Ezekeli 47
47
Bu-tola na zege Wɛ diga kam ne ka duri ka vei tei to
1Nɔɔno wom daa ma ja-ne o jwoori Wɛ diga kam ni seeni. A ma nii a na na na bura ni dem kuri ne ba dura ba vei wɛ-puli seeni ba kɛa. Wɛ diga kam yiga déem jeeri wɛ-puli seeni mo. Na bam nwoŋi Wɛ diga kam manchwo-peo tega-kuri seeni mo, ye ba duri ba tɔge kaanem bimbini dem tega-kuri seeni.#Zekaria 14:7 2O ta ma pa dé tɔge baŋa seeni ni dem ne, dé bebare dé da pwooni yiga dé vo dé yi ni delo na jeeri wɛ-puli seeni to. A ma na we na bam maa tae fenfee ba nwoŋi ni dem tega-kuri seeni ba duri ba kɛa.
3Nɔɔno wom ma ja-ne o yɔɔre wɛ-puli seeni ye o zei lɔra ŋona. O ma kwei-ka o maŋe jatwogo de noa ni maŋem kuni moro. Dé na vei dé yi da to, o ma tɔge a yiga pa dé vei na bam wone se dé bɛ. Ba déem maŋe nakila ne mo. 4O daa ma maŋe se dé vo dé yi jatwogo de noa ni kuni moro kodwoŋi, ye o daa tɔge a yiga pa dé vei na bam wone. Ba laam ma maŋe nadwoona ne. O ta ma jwoori o maŋe se dé vo jatwogo de noa ni kuni moro dé woli da. O daa ma pa dé vei na bam wone, de ba laam maŋe teiŋa ne mo. 5O daa ta maŋe se dé vo dé yi jatwogo de noa ni kuni moro mo, de ba laam jigi bu-fara mo pa a ware se a vo na bam wone a bɛ. Buga kam déem tiini ka luuna mo pa wolo na boŋe se o bɛ-ka to jege se o pugi na bam mo se o wane o bɛ bubɛ dedwoŋi dem ne. 6O ma bwei amo o we, “Nabiinu, nmo nɛ konto na?”
O ma pa dé jwoori buga kam buburi-bɛ dem ne. 7Dé na yi da to, mo amo nɛ teeni dedɛ na zege de maŋe de buga kam bubɛ maama. 8Nɔɔno wom ma ta de amo o we, “Bu-tola kanto duri ka yɔɔre wɛ-puli seeni mo, se ka tɔge bwolo kolo na tigi Jɔdan buga kam seeni to, ye ka laam vo ka kweeli Yɛ naneo kom wone. Ka na bam ná zo dáane, naneo kom na bam wó ji na-ŋona mo. 9Bu-tola kanto maa ná duri ka yi mɛ maama, wonnu dwi dwi, de ywona dedɛ mo wó taa wora. Kokuri, naneo kom wo na bam laam kwɛ ba ji na-doora mo ye ba pae ŋwea. 10Ywon-jara wó yeini ba zege naneo kom ni ne ba taa jaane ywona. Ko na zege En-gedi ne, se ko yi En-egalayim to, ba wó taa zege naneo kom ni ne mo ba dole ba chworu tem. Ba maa wó taa jaane ywona dwi maama, se ko maŋe de yalo na wo Mediterania naneo kom ne tei to. 11Ko nam ná ye chwaro de bwollu telo na bwola de naneo kom ni to, te na bam bá yɔɔre ba ji na-doora. Nɔɔna ta wó taa nae yɛ te wone. 12Teeni delo na ke bia se nɔɔna taa di to dwi maama de wó nwoŋi de taa zege bu-tola kam bubɛ maama ne. Teeni dem vɔɔro bá kwaare, ye de bá lei bia de ga. Teeni dem wó taa ke bia mo chana maama wone. Kokuri to, na balo na nwoŋi Wɛ diga kam ne to mo duri ba yi-de pa de nyɔ-ba de sui. De bia bam wó taa ye wodiu mo te pae nɔɔna, ye de vɔɔro tem de pa-ba zurim.”#Gurim 22:1-2
Tega kam siseini na maŋe mɛ to
13Yuu-tu Baŋa Wɛ na tage tei to mo tento: “Abam ná tu á pɔɔre tega kam, siseina yalo á na wó tiŋi á pa á tete to wó taa ye tento mo. Á wó pɔɔre-ka á pa Isarele dwia fuga-yalei yam se ba taa tei. Á nam wó kwei popɔre selei á pa Josɛf dwi dem. 14Pɔɔre-na tega kam á pa á dwia yam maama se ko taa mae daane. Kokuri, amo déem dugi duuri we a lage a kwei-ka a pa á nabaara bam mo. Tega kam nam wó taa ye abam nyem mo se á ta‑á tei-ka.
15Tega kam siseini na wó taa ye tei mo tento:
Baŋa seeni siseini dem wó bobo Mediterania naneo kom ni ne mo de tole de vo Hetelon seeni, se de laam tɔge Lebo-Hamafa, ye de daare de bɛ de kɛ Zedadi, 16de Berota, de Siberayim. Jei sem konto wo Damasika de Hamafa tetare laŋa ne mo. Siseini dem ta wó kɛ de yi Hazera Hatikon, de na wo Hawuran siseini dem ne to. 17Konto to, siseini dem wó zege naneo kom ni ne ko vo ko kweeli Hazara Enan ne. De maa wó tɔge Damasika baŋa seeni siseini dem mo, ye Hamafa teo siseini dem de wo baŋa seeni. Tega kam baŋa seeni siseini dem na wó taa ye tei to mo konto.
18Wɛ-puli seeni siseini dem wó taa tigi Hawuran de Damasika tetare laŋa ne mo. De wó tole Jɔdan buga kam, ye de wo Gilead de Isarele tega kam tetare ne to. Ka maa wó vo ka yi Yɛ naneo kom, Tamara teo na zege mɛ to. Tega kam wɛ-puli seeni siseini dem na wó taa ye tei to mo konto.
19Tega-kuri seeni siseini dem wó zege Tamara ne mo de tole de yi Meriba-kadese buli-yi dem seeni. De daa ta wó tɔge Ejipti nabara kam ne de tole de vo de kweeli Mediterania naneo kom ni ne. Tega kam tega-kuri seeni siseini dem na wó taa ye tei to mo konto.
20Wɛ-zoore seeni siseini dem wó tɔge Mediterania naneo kom ni mo de tole de vo de yi jei selo na maŋe de Lebo-Hamafa to. Tega kam wɛ-zoore seeni siseini dem na wó taa ye tei to mo konto.
21Nam pɔɔre-na tega kam á pa daane se Isarele dwia yam maama wane ba na ba de nyem ka wone. 22Abam nam ná lage á pɔɔre tega kam, á wó kwei-ka á pa á tete dedaane veira balo na tu ba zoore de abam ye ba jege bia to. Abam na wó ke tei á pa Isarele tembia to, se á ke konto de veira bam de. Ba de jege chwoŋa se ba tɔge de Isarele dwi tiina bam ba jwoŋi ba tega. 23Isarele tiina dwi delo wone veiru ná zoore da, kotu wó jwoŋi tega dáane mo se o taa tei.”
Yuu-tu Baŋa Wɛ na tage kolo to mo konto.
Currently Selected:
Ezekeli 47: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
