Hosea 9
9
Isarele tiina bam wó na waarem
1Isarele tiina bam, á yé ta‑á chake de wopwolo,
ne dwi-gɛ tiina bam na di ba kura yam tei to.
Kokuri to, á lɔge á Tu Wɛ wom kwaga ne,
ye á ta tɔge wa-yɔɔro.
Á swoi se á ta‑á jwoŋa kabworim kikia sabu
mena ferem jei sem maama ne.
2Abam nam na wó fere mena yalo to bá yi á dim.
Á ta na wó ŋoke Vini tio-bia se á na sana balo to bá yi abam.
3Isarele tiina bam bá na chwoŋa
se ba maŋe Baŋa Wɛ tega kam wone.
Efrayim tiina bam wó jwoori ba zo kabɛɛne wone mo,
ne ko déem na ke-ba Ejipti ne tei to.
Ba badwonna wó vo Asiria teo kom
ye ba di wodiu kolo ya na chuli se ba di to.
4Dáane ba bá taa kwei sana ba ke pɛɛra
ba ma ba zuli Baŋa Wɛ.
Kaanem delo maama ba na wó ke ba pa‑o to bá su o yi.
Ba pɛɛra yam konto wó taa nye de
wodiu kolo ba na di lua sɔŋɔ ne to.
Wolo maama ná di-ko,
kotu wó digiri o tete chullu tem seeni.
Wodiu kom konto nam wó su banto kana yerane mo.
Ko bá lɛɛne ko vo Baŋa Wɛ wara-jei sem wo.
5Dɛ dem ná tu de yi se á di kuri á zuli Baŋa Wɛ
ne á ya na yeini á ke tei to,
á laam wó ke tetɛ mo?
6Nii-na! Ba ná maŋe ba duri ba jage da yiga ne
se ba lu cham wone,
Ejipti tiina bam ta wó ja-ba.
Ba ta wó suli-ba Memfisi teo wone.
Man-chaŋa wó nwoŋi ka li ba lu-nyenno jejegero tem,
ye sabare de li ba di sem.
7Isarele tiina bam waarem maŋa kam yi ka ti.
Ba laam wó jwoŋi kolo na maŋe de ba lwarem kikia yam to.
Ba taa yei ko ni ne!
Ba boŋe we Wɛ sampwora kam yirisi mo.
Ba ta maa nii nɔn-popore nyem pa o ye chichwoo.
Ba yeini ba yaale Wɛ tontoŋena konto dwoŋi,
ba lwarem kikia na daga
ye ba nankɔɔre de gaale to ŋwaane.
8Sampwora kam nam ye Wɛ tontoŋeno mo.
O tu se o yere Efrayim tiina bam.
O nam ná vei mɛ maama,
ba yeini ba cho o chwoŋa.
O ná maŋe o wo Wɛ diga kam ne,
ba yeini ba chuli‑o mo.
9Ba tiini ba chɔge ba tete de totoŋ-zɔɔna,
ne ba déem na ke tei Gibea ne to.#Yiga tiina 19:22-25
Wɛ nam wó guli ba lwarem kikia yam,
ye o daare o waare-ba ya ŋwaane.
Baŋa Wɛ maa we:
10“Amo déem na bobo a na Isarele tiina bam to,
ba nye de Vini tio-bia mo na puli ba nwoŋi kagoa wone to.
A na nɛ á nabaara bam to,
ko nye de a nɛ mɔ-lelea na bega kaporo yuu ne to mo.
Ba nam na tu ba yi Baal-Peora jei sem to,
ba ma kwei ba tete ba pa wo-zɔɔne dem konto.
Ba tete laam jigi wo-zɔɔna
se ko maŋe de jwoni delo ba na zuli to.#Jeelim 25:1-5
11Efrayim tiina bam nenɔŋa lage ka jei mo,
ne zuŋa na jaane ka di wɛyuu tei to.
Bu-lore de pu-jara daa bá taa wora ba wone.
12Ba ná maŋe ba lo bia ye ba kɔne-ba,
amo wó pa se ba maama te,
pa se ba wolowolo daa yé daare.
Lɛɛro wó ba ba baŋa,
amo kwaga na wó ya-ba to ŋwaane.
13A nɛ Isarele teo kom na zege te-ywoŋa jei ne tei,
ne Tura teo kom na ye tei to.
Efrayim tiina bam nam jege se ba ja ba bia ba nwoŋi
se nɔɔna mo go-ba.”
14Amo Tu Baŋa Wɛ,
a nam wó lwoori‑m
se n ke-ba tetɛ mo?
Kɔ ba lora kam,
se n daare n pa ba yele na de ko.
Baŋa Wɛ maa we:
15“Giligal ne mo ba maŋe ba bobo ba lwarem kikia yanto.
Mo kokuri a laam chuli-ba.
Amo lage a zeili-ba se ba nwoŋi a tega kam baŋa ne,
ba lwarem totoŋa yam ŋwaane.
A daa bá taa jege ba swono.
Ba nakwa bam maama baare amo kwaga.
16Efrayim tiina bam weele mo.
Ba nye de tei-koro mo na koge ko zege ŋɔɔ
ye ko ba leiri bia to.
Ba nam ná maŋe ba lo,
a wó go ba bu-swonnu tem konto.”
17Amo Wɛ wom wó ve-ba,
de ba na wo sɛ o bera yam to ŋwaane.
Mo kokuri, ba wó taa kare ba beera
dwi-gɛ tiina bam wone.
Currently Selected:
Hosea 9: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
