Matiyu 16

Farisi tiina de Saduka tiina taane

Maake 8:11-21; Luka 12:54-56

1Farisi tiina badaara de Saduka tiina déem ma zaŋe ba vo Yezu tei. Ba maa lage se ba maŋe‑o mo ba nii, ye ba ta ded‑o we, o ke wo-kenkagele delo na wó bere-ba we o dam dem nwoŋi Wɛ tei ne to.#Jɔn 8:6 2Yezu ma leiri-ba o we, “Abam yeini á wae á nii wɛyuu ne á lɔre tega kam yibia na wó taa ye tei to. Ko ná ye dedaan-ni ne, ye wɛyuu kom ná ke nasoŋo, á yeini á ta we, tega wó poore lanyerane. 3Ko nam ná ye zezeŋa ne, ye wɛyuu kom ná ye liira liira, á yeini á we, doa mo lage ka ne. Bɛ nam mo ye á ware á lɔre we wonnu telo na wora te ke leile to bere Wɛ na lage o ke wo-kamunnu telo to? 4Zem nɔɔna bam ye puseŋ-nyena mo ye ba yiga tera de Wɛ. Mo kokuri ba lage se a ke wo-kenkagele a bere-ba. Ba maa bá na, ko ná dae wo-kenkagele delo na maŋe de ke Jonah tei ne to yerane.”#Jonah 1:17

O na tage de-ba konto to, o laam ma yage ba tei ye o kɛ.

5Yezu kwaga tɔgena bam déem na vei ba bɛ buga kam bubɛ dedwoŋi dem to, ba ya swei se ba ja bworobworo ba woli da. 6Yezu ma ta de-ba o we, “Á fɔge á che á tete se á yé pa Farisi tiina bam de Saduka tiina bam de abam sabɔle.” 7O na tage de-ba konto to, ba ma bane daane ba we, “Ko ye bworobworo taane mo o tɛa, ye debam wo jaane kodwoŋi dé ba.” 8Yezu ma maane ba na tɛ kolo to, ye o we, “Bɛ mo ye á pa lwia jege abam de á na ba jege bworobworo to? Abam boboŋa muri de Wɛ. 9Abam ta wo lɔre Wɛ na jege dam tei to na? Á nam swei we amo kwei bworobwooru tenu mo a fɔ fɔ a pa nɔɔna morro tenu ye ba di na? Á nam ware á guli kayɛ segera á na twɛ wodiu kolo na daare á ke da to na? 10Ko woli da, amo na kwei bworobwooru terepɛ tem a pa nɔɔna morro tena ye ba di to, kayɛ segera mo á ta twɛ á su? 11Ko nam dae bworobworo taane mo a ya tɛa. Á laam wo lɔre konto na? Á nam fɔge á che á tete se á yé pa Farisi tiina bam de Saduka tiina bam de abam sabɔle.”

12O kwaga tɔgena bam laam ma lɔre we, ko ya dae sabɔle delo ba na ke bworobworo ne to taane mo o ŋɔɔne de-ba. Ko nam ye se ba yé pa Farisi tiina de Saduka tiina berem dem mo chɔge-ba.

Piita na tage Yezu chega kam tei to

Maake 8:27-30; Luka 9:18-21

13Yezu déem ma vo o yi Kazaria Filipi nawuura yam. O na yi da to, o ma bwei o kwaga tɔgena bam o we, “Nɔɔna yeini ba tɛ amo Nabiin-bu wom taane ba we amo ye wɔ mo?” 14Ba ma leiri‑o ba we, “Badaara tɛ ba we, nmo ye Jɔn wolo na ye sɛɛm tu to mo. Badaara de maa tɛ ba we nmo ye Elija mo, ye badaara de tɛ ba we nmo ye Jeremia naa faŋa faŋa Wɛ sampwora kadwoŋi mo.” 15O laam ma bwei-ba o we, “Ko nam ná ye abam, á boŋe se amo ye wɔ mo?” 16Simon Piita ma leiri‑o we, “Nmo ye Ŋwea Tu Baŋa Wɛ Bu Krista wolo o na toŋe to mo.”#Jɔn 11:27 17Yezu ma leiri‑o we, “Jonah bu Simon, nmo na lɔre konto to, nmo ye yu-ywoŋo tu. Ko nam dae nabiina yiyiu mo pɛ n lɔre chega kam konto, se ko ye a Kwo Wɛ mo pɛ n lɔre-ka. 18Amo nam wó ta a bere‑m nmo na ye tei to. Nmo yere mo Piita, ko kuri mo ye pelɔrɔ. Ko maa bere we amo wó bobo a kɔgɔ kom kuri pelɔrɔ kom konto baŋa ne mo. Toone de de dam maama maa bá wane-ko de chɔge. 19Amo nam wó kwei Wɛ telaao paare dem bwor-bia a ke nmo jeŋa ne, se n wane n ma n pore chwoŋa n pa nɔɔna taa tɔge da ba zoore Wɛ woro kom wo. Chwoŋa kalo maama nmo na chege se nɔɔna yé da da to, Wɛ wó zege nmo kwaga ne de konto. Nmo nam ná yage chwoŋa kalo maama, Wɛ daa ta wó zege nmo kwaga ne de konto.”

20Yezu laam ma kaane o kwaga tɔgena bam se ba yé pa nɔɔn-nɔɔno lɔre we o seene o ye Wɛ Dam Tu Krista wom.

Yezu bere o toone na wó taa ye tei to

Maake 8:31–9:1; Luka 9:22-27

21Ko zege kanto maŋa kam ne Yezu ma ŋɔɔne jaja o bere o kwaga tɔgena bam we o jege se o vo Jerusalem o na yaara dedɛ Juu tiina nakwa bam tei ne, de ba kaanem yiga tiina bam, de ba zamesem tiina bam de tei ne. Ba maa jege se ba go‑o se o laam jwoori o bi toone wone da yatɔ dɛ ne.#Luka 24:7 22Yezu na tage konto dwoŋi to, Piita ma ja‑o o vo dáa, ye o bwɛ‑o o we, “Amo Teiru, Wɛ bá sɛ se konto ke nmo.” 23Yezu ma guni o nii Piita, ye o ta ded‑o o we, “Setaana pɛ, vei dáa a tei ne! Nmo lage n pa a tusi mo. Nmo boboŋa yam ye nabiina nyem mo ye ya ba tɔge Wɛ na lage tei to.”

24Yezu laam ma ta de o kwaga tɔgena bam o we, “Nɔɔno wolo maama ná lage se o taa tɔge amo kwaga, konto tu jege se o ve o tete boboŋa ye o sɛ yaara ne wolo na zeŋe dagara o maa vei o toone jei tei to, se o laam taa tɔge-ne. 25Wolo maama nam ná lage se o jwoŋi o tete ŋwea, konto tu wó ga-ka mo. Ko daare wolo maama ná sɛ se o ga o ŋwea amo ŋwaane, konto tu wó na ŋwea Wɛ tei ne. 26Nɔɔno nam ná kwaane o jwoŋi logo baŋa wonnu tem maama, ye o laam ná gɛ ŋwea Wɛ tei ne, bɛ nyɔɔre mo o nɛa? Kolokolo nam tera nɔɔno na wó wane o kwei o ma jwoŋi o ŋwea Wɛ tei ne. 27Amo Nabiin-bu wom nam jege se a ba de nenɔŋ-fɔrɔ, ne a Kwo Wɛ na jege tei, ye o malese sem de wó tɔge-ne. Kanto maŋa kam ne, amo laam wó pa se nɔɔno maama jwoŋi nyɔɔre delo na maŋe de o kikia to.#Matiyu 25:31 28Chega ŋwaane to, nɔɔna balo zem na wo ywo-seeni to badaara bá te ye ba ta wo nɛ amo Nabiin-bu wom na maa beene de a paare dem to.”

Currently Selected:

Matiyu 16: xsmKBG

Highlight

Copy