu sɔŋɔ tu wom ná jwoori o ba, de o ke kolo maama o na pɛ‑o se o ke to, wopwolo laam wó taa wo tontoŋeno wom konto tei ne. 47A tɛ abam chega ŋwaane to, o tu wom laam wó pa se o taa nii o jejegero maama baŋa ne mo.

48O nam ná ye tontoŋeno-balɔrɔ, wonto ya wó boŋe we omo tu wom wó dáane ye o jwoori. 49O maa wó taa jege o dwonna tontoŋena bam mo o maga, ye o daare o tɔge de sa-nyɔra o di ye o nyɔ sana de-ba. 50Sɔŋɔ tu wom laam wó jwoori o ba dɛ dem tontoŋeno wom na ba jege o teena de maŋa kalo o na wó ba o zo to. 51O tu wom nam ná tu o peere‑o konto, o laam wó zeili‑o o sɔŋɔ kom wone, ye o daare o pa se o tɔge de pipiri-nyena o na yaara dedɛ jei selo ne ba na wó taa keera ye ba done ba nwa to.

Currently Selected:

Matiyu 24: xsmKBG

Highlight

Copy