Matiyu 18

Wɛ paare dem nɔn-kamunu na ye tei to

Maake 9:33-37, 42-48; Luka 9:46-48; 17:1-2

1Konto maŋa kam ne Yezu kwaga tɔgena bam ma vo o tei, ye ba bwei‑o ba we, “Wɛ telaao paare dem seeni wɔ mo wó taa ye nɔn-kamunu o dwoi maama?”

2Yezu laam ma bwoŋi bu-balaŋa pa se o ba o zege ba maama tetare ne. 3O ma ta o we, “Chega ŋwaane to, abam ná wo leiri á boboŋa se ko pa á ji ne bu-balwa tei to, á bá na chwoŋa se á zo Wɛ telaao paare dem wo.#Maake 10:15 4Wolo na dwoi maama Wɛ telaao paare dem wone to mo ye wolo na gwooni o tete ye o ji nenɛɛne bu-balaŋa kanto to. 5Ko woli da, wolo maama na wó zuli bu wonto dwoŋi lanyerane amo yere ŋwaane to, konto tu zuli amo mo.

6Ko ná ye balo na ke ba wo-dedoa de amo, ye ba ná maŋe ba muri ne bu-balwa tei, nɔɔno wolo ná pɛ ba dedoa tusi Wɛ chwoŋa wone, konto tu tiini o chɔge mo dedɛ. Ba ná jaane nɔɔno wom konto ye ba lei kandwɛ-kamunu o ba ne ba daare ba de‑o naneo wone se o te, konto gare waarem delo kotu na jege se o na Wɛ tei ne to. 7Ko ye lɛɛro mo ko pae nabiina de wonnu telo na wo logo baŋa ne ye te pae nɔɔna tusi Wɛ chwoŋa wone to. Wonnu tem konto dwoŋi jege se te taa wora se te soge nɔɔna. Wolo maama nam ná tɔge te baŋa o soge nɔɔna pa ba tusi, lɛɛro wó tiini te yi konto tu dedɛ.

8Nɔɔno jeŋa naa o naga ná pɛ se o tusi, ko maŋe se o gwoni-ka mo o yage. Nɔɔno ná gɛ o jeŋa naa o naga, ye o daare o na ŋwea Wɛ tei ne, konto gare o ná jege o yera yam maama ye ba laam de‑o ba yage mini delo na bá fɔge de dwei to wone. 9Nɔɔno yi nam ná pɛ se o tusi, ko maŋe se o le-de o dole o yage. Nɔɔno ná jege yi dedwe ye o na Wɛ ŋwea kam, ko gare o ná jege yia yalei ye ba laam de‑o ba yage te-seŋa mini dem wone.

Pi-jia kam memaŋe

Luka 15:3-7

10Ta‑á yei-na se á yé gwooni wolo maama na muri amo nɔɔna bam wone to. Nam lɔre we, Wɛ malese selo na nii banto baŋa ne to zege amo Kwo Wɛ tei ne telaao ne maŋa maama. [ 11Nabiin-bu wom na tu logo baŋa to, ko ye se o jwoŋi balo na jei to mo o ke Wɛ jeŋa ne.]

12Nɔɔno ná jege pei bi (100), ye se dedoa ná jei, abam boŋe we o wó ke tɛ mo? O jege se o yage pei funogo-nogo sem (99) mo se kaporo kom ne, se o daare o vo o beeri pi-jia kam. 13Chega ŋwaane to, o nam ná beeri o na-ka, o laam wó na wopwolo dedɛ kanto ŋwaane se ko dwoni pei selo na daare ye se wo jei to. 14Ko nam ye bedwe mo de abam Kwo Wɛ na bá yage amo nɔɔna balo na muri to dedoa se o jei.

Nɔɔno de o dwoŋi jege se ba fɔge daane

15Nmo nu-bu ná ke lwarem o chɔge nmo wo, se n vo n kaane‑o de o na ke kolo to, se ko taa ye abam yerane taane ye nɔɔn-nɔɔno tɔge o tera. O nam ná sɛ nmo na tage kolo to, ko bere we n jwoori n de‑o Wɛ chwoŋa wone.#Luka 17:3 16O nam ná wo sɛ se o cheigi nmo taane dem, se n lage nɔɔno dedoa naa nɔɔna balei se á tɔge daane á vo o tei, se ba bwei‑o ba nii. Konto dwoŋi mo wó tɔge Wɛ tɔn-dwoŋo kom na bere tei to we, ‘Nɔɔno ná jege taane de o dwoŋi, ko maŋe se nɔɔna balei naa batɔ mo zege o taane dem kwaga ne.’#Nia Gulim 19:15 17Nɔɔno wom nam ta ná wo sɛ se o cheigi banto de, se n laam vo n wɛ-diga kɔgɔ kom yiga ne n tole taane dem n bere-ba. O nam daa ta ná wo sɛ se o cheigi á wɛ-diga kɔgɔ kom taane dem, se á laam ta‑á ke‑o nenɛɛne o ye nɔn-yɔɔ wolo na maŋe o yeiri Wɛ to.

18A tɛ abam chega ŋwaane to, chwoŋa kalo maama abam na chege se nɔɔna yé da da to, Wɛ wó zege abam kwaga ne de konto. Abam nam ná yage chwoŋa kalo maama, Wɛ daa ta wó zege abam kwaga ne de konto. 19Ko woli da, abam nɔɔna balei ná ke ni daane logo baŋa ne se á lwoori woŋo kolo maama amo Kwo Wɛ tei ne, wonto wó ke o pa abam. 20Kokuri ŋwaane, nɔɔna balei naa batɔ ná jeini daane amo yere ŋwaane, amo wó taa wora ba tei ne.”

Ka-yage-ka-chɛ memaŋe

21Piita laam ma vo Yezu tei, ye o bwei‑o o we, “Amo Teiru, amo nu-bu ná yɔɔre o ke lwarem o chɔge amo wo, ko wó taa ye kuni begera mo o daa ta wó ke ye a jege se a yage a ma chɛ‑o? Ko maŋe se ko yi kuni berepɛ mo na?” 22Yezu ma leiri‑o o we, “Aawo, ko dae kuni berepɛ yerane, se ko nam jege se ko taa ye fuserepɛ kuni berepɛ mo. 23Kokuri Wɛ paare dem na ye tei to, de nye de pɛ wodwoŋi na lage se o jeeli o sabu o nii o tontoŋena bam tei ne. 24O na bobo se o jeeli konto to, ba laam ma ja o tontoŋeno wodwoŋi wolo na jege o jene dedɛ se ko maŋe de sabu ywollu morro morro to ba ba o tei. 25Nɔɔno wom konto maa ware o ŋwe o jene dem. Pɛ wom laam ma pa ni se ba ja nɔɔno wom, de o kaane, de o bia maama ba yeigi, ko woli de o wonnu maama, se ba ma sabu kom konto ba ŋwe jene dem. 26Tontoŋeno wom na nigi konto to, o ma vo o kuni dwoona pɛ wom yiga ne, ye o lwoori‑o o we, ‘Amo tu, popo ja n bane de amo, se nmo ná pɛ-ne chwoŋa, amo laam wó ŋwe a jene dem maama a pa‑m.’ 27Pɛ wom ma duri o ŋwaŋa pa se o yage jene dem o ma chɛ‑o, ye o daa wo ke‑o kolokolo.

28Nɔɔno wom konto laam ma nwoŋi o vo o jeeri tontoŋeno wodwoŋi wolo na jege o jene fenfee nenɛɛne sabu ywolo dedoa to. O ma sɔ nɔɔno wom ba, ye o fe‑o se o ŋwe o jene dem. 29Nɔɔno wom ma kuni dwoona o dwoŋi tontoŋeno wom yiga ne ye o lwoori‑o o we, ‘Popo ja n bane de amo, se nmo ná pɛ-ne chwoŋa, amo laam wó ŋwe a jene dem a pa‑m.’ 30O maa wo sɛ, ye o ja nɔɔno wom o vo o ke peena diga ne se ko vo ko yi maŋa kam o na wó ŋwe jene dem to.

31Pɛ wom tontoŋena badwonna na nɛ konto to, ko ma pa ba wo tiini ko chɔge. Ba ma vo ba ta ba bere pɛ wom kolo maama na ke to. 32Pɛ wom laam ma bwoŋi o tontoŋeno wom konto se o ba o tei. O ma ta ded‑o o we, ‘Nmo ye puseŋ-nyeno mo. Amo yage nmo jen-fɔrɔ kom maama mo a ma chɛ‑m, nmo na lwoori-ne to ŋwaane. 33Ko ya maŋe se nmo de duri n dwoŋi wom ŋwaŋa, nenɛɛne amo na duri nmo ŋwaŋa tei to.’ 34Pɛ wom bane ma tiini de zaŋe dedɛ de o tontoŋeno wom. O ma ke‑o o nɔn-kachɛ jeŋa ne se ba taa pa‑o waarem se ko taa vei maŋa kalo o na wó ŋwe o jene dem maama to.

35Tɔ. Abam wolo maama ná wo yage o ma chɛ o nu-bu de o bochare maama, amo Kwo Wɛ de wó waare abam konto dwoŋi mo.”

Currently Selected:

Matiyu 18: xsmKBG

Highlight

Copy