Pulim 24

Izaak kadiri

1Abaraham déem ma tiini o kwe ye o bena gaale. O chwoŋa maama wone Baŋa Wɛ ma ke zaane o ke o yuu ne. 2O ma bwoŋi o sɔŋɔ tontoŋena bam maama yiga tu wom, wolo na nii o wonnu maama baŋa ne to ye o ta ded‑o we, “Kwei n jeŋa n ke amo chwei kuri ne se n du duuri. 3Nmo jege se n du duuri Baŋa Wɛ yere ŋwaane, o na tei wɛyuu de tega baŋa to. Du duuri n pa-ne we, debam na seene dé zoore Kanaan tiina bam wone to, nmo bá beeri kaane ba bukwa bam wone n pa amo bu Izaak. 4Nmo nam wó jwoori n vo amo nabaara teo kom, de a dwi tiina na wo mɛ to mo n beeri kaane n pa‑o.”

5Tontoŋeno wom ma bwei‑o we, “Se kaane wom ná wo sɛ se o tɔge de amo o jwoori o ba tega kanto ne, a wó ke tɛ mo? A wó ja n bu wom a jwoori a vo mɛ n na nwoŋi n ba ywo to mo na?” 6Abaraham ma leiri o ta we, “Ta‑n yei se n daa‑n yé ja amo bu wom n jwoori dáane. 7Ko ye Baŋa Wɛ wom na tei wɛyuu to mo jaane amo o ja o nwoŋi a kwo sɔŋɔ ne se a yage a dwi tiina tega kam. Wonto mo ŋɔɔne de amo o du duuri we ‘Nmo dwi dem mo a wó seene a pa tega kanto’.#Pulim 12:7 Wonto mo lage o toŋe o maleka se ka tɔge nmo yiga ka vo se nmo wane n na kaane dáane n ja n ba n pa amo bu wom. 8Kaane wom nam ná wo sɛ se o tɔge de nmo o ba ywo-seeni, kanto maŋa ne mo duuri dento daa bá taa wo n yuu ne. Nmo yé ja amo bu wom n jwoori n vo dáane.” 9Tontoŋeno wom ma sɛ o kwei o jeŋa o ke o tu Abaraham chwei kuri ne ye o du duuri, taane dem konto ŋwaane.

10Tontoŋeno wom laam ma le kona fuga Abaraham kona yam wone o ma o zeŋe o tu wom wo-laaro dwi maama o ja o woli da o kɛ. O ma kwei chwoŋa se o vo Mesopotamia seeni. O ma vo o yi teo kolo Nahora déem na zoore to.#Pulim 11:29 11O na yi teo kom ni to, o ma pa se o kona yam kuni ya nadwoona ya tigi vole ni ne. Ko déem ye dedaan-ni ne mo, maŋa kalo kaana na nwoŋi ba vei ba mɔɔne na to. 12O ma lwoori Wɛ ye o we, “Baŋa Wɛ, amo tu Abaraham Wɛ, nam pa se ko ke lanyerane ko pa-ne zem dɛ dem ne, se n daare n duri amo tu Abaraham ŋwaŋa. 13Nii! Amo zege vole dento ni ne mo, ye teo kom bukwa bam wó ba se ba mɔ na. 14Amo ná tage dedaane busankana kalo we ‘Ja! Zoore n kɔɔro wom n zege se n ke na n pa-ne se a nyɔ,’ ye konto tu wom ná taga we ‘Nyɔ, se n daare se a mɔ na a pa n kona yam se ya de nyɔ,’ pa se wonto taa ye wolo nmo na kuri se n pa Izaak to. Ko nam ná ke konto mo, amo wó lɔre we nmo seene n duri amo tu wom ŋwaŋa.”

15O daa ta na wora o lwoori Wɛ konto to, mo o nɛ Rebeka na vei o beene, ye o zeŋe kɔɔro o bakale baŋa ne. O déem ye Bɛtuweli bukɔ mo. Bɛtuweli de maa ye Abaraham choro Nahora de o kaane Milika bu. 16Busankana kam déem tiini ka lamma. O déem maa ta yeiri baaro. O ma yi vole dem ni, o mɔ na o su o kɔɔro wom ye o jwoori o bɛ.

17Abaraham tontoŋeno wom ma ke lela o jeeri‑o ye o we, “Ja! Twei na n kɔɔro wom ne n pa-ne se a nyɔ.” 18O de maa we, “Amo tu, nam nyɔ”, ye o ke lela o zoore o kɔɔro wom o zeeri o jea ne se o nyɔ. 19O na pɛ se o nyɔ o ti to, busankana kam maa we, “A lage a mɔ na bam mo a pa n kona yam de, se ya maama nyɔ ya su.” 20O laam ma ke lela o lwo na bam o ke vara na nyɔɔm gwoŋo wone, ye o daa jwoori vole dem ne o mɔ na bam o woli da. O ke konto mo taa o mɔ na bam pa se kona yam maama nyɔ ya su. 21Nɔɔno wom de maa wo tage kolokolo, ye o laam fɔge o nii busankana kam lanyerane se o lɔre Baŋa Wɛ seene o pa se o chwoŋa kam veiŋa ke lanyerane naa ko dae konto.

22Kona yam na nyɔge na bam ya ti to, mo nɔɔno wom le sabu-seŋa jafole delo ba déem na ke momwa ne to dedaane jeŋa bɛ selei se o pa Rebeka. Wonnu tem konto déem tiini te jege sabu. 23O laam ma bwei‑o we, “Nmo ye wɔ bukɔ mo? Jei nam wó taa wo abam sɔŋɔ ne se a peini tete dento se tega poore na?” 24Rebeka ma leiri o we, “Amo ye Bɛtuweli bukɔ mo. Wonto maa ye Milika de Nahora bu.” 25O ta ma woli da we, “Debam jege jei se nmo dedaane balo na tɔge‑m to peini da. Vara wodiu dedɛ de wora se á kona yam de di ya su.”

26O na nigi konto to, nɔɔno wom ma chɔɔle tega ne o zuli Baŋa Wɛ, 27ye o we, “Amo wó tei Baŋa Wɛ wom na ye amo tu Abaraham Wɛ to. Kokuri to, o seene o zege o chega kam wone mo ye o swoi amo tu Abaraham. Ko nam ná ye amo, Baŋa Wɛ tɔge amo yiga mo chwoŋa kam maama ne o ja-ne o ja o yi amo tu wom tete nɔɔna wone.”

28Rebeka ma ke lela o duri o vo sɔŋɔ o guli wonnu tento maama de o nu de ba sɔŋɔ tiina bam. 29O déem jege nabɔ o yere na ye Laban. Wonto ma ke lela o duri o vo se o jeeri nɔɔno wom vole dem ni ne. 30O ya maŋe o na jafole dem o nakɔ wom momwɛ ne de bɛ sem na wo o je sem ne to, ye o ta ni taane delo maama nɔɔno wom ya na tage de Rebeka to. Laban ma ke lela o nwoŋi o vo o na nɔɔno wom na zege vole dem ni ne de o kona yam. 31O maa we, “Baŋa Wɛ ke zaane nmo yuu ne mo. Pa se dé vo sɔŋɔ. Bɛŋwaane mo nmo wó ta‑n zege pwola kanto ne? Amo nam maŋe a kwɛ diga nmo ŋwaane, ye kona yam de wó na jei ya taa tiga.”

32Nɔɔno wom laam ma tɔge o vo o zo ba sɔŋɔ kom. Laban ma zoore o kona yam zela yam. O ma beeri vara wodiu o pa kona yam, ye o daare o ke na se Abaraham tontoŋeno wom de balo na tɔge dedaane‑o to zare ba nɛ. 33Ba na jaane wodiu kom ba ba to, mo Abaraham tontoŋeno wom we, “Amo ná wo tage kolo na wo a ni ne to, a bá di wodiu.” Laban maa we, “Nam ta n bere debam.”

34O laam ma tole taane dem o we:

“Amo ye Abaraham tontoŋeno mo. 35Baŋa Wɛ nam mo tiini o ke zaane o ke amo tu wom yuu ne pa se o laam ji jejegero tu. Wɛ pɛ‑o peeni, de bone, de naane, ko woli de lu-nyenno de sabu-seŋa, de tontoŋe-baara de tontoŋe-kana, dedaane kona de bonɛ. 36Amo tu kaane Sarah ya loge bakeira o pa‑o mo o kokweero maŋa kam ne. Amo tu wom de kwei woŋo kolo maama o na jege to mo o pa bu wom konto. 37Amo tu wom laam ya ma pa se amo du duuri, ye o ta we ‘N ná wó beeri kaane se n pa a bu wom, yé beeri Kanaan tiina bukwa bam wone, mɛ tento amo na zoore leile to. 38Nam jwoori n vo amo nabaara teo kom n lage kaane amo tete sɔ-yuu kom ne n pa amo bu wom.’ 39Amo de ma bwei a tu wom we ‘Se kaane wom ná ve se o tɔge de amo o jwoori o ba, se a ke tɛ mo?’

40O de ma leiri we, ‘Baŋa Wɛ wolo wom a na sɛ o ni to wó toŋe o maleka se o da nmo yiga se nmo chwoŋa kam veiŋa ke lanyerane. Ko wó pa se n na kaane n pa amo bu wom se o nwoŋi amo tete sɔ-yuu kom ne, amo kwo dwi tiina wone. 41Nmo nam ná lwoori n vo amo sɔ-yuu kom ne, ye ba ve‑m ba bukɔ wom, n laam wó sii duuri delo a na pɛ se n du to wone.’

42Amo zem ma na tu a yi vole dem ni to, mo a lwoori Wɛ we, ‘Baŋa Wɛ, na ye amo tu Abaraham Wɛ to, nenɛɛne ko ná su nmo yi, sɛ se a chwoŋa kam veiŋa ke lanyerane. 43Nii! Amo zege vole dem ni ne mo ywo. Bukɔ wolo ná tu ywo se o mɔ na ye a ta ded‑o we, “Ja! Pa-ne n kɔɔro wom wo na fee se a nyɔ,” 44ye kotu ná tage de amo we, “Nyɔ, se a ta wó mɔ na se n kona yam de nyɔ,” sɛ se o taa ye kaane wolo Baŋa Wɛ na kuri se o zo amo tu wom bu-baaro to.’

45Tɔ. Amo bere a maŋe a wo lwoori wɛ-lworo kom a bochare ne a ti dedaane Rebeka na maa beena, de o bakale baŋa kɔɔro. O ma yi vole dem o mɔ na bam, ye amo de ta ded‑o we ‘Ja! Pa-ne na se a nyɔ.’ 46O ma ke lela o zoore o kɔɔro wom ye o we ‘Nyɔ, se a ta wó pa n kona yam de na se ya nyɔ.’ Amo ma nyɔ ye o seene o mɔ na o pa kona yam ye ya nyɔ. 47Amo de ma bwei‑o we ‘Nmo ye wɔ bukɔ mo?’ O ma leiri we ‘Amo ye Bɛtuweli bukɔ mo. Amo kwo wom mo ye wolo Milika na loga o pa Nahora to.’ A na lɔre konto to, mo a laam kwei jafole dem a ke o momwɛ ne a daare a kwei bɛ sem a ke o je sem ne. 48A ma chɔɔle tega ne a tei Baŋa Wɛ wom na ye amo tu Abaraham Wɛ to. Wɛ wom konto mo dɛ amo yiga ye o bere-ne chwo-laao kom se a wane a na amo tu wom choro bukɔ se o taa ye a tu wom bu-kaane.

49Konto to, ko laam wo abam tei ne. Á ná sɛ se á ke amo tu wom lanyerane ye á ke chega á pa‑o, se á ta á bere-ne. Á nam daa ná lage se á lɔ o kwaga ne mo, ta ta-na á bere-ne, se amo laam wó lɔre chwoŋa kalo a na wó tɔge to.”

50Laban de Bɛtuweli ma leiri we, “Tento nwoŋi Baŋa Wɛ tei ne mo. Debam bá wane de ta kolokolo dede‑m nenɛɛne dé sɛ naa dé wo sɛ. 51Nii Rebeka da, ja‑o n viiri n vo n pa n tu bu wom se o taa ye o kaane, nenɛɛne Baŋa Wɛ na bere tei to.”

52Abaraham tontoŋeno wom na nigi ba na tage tei to, o ma tiiri tega ne o ke Baŋa Wɛ lei. 53O laam ma le zela o tampɔgɔ ne o kwei o pa Rebeka. Pɛɛra yam déem ye sabu-seŋa dedaane lu-nyenno wonnu tedwonna ko woli de gwaaro. O ta ma le pɛɛra yalo na tiini ya ke sabu to o pa Rebeka nabɔ wom de o nu. 54Konto maama kwaga ne, o de nɔɔna balo na tɔge daane to laam ma di ba daare ba nyɔ ye ba peini sɔŋɔ kom ne pa se tega poore.

Tega na poore ye ba zaŋe zezeŋa ne to mo Abaraham tontoŋeno wom tage we, “Yage-na amo chwoŋa ne se a jwoori a vo a tu wom tei ne.” 55Bukɔ wom nabɔ de o nu ma leiri we, “Yage se bukɔ wom maŋe debam tei ne se ko yi nenɛɛne da fuga to, se abam laam viiri.” 56O de ma leiri we, “Baŋa Wɛ na lwoori o pa se amo chwoŋa kam ke lanyerane to, daa yé cheiŋi-na amo. Pa-na pwola se a jwoori amo tu wom tei.” 57Ba maa we, “Yage se dé bwoŋi busankana kam dé bwei‑o dé nii.” 58Ba ma bwoŋi Rebeka ba bwei‑o we, “Nmo wó sɛ n da dedaane nɔɔno wonto n kɛ na?” O ma leiri we, “Amo wó vo.”

59Ba ma sɛ ye ba bane ba nakɔ Rebeka de wolo na wó taa nii o baŋa ne to ba yage chwoŋa ne, ko woli de Abaraham tontoŋeno wom de balo na tɔge ded‑o to. 60Ba ma kwei Wɛ zaane ba ma swɛ Rebeka swolim ye ba ta ded‑o we:

“Debam nakɔ, Wɛ wó pa se nmo dwi puli

de yi morro morro.

Wɛ wó pa se nmo dwi dem taa jege dam

se ba jwoŋi ba dona teene ba taa tei.”

61Rebeka de o ka-nyaana bam ma ti ba yiga ye ba di kona yam ba tɔge de nɔɔno wom ba kɛ. Mo ko na ke tei ye Abaraham tontoŋeno wom ja Rebeka o ja viiri.

62Izaak déem ya zaŋe Beeri Lahayi Royi ne o vo o zoore tega-kuri seeni kagoa kam ne mo. 63Dedaan-ni ne o ma nwoŋi o vo o kara o kare o beera. O ma kwoni o yuu wɛɛne ye o na kona na vei ya beena. 64Rebeka de ma kwoni o yuu o nii ye o na Izaak. O ma zege o kone dem yuu ne o faŋe o chu tega ne. 65Rebeka daa ma bwei Abaraham tontoŋeno wom we, “Wɔ mo tento kara kam ne o na vei o beene se o jeeri debam to?” O ma leiri we, “Amo tu Izaak mo.” O na lɔre konto to, o ma kwei o yu-gare-daŋɔ kom o ma o kwoli o yibia.

66Abaraham tontoŋeno wom laam ma lwoni o bere Izaak o na ke tei maama to. 67Izaak ma ja Rebeka o zo o nu Sarah vwei dem wone. O déem ma di o ma o ke kaane. Izaak maa swoi‑o lanyerane. Izaak wo déem ya chɔge de o nu toone dem ye Rebeka laam pa se o wo jwoori ko zuri.

Currently Selected:

Pulim 24: KBG

Highlight

Copy