Ezekeli 45

Ba na wó pɔɔre tega kam tei to

1Abam ná lage á pɔɔre tega kam á pa Isarele dwia yam se ba taa tei, á jege se á le pwola se ka taa ye ka yera amo Baŋa Wɛ ŋwaane. Ka wó taa ye naba-laara 12,500 mo dedɔrem baŋa ne, de naba-laara 10,000 ka kayɔlɔ baŋa ne. Pwola kam maama wó taa ye wose mo amo ŋwaane. 2Pwola kam konto ne á wó pɔɔre naba-laara 250 mo dedɔrem baŋa ne de kayɔlɔ baŋa ne se á ma á lɔ Wɛ diga kam da. Kapworo wó taa tigi ko kaare-ka, ye ko kayɔlɔ baŋa maŋem ye naba-laara finlei-benu (25). 3Ta pɔɔre-na pwola kalo na ye ka yera to belei, se á maŋe naba-laara 12,500 dedɔrem baŋa ne, de naba-laara 5,000 kayɔlɔ baŋa ne. Jei sem konto á na wó maŋe to mo á wó ke Wɛ diga kam na tiini ka ye wose Wɛ ŋwaane to da. 4Pwola kam chicheiro kom konto wó taa ye tega kalo na pɔɔre amo ŋwaane to. Dáane mo kaanem tiina bam wó taa tei, de ba na toŋe Wɛ diga totoŋa yam ye ba fɔɔre ba twɛ Baŋa Wɛ tei se ba toŋe ba pa‑o to. Ba wó lɔ ba sam dem dáane mo, ye dáane mo Wɛ tete diga kam de maa wó taa wora. 5Pwola kam chicheiro kolo na daare to de wó taa ye naba-laara 12,500 dedɔrem baŋa ne, de naba-laara 5,000 kayɔlɔ baŋa ne. Tega kam konto wó taa ye Levi dwi tiina bam nyem mo, ba na toŋe Wɛ wara-jei sem wone to ŋwaane. Ba wó taa tei-ka pa se teene taa wora se ba taa zoore de wone.

6Ko ta ná ye tega kalo abam na wó lɔ teo kom tete ka baŋa ne to, á wó maŋe laŋa kalo na ye naba-laara 2,500 kayɔlɔ baŋa ne de naba-laara 12,500 dedɔrem baŋa ne to, pa se ka saŋe pwola kalo na ye ka yera amo ŋwaane to. Laŋa kam konto wó taa ye Isarele tiina bam maama nyem mo.

7Isarele teo dedɛɛro wom nam mo wó taa tei tega kadwoŋi, ka na twoŋi de pwola kalo na ye ka yera amo ŋwaane to, ye ka ta twoŋi de tega kalo na ye teo kom nyem to. O laŋa kam maa wó zege amo pwola kam wɛ-zoore seeni ka vo ka yi tega kam maama wɛ-zoore seeni siseini dem, ye ka zege amo pwola kam wɛ-puli seeni ka vo ka yi tega kam maama wɛ-puli seeni siseini dem. Ko maa bere we o tega kam wó taa dɔra ka mae de Isarele dwia yadwonna yam tega na mae tei to mo. 8Tega kam konto maa wó lɛɛre ka taa ye dedɛɛro wom nyem mo Isarele teo kom ne. Konto to, a dedɛɛra bam daa bá taa jege a nɔɔna bam ba bɛɛsa. Ba nam wó yage Isarele tiina bam mo se dwi maama jwoŋi de tega de taa tei.

9Yuu-tu Baŋa Wɛ na tage tei to mo tento: Abam Isarele teo dedɛɛra bam, á tiini á pini amo nɔɔna bam, ye á daare á bɛɛse-ba se ko dáane. Nam yage-na vuvuga totoŋa, se á daare á toŋe kolo na ye chega ye ko tɔge chwoŋa to. Á daa yé vere tega amo nɔɔna bam tei ne se á daare-ba á zege bwori. Yuu-tu Baŋa Wɛ na tage kolo to mo konto. 10Abam ná lage á maŋe wonnu á pa daane, se á kwei bwɛ selo na ye chekke to á maŋe-te. 11Kuriwɛ selo á na wó ta‑á mae á maŋe wonnu to jege se se taa ye chekke mo, ne ko ná ye muni mo á jege á maŋa, naa ko ná ye na mo de. Kuriwaa bia fuga mo wó yi homaa dedoa. 12Á nam ná maŋe wonnu se á lɔre te dunni na ye tei to, se á maŋe gɛra kuni finlei se te taa ye sɛkɛle dedoa. Sɛkɛla fuseredo (60) de maa wó taa ye mina dedoa.

Wɛ pɛɛra de kura taane

13Pɛɛra yalo á na jege se á kwei á pa Wɛ to mo tento: Maŋe-na á mena#45:13 mena = wheat, barley bwɛ fuseredo maama wone se á le dedoa. 14Á ta wó ma kuriwaa mo á maŋe á nuga kam, se á le bwɛ selei kuriwaa bia fuga maama wone. Kuriwaa bia fuga ye bedwe mo de homaa dedoa 15Ko ta ná ye abam pei sem na di gaao Isarele te-ywoŋa kam ne to, á wó le pia dedoa mo se bia yalei maama wone. Ba maa wó kwei pɛɛra yam konto ba ma ba ke wodiu pɛɛra, de zwɛɛm pɛɛra, de nu-biu pɛɛra kaanem, se ba tɔge ya ŋwaane ba le nɔɔna bam wɛleera Wɛ yiga ne. Yuu-tu Baŋa Wɛ na tage kolo to mo konto. 16Isarele tiina bam maama nam mo wó ja pɛɛra yam konto ba ba ba ke ba teo kom dedɛɛro wom jeŋa ne. 17Dedɛɛro wom nam jege se o beeri vara balo ba na wó kwei ba ke zwɛɛm pɛɛra, de wodiu pɛɛra, de wo-nyɔɔro pɛɛra, ne nɔɔna bam ná lage ba di ba kura dwi dwi. Ko ná ye ba chan-doŋa kura, de ba siu da yam, dedaane kura yalo maama Isarele dwi tiina bam na jege se ba di to, wonto mo wó beeri wɛleere saarem kaanem vara bam, de wodiu pɛɛra yam, de pɛɛra yalo ba na wó zwɛ ba pa Wɛ to, de nu-biu pɛɛra yam se ba kwei ba maa ke kaanem ba pa Wɛ se ba le nɔɔna bam lwarem o yiga ne.

18Yuu-tu Baŋa Wɛ na tage tei to mo tento: Boboa chana kam boboa dɛ dem ne, se á kwei na-bala kalo na ba jege gɛɛ ka yera ne to á ma á kwɛ wara-jei sem. 19Kaanem tu wom maa wó pwori wɛleere saarem kaanem varem wom jana wone o ja o vo o taare Wɛ diga kam manchwo-nia sɛ sem ne. O ta wó kwei-ba o ke bimbini dem tetare seeni nia yana yam ne, de Wɛ diga tetare konkɔlɔ kom ni-kaywallo tem ne. 20Ko ta ná yeini ko yi chana kam da yarepɛ dɛ dem, nmo nam ta wó ke konto dwoŋi mo se n ma n kwɛ wolo maama na tusi ye o wo paale o ke wɛleere, naa o wo lɔre ko ni ne to. Konto maa wó pa se n fɔge n kwɛ Wɛ diga kam chullu tem seeni.

21Boboa chana kam da fuga-yana dɛ dem ne, se á di Atɔgebabaŋa kuri dem. Kwei-na da yarepɛ á di-de, se da yam konto ne á ta‑á di bworobworo kolo na ba jege sabɔle ko wone to. 22Kuri dem boboa dɛ dem ne, á teo dedɛɛro wom wó beeri na-bala mo se ba kwei-ka ba ma ba ke wɛleere saarem kaanem o tete ŋwaane, de teo kom nɔɔna bam maama ŋwaane. 23Da yarepɛ yam dɛ maama wone o nam ta wó beeri na-bale serepɛ, de pi-bɛ serepɛ, te maama na ba jege gɛɛ te yera ne to mo, se ba kwei-te ba ke zwɛɛm kaanem ba pa Baŋa Wɛ. O ta maa wó beeri bo-bala se ba kwei-ka ba ke wɛleere saarem kaanem. 24O nam ta wó taa jege muni mo o woli da se ba ma ba ke wodiu pɛɛre kaanem. Ko wó taa ye muni kuriwaa bu dedoa na-bala maama ŋwaane, de kuriwaa bu dedoa pi-bɛ maama ŋwaane. Nuga bwɛ sena nam mo wó woli de muni kuriwaa maama.

25Ko ta ná ye kuri delo na bobo chane serepɛ chana kam da fuga-yanu dɛ dem ne to#45:25 = Vwoa chwiim kuri dem: Chullu 23:33; Nia Gulim 16:13, kuri dento da yarepɛ yam dɛ maama wone o daa wó beeri pɛɛra mo se ba ma-ya ba ke wɛleere saarem kaanem, de zwɛɛm pɛɛre kaanem, de wodiu pɛɛre kaanem, se nuga de woli te wone.

Currently Selected:

Ezekeli 45: KBG

Highlight

Copy