Pulim 31

Jakob duri o daare Laban

1Jakob déem ma ni Laban bia bam na tɛ ba we, “Jakob mo jwoŋi debam kwo déem ya na jege kolo maama to. O zege debam kwo jeŋa wonnu baŋa ne mo o duni.” 2Jakob ta ma maane we Laban yi daa ta ba sui ded‑o, nenɛɛne ko déem na ye tei to.

3 Baŋa Wɛ laam ma ta de Jakob we, “Zaŋe n jwoori n vo n kwoa teo kom, nmo chorro tem na zoore mɛ to, se amo wó taa wo nmo tei ne.” 4Jakob ma toŋe o bwoŋi Racheli de Leah se ba ba ba jeeri‑o pwola kalo ne o na nii o vara bam da to. 5O ma ta de-ba we, “Amo maane we abam kwo yi laam daa ba sui dedaane amo, nenɛɛne ko déem na ye tei to. De konto de, Wɛ wom amo kwo na zuli‑o to wo amo tei ne. 6Abam yei we amo mɛ a dam maama mo a toŋe a pa á kwo wom. 7De konto maama de, abam kwo wom yeini o pini amo mo ye o leiri amo ŋweero tem kuni fuga. Woŋo maama wone, Wɛ wo pɛ‑o chwoŋa se o ke amo wo-lɔŋɔ. 8O ná yeini o we, vara balo na ye nyɔge nyɔge to mo wó taa ye amo ŋweero, vara bam maama wó lo bia balo na ye nyɔge nyɔge to mo. O daa ná we, vare-poporro tem mo wó taa ye a ŋweero, vara bam maama ta wó lo vare-poporro mo. 9Ko ye Wɛ mo dɛ chwoŋa kam konto o jwoŋi abam kwo vara bam o kwei o pa amo.

10Tɔ. Maŋa kalo vara na diini daane to mo amo nam dwɛ dendwɛ, ye a na we bo-bale selo na wora se diini bo-chwa to ye selo na jege nyɔge nyɔge se yera ne to mo. Sedwonna de ta ye poporro. 11Amo na dwɛ dendwɛ dem konto to, Wɛ maleka kam laam ma bwoŋi amo yere we ‘Jakob’. Amo de ma leiri we ‘Nii-ne.’ 12O laam maa we ‘Fɔge n nii, se n na we bo-bɛ selo na wora se diini bone dem to jege nyɔge nyɔge mo ye sedwonna ye poporro. Amo ke konto a pa‑m, kokuri amo nɛ tetei maama Laban na jege o toŋe nmo yera ne to. 13Amo mo ye Wɛ wolo déem na jeeri‑m Bɛtel ne to. Dáane mo nmo de déem chwi kandwɛ nenɛɛne ywei dwoŋi ye n lwo nuga de baŋa ne n daare n pwooli amo yiga ne.#Pulim 28:18 Konto to, zaŋe da teo konto ne leile se n daare n jwoori n vo teo kolo ba na loge‑m to.’ ”

14Racheli de Leah ma leiri we, “Dé kwo ná tega o daare, kolokolo daa tera se dé tɔge dé jwoŋi o sɔŋɔ kom ne dé taa tei. 15Dé kwo laam maŋe o ke debam nenɛɛne dé ye veira mo tei. O kwei debam mo o yeigi o pa‑m, ye o ta daare o di nyɔɔre delo o na jwoŋi debam ŋwaane to o ti. 16Chega wone to, jejegero telo maama Wɛ na jwoŋi debam kwo wom tei ne o pa nmo to seene te ye debam dedaane dé bia bam nyem mo. Konto to, ke kolo maama Wɛ na we n ke to.”

17Ba na tage konto to, Jakob laam ma kwei o bia de o kaana bam o jeini kona baŋa ne, 18ye o kale o vara bam maama o ke yiga ne, ko woli de wonnu telo maama o na nɛ Mesopotamia ne to, se o jwoori o vo o kwo Izaak tei Kanaan teo kom ne.

19Laban déem ma nwoŋi o vo se o pa ba fane o pei sem koro. Racheli ma zo o ŋɔ o kwo jwona yam. 20Jakob de ma kwori o gane Aram tu Laban, bɛŋwaane o wo tage o bere‑o we o lage o duri o viiri mo. 21O déem ma zaŋe Laban tei ne o kwei o jejegero maama o ke lela o viiri. O ma vo o bɛ Yuferata bu-nia kam o vo o yi Gilead zwonnu laŋa kam.

Laban duri o pu Jakob kwaga

22Da yatɔ na kɛ to mo ba tage ba bere Laban we Jakob duri mo o maa viira. 23O ma la o fara o ke daane, ye o laam duri o pare Jakob da yarepɛ. O ma pare o ja‑o Gilead zwonnu laŋa kam ne. 24Tete ne Wɛ ma ba Aram tu Laban tei dendwɛ wone ye o ta ded‑o we, “Ta‑n yei se n yé ta kolokolo dedaane Jakob se ko taa ye botare-laao naa botare-balɔrɔ.”

25Laban na yi Jakob tei konto to, Jakob déem ya tei o vwoa Gilead zwonnu laŋa kam ne mo. Laban de o fara bam de ma tei ba vwoa dáane. 26Laban ma ta de Jakob we, “Bɛ mo ye nmo ke konto? Nmo gane amo, ye n ja a bukwa bam n viiri nenɛɛne nɔɔna na mage jara ba jaane kaana ba vɔ ba viiri tei to. 27Nmo na gane-ne tei to, n seigi amo yiga ne n duri mo. Nmo nam ya ná tage n bere-ne se a bane‑m, a ya wó yage‑m chwoŋa ne dedaane wopwolo, ye ba leeni lei ye ba mage kwanno dedaane senyɛ ba pa‑m. 28N maŋe n wo pɛ-ne pwola se a kukwori a naaro tem dedaane a bukwa bam se a bane-ba a yage chwoŋa ne. Nmo na ke tei to, n tiini n toŋe totoŋ-jworo dedɛ. 29Amo ya jege dam se a ke abam wo-lɔŋɔ, se diim tete dem ne mo Wɛ wolo n kwo na zuli to tage de amo o we ‘Ta‑n yei se n yé ta kolokolo dedaane Jakob se ko taa ye botare-laao naa botare-balɔrɔ.’ 30Amo nam yei nmo na duri kolo ŋwaane to, n kwo sɔŋɔ kom fera mo jaane‑m. Se bɛŋwaane mo nmo nam ŋɔge amo jwona yam n woli da n jege n ma‑n viira?” 31Jakob ma leiri Laban we, “Foone mo jaane amo, kokuri to amo ya boŋe we nmo wó ma dam mo n vere n bukwa bam amo tei ne. 32Se ko daare, nmo ná nɛ n jwona yam nɔɔno wolo tei ne, konto tu maŋe se o te mo. Debam maama fara bam yiga ne ywo, fɔge n nii n ná wó na n woŋo amo wonnu tem wone. N nam ná nɛ kolo, se n kwei.” Jakob déem na tage konto to, o wo lɔre we Racheli mo ŋɔge o kwo jwona yam.

33Laban laam ma zo Jakob vwei dem wone, de Leah vwei dem wone, de ka-nyaana balei bam vwei dem wone ye o wo nɛ kolokolo. O na nwoŋi Leah vwei dem ne to mo o vei o zo Racheli vwei dem. 34Racheli déem ya kwei o kwo jwona yam o ke o kone dem pɔlɔ ne mo ye o laam jei pɔlɔ kom baŋa ne. Laban ma beeri o taane vwei dem jei maama ne ye o wo nɛ kolokolo. 35Racheli ma ta de o kwo we, “Amo tu, yé pa se n bane zaŋe, se amo bá wane a zaŋe wɛɛne, kokuri to, amo wo a zarem wone mo.” Ko ma pa se o beeri wuu ye o wo nɛ o sɔŋɔ jwona yam.

36Jakob bane ma zaŋe ye o bwɛ Laban. O ma bwei‑o o we, “Amo ke bɛ mo a ja a chɔge? Amo ke lwarem dɔ mo ye nmo laam tɔge amo nɛ tento? 37Nmo na tiini n beeri n buŋi amo zela yam maama wone to, n nɛ woŋo kolo na ye nmo sɔŋɔ woŋo to da na? Nmo ná nɛ woŋo ye ko ye n nyem, se n ja-ko n ba n zege ywo se nmo chorro tem de amo chorro tem maama yia tɔge ya na. Banto laam mo wó bore bora ba pa debam balei. 38Amo na wo nmo tei ne to bena finlei mo tento. Nmo pei sem de n bone dem wo chaare puga ba yage. Amo nam wo le n vara bam wone pi-bɛa dedoa de a di. 39Kago-vara mo ná maŋe ba ja nmo vara bam wone ba tore tore de, a ba jaane-ba a tui n tei ne se n nii. Amo nam yeini a jwoori a yiri varem wom konto mo a pa‑m. Ŋweena ná vere woŋo, wea ne de tete ne maama, nmo wó pa se a jwoori a yiri-ko mo a pa‑m. 40Amo na toŋe a pa‑m tei to, fonyogo déem mage-ne wea ne, ye tete ne waaro zoore-ne dedɛ. Dɔɔm de maa ba tui a yia ne. 41Ko déem ye konto mo bena finlei yalo maama wone amo na wo nmo sɔŋɔ kom ne to. Amo toŋe bena fuga-yana mo n bukwa balei bam ŋwaane, ye a daare a toŋe bena yaredo nmo vara bam de ŋwaane. Nmo déem ta yeini n leini amo ŋweero tem kuni fuga. 42Ko nam ye Wɛ mo woli-ne, o na ye a kwo Abaraham Wɛ wom ye Izaak dé kɔre‑o to. Ko nam ya ná dae Wɛ na wo amo tei ne to ŋwaane, nmo ya lage n bane amo n yage chwoŋa ne de je-kore mo. Wɛ nam nɛ ko na tiini ko zo amo yera ye n bɛɛse-ne totoŋa yam baŋa ne tei to. Konto ŋwaane mo pa se o ba nmo tei diim tete ne o bwei nmo.”

43Laban ma leiri Jakob ye o we, “Kaana bam ye amo bukwa mo, bia bam ye amo bia mo, ye vara bam de ye amo vara mo. Chega to, woŋo kolo maama n yia na nae to ye amo nyem. De konto maama de, a jeŋa daa tera de a bukwa banto de bia balo ba na loge to. 44Konto to, pa se dé gwoni ni dé pa daane, se ko taa ye maana debam balei laŋa ne.”

45Jakob na nigi konto to, o ma kwei kandwɛ o chwi-de nenɛɛne ywei dwoŋi. 46O ma ta de o fara bam we, “Twɛ twɛ-na kandwa á ja á ba-na ywo.” Nɔɔna bam ma la kandwa yam ye ba dogele-ya pa se ya di wɛɛne. Jakob de Laban laam ma jeini kandwa-pwoa yam teiŋa ne ba di wodiu. 47Laban ma bwoŋi jei sem yere we ‘Jegare-Sahadufa’, ye Jakob de bwoŋi jei sem we ‘Galeede’. 48Laban maa we, “Zem dɛ dem ne kandwa-pwoa yanto na dogele to ye maana mo debam balei laŋa ne.” Mo kokuri jei sem yere ye Galeede. 49Ba déem ta bwoi jei sem we ‘Mizipa’ mo, kokuri to Laban tage we, “Baŋa Wɛ wó taa yere debam maama, nenɛɛne dé ná maŋe dé wo yiga yiga da-tei ne.#31:49 Mizipa kuri mo ye yerem jeiga 50Nenɛɛne nmo ná yaare amo bukwa bam naa n ná n daa‑n ná vei n di kaana badwonna n woli amo bukwa bam wone, nam guli we nɔɔn-nɔɔno ná seene o tere debam tei ne, ko ye Wɛ mo ye maana debam balei laŋa ne.”

51Laban daa ta ma ta de Jakob we, “Fɔge n nii kandwa-pwoa yam mo, dedaane kandwɛ amo na chwi ne ywei dwoŋi to. Ya maama zege nmo de amo laŋa tetare ne mo. 52Kandwa-pwoa yanto dedaane ywei dento maa ye maana ya pae debam. Amo bá gaale kandwa yanto a kɛ a ba a yi nmo laŋa kam ne a ke‑m zonne, ye nmo de nam bá gaale-ya se n kɛ n ba amo de laŋa kam ne n ke amo zonne. 53Debam kwoa bam Wɛ, Abaraham Wɛ wom, de Nahora Wɛ wom mo wó taa bore bora debam balei laŋa ne.” Jakob laam ma sɛ ye o du duuri Baŋa Wɛ wom o kwo Izaak na kɔre to yere ŋwaane. 54O laam ma go varem o ma kaane o pa Wɛ zwonnu laŋa kam ne ye o daare o bwoŋi o fara bam maama se ba ba ba di ded‑o. Ba na di ba ti to, ba ma maŋe da ba peini se tega poore.

55Tega na poore zezeŋa ne to, Laban ma kukwori o bukwa bam de ba bia bam ye o kwei Wɛ zaane o ma swɛ ba swolim. O laam ma kɛ o jwoori sɔŋɔ.

Currently Selected:

Pulim 31: KBG

Highlight

Copy