Pulim 42

Josɛf chorro vei Ejipti ba na wodiu

1Jakob déem ma lɔre we wodiu wo Ejipti ne. O ma ta o bu-baara bam we, “Wodiu tera ye á jei sɔŋɔ ne se bɛ? 2Amo nigi we wodiu wo Ejipti ne. Nam véi-na dáane á yeigi mena á ja á ba, se dé yé pu de kana.”

3Josɛf zembaara bam fuga ma zaŋe ba vo Ejipti se ba yeigi mena. 4Jakob déem nam ya chege Josɛf nyaane Benjamin mo se o yé tɔge o chorro tedwonna tem o vo. Kokuri to, o kɔre we cham mo wó zege de yi‑o chwoŋa ne. 5Jakob bu-baara bam déem to nɔn-kɔgɔ wone mo ba tɔge ba vo Ejipti se ba yeigi wodiu. Kokuri to, kana kam déem chɛ Kanaan logo kom maama de mo.

6Josɛf déem nam mo ye dedɛɛro Ejipti ne ye o jege mena o yeigi o pae ko nɔn-bia maama. Josɛf zembaara bam ma vo ba yi o tei, ye ba chɔɔle ba yibia tega ne ba jɔɔne‑o.#Pulim 37:7 7Josɛf na nɛ o zembaara bam to mo o lɔre-ba. O déem ma seigi o tete de-ba, ye o daare o zage-ba ni-chɛɛre. O ma bwei-ba we, “Abam nwoŋi yei mo?” Ba de ma leiri we, “Debam nwoŋi Kanaan mo. Dé tu se dé yeigi wodiu mo.”

8Josɛf déem na lɔre o zembaara bam to, banto ya wo lɔre‑o. 9O ma guli o na dwɛ o zembaara bam dendwea yam to, ye o ta-ba o we, “Abam tu se á ŋɔ á yere debam teo kom wonnu mo, se á nii teo kom mɛ na wo chege to.” 10Ba ma leiri‑o we, “Debam tu, ko nam dae konto! Dé ye nmo kabɛ. Dé tu ywo-seeni se dé yeigi wodiu mo. 11Debam maama ye baaro dedoa bia mo. Debam vei de chega mo, se dé wo tu se dé ŋɔ dé yere á teo kom.”

12O daa ta ma ta de-ba o we, “Vwa! Abam tu ywo se á nii debam teo kom jei selo na wo chege to mo.” 13Ba ma leiri‑o ba we, “Debam tu, dé déem ye fuga-balei mo de kwo dedoa ye dé zoore Kanaan ne. Dé nyaane wom ta wo debam kwo tei ne tento. Ko daare, dedoa kam daa tera.”

14Josɛf ma ta de-ba we, “Amo maŋe a wo tage chega na? Abam ŋɔne mo á nii teo kom! 15A lage a faŋe abam mo a nii: A dugi Pa-faro wom yere ŋwaane, abam nyaane wom ná wo tu se a na‑o, a bá sɛ a yage abam se á viiri. 16Toŋe-na á wone dedoa se kotu vo o ja á nyaane wom o ba. Abam balo na daare to, a lage a pe á maama mo se a lɔre á taane dem ná ye chega naa vwa. A dugi dedaane Pa-faro wom yere, á nyaane wom ná wo tu, ko wó bere we abam seene á ŋɔne á nii teo kom mo!” 17O ma pa se ba ja ba maama ba pe da yatɔ.

18Da yatɔ dɛ dem na yi to, Josɛf ma ta de-ba we, “Ke-na tento se a pa á jwoŋi á ŋwea, amo na kɔre Wɛ to ŋwaane. 19Abam ná seene á vei de chega, se á pa abam dedoa maŋe peena diga kam ne ywo. Abam balo na daare to wó wane á ja wodiiru á vo á pa á sɔŋɔ tiina bam se ba yé pu de kana. 20Ko nam jege se á ja á nyaane wom mo á ja á ba se a na‑o. Konto wó bere we abam taane dem ye chega pa se á daa yé ga ŋwea.”

Ba ma sɛ, 21ye ba bwɛ daane ba we, “Dé na nɛ waarem dento maama to, ko ye dé na ke dé nyaane Josɛf tei to ŋwaane mo. Ko déem na ni‑o, ye o lwoori wolim debam tei ne to, dé nɛ ye dé ve se dé duri o yibwona. Konto cham laam nam mo jwoori dé baŋa ne.” 22Ruben ma leiri o we, “Amo déem tage de abam se á yé ke zonne á pa bu wom. Abam ma ve se á cheigi-ne! Dé laam jege se dé jwoŋi o toone dem ŋweero mo.” 23Ba na ŋɔɔne daane konto to, ba déem yeiri we Josɛf ni ba taane dem. Kokuri to, ba ya ná yeini ba ŋɔɔne ded‑o, nɔɔno mo wó jwoŋi ba taane dem o leiri de Ejipti tiina taane o pa‑o. 24Josɛf déem ma pipiri o vo dáa ye o ka yi-na. O yera na jwoori to, o ma jwoori ba tei o ŋɔɔne de-ba. O déem ma le Simeon ba wone ye o pa se nɔɔna vɔ‑o ba ja viiri ba maama yibia ne.

25Josɛf ma pa ni o we, ba kwei mena ba su o zembaara bam ywollu tem maama. O déem ta pɛ se ba jwoori ba ke nɔɔno maama sabu mo o ywolo ne, se ba daare ba pa-ba wodiu ba na wó di chwoŋa ne to. 26Ba na ke konto ba pa-ba to, nɔɔna bam ma vɔ ba ywollu tem ba daŋe ba bonɛ baŋa ne ye ba kɛ.

27Ba déem ma vo ba yi mɛ ba na wó peini ba sii se tega poore to. Ba dedoa ma bwoli o ywolo se o le wodiu o pa o bonaga. O ma na o sabu kom na tigi da o ywolo kom ni ne. 28O ma ta de o chorro tem o we, “Amo sabu kom mo ba jwoori ba pa-ne. Nii-ko da a ywolo kom ne.” Ba na lɔre konto to, ba bochara ma di. Foone ma ja-ba ye ba ŋɔɔne ba bere daane ba we, “Bɛ mo Wɛ ke debam tento?”

29Ba déem ma vo ba yi ba kwo Jakob tei Kanaan ne. Ba ma lwoni kolo maama na yi-ba to ba bere‑o. Ba ma ta ba we, 30“Dedɛɛro wolo na nii Ejipti logo kom maama baŋa ne to zage debam mo de ni-chɛɛre ye o pa se ko zo dé yera nenɛɛne dé ga ye balo na lage dé ŋɔ ba teo kom mo dé nii to. 31Debam de ma ta ded‑o we ‘Debam ye chega tiina mo, dé dae balo na ŋɔne dé nii á teo kom to.’ 32Dé ma pa o maane we, dé déem ye chorro fuga-balei mo de kwo dedoa. Dé bere‑o debam dedoa daa na tera tei, dedaane dé nyaan-balaŋa mo laam na wo dé kwo wom tei ne ywo-seeni tei to.

33Dedɛɛro wom ma ta dedaane debam o we ‘Ke-na tento se a lɔre we á tage chega. Abam choro dedoa wó maŋe amo tei ne ywo, se á daare á kwei mena á ja á vo á pa á sɔŋɔ tiina se ba yé pu de kana. 34Ko nam jege se á ja á nyaane wom mo á ba se a na‑o. Konto mo wó pa se a lɔre we á ye chega tiina ye á wo tu se á ŋɔ á nii dé teo kom. Amo laam maa wó yage á choro kom a ya na pe to, se á de ta‑á beeri á pipia debam teo kom ne.’ ”

35Ba na tage konto ba ti to, mo ba maama déem bwoli ba ywollu tem. Ba dedoa dedoa ma na o sabu-ganlɔgere dem na tigi da dedaane sabia bam maama! Ba maama de ba kwo wom na nɛ konto to, foone ma ja-ba. 36Ba kwo Jakob ma ta de-ba o we, “Abam na ke tei to, á lage á pa se amo ga a bia bam maama mo! A bu Josɛf daa tera. Simeon de daa tera. Abam daa ta kwaane se á ja Benjamin á ja viiri. Lɛɛro jege-ne keim dento maama wone!” 37Ruben ma ta de o kwo o we, “Kwei bu wom n ke amo jeŋa ne se dé kɛ. A ná wo jaane‑o a jwoori a ke n jeŋa ne, se n go a bu-baara balei bam.” 38De konto de, Jakob tage we, “Amo bá sɛ. Amo bu Benjamin bá da dedaane abam o vo. O zembaaro Josɛf maŋe o te ye wonto yerane mo daare o nu-bia wone. Cham ná yi‑o chwoŋa ne, abam wó pa se a te wo-chechɔgɔ ŋwaane, ye a ja a yu-pwei sento a vo churu.”

Currently Selected:

Pulim 42: KBG

Highlight

Copy