Ezekeli 46

1Yuu-tu Baŋa Wɛ na tage tei to mo tento: Wɛ diga tetare konkɔlɔ kom ni delo na jeeri wɛ-puli seeni to ye se á pe-de mo á totoŋa da yaredo maama wone. Ko maa ná yi siu dɛ dem, dedaane chan-doŋa dɛ dem ne, se á laam pore-de á yage. 2Teo kom dedɛɛro wom maa wó zege da-yiga konkɔlɔ kom ne o vo o zo ni dem konto napɔrɔ kom wone se o taa zege manchwoŋo ni dem ne. Kaanem tiina bam maa wó kwei o zwɛɛm pɛɛra, de o yazura pɛɛra ba ma ba ke kaanem. Dedɛɛro wom ta ná zege manchwoŋo ni dem ne, o wó chɔɔle o yibia tega ne se o zuli-ne, ye o daare o nwoŋi da o viiri. Ba nam bá pe ni dem, se tega ná tu ka yi, se ba laam pe-de. 3Siu da yam de chan-doŋa da yam maama ne, teo kom nɔɔna bam nam jege se ba gilimi daane ni dem konto yiga ne mo, se ba zuli Baŋa Wɛ. 4Dedɛɛro wom na jege se o ja zwɛɛm pɛɛre delo siu dɛ maama ne o ba o ke o pa Baŋa Wɛ to nam wó taa ye pi-bale seredo, de pi-bea dedoa mo. Tento maama nam bá taa jege gɛɛ te yera ne. 5Wodiu pɛɛre delo o na woli pi-bea kam wone se o ma o ke kaanem dem to wó taa ye kuriwaa bu dedoa mo. Muni delo o na wó kwei o woli pi-bale sem ne to nam wó maŋe de o na lage tei to mo. O nam wó woli nuga bwɛ sena mo muni kuriwaa maama ŋwaane. 6Chan-doŋa dɛ dem ne dedɛɛro wom ta wó kwei na-bala dedoa, de pi-bale seredo, de pi-bea dedoa se o ma o ke kaanem, te maama na ba jege gɛɛ te yera ne to. 7O ta wó ja wodiu pɛɛre kuriwaa bu dedoa na-bala kam ŋwaane, de wodiu pɛɛre kuriwaa bu dedoa pi-bea kam ŋwaane. Ko nam ná ye pi-bale sem, o wó woli wodiu pɛɛre se ko maŋe de o na lage tei to mo. O ta wó woli nuga bwɛ sena mo kuriwaa maama ŋwaane. 8Dedɛɛro wom ná yeini o zo manchwoŋo ni dem, o wó tɔge napɔrɔ kom ne mo o zo da. O ta ná lage o nwoŋi, ko ye se o jwoori o tɔge chwoŋa kam konto mo.

9Teo kom nɔɔna ná yeini ba jeeri Baŋa Wɛ yiga ne se ba di ba kura yam, se ba na tɔge ni delo ba zo to, ba da ni dedwoŋi ne ba nwoŋi wara-jei sem wone. Ba wolo ná dɛ baŋa seeni ni dem o zo, kotu wó tɔge tega-kuri seeni ni dem ne mo o nwoŋi. Wolo nam na tɔge tega-kuri seeni ni dem o zo, kotu de wó da baŋa seeni ni dem ne mo o nwoŋi. 10Ba ná yeini ba zo da, dedɛɛro wom de maa wó gwaane ba wone, ye o ta tɔge de-ba o nwoŋi.

11Ba ná yeini ba jege ba kura yam dwi maama ba di, wodiu pɛɛre dem wó taa ye muni kuriwaa bu dedoa mo na-bala maama ŋwaane, de kuriwaa bu dedoa pi-bea maama ŋwaane. Ko daare ko ná ye pi-bale sem, wodiu pɛɛre dem na woli da to wó maŋe de nɔɔno boboŋa na lage tei to mo. Ba ta wó woli nuga bwɛ sena mo kuriwaa maama ŋwaane. 12Dedɛɛro wom ná boŋe se o ke wo-ywoŋo pɛɛre o pa Baŋa Wɛ, ne ko ná ye zwɛɛm pɛɛre naa nu-biu pɛɛre mo, se ba pore ni delo na jeeri wɛ-puli seeni to ba pa‑o. O maa wó ke o zwɛɛm pɛɛre dem, naa o nu-biu pɛɛre dem, ne ko na maŋe ko ke tei siu dɛ dem ne to mo. Ko kwaga seeni o ná nwoŋi se o viiri, ba laam wó wane ni dem ba pe.

13Dɛ maama wone nmo jege se n beeri pi-bala na yi bene ye ka ba jege gɛɛ ka yera ne to se n ma-ka n ke zwɛɛm pɛɛre n pa Baŋa Wɛ. Ko nam ye zezeŋa maama mo nmo wó ta‑n ke konto. 14Zezeŋa maama se n yeini n ke wodiu pɛɛre n woli da. Pɛɛre dem n na wó ke n pa Baŋa Wɛ to ye muni bwɛ setɔ mo, ye n guuri nuga bɔŋa dedoa de wone. Ni dento ba jege se de leiri maŋa de maŋa. 15Ko maa na ye tei to, pi-bala kam, de wodiu pɛɛre dem, de nuga kalo na woli de wone to ye se á ta‑á beeri-te mo zezeŋa maama se á yeini á ma-te á ke zwɛɛm kaanem maŋa maama ne.

16Yuu-tu Baŋa Wɛ nam na tage tei to mo tento: Teo dedɛɛro wom ná pɔɔre ba dwi tega kam wone se ko ji pɛɛre ko pa o bu, ka laam wó lɛɛre ka taa ye bu wom de o de kwaga nyem mo. 17Ko daare, o ná kwei-ka o ji pɛɛre mo o pa o tontoŋeno wolo, o tontoŋeno wom wó taa jege-ka o toŋe mo se ko taa nii wonnu yirim bene dem. Maŋa kam konto ná yia, se o tontoŋeno wom jwoori o kwei tega kam o pa dedɛɛro wom, dedɛɛro wom dwi dem mo na tei tega kam to ŋwaane. Ko ye wonto bia yerane mo jege chwoŋa se ba taa tei o tega se ka ji ba nyem. 18Teo dedɛɛro wom nam ba jege chwoŋa se o zeili nɔɔna ba tega ne se o daare-ba o zege bwori. O nam wó nii o tete tega wone o pɔɔre o pa o bia, se ba de ba dwi dem taa tei. Ko dae se a nɔɔna bam tega nwoŋi ba jeŋa ne ka daare-ba.’ ”

Kaanem tiina bam kaligwoŋo

19Nɔɔno wom daa ma ja-ne pa dé tɔge Wɛ diga konkɔlɔ manchwo-ni dem dé vo dé yi di selo na pɔɔre se zega Wɛ kaanem tiina bam ŋwaane ye se jeeri baŋa seeni to. O ma bere-ne jei selo na yeiri di sem konto wɛ-zoore seeni to. 20O laam ma ta de amo o we, “Jei sento ye kaligwoŋo mo ko pa kaanem tiina bam. Dáane mo ba wó yeini ba taa saŋa wɛleere jene kaanem dem, de wɛleere saarem kaanem dem, ye ba daare ba wɔ wodiu pɛɛra yam, se ba yé ja-ya ba zo da-yiga konkɔlɔ kom wone. Ba ya ná ke konto, ko wó wane nɔɔna bam de mo ko pwɛ Wɛ ŋwaane.”

21O daa ma ja-ne o nwoŋi pa dé zo da-yiga konkɔlɔ kom wone, ye o ja-ne o kaare ko gugworru tena tem. A ma na we gugworo maama jege ko konkɔlɔ mo. 22Da-yiga konkɔlɔ kom gugworru tena tem maa jege konkwallo telo maama na mae daane ye kabiri che-te to. Te maa ye jatwogo de noa ni maŋem finna dedɔrem baŋa ne, de jatwogo de noa ni maŋem fintɔ kayɔlɔ baŋa ne. 23Ba déem kwei kandwa mo ba lɔ taara ba kaare konkwallo tem konto, ye ba lɔ mini kura kabiri sem tega kuri seeni. 24O ma ta de amo o we, “Kaligwonnu tento wone mo balo na yeini ba toŋe Wɛ diga kam totoŋa to wó taa saŋe nɔna yalo nɔɔna bam na yeini ba ja ba ba se ba maa ke kaanem to.”

Currently Selected:

Ezekeli 46: KBG

Highlight

Copy