Matiyu 17

Yezu yibia na leiri tei to

Maake 9:2-13; Luka 9:28-36

1Da yaredo déem ma ba ya kɛ. Yezu laam ma ja Piita, ko woli de Jemsi, de o nyaane Jɔn pa ba tɔge daane ba vo ba di peo-kamunu yuu. Ba maa wora ba yerane mo. 2Ba na wora konto to, Yezu yibia ma leiri ba yiga ne. O yibia kam maa nye de wea na nyeene tei to mo.#Nwoŋim 34:29 O gwaaro tem de maa tiini te peere ye te nyeena. 3Ba laam ma na Moses de Elija na wo Yezu tei ne, ye ba ŋɔɔne ded‑o. 4Piita laam ma ta de Yezu o we, “Amo Teiru, dé na wo ywo-seeni to, ko tiini ko lana ko pa debam. Nmo nam ná sɛ, se n pa a pu vwoa yatɔ ywo, se nmo de Moses de Elija taa zoore da.”

5Piita na wora o ŋɔɔne konto to, kunkwoŋo kolo na nyeene to ma ba ko li-ba. Ba laam ma ni kwora na ŋɔɔne ko wone ka we, “Amo bu-doa mo tento ye a swoi‑o lanyerane. O kikia su amo yi. Á nam ta‑á cheigi o taane lanyerane.”#2 Piita 1:17-18

6Yezu tɔgena batɔ bam na nigi kwora kam to, ba ma vwi ba yibia tega ne, foone na tiini de zo-ba to ŋwaane. 7Yezu laam ma vo ba tei o dwei-ba, ye o we, “Zaŋe-na, se á yé pa foone taa jege abam.”

8Ba laam ma kwoni ba yum wɛɛne, ye ba daa wo nɛ nɔɔn-nɔɔno, ko ná dae Yezu yerane. 9Ba ma zaŋe peo kom yuu ne ba maa tua. Yezu laam ma kaane-ba o we, ba yé pa se nɔɔn-nɔɔno lɔre ba na nɛ kolo to, se ko taa nii maŋa kalo omo Nabiin-bu wom na wó bi toone wone to.

10O kwaga tɔgena bam laam ma ta ded‑o ba we, “Wɛ nia yam zamesem tiina bam yeini ba tɛ ba we, Elija mo jege se o lwoori o ba yiga, se Wɛ Dam Tu wom laam da kwaga. Ko ye chega mo naa vwa mo?” 11Yezu ma leiri-ba o we, “Ko ye chega mo. Elija jege se o ba o kwɛ woŋo maama se Wɛ Dam Tu wom laam ba.#Malaki 4:5-6 12Nam ta‑á yei-na we, Elija maŋe o ba ye nɔɔna wo wane ba lɔre‑o. Ba ma tiini ba bɛɛse‑o se ko yi ba boboŋa na lage tei to. Ko nam ná ye amo Nabiin-bu wom, ba daa ta wó bɛɛse amo de konto dwoŋi mo.”

13O kwaga tɔgena bam laam ma lɔre we ko ye Jɔn wolo na ye sɛɛm tu to taane mo o ŋɔɔna.

Yezu yɔɔre bu wodwoŋi

Maake 9:14-32; Luka 9:37-45

14Yezu de o kwaga tɔgena batɔ bam laam ma jwoori ba vo ba yi nɔn-kɔgɔ kom tei. Nɔɔno wodwoŋi ma vo o kuni dwoona Yezu yiga ne o ta ded‑o o we, 15“Amo tu, duri amo bu yiniga. O sae kɔɔro mo ye ko tiini ko chana o yera ne. O maa yeini o toe mini wone de na wone. 16Amo nam jaane‑o a ba nmo kwaga tɔgena bam tei mo se ba yɔɔre‑o, ye ba wo wane.”

17Yezu na nigi konto to, o ma ta o we, “Abam zem nɔɔna bam bere á ba jege wo-dedoa de amo, ye á ba sɛ se á taa tɔge chwoŋa. Ko fe se a tiini a dáane abam tei ne se a vo a maŋe yei ne mo? A nam wó ke tɛ mo a zuri a bochare de abam? Ja-na bu wom á ba.” 18Yezu laam ma bage setaane delo na daane bu wom to pa se de yage‑o. O ma yɔɔre o na yazura maŋa kam konto ne nɔɔ.

19Nɔn-kɔgɔ kom déem na viiri maama to, Yezu kwaga tɔgena bam laam ma vo o tei ba bwei‑o ba we, “Bɛ mo ye debam ware setaane dem dé zeili?” 20O ma leiri-ba o we, “Ko ye abam boboŋa na muri to ŋwaane mo. A tɛ abam chega ŋwaane to, nɔɔno ná jege wo-dedoa de Wɛ, ye ko ná maŋe ko ye fenfee yerane se ko maŋe de tio-bu-memeeno tei de, wonto wó wane o ma-ko o toŋe totoŋ-kamunnu. Wonto wó wane o ta de peo-kamunu konto se ko zaŋe ko vo ko jeini jei-gɛ, ye ko wó seene ko ke. Kolokolo tera ko na wó cheiŋi wo-dedoa tu. [ 21Setaane dento dwoŋi zeilim dana. Ko ná dae we á seene á yia á lwoori Wɛ ye á vɔ ni, ko ya bá wane.]”

22Yezu kwaga tɔgena bam déem ma ba ba jeeri daane Galili ne. Yezu ma ta de-ba o we, “Leile konto ba lage ba ja Nabiin-bu wom ba ke nɔɔna jeŋa ne, 23ye ba laam wó go‑o. Da yatɔ dɛ ne o nam wó jwoori o bi toone wone.” O taane dem konto ma tiini de chɔge ba wo.

Wɛ diga kam lampwoo taane

24Ba déem ma vo ba yi Kaparenia. Juu tiina balo na yeini ba jwoŋi lampwoo Wɛ diga kam ŋwaane to ma vo Piita tei ye ba bwei‑o ba we, “Abam berem tu Yezu yeini o ŋwe lampwoo na?”#Nwoŋim 30:13 25Piita ma leiri o we, “O ŋwea.”

O laam ma jwoori o vo o zo sɔŋɔ kolo ba na wora to. Yezu ma wuuri o bwei‑o o we, “Simon, nmo boboŋa jaane tɛ mo? Logo baŋa pwa bam na yeini ba jwoŋi lampwoo tei to, ba yeini ba jwoŋi-ko nɔɔna bera tei ne mo? Ba yeini ba jwoŋi-ko ba tete sɔŋɔ tiina tei ne mo naa balo na ye veira to tei ne mo?” 26Piita ma leiri‑o o we, “Ko ye veira bam tei ne mo.” Yezu laam ma ta o we, “Tɔ. Ko bere we, dé na ye Wɛ sɔŋɔ tiina to, dé nam ba jege se dé ŋwe. 27Dé nam ba lage se dé pa lampwoo lara bam boboŋa chɔge. Konto ŋwaane nam zaŋe n vo buga kam ni se n de gwola n ma n ja ywoni. Nmo na bobo se n ja ywoni delo to, se n kaŋe de ni se n na sabu-dale da. Sabu-dale dem konto wó yi Wɛ diga kam lampwoo kom kuni belei ŋweem. N ná le-de, se n ja n ba n ma n ŋwe n pa amo de n tete.”

Currently Selected:

Matiyu 17: xsmKBG

Highlight

Copy