Pulim 30

1Racheli déem na nɛ we o wo wane se o lo bia o pa Jakob to, o maa jege kazwe o zwe de o zembaaro Leah. Ko ma pa se o ta de Jakob we, “Pa-ne bia, se ko ná dae konto, amo lage a te mo!” 2Jakob bane ma zaŋe ded‑o ye o we, “Amo ye Wɛ mo na? Ko dae wonto mo chege nmo de bu-lore na?” 3Racheli maa we, “Nam nii amo ka-nyaane Biliha da. Peini ded‑o se o lo bia o pa amo, se amo de wane a tɔge wonto baŋa ne a na dwi.”

4O laam ma kwei o ka-nyaane Biliha o pa‑o se o ma ke kaane. Jakob ma peini ded‑o, 5ye o ja puga o lo bakeira o pa‑o. 6Racheli maa we, “Wɛ laam bere we amo de jege bora. O sɛ amo wɛ-lworo ye o pa-ne bakeira.” Konto ŋwaane, o ma pa o yere we ‘Dan’.

7Racheli ka-nyaane Biliha daa ma ja puga ye o lo bakeira o pa Jakob o woli da. 8Racheli laam maa we, “Amo tiini a yiŋi mo de a zembaaro wom, ye a wane‑o.” O ma pa o yere we ‘Nafitali’.

9Leah déem na maane we o daa ba lore bia to, o de ma kwei o ka-nyaane Zilipa o pa Jakob se o ma ji o kaane. 10Leah ka-nyaane Zilipa ma lo bakeira o pa Jakob. 11Leah laam maa we, “Nii a na nɛ yu-ywoŋo tei!” O ma pa bu wom yere we ‘Gad’.

12Zilipa daa ma lo bakeira o pa Jakob. 13Leah maa we, “Nii amo na nɛ wopwolo tei! Kaana bam laam wó taa tɛ we a jege yu-ywoŋo mo.” O ma pa o yere we ‘Asere’.

14Faao-ni maŋa dɛ dedwe, Leah bu Ruben ma nwoŋi o vo kare sem. O ma beeri o na liri vɔɔro tedwonna o ja o ba o pa o nu. Ba maa bwoi vɔɔro tento we ‘mandaraka’. Racheli na nɛ konto to, o ma ta de Leah o we, “Jan ja, twori n bu mandaraka vɔɔro tem wone n pa-ne.” 15Leah ma leiri o we, “Nmo maŋe n wo vere amo baro wom a tei ne mo na? Konto to, nmo ta lage se n kwei amo bu Ruben mandaraka vɔɔro tem mo n woli da na?” Racheli maa we, “Amo nam sɛ. Ke n bu wom liri sem n pa-ne, se tete dento Jakob wó ba o peini de nmo.”

16Dedaan-ni ne Jakob déem ma zege kara kam ne o jwoori sɔŋɔ. Leah ma nwoŋi o jeeri‑o ye o we, “Nmo zem ye se n peini de amo mo. Amo mɛ a bu Ruben mandaraka vɔɔro mo a ŋwe nmo ŋwaane se debam zem peini daane.” O ma seene o peini ded‑o dento tete dem ne. 17Wɛ ma sɛ Leah wɛ-lworo, pa se o ja puga o lo bakeira o ke senu o pa Jakob. 18Leah laam maa we, “Wɛ mo ŋwe amo ŋweero konto dedaane a na kwei a ka-nyaane wom a pa a baro wom to.” O ma pa o yere we ‘Isakara’.

19Leah daa ma ja puga o lo bakeira o ke seredo o pa Jakob. 20O laam maa we, “Wɛ kwei pɛɛre delo na jege yuu to mo o pa-ne. Leile konto, amo baro wom laam wó taa nege amo mo, amo na loge bu-baara baredo a pa‑o to ŋwaane.” O ma pa bu wonto yere we ‘Zebulun’. 21Leah laam ma daare o lo busankana ye o pa o yere we ‘Dina’.

22Wɛ laam ma guli Racheli gula. O ma sɛ o wɛ-lworo ye o pa se o lora pore. 23O ma ja puga ye o lo bakeira pa se o we, “Wɛ kwei amo chaveera yam o ja o kɛ dáa.” 24O ma pa bu wom yere we ‘Josɛf’, ye o we, “Baŋa Wɛ ta woli bakeira kadwoŋi da o pa-ne.”

Jakob pei sem puli dedɛ

25Racheli déem na loge Josɛf to mo Jakob tage de o kaane kwo Laban we, “A lwoori chwoŋa nmo tei ne, se a jwoori a vo a kwo sɔŋɔ na ye a tete teo to. 26Pa-ne chwoŋa se a viiri, amo de a kaana dedaane a bia bam, se banto ŋwaane mo a toŋe taa a pa‑m. Nmo nam yei amo na tiini a toŋe a pa‑m ye ko mae tei to.” 27Laban maa wo sɛ ye o ta ded‑o we, “Nenɛɛne amo keim ná su nmo yi, se n maŋe ywo. Amo na beeri a nii to mo a nɛ we ko ye nmo ŋwaane mo Baŋa Wɛ ke zaane a yuu ne. 28Ta n bere-ne, nmo na lage se n ŋweero taa ye tei maama to, se amo wó ŋwe-te a pa‑m.”

29Jakob ma ta ded‑o we, “Nmo yei amo na toŋe tei ye a yere n vara bam pa se ba ke lanyerane amo jeŋa ne to. 30Fenfee kolo nmo déem na jege ye amo ya ta wo tu n tei ne to laam puli mo dedɛ. Mɛ maama amo ná via, Baŋa Wɛ yeini o ke zaane mo o ke nmo yuu ne. Se leile konto, ko maŋe se a ke kolo na wó woli a tete sɔŋɔ tiina bam mo.”

31Laban ma bwei‑o we, “Nmo nam we a pa‑m bɛ mo?” Jakob ma leiri we, “Amo nam bá jwoŋi ŋweero nmo tei ne. Za n sɛ se n ke kolo amo na wó lwoori nmo tei ne to, se a ta wó kale n vara bam a nii ba baŋa ne. 32Nam pa-ne chwoŋa zem se a zo nmo vara bam wone a le pi-poporro tem de pipeili selo maama na zwora to, ko woli de bom-poporro tem. Sento dwi maama mo wó taa ye amo ŋweero. 33Konto to, amo chega kam laam wó bere jaja jwa seeni mo. Nmo ná tua se n nii ŋweero telo n na pɛ amo to, ye n ná nɛ we amo jege boŋo kolo na dae poporro, naa pipeila kalo na ba zwora to, ta‑n yei we a ŋɔge-te nmo tei ne mo.” 34Laban ma sɛ ye o we, “Dé wó ke tetei nmo na tage to mo.”

35Dento dɛ dem ne nɔɔ mo, Laban vei o le bo-bale selo na ye poporro to, de bo-chwa yalo yera na ye nyɔge nyɔge ye ya jege napwoŋo to o ta woli de pipeili selo na zwora to dwi maama, o pɔɔre-se o ke o bu-baara bam jeŋa ne se ba taa nii-se. 36O ma pa ba vo da yatɔ veiŋa mo ba daare Jakob dedaane vara balo na daare ye o jege-ba o yere to.

37Jakob ma na ye o gwoni teeni dedwonna nɛ. Teeni dento dɛ sem ye napwonnu, de yera maa ye Popela, de Aamonda, de Pileeni. O laam ma lɔɔre lɔɔre nɛ sem poro tem jei sedwonna o daare bibeiri-pwonnu pa te wo da-lɛɛro tem wone. 38O ma kwei tio-nɛ sem o na pwoni pwoni konto to, o tiŋi-se gwonnu telo ba na lwoi na da se vara bam nyɔ to wone. O ma pa se vara bam yɔɔre ba na dɛ sem maŋa kalo maama ba na wó ba se ba nyɔ na to. Vara bam yeini ba diini daane jei sem konto ne. 39Ba déem na diini daane dɛ sem yiga ne konto to, ba laam ma ba ba lore bia balo na ye poporro de balo na ye nyɔge nyɔge to.

40Jakob ma pɔɔre pipeili sem o ke dáa ba yerane. O déem ma yeini o pa pei selo na daare to yɔɔre se jeeri Laban vara balo na zwora de balo na ye vare-poporro to. O ke konto mo o ma na vara o tete ŋwaane ye o wo woli-ba Laban vara bam wone. 41Ko ná ye vara balo na dana to, banto ná yeini ba lage se ba di daane, Jakob yeini o kwei dɛ sem mo o tiŋi vara na nyɔɔm gwonnu tem wone, se vara bam di daane dɛ sem yiga ne. 42Ko nam ná ye vare-nabwona bam, o yeini o ba ke konto. Ko ma pa se vare-nabwona bam woli Laban vara bam wone ye vare-dedɛɛra bam ji Jakob nyem. 43Ko dɛ konto baŋa ne mo ye Jakob tiini o duni. O laam ma ba o jege o tete vara dedɛ, dedaane kona de bonɛ, de kabɛ, baara de kaana maama.

Currently Selected:

Pulim 30: KBG

Highlight

Copy