Matiyu 19

Kaane yagem

Maake 10:1-12; Luka 16:18

1Yezu déem na bere-ba wonnu tem konto maama o ti to, o laam ma zaŋe Galili ne o vo o yi Judea laŋa kalo na wo Jɔdan buga kam bubɛ dedwoŋi dem ne to. 2Nɔn-kɔgɔ ma tɔge‑o ko vo, ye o yɔɔre-ba jei sem konto ne.

3 Farisi tiina badaara déem ma zaŋe ba vo Yezu tei. Ba maa lage se ba maŋe o boboŋa ba nii, ye ba bwei‑o ba we, “Nɔɔno jege chwoŋa se o yage o kaane, ko ná maŋe ko ye kolo maama ŋwaane na?” 4Yezu ma leiri-ba o we, “Ko popone Wɛ tɔnɔ kom ne we, boboa ne Wɛ na ke nabiina to, o ke-ba se ba taa ye baara de kaana mo. Abam nam maŋe á wo gage konto na? 5Wɛ na ke-ba se ba taa ye konto dwoŋi to, nɔɔno ná di kaane, o jege se o pwɛ o tete o kwo de o nu tei ne, se o daare o ba o pa se o de o kaane wom tane daane. Konto wó pa ba laam ji nɔɔno dedoa. 6Ba daa maa dae nɔɔna balei, se ba ye ŋo dedoa mo. Wɛ na pɛ se ba kwaare daane to, nɔɔn-nɔɔno daa ba jege se o pɔɔre-ba daane.”#Pulim 2:24 7Farisi tiina bam daa ma bwei‑o ba we, “Bɛ nam mo ye Moses déem pa ni we nɔɔno jege chwoŋa se o popone tɔnɔ o pa o kaane se ko bere we o yage‑o?”#Nia Gulim 24:1-4 8Yezu ma leiri-ba o we, “Moses na yage chwoŋa se abam ta‑á ke á kaana konto to, ko ye á boboŋa na lira de o berem dem to ŋwaane mo. Ko zege boboa ne ko ya wo maŋe se nɔɔna yage ba kaana. 9Amo nam tɛ abam we, nɔɔno kaane ná wo chɔge de baara lagem, ye o ná yage‑o ye o daare o di kaane wodwoŋi, konto tu keim dem de kabwoŋa ye bedwe mo.”

10Yezu na tage konto to, o kwaga tɔgena bam ma ta ded‑o ba we, “Ko ná seene ko ye konto mo baaro de o kaane laŋa ne, nɔɔno nam ná maŋe o wo di kaane, ko ya gara.” 11O ma leiri-ba o we, “Ko nam dae nɔɔna maama mo wó wane berem dento ba jwoŋi ba ke ba yuu ne, se ko ye Wɛ na zeini balo yerane se ba jwoŋi-de to mo. 12Nɔɔna badaara wora ba na ba boŋe se ba di kaana, kokuri ba maŋe ba lo banto bakane mo. Badaara de maa wora ba na ba boŋe se ba di kaana, ye ko ye nɔɔna mo jaane-ba ba lwe. Ko daare badaara wora ba tete na ve se ba di kaana, ye ko ye ba na seene ba yia Wɛ telaao paare dem ŋwaane to mo. Nɔɔno wolo ná wane berem dento o jwoŋi, se o taa tɔge-de.”

Bu-balwa maŋe de Wɛ paare dem

Maake 10:13-16; Luka 18:15-17

13Nɔɔna badwonna déem ma ja bu-balwa ba vo Yezu tei se o zi o jea ba yum ne ye o ware Wɛ o pa-ba. O kwaga tɔgena bam ma zaŋe ba bwɛ-ba se ba yé taa ke konto. 14Yezu laam ma ta o we, “Yage-na se bia bam taa tui a tei, se á yé zaŋe á che-ba. Kokuri Wɛ telaao paare dem ye banto dwi nyem mo.” 15O na tage konto to, o laam ma zi o jea ba yuu ne, ye o daare o viiri.

Naduna wó wane ba na ŋwea Wɛ tei ne na?

Maake 10:17-31; Luka 18:18-30

16Dɛ dedwe nɔn-doŋo kodwoŋi déem ma zaŋe o vo Yezu tei. O ma bwei‑o o we, “Berem tu, keim-laao kɔ mo a jege se a ke se ko pa a na ŋwea kalo na ba jege kweelim Wɛ tei ne to?” 17Yezu ma leiri‑o o we, “Ko ke tɛ mo ye n bwei amo se n lɔre woŋo kolo na lana se n ke to? Wɛ yerane mo ye lam tu. Nmo ná lage se n na ŋwea o tei ne, ko maŋe se n ta‑n tɔge o nia yam mo.” 18Nɔɔno wom ma bwei‑o o we, “O nia yɔ mo konto?” Yezu ma leiri‑o o we, “Yé go nɔɔn-nɔɔno. Yé zaŋe n ke kabwoŋa. Yé zaŋe n ŋɔ. Yé fɔ vwa n pa n dwoŋi. 19Ta‑n zuli n kwo de n nu. Ta‑n swoi n dwoŋi se ko maŋe de n na swoi n tete tei to.”#Nwoŋim 20:12-16; Chullu 19:18

20Nɔn-doŋo kom laam ma ta o we, “Amo maŋe a tɔge nia yanto maama. Ko nam ta gɛ bɛ mo se a ke?” 21Yezu ma ta ded‑o o we, “Nmo ná lage se n ta‑n tɔge chwoŋa fase, se n kwei kolo maama n na jege to n yeigi, se n laam kwei sabu kom n ma n woli yiniga tiina. Konto wó pa se n wo-laaro tiini te puli Wɛ telaao ne. Nmo ná ke konto, se n laam ba n ta‑n tɔge amo.”

22Nɔn-doŋo kom na nigi konto to, ko ma pa o yiga nyɔne dedɛ, o jejegero tem na tiini te daga to ŋwaane. O ma viiri Yezu tei ne.

23Yezu laam ma ta de o kwaga tɔgena bam o we, “A tɛ abam chega ŋwaane to, nadum ná lage se o zo Wɛ telaao paare dem wone, ko wó taa tiini ko chana ko pa‑o. 24Á ta‑á yei we, nadum ná lage se o zo Wɛ woro kom wone, ko wó taa chana ko dwoi kone ná lage se de da gare-lwei bɔɔne de nwoŋi.” 25O kwaga tɔgena bam na nigi konto to, ko ma tiini ko so-ba. Ba maa tɛ ba we, “Ko ná ye konto, nɔɔn-nɔɔno bá wane o na ŋwea Wɛ tei ne.” 26Yezu ma nii-ba ye o we, “Nabiina tei ne mo ko bá wane ko ke. Ko daare Wɛ wae ŋo maama o ke.”#Pulim 18:14

27Piita laam ma zaŋe o ta o we, “Nii. Debam yage dé woŋo maama mo ye dé daare dé tɔge nmo. Dé nam wó na bɛ nyɔɔre mo Wɛ tei ne?” 28Yezu ma ta de ba maama o we, “Chega ŋwaane to, abam balo na ye a tɔgena to wó ba á tɔge á di paare maŋa kalo Wɛ na wó fɔge o kwɛ wonnu maama to. Maŋa kam konto ná yia, amo Nabiin-bu wom wó ba a jeini a paare yituŋu kom baŋa ne de dam-fɔrɔ, ye abam de wó jeini paare yitunnu fuga-telei baŋa ne, se á ta‑á tei Isarele dwia fuga-yalei yam. 29Nɔɔno wolo maama ná tɔge amo ŋwaane, ye o yage o sɔŋɔ, de o nu-bia, de o kwo, de o nu, de o bia, ko woli de o kare de, konto tu wó jwoŋi kolo maama o na yage to se ko maŋe de kuni bi mo Wɛ tei ne, ye o daare o na ŋwea kalo na ba jege kweelim to. 30Ko daare balo na maŋe ba ye yiga tiina to dedɛ wó jwoori ba ji kwaga tiina. Ko woli da, balo de na maŋe ba ye kwaga tiina to dedɛ wó ba ba ji yiga tiina.”

Currently Selected:

Matiyu 19: xsmKBG

Highlight

Copy