Pulim 45

Josɛf bere o tete de o chorro tem

1Josɛf déem daa wo wane o tete o ja o tontoŋena bam yiga ne. O ma bage-ba o we, “Nɔɔno maama nwoŋi da á daare-ne na!” Tontoŋena bam na nwoŋi ba daare Josɛf de o chorro tem yerane, o laam ma ta o na ye wolo to o bere-ba. 2O ma kaase de kwor-dɛa ye o keeri pa se Ejipti tiina bam ni sɔɔ kom. Pa-faro wom sɔŋɔ tiina de déem ni ko ŋwa.

3Josɛf ma ta o chorro tem o we, “Amo ye Josɛf mo! A kwo daa ta seene o ŋwe na?” O chorro tem déem wo wane o taane dem se ba leiri ba pa‑o, kokuri to, ba yera déem tiini ya sae mo o yiga ne.

4Josɛf déem ta ma ta de o chorro tem we, “Fɔɔre-na á yi a yera.” Ba na yi o tei to, mo o tage o we:

“Amo mo ye á choro Josɛf, wolo abam déem na yeigi á pa nɔɔna se ba ja-ne ba vo Ejipti to! 5Nam yé pa-na se á wo chɔge. Daa á yé pa-na ko taa wɔe abam dedaane á na yeigi-ne á yage ywo-seeni to ŋwaane. Chega ŋwaane to, ko ye Wɛ déem mo toŋe-ne ywo se a lwoori yiga a ba se a jwoŋi nɔɔna dedɛ ŋwea a yage. 6Kana kam bena yalei mo kɛ tento, ye bena yanu ta daare se ka tiini ka chɛ. Bena yanto wone nɔɔna bá va se ba zage wodiiru. 7Ko maa ye Wɛ mo toŋe-ne se a da abam yiga a ba ywo se a che se á dwi yé saare logo kom ne. O mɛ o dam mo o ke konto se a jwoŋi abam a yage chekke. 8Ta‑á yei-na we ko dae abam mo pɛ se a ba ywo. Wɛ mo kea. Wonto mo pɛ se amo ji dedɛɛro Pɛ wom yiga ne, se a taa nii o sɔŋɔ kom maama baŋa ne, ye a daare a tei Ejipti teo kom maama.

9Nam ke-na lela á jwoori á vo a kwo tei se á ta ded‑o we ‘Nmo bu Josɛf kwora mo tento: Wɛ mo pɛ a tei Ejipti teo kom maama. Kwaane se n daa‑n yé dáane se n ba a tei lela. 10Nmo wó ta‑n zoore Gosen laŋa kam seeni mo se n ta‑n twɛ amo ywo-seeni. Nmo de n bia, de n naaro, de n peeni, de n bone, de n naane, dedaane woŋo kolo maama n na jege to wó taa wo dáane mo. 11Abam ná wo dáane, amo wó taa nii á baŋa ne se á na wodiu á di. Ta‑n yei we bena yanu mo ta daare se kana kam taa wora. A nam ba lage se kana yaare nmo de n sɔŋɔ tiina bam, ko woli dedaane n vara maama.’

12Abam tete nɛa ye a nyaane Benjamin de nɛa we amo mo seene a ye Josɛf. 13Pa-na se a kwo lɔre we Ejipti tiina bam tiini ba zuli-ne mo ywo-seeni, se á daare á ta ded‑o kolo maama á yi na nɛ to. Á laam maa wó ja‑o á ba ywo lela.”

14Josɛf na tage konto to, o laam ma kukwori o nyaane Benjamin ye o ka yi-na. Benjamin de ma kukwori‑o ye o de ka yi-na. 15Ko kwaga ne Josɛf laam ma kukwori o zembaara bam dedoa dedoa ye o ka ka yi-na ba maama baŋa ne. O chorro tem laam ma na pwola ba ŋɔɔne ded‑o.

16Pa-faro wom de o sɔŋɔ tiina ma ni we Josɛf chorro mo tu o tei. O de o nakwa bam maama wo ma pwoli ko ŋwaane. 17Pɛ wom ma ta de Josɛf o we, “Ta de n chorro tem se ba vɔ ba bonɛ sem ba jwoori Kanaan teo kom. 18Ba jege se ba ja á kwo wom dedaane o sɔŋɔ tiina maama mo se ba jwoori ba ba a tei ywo. Amo wó pa-ba Ejipti tega kam mɛ na tiini ka lamma to se ba jeini da. Konto wó pa se ba ni logo kom ywoni lanyerane. 19Ta ta de-ba se ba lage sisei-torokooro Ejipti ywo ba ja ba vo Kanaan ba ke ba kaana de ba bia te wone ba ja ba ba. Ba ná beene, se ba ja á kwo ba woli da ba ba ywo-seeni. 20Yé pa-na se ko daane abam á zela yam ŋwaane, se Ejipti logo kom wo-laaro maama mo wó taa ye abam nyem.”

21Jakob bu-baara bam ma ke kolo maama ba déem na bere-ba se ba ke to. Josɛf déem pɛ-ba sisei-torokooro mo, nenɛɛne Pɛ wom na pɛ ni tei to. O déem ta ma pa-ba wodiu se ko woli-ba chwoŋa ne. 22O ma daare o pa ba maama gare-donno se ba zo. Se ko ná ye Benjamin, o déem pɛ wonto lu-nyenno sabu-dala bia yatɔ mo o woli de gare-donno kuni benu. 23Wonnu telo Josɛf na toŋe se ba pa o kwo mo tento: wo-laaro dwi dwi mo na nwoŋi Ejipti ne to, bonɛ fuga déem mo maa zeŋe-te. O daa ta ma pa se bona-chwa fuga zeŋe mena de wodiu dedɛ dedaane wo-laaro telo na wó woli o kwo chwoŋa ne to. 24Josɛf déem ma bane o chorro tem o yage chwoŋa ne. Ba na maa kɛ to, o ma ta-ba we, “Yé ke-na jara chwoŋa ne!”

25Ba ma nwoŋi Ejipti ne ye ba vo ba yi ba kwo Jakob tei Kanaan teo kom ne. 26Ba ma ta ded‑o ba we, “Josɛf daa ta ŋwe! Wonto mo laam tei Ejipti teo kom maama o nii ko baŋa ne.” Jakob ma ko o zega, ye o wo sɛ ba taane dem. 27Ba déem ma lwoni woŋo kolo maama Josɛf na tage de-ba to. Jakob ta ma na sisei-torokooro tem Josɛf na toŋe se ba ma ja‑o ba ba Ejipti to. Ko laam ma pa se ba kwo Jakob ma jwoori o tete ne. 28Jakob ma ta o we, “Amo laam sɛ! Amo bu Josɛf seene o ta ŋwe mo! Amo wó vo a na‑o mo se a laam daare a te.”

Currently Selected:

Pulim 45: KBG

Highlight

Copy