Ezekeli 44

Wɛ diga kam chullu tedwonna

1Nɔɔno wom daa ma ja-ne pa dé vo dé yi Wɛ diga kam konkɔlɔ ni delo na jeeri wɛ-puli seeni to. De nam ya pe mo. 2Baŋa Wɛ ma ta de amo o we, “Ni dento wó yɔɔre de pe mo de taa zega. Ba daa bá pore-de. Nɔɔn-nɔɔno daa bá tɔge da o zo wara-jei sem wone, kokuri to, Baŋa Wɛ wom na ye Isarele tiina Wɛ to mo tɔge ni dem konto o zo da. Konto ŋwaane mo de wó pe de taa zega taa wuu. 3Isarele teo dedɛɛro wom yerane mo jege chwoŋa se o vo o jeini ni dem diga dedoa ne o di wodiu amo Baŋa Wɛ yiga ne. O nam jege se o tɔge ni dem napɔrɔ kom ne mo o zo da, ye o daare o tɔge chwoŋa kam konto o nwoŋi.”

4Nɔɔno wom ma ja-ne pa dé tɔge baŋa seeni ni dem ne dé vo dé zaŋe Wɛ diga kam yiga ne. Amo ma nii a na Baŋa Wɛ nenɔŋ-fɔrɔ kom na su Wɛ diga kam ni maama tei to. A ma to a vwi a yibia tega ne.

5 Baŋa Wɛ ta ma ta de amo o we, “Nabiinu, fɔge n nii lanyerane, se n cheigi kolo maama a na lage a bere‑m Baŋa Wɛ diga kam chullu tem seeni to se n kwei-te n ke n yuu ne. Ta maane ka nia yam na ye tei to de balo na jege chwoŋa se ba taa tɔge-ya ba zoore wara-jei sem ba daare ba nwoŋi to. 6Nam ta de Isarele dwi zwabani-nyena bam we, ‘Yuu-tu Baŋa Wɛ na tage tei to mo tento: Abam Isarele dwi tiina bam, yage-na á totoŋ-vɛɛsa yam! 7Abam jaane sa-teena balo na yɔɔre ba yeiri amo ye ba boboŋa kwaale to mo á ja á zo amo wara-jei sem ne, ne á ná yeini á kwei wodiu pɛɛra, de vara lara, de ba jana á ma á ke kaanem á pa amo. Á ma da ko ŋwaane á biini amo Wɛ diga kam, ye á chɔge ni delo amo na gwoni de abam to. Á yeini á ke konto dwoŋi mo á woli á totoŋ-vɛɛsa yadwonna yam wone. 8Ko ná ye pɛɛra yalo na ye wose amo ŋwaane to, abam wo fɔge á nii ya baŋa ne. Á nam kwei sa-teena mo á pa ba jege amo wara-jei sem totoŋa ba toŋa ba pa abam. 9Yuu-tu Baŋa Wɛ nam na tage tei to mo tento: Sa-teena balo na yeiri amo to ba jege chwoŋa se ba zo amo wara-jei sem ne, de balo na zoore Isarele tiina bam tetare ne to de.

10Levi dwi tiina bam badwonna déem yage amo. Ba ma gwaane Isarele tiina badaara bam wone pa ba ywori chwoŋa ba daare amo ye ba zuli jwona. Ba wɛleera yam konto wó taa wo ba yuu ne se ba na waarem. 11Amo nam wó pa-ba chwoŋa se ba taa toŋe amo wara-jei sem ne. Ba wó taa yere Wɛ diga kam nia yam. Ba ta wó taa goe vara balo nɔɔna na jaane ba tui se ba maa ke zwɛɛm kaanem de kaanem dwi maama to, ye ba daare ba taa zege nɔɔna bam yiga ne ba woli-ba Wɛ zula seeni. 12Ba nam na toŋe ba pa Isarele dwi tiina bam jwona kaanem baŋa ne mo ye ba pa ba tusi to ŋwaane, amo nam dugi de a tete yere we a wó waare-ba ba wɛleera yam ŋwaane. Yuu-tu Baŋa Wɛ na tage kolo to mo konto. 13A nam bá pa-ba chwoŋa se ba fɔɔre ba twɛ amo se ba taa toŋa kaanem tiina totoŋa ba pa-ne. Ba ta yé twɛ wonnu telo a na pɔɔre-te se te taa ye wose amo ŋwaane to. Ba nam wó di ba chaveera mo totoŋ-zɔɔna yalo ba na ke to ŋwaane. 14De ko de, a lage a kwei Wɛ diga kam totoŋa dwi maama mo a ke banto jeŋa ne se ba taa nii ya baŋa ne.

15Ko daare Levi dwi tiina balo na ye kaanem tiina ye ba nwoŋi Zadoki diga kam ne to, banto mo yɔɔre ba nii amo wara-jei sem totoŋa baŋa ne ba pa-ne maŋa kalo Isarele tiina badaara bam na ywori ba chwoŋa ne to. Banto mo wó fɔɔre ba twɛ amo se ba taa toŋe a kaanem totoŋa yam, ye ba yeini ba kwei vara lara, de jana ba ke kaanem ba pa-ne. Yuu-tu Baŋa Wɛ na tage kolo to mo konto. 16Banto ta wó wane ba zo amo diga kam wone, se ba ke kaanem amo bimbini dem baŋa ne, ye ba toŋe ba pa-ne. Banto nam mo wó ke amo boboŋa yam na lage tei to.

17Ba ná yeini ba zo Wɛ diga tetare konkɔlɔ kom wone, ba jege se ba kwei gare-fefale mo ba zo. Ko dae se ba zo pei koro gwaaro se ba ma-te ba toŋe wara-jei konkɔlɔ kom wone, naa Wɛ diga kam tete wone. 18Ba jege se ba yeini ba kwei gare-fefale mo ba ba ba yuni tem, ye ba daare ba vɔ gare-kuri-kukwi ba tei ne. Ko nam dae se ba vɔ ba tete de gwaaro telo na wó pa ba taa chuuri de luluŋu to. 19Ba nam ná nwoŋi wara-jei sem ne se ba vo ba yi da-yiga konkɔlɔ kom mɛ nɔɔna bam na gilimi to, ba wó lɔɔre gwaaro telo ba na zo ba maa toŋe Wɛ diga kam totoŋa to mo ba tiŋi di selo na pɔɔre Wɛ ŋwaane to wone, se ba laam jwoori ba kwei gwaaro tedwonna ba zo. Ba ná ke konto, nɔɔna bam bá wane ba dwei ba gwaaro tem se ko pa ba de ji wose.

20Wɛ kaanem tiina bam nam dae se ba cheeri ba yuni, naa se ba yage ba yu-ywei se se ke dedwaaro. Ba nam wó wane ba dɔɔre ba yu-ywei sem ba yage. 21Ba wolowolo nam yé nyɔ sana ye o daare o zo Wɛ diga tetare konkɔlɔ kom wone. 22Ba dae se ba di kadeina ba ma ke ba kaana, naa kaana balo de ba banna na yage daane to. Banto nam jege se ba di Isarele tiina bukwa balo na yeiri baara to yerane mo, naa kaanem tiina badwonna kadeina. 23Banto totoŋe mo ye se ba bere a nɔɔna bam se ba taa wae ba pɔɔre wonnu telo na ye wose to, de telo na wora dɛ dɛ totoŋa ŋwaane to daane. Ba ta wó pa ba taa wae ba pɔɔre wonnu telo na maŋe de Wɛ chullu tem to, de telo na jege digiru chullu tem seeni to daane.

24Taane ná wo amo nɔɔna bam laŋa ne, ko ye kaanem tiina bam mo wó kwei amo nia yam ba ma bore chega ba tetare ne. Ba ta wó nii se a nia yam na bere se nɔɔna bam taa di kura yalo to seene ya taa toŋa. Ba ta wó taa nege a siu da yam, se nɔɔna taa pae ya ye ya yera.

25Kaanem tu dae se o twɛ too yera, kokuri, o ná dwei too yera, ko wó pa o digiri o tete chullu tem seeni mo. Ko nam ná ye o kwo naa o nu mo tega, naa o bia wone dedoa, naa o zembaaro, naa o nyaane, naa o nakɔ ta na wo zo baro mo ná tega, o jege chwoŋa se o dwei kotu yera yam. 26O nam ná dwei too yera, o laam wó kwɛ o tete se o jwoori o maŋe de chullu tem. O ná ke konto o ti, se o daare o pa da yarepɛ kɛ. 27O laam jege chwoŋa se o zo Wɛ diga kam tetare konkɔlɔ kom wone se o toŋe wara-jei sem ne. Dɛ dem konto ne o wó ke wɛleera saarem kaanem o tete ŋwaane. Yuu-tu Baŋa Wɛ na tage kolo to mo konto.

28Yé pɔɔre-na Isarele tega kam wone á pa kaanem tiina bam. Amo Baŋa Wɛ tete yerane mo wó taa ye ba nyɔn-mage nyem. Amo tete mo yɔɔre a maŋe a pa-ba#Jeelim 18:20. 29Ko na ye tei to, wodiu pɛɛra, de wɛleere saarem pɛɛra, de wɛleere jene pɛɛra, de wonnu telo maama Isarele tiina bam na jaane ba tui ba ke amo jeŋa ne to ye banto nyem mo. 30Abam wodiiru telo na lwoori yiga te ke ye te lamma to, dedaane á Wɛ-teiri pɛɛra dwi dwi wó taa ye kaanem tiina bam nyem mo.#Nwoŋim 23:19 Á ta wó kwei mun-bwei delo á na bobo á pɔɔre se á ma á fɔge bworobworo to á pa kaanem tiina bam, se Wɛ swolim taa wo á sam dem baŋa ne. 31Kaanem tiina ba jege chwoŋa se ba di woŋo kolo na tege ko tete toone, naa vara na jaane-ko ba tore to. Ko ná maŋe ko ye zuŋa mo, naa varem mo de, ba yé di-te.

Currently Selected:

Ezekeli 44: KBG

Highlight

Copy