Ezekeli 41

1Nɔɔno wom laam ma ja-ne o zo di-yuu kom. O ma maŋe taala yalei yam na wo ka ni dem sɛ selei sem ne to. Ya dedoa na lira tei to ye jatwogo de noa ni maŋem beredo mo. 2Ka ni dem maŋem ye jatwogo de noa ni kuni fuga mo. Ka sɛ kabiri sem maa ye jatwogo de noa ni maŋem benu benu saŋa maama baŋa ne. O ta ma maŋe diga kam tete. Ka dedɔrem baŋa maŋem maa ye jatwogo de noa ni maŋem kuni finna. Ka kayɔlɔ baŋa maŋem de maa ye jatwogo de noa ni maŋem kuni finlei. 3O laam ma vo o zo di-yun-gala kam. O ma maŋe taala yalei yam na wo ka ni dem sɛ selei sem ne to. Ya dedoa dedoa maa ye jatwogo de noa ni maŋem belei. Ni dem tete ye jatwogo de noa ni maŋem kuni beredo mo kayɔlɔ baŋa ne. Ka sɛ kabiri sem maa ye jatwogo de noa ni maŋem berepɛ berepɛ. 4O laam ma maŋe di-yun-gala kam tete, de ka na lɛɛne ka yi di-yuu kom to. Ko maa ye jatwogo de noa ni maŋem finlei dedɔrem baŋa ne. Ko ta ye jatwogo de noa ni maŋem finlei mo kayɔlɔ baŋa ne. O ma ta de amo o we, “Diga kanto mo tiini ka ye wose Wɛ ŋwaane.”#1 Pwa 6:16, 20

5Nɔɔno wom laam ma maŋe Wɛ diga kabira kam ni na ye tei to. Ka na lira tei to ye jatwogo de noa ni maŋem beredo mo. Di-balwa balo na lɔge ba yeiri Wɛ diga kabira kam pwooni yiga seeni to ye jatwogo de noa ni maŋem bena bena mo kayɔlɔ baŋa ne. 6Di-balwa bam konto lɔge ba daŋe da-baŋa mo kuni betɔ. Se maa ye di fintɔ mo gena maama ne. Ba nam na lɔge di-kamunu kom kabira kam tei to, ba pɔɔre mɛ di-balwa bei sem na wó peini da to mo, se ba daa yé lu bɔɔna kabira kam yera ne ba lɔ. 7Di selo na lɔge se daŋe baŋa gene sem ne to yala se dwoi selo na wo kuri dem ne to, se ko tɔge Wɛ diga kabira kam na ye tei ko zege tega kam seeni ko taa diini baŋa seeni to. Nateina mo zege kuri gene sem ne ya dɔɔle ya tɔge tetare gene sem seeni, ya kɛ ya di baŋa seeni gene di sem.

8Amo ma nii a na we ba lɔge bimbini mo na kaare Wɛ diga kam maama. Di-balwa bam déem chwi bimbini dem baŋa ne mo, ye de maŋem dem ye kasogo dedoa. Jatwogo de noa ni maŋem kuni beredo mo konto. 9Di-balwa bam kabiri sem liliru maŋem ye jatwogo de noa ni kuni benu mo. Ko daare, pwola kalo na tigi Wɛ diga kam di-balwa bam, 10dedaane konkɔlɔ kom di sedwonna sem laŋa ne to ya ye jatwogo de noa ni maŋem finlei mo ka kayɔlɔ baŋa ne, se ko ja ko kaare Wɛ diga kam ni maama. 11Nia mo wora ya na tɔge ya zoore di-balwa bam wone, ne nɔɔno ná zege pwola kam ne o beene da. Ni dedoa zege Wɛ diga kam baŋa seeni mo, ye dedwoŋi dem zege ka tega-kuri seeni. Pwola kalo na daare to kayɔlɔ baŋa maŋem dem laam maa ye jatwogo de noa ni maŋem benu ko kaare Wɛ diga kam maama.

12Diga kadwoŋi déem wo Wɛ diga kam wɛ-zoore seeni ka na jeeri konkɔlɔ kom. Ka maa ye jatwogo de noa ni maŋem kuni fuserepɛ kayɔlɔ baŋa ne. Ka kabira kam liliru maŋem maa ye jatwogo de noa ni maŋem benu se ko kaare ko pu. Ka dedɔrem baŋa maŋem maa ye jatwogo de noa ni kuni funogo.

13Nɔɔno wom laam ma maŋe Wɛ diga kam. Ka ye jatwogo de noa ni maŋem bi mo dedɔrem baŋa ne. Wɛ diga konkɔlɔ kom pwola kayɔlɔ maŋem de maa ye jatwogo de noa ni maŋem bi, se ko vo ko yi diga kam de ka kabira kam maama. 14Wɛ diga konkɔlɔ pwola kalo na wo ka wɛ-puli seeni to, de ka yiga kam seeni de maa ye jatwogo de noa ni maŋem bi kayɔlɔ baŋa ne.

15Nɔɔno wom daa ma maŋe diga kalo na wo Wɛ diga kam wɛ-zoore seeni ye ka jeeri konkɔlɔ kom to, ko woli de di selo na yeiri ka sɛ selei sem to. Ko maama maa ye jatwogo de noa ni maŋem kuni bi.

Ko ta ná ye Wɛ diga napɔrɔ kom, de ka di-yuu kom, dedaane di-yun-gala kam, 16ba kwei da-pelwaro mo ba kwoli di setɔ sem maama wo kabira kam, ko zege ka tega kam seeni se ko yi takworru tem na wo mɛ to. Di sem nia yam, de se takworru tem, dedaane se gugworru tem maama mo ba fɔge ba kwɛ konto dwoŋi ba zege. 17Ko ta ná ye ni delo na zoore di-yuu kom to, ba ma kwɛ kabira kalo na wo de baŋa kam seeni to. Ba ma gɔgere Wɛ diga kam wo kabiri sem maama. 18Ko nam ye cherubi de konkwara nyenyero mo ba gɔgere ba ke da, pa se cherubi maama gɔgere ko saŋe konkwara. Ba nam ke cherubi maama pa ka jege yibi selei mo. 19Cherubi maama yibia kalo na ye nabiinu yibia to wó jeeri konkwara mo daa dedoa ne, ye ka yibia kalo na ye nywoŋo yibia to jeeri konkwara kadwoŋi na saŋe to. Te ke konto dwoŋi mo te kaare diga kam wo maama. 20Ko na zege tega ne se ko ja ko di jeiga kalo na wo ni dem baŋa seeni to, ba yɔɔre ba gɔgere cherubi, de konkwara nyenyero mo Wɛ di-yuu kom kabiri sem yera ne.

21Ni delo na zoore di-yuu kom to sɛ sena sem mae daane mo. Delo dem maa na zoore di-yun-gala kam wo to de ye konto dwoŋi. 22Kaanem bimbini delo ba na mɛ daa ba ke to maa zege da. De maa ye jatwogo de noa ni maŋem kuni betɔ wɛ-baŋa ne. De dedɔrem dem baŋa seeni de de kayɔlɔ baŋa seeni de maa ye jatwogo de noa ni maŋem belei belei. Bimbini dem nyea yam, de de kuri dem seeni, dedaane de sɛ sem maama ye dɛ mo ba mɛ ba ke. Nɔɔno wom ma ta de amo o we, “Tabolo konto mo ye kolo na zege Baŋa Wɛ yiga ne to.”

23Ni delo na zoore di-yuu kom to, de delo na zoore di-yun-gala kam to maama jege bworru telei telei mo. 24Bworo maama jege vɔna yalei mo pa ko wae ko piri ko tete ko ke daane. 25Ba ta ma gɔgere cherubi de konkwara nyenyero di-yuu kom ni-bworru tem yera ne, ne ba na ke tei kabiri sem yera ne to. Ba mɛ dɛ mo ba tei pwoŋa Wɛ diga napɔrɔ kom pwooni yiga ne. 26Takworru maa wo napɔrɔ kom ni sɛ selei sem ne, ye ba gɔgere konkwara nyenyero ba ke da. Wɛ diga di-balwa bam de se pwei sem de déem kwɛ konto dwoŋi mo.

Currently Selected:

Ezekeli 41: KBG

Highlight

Copy