Pulim 44

Lu-nyenno na-zoŋa taane

1Josɛf déem ma pa o sɔŋɔ tontoŋena yiga tu wom ni ye o we, “Ke wodiu n su nɔɔna bam ywollu tem se ko maŋe de ba dedoa dedoa na wó wane tei ba zeŋe to. Laam kwei nɔɔno maama sabu n jwoori n ke o ywolo ni ne. 2Ta daare n kwei amo lu-nyenno na-zoŋa kam n ke ba nyaan-balaŋa kam ywolo kom ni ne n woli de o de sabu kom.” Tontoŋeno wom ma ke kolo maama Josɛf na bere‑o to.

3Tega na jege ka poore to, ba ma pa nɔɔna bam chwoŋa se ba viiri de ba bonɛ sem maama. 4Ba na nwoŋi teo kom wone ye ba maŋe ba wo yi yiga to, dedaane Josɛf na tage o sɔŋɔ tontoŋeno wom o we, “Ke lela n pare nɔɔna bam n ja-ba. N ná yi-ba se n ta de-ba we ‘Bɛŋwaane mo abam mɛ lwarem á ma á ŋwe lanyerane delo a tu wom na ke o pa abam to? 5Bɛ mo ye á ŋɔ amo tu na-zoŋa kam? Mo kalo amo tu wom na jege o nyɔ na, ye o ta mae-ka o beeri o nii o yiga. Abam tiini á toŋe puseŋa á pa‑o.’ ”

6Josɛf tontoŋeno wom ma seene o pare-ba o ja, ye o lwoni taane dem o bere-ba. 7Ba ma leiri ba we, “Bɛ mo ye dé tu wom laam tɛ konto? Debam ware dé toŋe konto dwoŋi dé pa‑o kɔtaa! 8Dé daama na maane we sabu kolo dé mɛ dé yeigi wodiu kom tɔge debam ko vo Kanaan teo kom to, dé jwoori dé ja-ko dé ba dé pa abam. Ko dae chega na? Bɛ mo laam nam wó pa se dé ŋɔ sabu-seŋa naa lu-nyenno nmo tu wom sɔŋɔ ne? 9Nmo ná nɛ na-zoŋa kam n tontoŋena bam wolo tei ne, konto tu wó te mo. Debam maama balo na daare to maa wó ji dé tu wom kabɛ.” 10Josɛf tontoŋeno wom ma leiri o we, “Tɔ. A sɛ se ko taa ye ne abam na tage tei to mo. Amo ná nɛ na-zoŋa kam nɔɔno wolo tei ne, konto tu mo wó ji amo kabaa. Ko daare se abam maama viiri á ta‑á tei á tete.”

11Ba maama ma ke lela ba zoore ba ywollu tem ba tiŋi tega ne ye ba bwoli-te. 12Josɛf tontoŋeno wom ma bobo o beira kam. O déem zege nakwe wom baŋa ne mo o vo o yi nyaan-balaŋa kam baŋa. O laam ma vo o na na-zoŋa kam Benjamin ywolo kom ne. 13Chorro tem maama na nɛ konto to, ba ma kaare ba tete gwaaro de wo-chechɔgɔ. Ba déem ma jwoori ba kwei ba zela yam ba daŋe ba bonɛ sem baŋa ne, ye ba jwoori teo kom wo.

14Josɛf déem ya ta wo sɔŋɔ ne ye Judah de o chorro tem jwoori ba ba ba zo. Ba ma vwi ba yibia tega ne se ba ja o naga. 15Josɛf déem ma ta de-ba we, “Bɛ mo konto abam kea? Abam ya yeiri we, amo na ye dedɛɛro to, a wae a beeri a nii a nae wonnu jaja na?” 16Judah déem ma leiri we, “Debam tu, debam ba jege kolokolo se dé ta. Debam ni laam mɔɔre mo. Dé bá wane dé ta kolo dé na wó ma dé jwoŋi dé tete to. Wɛ mo peere debam zem dé chaveera wone. Konto to, debam maama mo laam ye nmo kabɛ, dé maama, ko woli de wolo ba na nɛ na-zoŋa kam o zela wone to.” 17Josɛf ma leiri o we, “Amo bá wane a pa se ko ke konto dwoŋi! Ba na nɛ na-zoŋa kam wolo zela ne to yerane mo wó ji amo kabaa. Abam maama wó wane á jwoori á kwo wom tei ne de yazura.”

18Judah déem ma tutwoni o yi Josɛf tei o ta o we:

“Jan ja, amo tu, pa-ne chwoŋa se dé ŋɔɔne daane jaja. Nam yé pa se n bane zaŋe amo baŋa ne, se nmo de Pa-faro wom tete mae daane mo. 19Amo tu, nmo daama bwei debam we, dé ta jege kwo de choro kodwoŋi na? 20Dé ma leiri we, dé jege nɔn-kwea sɔŋɔ ne. Dé nyaan-balaŋa dedoa de ta wora, dé kwo na loge‑o o kokweero maŋa ne mo. Dé ta pɛ se n lɔre we dé nyaane wom konto zembaaro maŋe o te. Wonto yerane laam mo daare o nu-puga bia wone. O kwo wom ma tiini o swoi‑o dedɛ.

21Nmo daa ta ma‑n ta we, dé ja‑o dé ba ywo se nmo de wane n na‑o. 22Debam de ma ta dede‑m we, bu wom bá wane o nwoŋi sɔŋɔ o daare o kwo wom, kokuri to, o ná tere o kwo wom tei ne, nɔn-kwea kam wó te mo. 23Dé tu, dé na tage konto to, nmo ta ma n leiri we, dé ná wo jaane dé nyaane wom dé ba, n daa‑n bá‑n pa debam chwoŋa se dé zo n tei. 24Dé na jwoori sɔŋɔ to, dé ma ta dé bere debam kwo kolo maama nmo na tage to.

25Ko na ke fee to, dé kwo wom maa we ‘Jwoori-na á vo á yeigi wodiu fee á ja á ba.’ 26Dé ma ta‑o we ‘Dé bá wane dé vo, ko ná dae se dé nyaane wom ná dɛ debam kwaga se dé vo. Dé nyaane wom ná tere dé tei ne, dé bá na chwoŋa se dé daa zo dedɛɛro wom tei.’

27Debam kwo wom ma ta o we ‘Abam yei we a kaane Racheli loge bakeiri selei yerane mo o pa-ne. 28Dedoa maŋe o jei o daare-ne. Amo na boŋe tei to, kago-varem mo jaane‑o de tore tore. Dedaane zem maama a daa wo nɛ‑o. 29Abam nam ná jaane wonto de á viiri ye cham ná yi‑o, abam wó pa se a te wo-chechɔgɔ ŋwaane, ye a ja a yu-pwei sento a vo churu.’

30Amo tu, jeeli se n lɔre we nɔn-kwea kam ŋwea de bu wom ŋwea me daane mo. Dé nam ná yi sɔŋɔ ye bu wom tere dé tei ne, amo kwo wó te mo. 31O ná nɛ we bu wom tɔge o tera, ko wó pa se o te wo-chechɔgɔ ŋwaane, ye o ja o yu-pwei sem o vo churu. 32Ko woli da, a kwei a tete a zege daare bu wom ŋwaane ye a ta de a kwo we, a ná wo jwoori a ja‑o a ke o jeŋa ne, se o kwei ko maama o zeŋe amo yuu ne taa wuu.

33Konto to, amo tu, sɛ se amo maŋe ywo a ji n kabaa se a leiri bu wom yuu ne. Pa se bu wom tɔge dedaane o zembaara bam se ba jwoori sɔŋɔ. 34Amo bá wane a jwoori a kwo wom tei nenɛɛne bu wom ná tere a tei ne. Amo bá taa lage se a na lwia yalo na wó yi a kwo wom, ne ko ná ke‑o konto.”

Currently Selected:

Pulim 44: KBG

Highlight

Copy