Ezekeli 43

Wɛ nenɔŋ-fɔrɔ kom taane

1Nɔɔno wom ma ja-ne pa dé vo Wɛ diga kam ni delo na jeeri wɛ-puli seeni to. 2A ma nii a na we Isarele tiina Wɛ nenɔŋ-fɔrɔ kom zege wɛ-puli seeni mo ko maa beena. Wɛ na dɔne o kwori tei to, ko nye de naneo na-fwaaro na chuuri ye te wuuri tei to mo. Tega baŋa jei maama déem ma li de o nenɔŋ-fɔrɔ kom pwooni. 3Wɛ na le wonnu telo o bere-ne to yɔɔre te nye de veera yalo a ya na nɛ ye o ba se o chɔge Jerusalem teo kom to mo. Te maa nye de yalo a ya na nɛ Chebara buga kam ni ne to. Amo ma to a vwi a yibia tega ne.#Ezekeli 1:28 4Baŋa Wɛ nenɔŋ-fɔrɔ kom ma tɔge ni delo na jeeri wɛ-puli seeni to ne ko zo Wɛ diga kam wone. 5Vio#43:5 vio naa jworo naa siu laam ma fuli ko gɔ-ne ko zege wɛɛne. Ko ma ja-ne ko ja zo Wɛ diga kam tetare konkɔlɔ kom ne, ye amo de na we Baŋa Wɛ nenɔŋ-fɔrɔ kom mo yɔɔre ko su Wɛ diga kam ni maama.#1 Pwa 8:10-11

6Nɔɔno wom na zege a saŋa ne konto to, mo a nigi nɔɔno wodwoŋi na zege Wɛ diga kam wone o ŋɔɔne de amo. 7Kotu ma ta o we, “Nabiinu, jeiga kanto mo ye amo paare yituŋu na wó chwi mɛ to. Ka wó taa ye amo jeiŋa jei. Amo wó maŋe ywo-seeni mo se a de Isarele tiina bam taa zoore daane se ko taa vei wuu. Isarele dwi tiina bam, de ba pwa bam maama daa bá toŋe ba chɔge amo yere dem na ye wose to, de ba na kare ba zuli jwo-yɔɔro de ba pwa balo na tege to yibeela yam. 8Ba pwa bam déem lɔge ba sɔ-fwaaro mo pa te yeiri amo tete diga kam kabira ne. Ko nye de kabira yerane mo chege amo de banto daane. Ba ma tɔge ba totoŋ-vɛɛsa yam ŋwaane ba chɔge amo yere dem na ye wose to. Konto ma pa se a tɔge a ban-lom dem baŋa ne a yɔɔre a chɔge-ba. 9Ba nam jege se ba yage jwo-yɔɔro kaanem, se ba daare ba yage ba pwa yibeela yam zula. Ba ná ke konto, amo laam wó taa zoore ba tetare ne taa wuu.

10Nabiinu, fɔge n maŋe Wɛ diga kam yera seina na ye tei to n bere Isarele tiina bam. Ko maa wó pa se chaveera ja-ba ba tusim kikia ŋwaane. Pa se ba na ka zega kam maŋem na ye tei to. 11Chaveera maa ná jaane-ba ba kikia yam maama ŋwaane, se n pa ba lɔre Wɛ diga kam na zega tei, de ka nia yam, de ka maŋem dem maama na ye tei to. Ta pa ba lɔre ka di sem na tigisi se lɔ tei to, se n daare n ta de-ba ka chullu tem na bere kolo to. Nam popone wonnu tem konto maama n tiŋi se ba maane Wɛ diga kam nyenyego na ye tei to, ye ba daare ba taa tɔge ka chullu tem.

12Wɛ ni delo na wora o diga kam ŋwaane to mo tento: Peo yuu jei selo ka na lɔge to de pwola kalo maama na kaare da to tiini ka ye wose mo Wɛ ŋwaane. Chega to, Wɛ ni delo na wora o diga kam ŋwaane to mo konto.”

Kaanem bimbini dem

13Kaanem bimbini dem maŋem na ye tei to mo tento, ne ko ná tɔge jatwogo de noa ni maŋem chekke. Ko nam ye da-yiga noa maŋem mo twoŋi jatwogo de noa ni maŋem dem wone. Bimbini dem kuri seeni gwoŋo mo tigi da, ko na luuna ko yi jatwogo de noa ni maŋem, ye ko ta yala se ko yi jatwogo de noa ni maŋem. De maa jege nia na kaare de maama pa se ya yala se ko maŋe de da-yiga noa maŋem kuni betɔ. Bimbini dem wɛ-baŋa maŋem na ye tei to mo tento: 14Ko na zege de kuri seeni gwoŋo kom ne se ko taa diini ko yi de tetare fera kam to, bimbini dem ye jatwogo de noa ni maŋem kuni belei mo wɛ baŋa seeni. Fera kam tete kayɔlɔ baŋa maŋem maa ye jatwogo de noa ni maŋem dedoa. Ko maa na zege tetare fera kam ne se ko taa diini ko yi baŋa seeni fera kam to, ko ye jatwogo de noa ni maŋem kuni bena mo wɛ baŋa ne, ye fera kam konto de ye jatwogo de noa ni maŋem dedoa ka kayɔlɔ baŋa ne. 15Bimbini dem baŋa kam mɛ seeni ba na zwɛ kaanem dem to maa ye jatwogo de noa ni maŋem kuni bena wɛ baŋa ne se ko woli da. Nyea yana ta maa zege de nia yam sɛ sena sem ne. 16Bimbini dem baŋa kam mɛ ba na zwɛ kaanem dem to sɛ sem maama mae da se mae da. Ko maa ye jatwogo de noa ni maŋem fuga-belei dedɔrem baŋa ne de ko kayɔlɔ baŋa ne. 17Bimbini dem tetare seeni maa ye jatwogo de noa ni maŋem kuni fuga-bena de dedɔrem baŋa ne, de de kayɔlɔ baŋa ne. De maa jege ni na ye jatwogo de noa ni maŋem chicheiro kayɔlɔ baŋa ne. De fera kam kayɔlɔ nam maŋe de jatwogo de noa ni maŋem dedoa ko ja kaare ka maama. Nateina déem diini bimbini dem wɛ-puli seeni ya yi de baŋa seeni.

18 Baŋa Wɛ ma ta de amo o we, “Nabiinu, Yuu-tu Baŋa Wɛ na tage tei to mo tento: Ba ná lɔge kaanem bimbini dem, chullu telo ba na wó tɔge se ba zwɛ vara, ba daare ba kwei ba jana bam ba miisi bimbini dem yera ne to mo tento: 19Nmo wó kwei na-bala n pa kaanem tiina bam se ba ma ba ke wɛleere saarem kaanem. Banto ye Zadoki diga kam tiina mo na jege chwoŋa se ba fɔɔre ba twɛ amo tei se ba taa toŋa ba pa-ne to. Yuu-tu Baŋa Wɛ na tage kolo to mo konto. 20Nmo laam ma‑n wó pwori jana bam wone se n kwei-ba n taare bimbini dem nyea yana yam ne, dedaane de tetare seeni nia yana yam ne, de fera kalo na kaare bimbini dem maama to ne. Nmo wó tɔge chwoŋa kam konto mo se n fɔge n kwɛ bimbini dem kaanem totoŋa yam ŋwaane. 21Nmo ta ma‑n wó ja na-bala kam n na mɛ n ke wɛleere saarem kaanem dem to nɔna n vo n zwɛ jeiga kalo na maŋe ye ka wo dáa dáa de Wɛ diga kam tete to ne.

22Tega ná poore, n ta wó ja bo-bala kalo na ba jege gɛɛ ka yera ne to mo n ba se n kwei-ka n ke wɛleere saarem kaanem. Ke konto n ma n fɔge n kwɛ bimbini dem Wɛ ŋwaane, ne n na ke tei de na-bala kam to. 23Nmo ná kwɛ-de n ti, n laam wó le na-bala de pi-bala mo n vara bam wone, te na ba jege gɛɛ te yera ne to. 24Nmo wó kwei-te n kaane Baŋa Wɛ yiga ne mo. Wɛ kaanem tiina bam de wó kwei yɛ ba zezage vara bam nɔna yam baŋa ne, ye ba daare ba zwɛ-ya ba pa Baŋa Wɛ.

25Kwei da yarepɛ se dɛ maama ne, n ja bo-bala n ba n ma n ke wɛleere saarem kaanem. Nmo ta wó beeri na-bala de pi-bala mo se n ma tento de n ke kaanem dem. Te nam ba jege se te taa jege gɛɛ te yera yam ne. 26Ba nam wó kwei da yarepɛ mo ba ma ba kwɛ bimbini dem Wɛ ŋwaane. Ba maa wó tɔge chwoŋa kam konto ba pɔɔre-de ba zege dáa ne kaanem totoŋa yam ŋwaane. 27Da yam konto ná lage ya ti, pa da nana dɛ dem yi se ko taa via, kaanem tiina bam jege se ba kwei abam zwɛɛm pɛɛra yam, de á nu-biu pɛɛra yam ba ma ke kaanem ba pa-ne bimbini dem baŋa ne. Amo laam maa wó sɛ se á ta‑á ye a nɔɔna bam. Amo Yuu-tu Baŋa Wɛ na tage kolo to mo konto.”

Currently Selected:

Ezekeli 43: KBG

Highlight

Copy