Pulim 46

Jakob de o sɔŋɔ tiina vei Josɛf tei

1Jakob déem ma lu o woŋo maama o ja o nwoŋi o vo Beeriseba. O na yi da to mo o ke kaanem o pa o kwo Izaak Wɛ wom. 2Wɛ déem ma ba Jakob tei tete ne o ŋɔɔne ded‑o o we, “Jakob! Jakob!” O de ma leiri we, “Nii-ne.” 3Wɛ ma leiri we, “Amo mo ye Baŋa Wɛ, nmo kwo Wɛ wom. Nam yé kɔre foone se n vo Ejipti, se dáane mo amo lage a pa se n dwi dem puli de ji te-zɔŋɔ. 4Amo tete wó tɔge de nmo se dé vo Ejipti. A nam ta wó jwoori a ja n dwi a ba ywo-seeni se ba jeini tega kanto baŋa ne. Nmo nam ná lage n te, nmo bu Josɛf tete mo wó ja nmo pa n te.”

5Jakob déem ma yage Beeriseba. O bia bam ma kwei‑o, ba woli de ba bu-balɛ, de ba kaana bam maama ba jeini sisei-torokooro wone, nenɛɛne Pa-faro wom na toŋe se ba ke tei to. 6Ba déem ta jaane ba vara mo, de ba zela yalo maama ba na nɛ Kanaan teo kom ne to ba woli da ba ja vo Ejipti. Jakob déem ma pɛ o dwi dem maama se ba vo Ejipti. 7Ko maa ye o bia maama mo, de o naaro, bakeiri de busankane maama mo o jaane o vo.

8Jakob bu-baara balo déem na dɛ ba vo Ejipti to yera mo tento:#Nwoŋim 1:1-4; Jeelim 26:5-51

Ruben déem mo ye Jakob bu-kwea. 9Ruben bu-baara bam maa ye:

Hanoki, de Pallu, de Hezeron, de Karimi.

10Simeon de bu-baara bam maa ye:

Jemweli, de Jamin, de Ohadi, de Jakin, de Zohare de Sawuli. Sawuli maa ye Kanaan tiina bukɔ bu.

11Levi de bu-baara bam maa ye:

Gereson, de Kohafe, dedaane Merari.

12Judah de bu-baara bam maa ye:

Era, de Onan, de Sela, de Pɛreza, de Zera. Ko nam ná ye Era de Onan, banto maŋe ba te Kanaan teo kom ne mo. Pɛreza bu-baara bam maa ye Hezeron dedaane Hamuli.

13Isakara bu-baara bam maa ye:

Tola, de Pua, de Jasubi, de Simiron.

14Zebulun de bu-baara bam maa ye: Seredi, de Elon, de Jahaleli.

15Jakob kaane Leah bu-baara de ba de bia mo konto. O déem nam loge o bia bam Mesopotamia ne mo. Leah ta loge bukɔ o pa Jakob, o yere mo Dina. Jakob ka-kwea kam bu-baara de o bukɔ Dina ná ke daane, ba maama wó taa ye fintɔ-batɔ mo.

16Gad de bu-baara bam déem mo ye:

Zefon, de Hagi, de Suni, de Ezibon, de Eri, de Arodi, dedaane Areli.

17Asere de bu-baara bam maa ye:

Imina, de Isiva, de Isivi de Beria. Ba nakɔ yere déem mo ye Sera. Beria bu-baara bam maa ye Hebera de Malikeli.

18Laban déem ya kwei Zilipa mo o pa o bukɔ Leah se o ma o ke o ka-nyaane. Wonto de déem ma lo bia banto o pa Jakob. Banto de ba bia maama ye fuga-baredo mo.

19Jakob kaane Racheli loge bu-baara balei o pa‑o:

Josɛf dedaane Benjamin.

20Josɛf de ma lo bia balei Ejipti ne: Manasɛ de Efrayim.#Pulim 41:50-52 Banto déem ye Ona kaanem tu Potifera bukɔ Asenaf bia mo.

21Benjamin bu-baara bam maa ye:

Bela, de Bechere, de Asabeli, de Gera, de Naaman, de Ehi, de Rosi, de Mupim, de Hupim dedaane Arada.

22Racheli bu-baara banto mo o déem loge o pa Jakob. Banto de ba bia maama ye fuga-bana mo.

23Dan bu-baaro wom déem mo ye: Husim.

24Nafitali de bu-baara bam maa ye:

Jahazeli, de Guni, de Jezera, dedaane Silem.

25Laban déem ya kwei Biliha mo o pa o bukɔ Racheli se o ma o ke‑o ka-nyaane. Wonto de déem ma lo bia o pa Jakob. Banto de ba bia maama ye barepɛ mo.

26Jakob tete dwi delo déem na dɛ ba vo Ejipti to déem ye nɔɔna fuseredo-baredo (66) mo, nenɛɛne ba ná wo jeeli o bu-kaana bam ba woli da. 27Bu-baara balei bam Josɛf na wo Ejipti ne ye o lo to ná woli da, Jakob sɔŋɔ tiina balo na zaŋe ba vo Ejipti to maama ye nɔɔna fuserepɛ (70) mo.

28Jakob déem toŋe Judah mo se o lwoori yiga o vo Josɛf tei se ba wane ba jeeri daane Gosen laŋa kam ne. Ba na yi Gosen to, 29de Josɛf déem pɛ se o tontoŋena ti o sisei-toroko yiga ye o di ko baŋa ne o vo Gosen se o jeeri o kwo Jakob. Josɛf na yɔɔre o na o kwo to, mo o dole o vɔna o kukwori‑o ye o ka yi-na se ko dáane. 30Jakob déem ma ta Josɛf o we, “Amo tete yia laam nɛ nmo ye n ta ŋwe! Amo laam ná nɛ chwoŋa, a wó te.”

31Josɛf ma ta de o chorro tem dedaane o kwo sɔŋɔ tiina bam o we, “Amo wó vo a ŋɔɔne de Pa-faro wom a ta we ‘Amo chorro de a kwo sɔŋɔ tiina déem zoore Kanaan ne mo. Ba maama laam nam tu a tei mo ywo-seeni.’ 32A ta wó pa se o lɔre we á ye nayere-dwi mo, ye á nam jaane á peeni, de á bone, de á naane dedaane á woŋo maama mo á woli da á ba ywo. 33Pɛ wom wó bwoŋi abam se á zo o tei. O ná bwei abam we ‘Abam toŋe bɛ totoŋa mo?’, 34se á fɔge á leiri‑o we ‘Ko na zege debam biini ne to, dé maŋe dé tɔge vara mo. Debam kwoa de déem nam mo maŋe ba ye nayera.’ Konto wó pa se o pa abam pwola se á jeini Gosen laŋa kam ne.” Josɛf déem tage konto kolo ŋwaane Ejipti tiina chuli balo na yere pei to mo.

Currently Selected:

Pulim 46: KBG

Highlight

Copy