Ezekeli 42

Kaanem tiina bam di

1Nɔɔno wom daa ma ja-ne o vo baŋa seeni se dé zo da-yiga konkɔlɔ kom. O ma bere-ne diga kalo na lɔge ka yeiri Wɛ diga tetare konkɔlɔ kabira kam na jeeri baŋa seeni to. 2Diga kam ni déem wo baŋa seeni mo. Ka maŋem dem maa ye jatwogo de noa ni kuni bi dedɔrem baŋa ne. Ka ta ye jatwogo de noa ni maŋem finnu mo kayɔlɔ baŋa ne. 3Pwola maa wo ka yiga ne, ne nɔɔno ná wo tetare konkɔlɔ kom seeni. Pwola kam na yala tei to ye jatwogo de noa ni maŋem finlei mo. Diga kam saŋa kadwoŋi kam ma jeeri pwola kalo na tigi da-yiga konkɔlɔ kom ne to. Ka maa jege di na lɔge gene setɔ ye se daŋe da-baŋa ne to. 4Di sem yiga ne tetare chwoŋa mo tigi da. Ka maa ye jatwogo de noa ni maŋem fuga ka kayɔlɔ baŋa ne, de jatwogo de noa ni maŋem kuni bi ka dedɔrem baŋa ne. Di sem nia yam yɔɔre ya jeeri baŋa seeni mo. 5Di sem na lɔge tei to, selo na wo baŋa seeni to muri selo na wo tetare dem seeni to mo. Selo de maa na wo tetare ne to de daa maa muri selo na wo kuri dem seeni to. 6Di sem na lɔge gene setɔ da-baŋa ne konto to, ba wo chwi ywoa yalo na wó teili-se to, ne konkwallo tem di sedwonna na jege tei to. Ko ma pa di selo na lɔge se zege baŋa ne to muri selo na wo kuri dem ne to. 7Kabira kadwoŋi maa zege ka maŋe de di sem, de da-yiga konkɔlɔ kom. Ka ye jatwogo de noa ni maŋem finnu mo dedɔrem baŋa ne. 8Di selo gena na yeiri da-yiga konkɔlɔ kom to maŋem ye jatwogo de noa ni finnu mo dedɔrem baŋa ne. Gena kalo na lɔge Wɛ diga kam teiŋa ne to dedɔrem maŋem maa ye jatwogo de noa ni maŋem bi. 9Di selo na wo kuri seeni to jege ni na wo se wɛ-puli seeni, ne nɔɔno ná nwoŋi da-yiga konkɔlɔ jei sem ne ye kotu maa zoore se wone. 10Ni dem konto maa wo konkɔlɔ kabira kam na bobo mɛ to ne.

Di sedwonna maa wo Wɛ diga da-yiga konkɔlɔ kom tega-kuri seeni, ye se yɔɔre se jeeri diga kadwoŋi kam. 11Tetare chwoŋa mo tigi se yiga ne. Di sem konto nam yɔɔre se nye de selo na wo baŋa seeni to mo. Se maŋem dem maama yɔɔre de ye bedwe de baŋa seeni di sem na ye tei to mo. Se nia yam de maa ye bedwe de nia yalo na wo baŋa seeni di sem ne to. 12Tega-kuri di sem maa jege ni delo na jeeri wɛ-puli seeni se ko maŋe de kabira kam na bobo mɛ seeni ka lɔ ka zege to.

13Nɔɔno wom laam ma ta de amo o we, “Di sento na wo Wɛ diga tetare konkɔlɔ kom baŋa seeni, de selo na wo ko tega-kuri seeni to ye wose mo. Dáane mo Baŋa Wɛ kaanem tiina balo na bwola ded‑o to wó yeini ba di kaanem wodiu kolo na tiini ko ye wose to. Ba maa wó tiŋi wonnu telo na ye wose to di sem konto wone, ne ko ná ye wodiu kaanem ŋwaane, de wɛleera saarem kaanem, de wɛleera jene kaanem ŋwaane. Kokuri to, di sem ye wose mo Wɛ ŋwaane. 14Kaanem tiina bam ná yeini ba zo Wɛ diga kam tete, ba daa bá wane ba nwoŋi ka jei sem ne, se ba zo da-yiga konkɔlɔ kom, ye ba wo lɔɔre ba kaanem gwaaro tem ba tiŋi di sem konto wone. Ba maa wó yeini ba kwei gwaaro tedwonna ba zo, se ba laam wane ba yi nɔɔna bam na wo mɛ seeni to.”

15O na maŋe woŋo kolo dwi maama na wo Wɛ diga jei sem ne o ti to, mo o jaane-ne pa dé tɔge wɛ-puli seeni ni dem dé nwoŋi pwooni. O laam ma maŋe pwola kalo na kaare dáane maama to. 16O kwei kasogo kolo o ya na jege o maŋe wonnu tem maama to mo o maa maŋe wɛ-puli seeni saŋa kam. Ka ye jatwogo de noa ni maŋem bia yanu mo. 17O ta ma kwei kasogo kom o maŋe baŋa seeni saŋa kam. Ka de ye jatwogo de noa ni maŋem bia yanu mo. 18O daa ma maŋe tega-kuri seeni saŋa kam. Ka de ye jatwogo de noa ni maŋem bia yanu mo. 19O ma pipiri o vo o maŋe wɛ-zoore seeni saŋa kam. Ka de maa ye jatwogo de noa ni maŋem bia yanu. 20O déem tɔge chwoŋa kam konto mo o maŋe Wɛ diga kam jei sem de kabira kalo na kaare-ka to. Ka sɛ sem mae da se mae da mo, jatwogo de noa ni maŋem kuni bia yanu yanu. Kabira kam déem lɔge ka che Wɛ diga kam, se ko pɔɔre wonnu telo na ye wose to, de telo na wora dɛ dɛ totoŋa ŋwaane to daane mo.

Currently Selected:

Ezekeli 42: KBG

Highlight

Copy