Hosea 10
10
1Isarele tiina bam déem nye de Vini tio
kolo kom na leigi tio-bia zɔrɔtɔtɔ to mo.
Ba nam na tiini ba puli dedɛ tei to,
ba kaanem bimbina yam de ye konto mo.
Ba tega kam maa na fɔge ka ke wodiiru lanyerane tei to,
ba kandwa yam ba na chwi ba jege ba zuli to mo
ba fɔge-ya se ya de taa tiini ya lamma.
2Ba ba jege wo-dedoa de Wɛ.
Mo kokuri ba jege se ba ŋwe ba wɛleera yam jene.
Baŋa Wɛ tete wó bwori ba kaanem bimbina yam,
ye o daare o yigi ba jwona kandwa yam o de tega ne.
3Ba nam wó taa ŋɔɔne ba we,
“Dé ba jege pɛ,
Baŋa Wɛ kɔrɔ na tera debam wone to ŋwaane.
Dé nam ya ná jege pɛ,
wonto wó wane o ke bɛ mo o pa debam?”
4Ba ni taane dem konto ye kafɛ mo.
Ba maa tɔge vwa baŋa ne ba gwoni ni
ye ba ta daare ba yiri-de.
Konto ŋwaane, nɔɔna tiini ba jege da-taane,
ne man-chaŋa na li tega tei to.
5Nɔɔna balo na zoore Samaria teo wone to yera sae mo
ye ba wo chɔge de na-mɔra jwoni dem
ba ya na zuli Bɛte-Aven ne to.
Banto de balo na ke kaanem ba pa-de to wó keeri de ŋwaane,
de na wó jei ba tei ne,
dedaane de nenɔŋa kam maama to.
6Nɔɔna wó zeŋe-de ba ja vo Asiria teo kom
se de ji jejegero de pa pa-faro wom.
Isarele dwi tiina bam wó di ba chaveera
de ba na zuli jwoni delo na ye da-kora to.
7Chega to, ba wó kale Samaria tiina bam de ba pɛ wom
ba ja vo jeiga yiga yiga,
ne na-dura na zeŋe da-kwolo ba ja viiri tei to.
8Jei selo Isarele tiina bam na toŋe puseŋa kikia
ye ba zuli jwona zwonnu yuu ne mɛ to
wó ba se chɔge.
Sabare de ga-cheiŋo wó nwoŋi te li bimbina yam maama.
Ba laam wó lwoori peero tem de zwonnu tem we,
te to ba baŋa ne te kwoli-ba.#Luka 23:30; Gurim 6:12
Baŋa Wɛ wó waare Isarele tiina bam
Baŋa Wɛ maa we:
9“Isarele tiina bam, ko zege maŋa kalo á na ke lwarem Gibea ne to se ko ba ko yi zem,
á yɔɔre á toŋe wɛleera mo maŋa maama.
Ko dae keim dem konto ŋwaane mo
jara déem yi puseŋ-nyena bam Gibea ne na?
10Amo boboŋa yam ná jaane ya ti,
a wó waare nɔn-lwanno tento mo.
Teene dedwonna wó ke ni daane
ba ba ba kwaare jara de-ba.
Ba maa wó vɔ-ba de chegero,
ba na tiini ba tusi ba daŋe da-baŋa ne to ŋwaane.
11Efrayim tiina bam déem nye de na-chwɛ
delo na wae de nɔne mena to mo.
Amo tete laam nam wó daŋe yɔgesa de ba ne,
se a pa de vaŋe naan-vɔrɔ.
Judah dwi tiina bam de jege se ba va!
Jakob dwi tiina bam de wó chɛ tega se ko zo ba yera.
12Nam kwaane-na á chɛ tega,
ye á daare á du chega á pa á tete,
se á wó na swolim á kikia baŋa ne.
Maŋa mo tento se á pipiri á ba amo tei.
Amo Baŋa Wɛ laam wó ke zaane á yuu ne,
ne doa na nena tei to.
13Abam nam na ke tei to,
á dugi lwarem yerane mo,
pa se á na lɛɛro á kikia baŋa ne.
Á na me de vwa fɔm to ŋwaane,
á nɛ nyɔɔre delo na maŋe de vwa to.
Á kwei á chega á daŋe á tete dam baŋa ne,
de á jar-keira na tiini ba daga tei to ŋwaane mo.
14Konto ŋwaane jara wó pɔpɔ ya to á wone,
pa se á dam jei sem maama chɔge.
Ko wó tiini ko zo á yera
ne ko na ke tei dɛ dem Saleman na chɔge
Bɛte-Arabel teo kom to.
Ba déem yigi niina de ba bia
ba de tega ne
ye ba daare ba nɔ-ba ba go.#2 Pwa 17:3
15Ko ta lage ko ke abam Bɛtel tiina bam konto dwoŋi mo,
de puseŋa kikia yalo abam na ke to ŋwaane.
Dɛ dem konto ná yia,
Isarele tiina pɛ wom wó yɔɔre o te ko nɛ sem ni ne.”
Currently Selected:
Hosea 10: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
