Pulim 21

Izaak lora kam taane

1 Baŋa Wɛ déem nii Sarah baŋa ne ye o seene o ke kolo o na tage ded‑o to o pa‑o. 2Sarah déem ma ja puga o lo bakeira o pa Abaraham o kokweero maŋa ne. Ko déem ke ko maŋe de maŋa kalo Wɛ na tage to mo.#Hiburu 11:11 3Abaraham ma pa bu wom yere we ‘Izaak’.#21:3 Izaak kuri mo ye o mɔna. 4Izaak na yi da nana to mo Abaraham gwoni o peini, nenɛɛne Wɛ na tage we o ke tei to.#Pulim 17:12 5Abaraham déem jege bena bi mo ye ba lo o bu-baaro Izaak ba pa‑o. 6Sarah maa we, “Wɛ jaane mwanno mo o ba o pa amo, ye wolo maama na nigi kolo na ke to, kotu wó da o woli de amo mo se dé mɔne.”

7O daa ta ma woli da o we, “Nɔɔn-nɔɔno ya bá wane o ta de Abaraham we Sarah wó wane o ja bia se ba ŋɔge yele. De konto maama de, amo loge bakeira a pa‑o o kokweero maŋa ne.”

Ba zeili Hagara dedaane Isameli ba yage

8Izaak ma ke nɔɔno ye ba kwori‑o yele. Dɛ dem konto ne, Abaraham ma bwoŋi nɔɔna se ba di kuri kamunu. 9Sarah déem ma na we Ejipti tiina bukɔ Hagara na loge bakeira kalo o pa Abaraham to zege da o ke Izaak o mɔna. 10O na nɛ to, o ma ta de Abaraham we, “Zeili kaane wolo na ye kabaa to de o bu-baaro wom se ba viiri, se kaane wonto bu wom bá tɔge de amo tete bu Izaak o pɔɔre nmo jejegero tem o taa tei.”

11Taane dem ma tiini de daane Abaraham, Isameli na ye o tete bu-baaro to ŋwaane. 12Wɛ ma ta ded‑o we, “Yé ta‑n pae se bakeira kam de n kaba-kana kam taane dem daane‑m. Nam cheigi Sarah na tage tei o bere‑m to, kokuri to, ko lage ko tɔge Izaak baŋa ne mo se nmo dwi dem ba de zege. 13Amo nam ta wó pa se kaba-kana kam bu-baaro wom dwi de puli de ji teo, o de na ye nmo bu to ŋwaane.”#Pulim 17:20; 25:12-18

14Tega na poore to zezeŋa ne to, Abaraham ma kwei wodiu o pa Hagara ye o daare o lwo na lɔɔ wone o pa‑o se o daŋe o bakala baŋa ne. O laam ma bane‑o de o bakeira kam o yage-ba chwoŋa ne. Hagara de ma to chwoŋa ne o kare Beeriseba kagoa kam yuu ne o beera. 15Lɔɔ kom wo na bam ma ti. O ma ja bu wom o vo jeini sabara kadwoŋi woro ne. 16O tete laam ma fɔɔre o vo dáa o jei se ko maŋe de nɔɔno na wó ta taŋa se ka yi mɛ to. O ma boŋe we, “Amo ba lage se a na a bu wom toone.” O na jei da to, o ma bobo se o taa keera.

17Wɛ ma ni bakeira kam na keeri to. Wɛ maleka kam maa zege Wɛ telaao ne ka bwoŋi Hagara ka we, “Hagara, bɛ mo kea? Yé ta‑n fona. Wɛ niga bu wom na tigi o keeri to. 18Zaŋe n vo n ja bu wom se o zaŋe, se amo wó pa se o dwi dem ji te-zɔŋɔ.” 19Wɛ laam ma puri o yia pa se o na vole na tigi da. O ma vo o mɔ na o su o lɔɔ kom ni ye o ja vo o pa bu wom se o nyɔ.

20Wɛ déem ma nii bu wom baŋa ne ye o ba o ke nɔɔno. O déem zoore kagoa kam yuu ne mo ye o ji tɔɔno chekke. 21Kagoa kam o na zoore mɛ to yere mo Paran. O na wora to, mo o nu vei o lage kaane Ejipti ne o swo o ba o pa‑o.

Abaraham de Abimeleka ke ni-mɔrɔ daane

22Da yam konto ni ne mo Abimeleka de Fikola na ye o jar-keira yiga tu to déem vei Abaraham tei. Ba ma ta de Abaraham we, “Debam maane we kolo maama nmo ná yeini n ke, Wɛ wo n tei ne mo. 23Konto to, laam du duuri Wɛ yiga ne we nmo bá‑n ke n gane amo kɔtaa, ko ná ye amo naa a bia bam, naa a dwi dem maama. Amo na ke‑m lanyerane to, nmo de wó ke amo lanyerane, ko ná ye amo de teo kolo nmo na ye veiru ko wone to maama.” 24Abaraham maa we, “Amo sɛ se a du duuri dem konto.”

25Abimeleka nɔɔna nam ya vere Abaraham vole dedwoŋi mo. Abaraham ma ŋɔɔne taane dem de Abimeleka. 26Abimeleka ma ta o we, “Amo wo lɔre wolo na ke konto to. Nmo wo tage ko taane n bere-ne, ye zem yerane mo amo laam lɔre ko ni ne.”

27Abaraham laam ma ja peeni, de bone, de naane o ja o nwoŋi o pa Abimeleka, ye banto balei ke ni-sɛɛm daane. 28Abaraham ma daare o le pi-chwa barepɛ o vara bam wone o zege dáa ne. 29Abimeleka ma bwei Abaraham we, “Bɛŋwaane mo nmo pɔɔre pi-chwa yam yarepɛ?” 30O ma leiri we, “Jwoŋi pi-chwa yarepɛ yam amo tei ne se ko taa ye maana we amo mo koge vole dento.” 31Ba déem ma bwoŋi jei sem konto we Beeriseba,#21:31 Beeriseba kuri mo ye vole delo ba na dugi duuri ko ŋwaane to. kokuri dáane mo nɔɔna banto balei déem dugi duuri.

32Ba na ke ni-sɛɛm dem konto Beeriseba ne ba ti to mo Abimeleka dedaane o jar-keira yiga tu Fikola jwoori ba vo Filisi tiina teo kom. 33Abaraham de ma zege Beeriseba ne o jeiri tio kodwoŋi ko yere na ye ‘Tamarisaka’ to. Dáane mo o bwoŋi Yuu-tu Baŋa Wɛ yere o zuli‑o, o na ye Wɛ wolo na maŋe o wora taa wuu to. 34Abaraham déem maa zoore Filisi tiina teo kom wone o dáane da.

Currently Selected:

Pulim 21: KBG

Highlight

Copy