Pulim 43

Josɛf zembaara jwoori Ejipti

1Kana kam déem tiini ka chɛ Kanaan teo maama ne mo. 2Jakob sɔŋɔ tiina bam ma di mena yalo maama ba na nɛ Ejipti ne ba ja ba to ba ti. Jakob laam ma ta-ba o we, “Jwoori-na á vo á yeigi wodiu fee á ja á ba ywo-seeni.”

3Judah déem ma ta de ba kwo wom o we, “Dedɛɛro wom seene yia mo o kaane debam o we, dé ná wo jaane dé nyaane wom dé ba, o daa bá pa debam chwoŋa se dé zo o tei. 4Nmo ná sɛ se dé nyaane Benjamin tɔge dedaane debam o vo mo, dé laam wó wane dé vo dé yeigi wodiu dé ja ba dé pa‑m. 5Se n nam ná wo sɛ se o tɔge o vo, dé bá wane dé vo, dedɛɛro wom na tage kolo to ŋwaane, de o na we, dé ná wo jaane dé nyaane wom dé ba, o daa bá pa debam chwoŋa se dé zo o tei.”

6Jakob ma bwei-ba o we, “Bɛŋwaane mo á tage de nɔɔno wom we á ta jege nyaane wodwoŋi sɔŋɔ ne, ye á ke-ne cham wone tento?” 7Ba ma leiri ba we, “Nɔɔno wom tiini o bwei debam mo o legese dedaane dé dwi maama. O bere o bwei we ‘Abam kwo ta ŋwe na? Á daa ta jege choro kodwoŋi na?’ Debam de ma leiri o bwia yam maama. Dé ya bá wane dé lɔre we o wó ta nenɛɛne, dé vei dé ja dé nyaane wom dé ja ba o tei.”

8Judah laam ma ta de o kwo wom o we, “Kwei bu wom n ke amo jeŋa ne se dé ke lela dé kɛ da. Ko ná dae konto, debam de dé bia bam maama wó pu mo de kana. 9Amo wó kwei a tete a zege daare bu wom ŋwaane. A ná wo jwoori a ja‑o a ba ywo a ke n jeŋa ne, se n bwei amo o bwia. Amo sɛ se, woŋo ná ke‑o, se n kwei ko maama n zeŋe amo yuu ne taa wuu. 10Chega to, ko ná dae dé na zege dé dáane, tento wɛɛne dé ya vei ye dé daa jwoori se ko yi kuni belei.”

11Ba kwo Jakob ma leiri o we, “Ko nam ná seene ko ye konto, ke-na tento dwoŋi: twori-na dé tega kam wo-laaro dwi dwi á ke á ywollu tem ne se á ja á vo á ma ke pɛɛre á pa dedɛɛro wom. Ko maa wó taa ye terale nuga fenfee, de tooro fee, de talwoŋ-ywoŋa dwi dwi, dedaane teeni bia dwi dwi.#43:11 Teeni bia dwi dwi = Pistaschio nuts, Almond nuts 12Nam ta ta‑á jege-na mena yam sabu kuni belei á woli da. Kokuri to, á jege se á jwoori á ja kolo ba ya na ke á ywollu tem ne to mo á vo á pa-ba. Dɛ delo ba tusi mo ba ke konto. 13Ja-na á nyaane wom á woli da se á jwoori á vo dedɛɛro wom tei leile konto. 14Dam-fɔrɔ Tu Wɛ wom#43:14 Dam-fɔrɔ Tu Wɛ wom: Hiburu = El Shaddai wó pa se nɔɔno wom duri á yibwona ye o pa chwoŋa se á ja á chorro tem, Simeon dedaane Benjamin, á jwoori á ba ywo. Ko ná tu se a ga a bia bam tento, a nam wó ga-ba mo.”

15Ba déem ma ti ba pɛɛra yam yiga, ye ba jege ba sabu kuni belei. Benjamin déem ma da o vo. Ba ma ke lela ba vo Ejipti. Ba na yi da to, ba ma zo Josɛf tei. 16Josɛf na nɛ we Benjamin tɔge o wo ba wone to, o ma ta o sɔŋɔ tontoŋena yiga tu wom o we, “Ja nɔɔna banto n vo sɔŋɔ. N ná yia, se n go varem n ma n ke wodiu, se banto wó di wodiu de amo mo wea ne.” 17Tontoŋena yiga tu wom ma ke o na bere‑o se o ke tei to, ye o jege nɔɔna bam o maa vei o tu wom sɔŋɔ.

18Foone déem maa jege chorro tem dedaane ba na jege-ba ba maa vei Josɛf sɔŋɔ kom to. Ba boboŋa yam déem ye we, “Ko ye sabu kom ba ya na jwoori ba ke dé ywollu tem wone to ŋwaane mo ba jege debam ba vei dáane. Dedɛɛro wom lage o pa ba pɔpɔ ba zi debam mo ba ja ba ma ke wonto kabɛ, ye ba vere debam bonɛ sem de ba woli da.” 19Ba na vei ba yi sɔŋɔ kom manchwoŋo ni to, mo ba ŋɔɔne de Josɛf tontoŋena yiga tu wom, 20ye ba we, “Jan ja, debam daama maŋe dé ba ywo dé yeigi wodiu. 21De laam na viiri ye dé yi jeiga kalo se dé peini de sii tete ne to, dé ma puri dé ywollu tem nia ye debam dedoa dedoa na we dé mena yam sabia bam maama jwoori ba wora, ko maa ye sabu kom ni ne mo chekke. De laam nam jwoori dé ja-ko dé ba. 22Dé nam ta jaane sabu dé woli da dé ba se dé daa ma yeigi wodiu. Debam wo lɔre wolo daama na kwei dé sabu kom o jwoori o ke dé ywollu tem ne to.” 23Tontoŋeno wom ma ta o we, “Ko wo chɔge, yé ta‑á fona. Abam Wɛ wom, wolo wom á kwo na tɔge to mo kwei pɛɛra o ke á ywollu tem ne. Amo daama jwoŋi abam sabu kom.” O na tage konto to, o laam ma pore Simeon o ja ba ba tei.

24Tontoŋeno wom déem ma pa chorro tem zo Josɛf sɔŋɔ kom. O ta ma mɔ na o pa-ba se ba ma zare ba nɛ, ye o daare o ja wodiiru o ba o pa ba bonɛ sem. 25Ba ma ni we ba wó di wodiu dedaane Josɛf mo o sɔŋɔ ne. Ba ma le ba pɛɛra yam ba tiŋi ye ba cheigi Josɛf se o ba wea ne.

26Josɛf na tu sɔŋɔ to, ba ma kwei pɛɛra yalo ba na jaane ba jeeri o sɔŋɔ kom ne to ba ja zo diga ba pa‑o. Ba ma chɔɔle ba yibia tega ne ba jɔɔne‑o. 27O ma bwei ba kwaga ye o daare o we, “Á nɔn-kwea kam á ya na tage ka taane á bere-ne to jege yazura na? O daa ta ŋwe na?” 28Ba ma leiri ba we, “Debam kwo ye nmo tontoŋeno mo, o nam ta ŋwe. O jege yazura de ya-dɛɛra.” Ba ma chɔɔle tega ne ba zuli‑o.

29Josɛf ma dole o yi o na o nyaane Benjamin na ye o nu-puga bu to. O ma bwei-ba o we, “Abam nyaane wom á na tage o taane á bere-ne to mo tento na?” O ma daare o ta de Benjamin o we, “Amo bu tete, Wɛ zaane wó taa wo nmo yuu ne.” 30Josɛf na seene o na o nyaane wom to, ko déem ma tiini ko vaŋe‑o dedɛ. O ma ke lela o nwoŋi o beeri jei se o ka yi-na. O ma zo o tete diga o keeri, o na jege o nyaane wom swono to ŋwaane.

31Josɛf laam ma su o yia, ye o jwoori o nwoŋi ba tei. O ma fɔge o ja o tete ye o we, “Pɔɔre pɔɔre-na wodiu kom se dé di.” 32Ba déem ke wonto wodiu ko yera mo, chorro tem de nyem ko yera. Ba ma daare ba ke Ejipti tiina balo na wora to de nyem ko yera, kokuri to, ko chula ko pae Ejipti tiina pa se ba ware ba di dedaane Hiburu tiina. 33Josɛf déem pɛ se o chorro tem jeini o yiga ne se ko maŋe de ba bena yam na ye tei to mo, ko zege bu-kwea kam ne se ko yi nyaan-balaŋa kam baŋa. Ba na nɛ konto to mo ba nii daane ye ko ke-ba yaau. 34Josɛf ma pa ba pɔɔre pɔɔre o wodiu kom wone ba pa o chorro tem. Benjamin na jwoŋi wodiu kolo to daga ko dwoi o zembaara bam nyem kuni benu. Ba maama maa jei Josɛf tei ne ba di ye ba nyɔ ba su ye lwia tera.

Currently Selected:

Pulim 43: KBG

Highlight

Copy