Pulim 29

Jakob yi Mesopotamia

1Jakob daa ma to o chwoŋa kam ne o maa kɛa ye o vo o yi wɛ-puli seeni nɔɔna bam teene dem. 2Dáane mo o nɛ vole na wo pwola kadwoŋi ne. Pei kɔgɔ kuni betɔ laam tigi se bwola de vole dem, kokuri to nayera bam jege se ba mɔ vole dem konto na mo ba nye pei sem. Kandwɛ delo déem na kwoli vole dem ni to maa daga dedɛ. 3Vara bam maama ná yeini ba jeeri da ba ti, nayera bam laam yeini ba bibili kandwɛ dem ba yage dáa ne mo ye ba mɔ na ba nye pei sem. Ko kwaga ne ba daa yeini ba jwoori ba ma kandwɛ dem ba ma ba pu vole dem ni.

4Jakob ma vo o bwei nayera bam we, “Amo chorro, abam nwoŋi yei mo?” Ba ma leiri we, “Debam nwoŋi Haran mo.” 5O ma bwei-ba o we, “Se abam yei Nahora naa kam na ye Laban to na?” Ba ma leiri we, “Ɛɛ, dé yei‑o.” 6Jakob daa ma bwei-ba o we, “O jege yazura na?” Ba ma leiri we, “Ɛɛ, o jege yazura. Nii o bukɔ Racheli na kale pei sem o maa beena.” 7O maa we, “Nii-na ywo, wea kam daa taa dana. Ko ta wo yi maŋa kalo á na wó pa se vara bam jeeri ba sii to. Nam mɔ-na na bam á pa pei sem se se nyɔ se á laam pa se jwoori se vo se di gaao.” 8Ba ma leiri ba we, “Dé bá wane dé ke konto. Ko jege se vara bam maama mo jeeri se dé laam bibili kandwɛ dem na wo vole dem ni ne to dé ke dáa ne, se dé wane dé mɔ na dé nye pei sem.”

9Jakob daa ta na zege o lare de nayera bam konto to, mo Racheli yi da de o kwo pei sem. O déem ye nayero mo. 10O ma nii o na Racheli na ye o nu nabɔ Laban bukɔ ye o kale o kwo pei sem to. O ma vo o bibili kandwɛ delo na pugi vole dem ni to o yage dáa ne ye o daare o mɔ na o nye o nabera wom pei sem. 11O laam ma vo Racheli tei o kukwori‑o ye o keeri wɛ-wɛ. 12O ma ta de Racheli o we o nwoŋi wonto kwo wom dwi dem wone mo, ye Rebeka mo loge‑o. Racheli na nigi konto to, o ma duri o vo o ta de o kwo. 13O kwo Laban na yɔɔre o ni o nakɔ bu Jakob ŋwa konto to, o ma ke lela o nwoŋi o vo o jeeri‑o. O ma kukwori‑o lanyerane. O ma daare o ja‑o o vo o zo o sɔŋɔ. Jakob laam ma tole taane dem maama o bere‑o.

14Laban laam ma ta ded‑o we, “Chega to, nmo seene n ye amo tete yera mo de amo jana.” Jakob ma maŋe o sɔŋɔ ne se ko yi chana.

Jakob di Leah de Racheli o ma ke kaana

15Laban déem ma ta de Jakob we, “Ko wo maŋe se nmo ta‑n toŋe n pae amo zɛɛra, n na ye amo choro to ŋwaane. Ta n bere-ne, ŋweero tɔ mo nmo wó ta‑n lage amo tei ne?” 16Laban déem maa jege bukwa balei, nakwe wom yere déem mo ye Leah, ye nyaane wom yere ye Racheli. 17Leah yibia kam déem maa lamma, se ko dwoi Racheli, wonto ye-daa kam maŋe daane mo ye o tiini o lamma yi ne. 18Jakob boboŋa ma zo Racheli wone ye o ta de Laban o we, “Nmo ná sɛ, amo wó toŋe a pa nmo bena yarepɛ se a jwoŋi n bukɔ-balaŋa Racheli a ma ke kaane.” 19Laban ma leiri o we, “A ná kwei‑o a pa nmo, ko wó taa gare a ná pɛ nɔn-gaa. Ta‑n zoore amo tei ne ywo-seeni.”

20Jakob ma seene o toŋe bena yarepɛ maama se o wane o jwoŋi Racheli, ye bena yam nye nenɛɛne da fenfee yerane mo o tei ne, o swono kom o na jege o pa‑o to ŋwaane. 21Jakob laam ma ta de Laban we, “Pa-ne a kaane wom. A maŋa kam n na pɛ-ne to ti, ye amo de laam lage se a peini ded‑o mo.” 22Laban ma ja teo kom nɔɔna bam maama se ba jeeri daane ba di kadiri kuri. 23Tega na yi to, o laam ma gane Jakob o ja o bukɔ Leah o ja o zo o pa Jakob, ye Jakob de peini ded‑o. 24Laban daa ta ma kwei o kaba-kana Zilipa o pa o bukɔ Leah se o ma o ji o ka-nyaane.

25Tega na poore to, mo Jakob maane we ko ye Leah mo! Ko ma pa se o ta de Laban we, “Bɛ mo ye nmo laam ke amo konto? Amo toŋe taa a pa‑m Racheli ŋwaane mo, ko dae konto mo na? Bɛ laam nam mo ke ye nmo gane amo?” 26Laban ma leiri we, “Ko ba ke konto debam teo ne, se nɔɔno kwei o bukɔ-balaŋa o yei o pa baro ye o zembaaro ta jei sɔŋɔ ne. 27Zuri n yera se kadiri dem da yarepɛ yam kɛ, se dé daare se a pa‑m o nyaane wom de a woli da, nenɛɛne n daa‑n ná wó toŋe bena yarepɛ daga n pa-ne.”

28Jakob ma sɛ. O de Leah ma ti ba ka-doore da yam, ye Laban kwei o bukɔ Racheli o pa‑o se o ma ji o kaane. 29Laban daa ta ma kwei o kaba-kana Biliha o pa o bukɔ Racheli se o ma o ke o ka-nyaane. 30Jakob ma peini de Racheli de, ye o laam za swoi Racheli o dwoi Leah. O daa ma toŋe bena yarepɛ o pa Laban.

Jakob bia bam taane

31 Baŋa Wɛ déem maane we Jakob ba tiini o jege Leah swono. Konto ŋwaane o ma pa wonto lora pore lanyerane. Ko daare Racheli maa ye kadega. 32Leah ma ja puga ye o lo bakeira. O ma pa o yere we ‘Ruben’, kokuri to o we, “Tento maama ye Baŋa Wɛ na nɛ amo wo-chechɔgɔ kom to ŋwaane mo. Amo baro wom laam wó taa swoi-ne.”

33O daa ma ja puga ye o daa ta lo bakeira. O maa we, “Tento mo Baŋa Wɛ lɔre we amo gɛ nɔɔna swono, mo kokuri o pɛ a lo wonto de.” O ma pa wonto yere we ‘Simeon’.

34Leah daa ta ma ja puga o lo bakeira. O laam ma ta we, “Leile konto, amo baro wom laam wó tane de amo, kokuri to a loge bakeiri setɔ a pa‑o.” O ma pa o yere we ‘Levi’.

35O ta ma jwoori o ja puga ye o lo bakeira o ta woli da. O ma ta we, “Amo laam wó taa tei Baŋa Wɛ mo.” Mo kokuri o déem pɛ wonto yere we ‘Judah’. O laam ma kwori bu-lore.

Currently Selected:

Pulim 29: KBG

Highlight

Copy