Ezekeli 48

Tega kam popɔre sem

1“Isarele dwia yam de tega kalo ba maama na wó jwoŋi to mo tento:

Ko na zege tega kam maama baŋa seeni siseini dem ne to, Dan dwi dem wó na popɔra dedoa mo. Ka baŋa seeni siseini dem wó tole de vo Hetelon seeni, se de laam yi Lebo-Hamafa. De maa wó vo de kweeli Hazara-enan ne. Damasika baŋa seeni siseini dem na yeiri Hamafa to mo konto. Dan dwi dem siseini mo konto, ko na zege Isarele tega kam wɛ-puli seeni se ko yi ka wɛ-zoore seeni to.

2Asere dwi dem de wó na popɔra dedoa mo. Ba tega kam wó lɔ siseini de Dan dwi dem mo, ko zege wɛ-puli seeni se ko kɛ ko yi ka wɛ-zoore seeni.

3Nafitali dwi dem de wó na popɔra dedoa mo. Ba tega kam wó lɔ siseini de Asere dwi dem mo, ko zege wɛ-puli seeni se ko yi ka wɛ-zoore seeni.

4Manasɛ dwi dem de wó na popɔra dedoa mo. Ba tega kam wó lɔ siseini de Nafitali dwi dem mo, ko zege wɛ-puli seeni se ko yi ka wɛ-zoore seeni.

5Efrayim dwi dem de wó na popɔra dedoa mo. Ba tega kam wó lɔ siseini de Manasɛ dwi dem mo, ko zege wɛ-puli seeni se ko yi ka wɛ-zoore seeni.

6Ruben dwi dem de wó na popɔra dedoa mo. Ba tega kam wó lɔ siseini de Efrayim dwi dem mo, ko zege wɛ-puli seeni se ko kɛ ko yi ka wɛ-zoore seeni.

7Judah dwi dem de wó na popɔra dedoa mo. Ba tega kam wó lɔ siseini de Ruben dwi dem mo, ko zege wɛ-puli seeni se ko kɛ ko yi ka wɛ-zoore seeni.

8Nam pɔɔre-na tega kalo na wó taa ye ka yera to. Tega kam konto wó lɔ siseini de Judah dwi dem mo, ko zege wɛ-puli seeni se ko kɛ ko yi ka wɛ-zoore seeni. Maŋe-na jei sem konto se ko taa ye naba-laara kuni 12,500 kayɔlɔ baŋa ne. Ka dedɔrem dem nam wó zege wɛ-puli seeni se ko yi wɛ-zoore seeni se ko taa mae de dwia yadwonna yam tega ni na wó taa ye tei to. Wɛ tete diga kam nam wó zege tega kam konto tetare ne mo.

9Pwola kalo abam na wó pɔɔre se ka taa ye Baŋa Wɛ tete nyem to ye se á maŋe-ka naba-laara kuni 12,500 dedɔrem baŋa ne. Ka kayɔlɔ baŋa maŋem de wó taa ye naba-laara kuni 5,000. 10Tega kam konto wó taa ye ka yera ka pae kaanem tiina bam mo. Ka baŋa seeni siseini maŋem wó taa ye naba-laara 12,500 mo. Ka kayɔlɔ seeni maŋem maa wó taa ye naba-laara 5,000 ka wɛ-zoore seeni, de ka wɛ-puli seeni. Tega-kuri seeni siseini dem maa wó taa ye naba-laara 12,500 dedɔrem baŋa ne. Baŋa Wɛ diga kam maa wó taa zege pwola kam konto tetare dem ne. 11Ka wó taa ye Zadoki tiina bam na ye kaanem tiina to nyem mo. Banto yɔɔre ba nii amo totoŋa baŋa ne mo ye ba wo yage. Ba wo sɛ se ba tɔge de Isarele tiina bam ba ywori ba chwoŋa, ne Levi dwi tiina badaara bam na ke tei to. 12Abam ná pɔɔre tega kam, pwola kam konto wó taa ye ka yera ka pa-ba. Ka wó tiini ka taa ye wose mo. Ka maa wó yeiri de Levi dwi tiina bam tega kam.

13Ko na yeiri kaanem tiina bam tega kam konto to, Levi dwi tiina bam wó taa jege ba de popɔra. Ka wó taa ye naba-laara 12,500 mo dedɔrem baŋa ne. Ka kayɔlɔ baŋa maŋem maa wó taa ye naba-laara 5,000. Ba tega kam ni maama wó taa ye naba-laara 12,500 mo dedɔrem baŋa ne, de naba-laara 5,000 kayɔlɔ baŋa ne. 14Ko dae se ba kwei tega kam ba yeigi ba pa nɔɔn-nɔɔno, naa se ba kwei-ka ba ma ba leiri woŋo kodwoŋi, ka na ye wose ka pa Baŋa Wɛ to ŋwaane.

15Pwola kam tega kalo ta na daare to wó yi naba-laara 2,500 ka kayɔlɔ baŋa ne, de naba-laara 12,500 ka dedɔrem baŋa ne. Kanto dae ka yera Wɛ ŋwaane, ye Jerusalem teo tiina wó wane ba taa jege-ka ba toŋa. Ba wae ba lɔ ba sam ye ba kɔne ba vara jei sem konto ne. Ba nam wó lɔ teo kom tete tega kam tetare ne mo. 16Ko sɛ sena sem maama wó taa mae daane mo: naba-laara 2,250 ko baŋa seeni, de tega-kuri seeni, de wɛ-puli seeni, dedaane wɛ-zoore seeni. 17Pwola maa wó taa tigi teo kom sɛ sena sem maama ne, ka kayɔlɔ baŋa maŋem na ye naba-laara 125 ka baŋa seeni, de tega-kuri seeni, de wɛ-puli seeni, dedaane wɛ-zoore seeni to. 18Tega kalo ta na daare ye ka yeiri pwola kalo na ye wose to ne mo ba wae ba kwei-ka ba du wodiu se Jerusalem teo nɔn-bia bam taa di. Tega kam kadwoŋi wó yi naba-laara 5,000 teo kom wɛ-puli seeni, ye ka kadwoŋi yi naba-laara 5,000 teo kom wɛ-zoore seeni. 19Teo kom nɔn-bia balo na nwoŋi Isarele dwia yam maama wone to mo wó taa vare tega kam konto. 20Ko na ye tei to, tega kalo maama na pɔɔre se ka taa ye ka yera to sɛ sem maama mae daane mo. Ka maŋem dem maa ye naba-laara 12,500 saŋa maama ne. Tega kalo na ye wose Wɛ ŋwaane to ná woli de Jerusalem teo laŋa kam, ko maama wó maŋe konto mo.

21Tega kalo ta na daare pwola kam konto wɛ-puli seeni dedaane ka wɛ-zoore seeni to wó taa ye teo dedɛɛro wom nyem mo. Ka kayɔlɔ maŋem maa wó taa ye naba-laara 12,500. O tega kam wó tole wɛ-puli seeni ka yi Jɔdan buga kam, ye ka daare ka tole wɛ-zoore seeni ka yi Mediterania naneo kom. Tega kalo ba na wó pɔɔre ba pa-ne to, de amo wara-jei sem na wó taa wo ka wone to laam maa wó taa tigi dedɛɛro wom tega kam tetare ne. 22Konto to, Levi dwi tiina tega kam, de kalo na wora teo kom ŋwaane to maama wó taa tigi dedɛɛro wom te selei sem tetare laŋa ne mo. O tega kam de maa wó lɔ siseini de Judah dwi tega kam na wo baŋa seeni to. Ka ta wó lɔ siseini de Benjamin dwi tega kam na wo tega-kuri seeni to.

23Ko ta ná daare dwia yalo na daare to:

Benjamin dwi dem wó na popɔra dedoa mo. Ba tega kam nam wó zege Isarele tega kam wɛ-puli seeni mo ka tole ka yi ka wɛ-zoore seeni.

24Simeon dwi dem de wó na popɔra dedoa mo. Ba tega kam wó lɔ siseini de Benjamin dwi dem mo, ko zege wɛ-puli seeni se ko yi ka wɛ-zoore seeni.

25Isakara dwi dem de wó na popɔra dedoa mo. Ba tega kam wó lɔ siseini de Simeon dwi dem mo, ko zege wɛ-puli seeni se ko yi ka wɛ-zoore seeni.

26Zebulun dwi dem de wó na popɔra dedoa mo. Ba tega kam wó lɔ siseini de Isakara dwi dem mo, ko zege wɛ-puli seeni se ko yi ka wɛ-zoore seeni.

27Gad dwi dem de wó na popɔra dedoa mo. Ba tega kam wó lɔ siseini de Zebulun dwi dem mo, ko zege wɛ-puli seeni se ko yi ka wɛ-zoore seeni.

28Gad dwi dem tega-kuri seeni siseini maa wó zege Tamara ne mo de tole de taa vei de yi Meriba-kadese buli-yia yam ne. De daa ta wó tɔge Ejipti nabara kam ne de tole de vo de kweeli Mediterania naneo kom ni ne.

29Tega kam konto mo nmo wó pɔɔre n pa Isarele dwia yam maama se ba taa tei. Dwi de dwi maama popɔra na wó taa ye tei to mo konto. Yuu-tu Baŋa Wɛ na tage kolo to mo konto.

Teo kom manchwo-peo nia taane

30Nia yanto mo nɔɔna wó yeini ba tɔge da ba nwoŋi teo kom wone: Teo kom baŋa seeni kabira maŋem wó taa ye naba-laara 2,250 mo. 31Ba maa wó pore nia yatɔ baŋa seeni kabira kam ne, ya yera na ye Ruben ni dem, de Judah ni dem, de Levi ni dem to. Ba wó taa jege Isarele dwia yam yera mo ba bwoi teo kom nia yam.

32Wɛ-puli seeni kabira kam maŋem de wó taa ye naba-laara 2,250, ye ka de jege nia yatɔ. Ko maa ye Josɛf ni dem, de Benjamin ni dem, de Dan ni dem.

33Tega-kuri seeni kabira kam maŋem de wó taa ye naba-laara 2,250, ye ka de jege nia yatɔ. Ko maa ye Simeon ni dem, de Isakara ni dem, de Zebulun ni dem.

34Wɛ-zoore seeni kabira kam maŋem de wó taa ye naba-laara 2,250, ye ka de jege nia yatɔ. Ko maa ye Gad ni dem, de Asere ni dem, de Nafitali ni dem.

35Konto to, laŋa kalo na tigi ka kaare teo kom sɛ sena sem maama to ye naba-laara 9,000 mo. Ko nam na zege maŋa kam konto ne se ko taa vei to, ba wó taa bwoi teo kom yere we, ‘Baŋa Wɛ wo ko wone.’ ”#Jeremia 3:17

Currently Selected:

Ezekeli 48: KBG

Highlight

Copy