Pulim 23

Sarah toone

1Sarah déem jege bena bi de finlei-yarepɛ (127) mo, 2ye o laam ba o te Kiriaf-Araba ne. Ko ye Kanaan teo mo, ko yere dedwoŋi mo Heboron. Abaraham ma zaŋe o vo se o keeri Sarah ye o ka yi-na o ŋwaane.

3Abaraham kaane wom na tega to, o ma zaŋe o baŋa ne ye o vo se o ŋɔɔne dedaane Hiti tiina bam. O maa we, 4“Amo ye veiru mo a na zoore abam tetare ne. A nam lwoori tega se á pa-ne se ko taa ye mɛ amo na wó suli a too wom da to.”

5Hiti tiina bam ma leiri Abaraham we, 6“Cheigi ywo-seeni. Nmo ye dedɛɛro kamunu mo debam tetare ne. Konto to, kuri debam yibeela yam wone delo na lamma de pa‑m to se n suli n too wom da. Nɔɔn-nɔɔno bá ve nmo we n yé suli n too wom o yibeeli ne.”

7Abaraham ma zaŋe wɛɛne o tiiri tega ne Hiti tiina bam na ye tega kam tiina to yiga ne. 8O ma ta-ba o we, “Abam nam ná sɛ se amo suli a kaane wom ywo-seeni, se á sɛ se á lwoori Zohare bu Eforon á pa-ne. 9Lwoori‑o á pa-ne se o kwei Machapela peo-bɔɔne dem na wo o kara kam siseini ni ne to o pa-ne. Ko na ye o nyem to, amo wó ŋwe ko sabu kom ni maama a pa‑o. Dé wó ke konto abam maama yiga ne se bɔɔne dem laam ji yibeeli de pa-ne.”

10Hiti tu Eforon de déem jei o nɔɔna bam wone. O ma leiri Abaraham tento pa se Hiti tiina balo maama déem na dɛ ba jeeri teo kom manchwo-peena yam ni ne to de cheigi. 11O maa we, “Amo tu, cheigi ywo-seeni. Amo wó kwei kara kam mo a pa‑m zɛɛra, ye a ta wó pa‑m peo-bɔɔne delo na wo ka laŋa ne to a woli da. Amo nɔɔna bam yiga ne mo a kwei a pa‑m. Véi n suli n kaane wom da.”

12Abaraham daa ma tiiri tega ne teo kom nɔɔna bam yiga ne. 13O ma ta de Eforon pa se ba maama ni ye o we, “Nam cheigi a na tɛ kolo to. Amo wó ŋwe tega kam sabu a pa‑m. Sɛ se n jwoŋi sabu kom se amo de wane a kwei a kaane wom a suli dáane.”

14Eforon ma leiri Abaraham we, 15“Amo tu, cheigi-ne. Tega kam sabu maŋe dedaane lu-nyenno sabu-dala bia yana yerane mo. Konto nam dae kolo debam na wó daane daane ko baŋa ne to. Kwei-ka n ma n suli n kaane wom.”

16Abaraham ma sɛ se o ŋwe tega kam sabu kom ni se ko maŋe de Eforon na bere tei Hiti tiina bam maama yiga ne to. O ma maŋe lu-nyenno sabu-dala bia yana mo o pa‑o se ko maŋe de maŋem delo pipiu-tiina bam déem na jege ba maŋa yaga ne to.

17Ko déem ke konto ye Eforon kara kam na wo Machapela ne ye ka bwola de Mamere to ba ka ji Abaraham nyem. Kara kam konto dedaane peo-bɔɔne delo na wo ka wone to, dedaane teeni delo maama na wo kara kam wone to laam ma ji Abaraham nyem. 18O déem yeigi-ka Hiti tiina balo maama na jeeri teo kom manchwo-peena yam ni ne to tei ne mo ye ba sɛ we ko ye o nyem.

19Ko maama na ti to, mo Abaraham laam suli o kaane Sarah Machapela peo-bɔɔne dem wone. Kara kam bwola de Mamere. Konto ye Kanaan te-balaŋa mo ye ko twɛ Heboron. 20Mo ko na ke tei ye Hiti tiina bam kwei tega kam konto de ka peo-bɔɔne dem ba pa Abaraham se ko taa ye o yibeela jei to.

Currently Selected:

Pulim 23: KBG

Highlight

Copy