Pulim 22

Wɛ faŋe Abaraham o nii

1Ko na ke fee to, Wɛ ma ke Abaraham o nii. O ma bwoŋi‑o o ta we, “Abaraham!” O ma leiri we, “Nii-ne.” 2Wɛ laam maa we, “Ja n bu-doa Izaak wom n na tiini n swoi to, n vo Moria laŋa kam se n ma‑o n kaane dáane n zwɛ‑o n pa-ne, peero tem dedoa yuu ne a na wó bere‑m to.”#Hiburu 11:17-19

3Tega na poore to, Abaraham ma zaŋe zezeŋa ne o ja o bonaga se o kɛ chwoŋa. O ma ja o tontoŋena balei dedaane o bu-baaro Izaak o woli da. O ma gwoni da-kore selo o na wó ma o zwɛ pɛɛra yam to. O laam ma kwei chwoŋa o maa vei jei selo Wɛ na tage we o véi to. 4Da yatɔ dɛ dem ne mo Abaraham kwoni o yuu wɛɛne o na jei sem yiga ne. 5O ma ta de o tontoŋena bam we, “Abam de bonaga kam maŋe-na ywo se amo dedaane bakeira kam vo dáane. Dé wó vo de zuli Wɛ ye dé daa ta jwoori dé ba abam tei ne.”

6Abaraham na tage konto to, o ma kwei dɛ sem o zeŋe o bu-baaro Izaak. Wonto tete laam maa zei mini dem de seo kom. Banto balei na vei ba maa kɛ to, 7Izaak ma bwoŋi o kwo Abaraham ye o ta o we, “Amo kwo.” O de ma leiri we, “Amo bu, nmo we bɛ mo?” Izaak maa we, “A nɛ mini dem de dɛ sem na wo ywo to, se pipeila kalo dé na lage dé zwɛ kaanem dé pa Wɛ to laam nam bɛ?” 8Abaraham ma leiri we, “Amo bu, Wɛ tete mo wó na pipeila kalo dé na wó zwɛ dé ma ke kaanem dem to o pa debam.”#Jɔn 1:29

Banto balei daa ta maa vei yiga. 9Ba na yi jei selo Wɛ na tage o bere Abaraham to, o ma tigisi kandwa o lɔ bimbini dáane ye o tɛɛse dɛ sem de baŋa ne. O laam ma vɔ o bu-baaro Izaak ye o gɔ‑o o daŋe dɛ sem baŋa ne. 10O laam ma tore o jeŋa o le seo kom se o go o bu wom.#Jemsi 2:21-23 11Bedwe baŋa ne mo Baŋa Wɛ maleka kam zege Wɛ telaao ne ka bwoŋi‑o we, “Abaraham! Abaraham!” O de ma sɛ o we, “Nii-ne da.” 12Maleka kam ma ta ka we, “Yé ke n bu wom zonne. Nam yé chɔge‑o. Amo laam maane we nmo seene n kɔre Wɛ, kokuri to nmo wo ve se n kwei n bu-doa kam n pa Baŋa Wɛ.”

13Abaraham ma kwoni o yuu wɛɛne ye o na we pi-bɛa mo zege sabara kadwoŋi wone, ka nyea na gerege ka wone to ŋwaane. O ma fɔɔre o yi pia kam tei o ja-ka o ba o ma o ke kaanem o zwɛ o pa Wɛ o ma o leiri o bu-baaro wom yuu ne. 14Ko déem ma pa se Abaraham bwoŋi jei sem konto yere we ‘Baŋa Wɛ wó pa’.#Nwoŋim 17:15 De zem maama de, nɔɔna ta yeini ba tɛ we, “Baŋa Wɛ peo kom yuu ne, pɛɛra wó taa wora.”

15 Baŋa Wɛ maleka kam daa ta ma zege Wɛ telaao ne ka bwoŋi Abaraham ka ke kuni belei 16ye ka we, “Cheigi Baŋa Wɛ na tage kolo to we, ‘Nmo na ke tento ye n wo ve se n kwei n bu-doa kam n pa amo mo, a dugi a tete ŋwaane mo we, 17amo wó seene a swɛ nmo swolim, ye a pa se nmo dwi dem puli dedɛ de taa daga nenɛɛne wɛyuu chalechwe sem dedaane naneo ni kasol-bia na daga tei to.#Pulim 32:12 Nmo dwi dem wó taa jege dam se ba jwoŋi ba dona teene ba taa tei. 18Ko ta lage ko tɔge nmo dwi dem baŋa ne mo se logo baŋa teene maama na zaane ba de baŋa ne, nmo tete na sɛ amo ni to ŋwaane.’ ”#Pulim 18:18; 26:5

19Abaraham de o bu Izaak laam ma jwoori o tontoŋena bam tei. Ba maama ma kwei Beeriseba chwoŋa kam ba maa kɛa. Ba na yi da to, Abaraham ma maŋe Beeriseba ne.

20Ko na ke fee ko woli da to, Abaraham ma ni we, o choro Nahora kaane Milika de loge bu-baara o pa‑o. 21Bia bam yera mo tento: Yuzi, bu-kwea kam, ko woli de o nyaane Buzi, de Kemweli, o na ye Aram kwo to, 22de Chesed, de Hazo, de Pilidasi, de Jidalafa, dedaane Bɛtuweli.

23Bɛtuweli ma ji Rebeka kwo. Milika déem loge bakeiri nana banto mo o pa Abaraham choro Nahora. 24Nahora déem jege ka-bia, o yere na ye Reuma. Wonto de déem ma lo bakeiri sento o pa‑o: Teba, de Gaham, de Tahasi, dedaane Maaka.

Currently Selected:

Pulim 22: KBG

Highlight

Copy