Pulim 20

Abaraham de Abimeleka taane

1Abaraham ma zaŋe jei sem konto ne o kwei chwoŋa kalo na maa tu kuri seeni to ye o laam vo o zoore Kadese dedaane Sura tetare laŋa ne. Teene dem konto wo tega-kuri kagoa kam ne mo.

Maŋa kadwoŋi ne o ma vo o jeini Gerare ne. 2O na wora to mo Abaraham tage o kaane Sarah taane we, o ye o nakɔ.#Pulim 12:13 Gerare teo kom pɛ Abimeleka ma toŋe Sarah kwaga ne ye o jwoŋi‑o se o ma o ke o kaane. 3Tete dedwe ne Baŋa Wɛ ma ba Abimeleka tei dendwɛ wone o ta ded‑o we, “Nmo ye too mo, kaane wom n na kwei to na ye nɔɔno kaane to ŋwaane.”

4Abimeleka ya daa ta wo dwei‑o. Konto to, o laam maa we, “Amo Teiru, a wo ke kolokolo a chɔge. Nmo wó sɛ n chɔge teo kolo na wo ke wo-lɔŋɔ to na? 5Abaraham mo tage de amo we ‘Kaane wom ye a nakɔ mo’, ye kaane wom de ta we ‘O ye a nabɔ’. Amo ke tento de a bochare-laao mo. A jea de ba jege digiru.”

6Wɛ daa ta ma ŋɔɔne ded‑o dendwɛ dem wone we, “Ko ye chega. A yei we n na toŋe tei maama to, n ke dedaane boboŋ-laaro. Konto ŋwaane amo cheiŋi se nmo yé ke wɛleere n chɔge amo yiga mo ye a wo pɛ‑m chwoŋa se n dwei‑o. 7Nɔɔno wom ye amo ni-jwoŋinu mo. Konto ŋwaane, jwoori n pa‑o o kaane wom se o daare o lwoori amo o pa‑m se n ta‑n ŋwe. Ko daare n ná wo ke konto, nmo wó seene n te, de n nɔɔna maama.”

8Tega na poore to, Abimeleka ma gwoni tega o bwoŋi o nɔɔna bam, ye o daare o lwoni kolo maama na ke to o bere-ba. Ba na nigi to, foone ma tiini de ja-ba. 9Abimeleka ma bwoŋi Abaraham pa se o zo ba tei ye o we, “Bɛŋwaane mo nmo ke debam konto? Bɛ lwarem mo a ke‑m ye nmo laam ja chɔgem n ba amo de a teo kom baŋa ne? Nmo na ke n chɔge amo yiga tei to ba lana.” 10O ta ma bwei Abaraham we, “Bɛ mo pɛ se n ke konto?”

11Abaraham laam ma leiri we, “Amo ya boŋe we, nɔɔn-nɔɔno ba kɔre Wɛ jei sento ne, ye ba wó wane ba go-ne, a kaane wom ŋwaane. 12O ta ye a nakɔ mo. Dé dae nu daane mo se o ye a kwo wom bukɔ mo, ye o laam ji amo kaane. 13Maŋa kalo Wɛ na pɛ se a nwoŋi a kwo sɔŋɔ kom ne ye a kare a beeri to, mo a tage ded‑o we ‘Sarah, ke tento se n bere we n swoi amo: Mɛ maama debam ná vei de yi, se nmo ta we, a ye n nabɔ mo.’ ”

14Abimeleka laam ma ja peeni de naane dedaane kabɛ, baara de kaana maama, o ja o nwoŋi o pa Abaraham. O ta ma jwoori o kwei Abaraham kaane Sarah o pa‑o. 15Abimeleka maa we, “Amo tega kam mo tento, nmo yiga ne. Ta n zoore jei selo maama ne n na lage to.” 16O ma daare o ta de Sarah we, “Nii, lu-nyenno sabu-dala moro mo a pɛ n nabɔ wom. Ko wó taa ye maana ko pa balo maama na wo n tei ne to se ko bere we n jege bora. Nmo wo ke kolokolo n chɔge.”

17Abaraham laam ma lwoori Wɛ o pa Abimeleka de o kaane dedaane ba ka-nyaana bam, ye Wɛ pa ba na yazura, pa se ba daa wane ba lo bia. 18Kokuri to, Baŋa Wɛ déem ya cheiŋi nɔɔna maama de bu-lore mo Abimeleka sɔŋɔ kom ne, Abaraham kaane Sarah ŋwaane.

Currently Selected:

Pulim 20: KBG

Highlight

Copy