Ezekeli 40

Jerusalem nadoŋo kom taane

1 Baŋa Wɛ dam dem déem tu amo baŋa. Ko ye bene delo ba na kale debam ba vo sa-teo yiga yiga ye bena finlei-yanu kɛ to boboa chana kam da fuga dɛ dem ne mo konto. Ko nam ye Jerusalem teo totoore dem kwaga ne bena fuga-yana bene dem ne mo. Baŋa Wɛ dam dem na tu amo baŋa dɛ dem konto ne to mo o jaane-ne o vo o bere-ne Jerusalem na ye tei to. 2Wɛ ma veere wonnu o bere-ne ye o pa a vo Isarele tega kam seeni se a zege peo na tiini ko dɔra to yuu ne.#Gurim 21:10 Amo na nii tega-kuri seeni to, mo a nɛ sam dedɛ na lɔge de zega, ne te-fɔrɔ mo zege de sam to. 3O na jaane-ne pa a fɔɔre a yi da to, mo a nɛ nɔɔno na zega, ye o nyeena ne channa na ye tei to. Kotu yɔɔre o zege manchwo-peo kom ni ne mo, ye o zei ŋona de kasogo o jeŋa ne, ne ba na ma-te ba maŋe wonnu tei to. 4Nɔɔno wom laam ma ta de amo o we, “Nabiinu, fɔge n puri n yia se n nii, n daare n pore n zwa se n cheigi kolo maama a na lage a bere‑m to. Kokuri, konto ŋwaane mo ba jaane‑m ba ba ywo-seeni. Tole kolo maama n na nɛ to n bere Isarele tiina bam.”

Wɛ diga konkɔlɔ wɛ-puli seeni ni dem

5Amo ma nii a na kabira na lɔge ka che Wɛ diga kam jei sem maama. Nɔɔno wom na zei kasogo kolo to dedɔrem déem ye naba-laara yatɔ mo. O ma kwei-ko o maŋe kabira kam na lira tei to. Ka maŋem déem nam ye kasogo dedoa. Ka dedɔrem baŋa maŋem de maa ye kasogo dedoa.

6O laam ma vo o yi Wɛ diga kam ni delo na jeeri wɛ-puli seeni to. O ma dɔɔle nateina yam o di, ye o daare o maŋe manchwo-ni dem seeni na dɔra tei to. De maŋem dem déem ye kasogo dedoa mo. 7Gugworru teredo déem mo zege te geene tetare chwoŋa kam ka sɛ selei sem ne. Te dedɔrem baŋa maŋem ye kasogo dedoa mo. Te kayɔlɔ baŋa maŋem de maa ye kasogo dedoa. Kabira kalo na chege ka pɔɔre gugworru tem maama daane to maa ye jatwogo de noa ni maŋem kuni benu. Napɔrɔ kolo na jeeri Wɛ diga kam to manchwo-ni maŋem de maa ye kasogo dedoa.

8Nɔɔno wom ta ma maŋe napɔrɔ kom tete. 9Ko wo kom maa ye jatwogo de noa ni maŋem kuni nana, ye ko taara yam maa ye jatwogo de noa ni maŋem belei. Napɔrɔ kom ni dem déem jeeri Wɛ diga kam tete mo.

10Gugworru tetɔ tetɔ maa wo tetare chwoŋa kam sɛ selei sem maama ne. Te maama mae daane mo, ye taala yalo na wora to de maa mae daane. 11O ta ma maŋe chwoŋa kalo na tɔge ni dem seeni to. Ka na yala tei to maa ye jatwogo de noa ni maŋem kuni fuga. Ka dedɔrem baŋa maŋem maa ye jatwogo de noa ni maŋem kuni fuga-betɔ. 12Gugworo maama yiga ne, gengaŋ-tua mo zege da ye ka maŋe de jatwogo de noa ni maŋem dedoa. Gugworru tem tete maama maa ye jatwogo de noa ni maŋem kuni beredo se sɛ sena sem maama baŋa ne. 13Nɔɔno wom daa ma zege gugworo dedoa kwaga kabira kam seeni, o tɔge tetare chwoŋa kam seeni o maŋe o zo gugworo kodwoŋi kwaga kabira kam. Ko maa ye jatwogo de noa ni maŋem kuni finlei-benu. 14O laam ma jeeli napɔrɔ kom wɛ-baŋa maŋem dem. Ko maa ye jatwogo de noa ni maŋem kuni fuseredo. Napɔrɔ kom déem jeeri konkɔlɔ kolo na wo ko sɛ setɔ sem ne to mo. 15Pwola kalo ba na tɔge da ba kɛ, ko zege pwooni yiga ni dem ne se ko yi napɔrɔ kom ni dem to maŋem maa ye jatwogo de noa ni maŋem finnu. 16Gugworru tem de te taala yam déem jege takworru mo te kabiri sem yera maama ne. Napɔrɔ kom de maa jege takworru konto dwoŋi. Konkwara nyenyero mo gɔgere te tigi taala yam maama yera ne.

Da-yiga konkɔlɔ kom

17Nɔɔno wom ma ja-ne pa dé zo Wɛ diga kam da-yiga konkɔlɔ kom. Amo ma nii a na di selo na lɔge da to, de ko pwola kalo na fɔge ka kwɛ to. Di sem ke daane se ye fintɔ mo. Se déem lɔge se jeeri pwola kam mo ye se kaare konkɔlɔ kom maama. 18Pwola kam maa tigi ka tɔge konkɔlɔ kom nia yam maama, pa se ka dedɔrem maŋe de-ya. Kuri seeni pwola kam mo konto. 19O ma maŋe pwola kalo na tigi konkɔlɔ kom nia yalei yam tetare laŋa ne to. Ko na zege wɛ-puli seeni ni dem se ko taa vei baŋa seeni ni dem to, ko maŋem ye jatwogo de noa ni maŋem kuni bi mo.

Baŋa seeni ni dem

20Nɔɔno wom daa ma maŋe ni delo na jeeri baŋa seeni ye de tole de vei da-yiga konkɔlɔ kom to. 21Gugworru tetɔ tetɔ na wo tetare chwoŋa kam sɛ sem ne to, de te taala yam, ko woli de napɔrɔ kom maama maŋem ye bedwe mo de wɛ-puli seeni ni dem na ye tei to. Ni dem diga kam ye jatwogo de noa ni maŋem kuni finnu mo dedɔrem baŋa ne. De taa ye jatwogo de noa ni maŋem finlei-benu ko kayɔlɔ baŋa ne. 22Ka takworru tem, de napɔrɔ kom, dedaane konkwara nyenyero telo na gɔgere te tigi ka kabiri sem yera ne to maama yɔɔre te ye bedwe mo de wɛ-puli seeni ni dem na ye tei to. Ka maa jege nateina yarepɛ na diini ya vei ka wone. Nɔɔna ná diini ba yi da, ka napɔrɔ kom wó taa wo ba yiga ne mo. 23Ni dedwoŋi de maa wora de na vei de zoore tetare konkɔlɔ kom wone, ye de jeeri baŋa seeni ni dem. Ni dedwoŋi de maa wo konkɔlɔ kom wɛ-puli seeni. Nɔɔno wom ma maŋe pwola kalo na tigi ni dedwe ne, se ko yi ni dedwoŋi dem ne to. Ko maa ye jatwogo de noa ni maŋem kuni bi.

Tega-kuri seeni ni dem

24Nɔɔno wom laam ma tɔge a yiga pa dé vo konkɔlɔ kom tega-kuri dem seeni. Amo ma nii a na ni delo na jeeri tega-kuri seeni to. O ma maŋe de taala yam, de de napɔrɔ kom. Te maama maŋem dem yɔɔre de ye bedwe de nia yadwonna yam na ye tei to mo. 25Ni dem diga kam de de napɔrɔ kom maa jege takworru ne nia yadwonna yam takworru tem na ye tei to. Diga kam ye jatwogo de noa ni maŋem kuni finnu mo dedɔrem baŋa ne. Ka ta ye jatwogo de noa ni maŋem finlei-benu mo kayɔlɔ baŋa ne. 26Ka maa jege nateina yarepɛ na diini ya vei ka wone. Nɔɔna ná diini ba yi da, ka napɔrɔ kom wó taa wo ba yiga ne mo. Ka taala yam maa jege konkwara nyenyero na gɔgere te tigi ya yera ne to, konkwara dedoa saŋa maama ne. 27Wɛ diga kam tetare konkɔlɔ kom de maa jege ni delo na jeeri tega-kuri seeni to. Nɔɔno wom ma maŋe pwola kalo na tigi tega-kuri seeni nia yalei yam tetare laŋa ne to. Ko maa ye jatwogo de noa ni maŋem kuni bi.

Nia yalo na vei ya zoore tetare konkɔlɔ kom wone to

28O daa ma tɔge tega-kuri ni dem seeni o ja-ne pa dé zo Wɛ diga tetare konkɔlɔ kom wone. O ma maŋe tega-kuri seeni ni dem, ye dento de nia yadwonna yam maŋem ye bedwe. 29De gugworru tem, de taala yam, de napɔrɔ kom maama maŋem dem ye bedwe de nia yadwonna yam mo. Ni dem diga kam, de napɔrɔ kom kabiri maama maa jege takworru se yera ne. Ka maa ye jatwogo de noa ni maŋem kuni finnu dedɔrem baŋa ne. Ka ta ye jatwogo de noa ni maŋem finlei-benu mo kayɔlɔ baŋa ne. 30Tetare konkɔlɔ kom saŋa maama jege ka napɔrɔ mo. Te maama ye jatwogo de noa ni maŋem kuni finlei-benu mo dedɔrem baŋa ne. Te ta ye jatwogo de noa ni maŋem kuni benu mo kayɔlɔ baŋa ne. 31Napɔrɔ kom nam jeeri da-yiga konkɔlɔ kom mo. Konkwara nyenyero déem gɔgere mo te tigi kabiri sem yera ne. Nateina nana de maa tole ya diini ni dem konto ne.

32Nɔɔno wom daa ma ja-ne o vo o yi tetare konkɔlɔ kom wɛ-puli seeni saŋa kam. O ma maŋe ka ni dem. De de maŋem yɔɔre de ye ne yadwonna yam maŋem na ye tei to mo. 33De gugworru tem, de taala yam, de napɔrɔ kom maama maŋem ye bedwe de nia yadwonna yam mo. Ni dem diga kam, de napɔrɔ kom kabiri maama maa jege takworru se yera ne. Ka maa ye jatwogo de noa ni maŋem kuni finnu dedɔrem baŋa ne. Ka ta ye jatwogo de noa ni maŋem finlei-benu mo kayɔlɔ baŋa ne. 34Napɔrɔ kom jeeri da-yiga konkɔlɔ kom mo. Konkwara nyenyero déem maa gɔgere te tigi kabiri sem yera ne. Nateina nana de maa tole ya diini ni dem konto ne.

35O daa ma ja-ne pa dé yi baŋa seeni ni dem, ye o maŋe-de. Dento de maŋem ye bedwe de nia yadwonna yam na mae tei to, 36dedaane de gugworru tem, de taala yam, de napɔrɔ kom maama mo. Diga kam kabiri sem maama maa jege takworru se yera ne. Ka maŋem dem ye jatwogo de noa ni maŋem finnu mo dedɔrem baŋa ne. Ka ta ye jatwogo de noa ni maŋem finlei-benu mo kayɔlɔ baŋa ne. 37Napɔrɔ kom jeeri da-yiga konkɔlɔ kom mo. Konkwara nyenyero déem mo gɔgere te tigi ko kabiri sem yera ne. Nateina nana de maa tole ya diini ni dem konto ne.

Kaanem vara kwɛɛm diga

38Diga kadwoŋi de ka ni maa wo konkɔlɔ ni dem konto napɔrɔ kom teiŋa ne. Ka wone mo ba yeini ba zare vara balo ba na wó go ba ma ke zwɛɛm kaanem to. 39Tabollo tena mo zege napɔrɔ kom ne. Te telei mo zege diga kam saŋa dedoa seeni, ye telei de zege saŋa kadwoŋi kam ne. Te baŋa ne mo ba nam goe vara balo ba na wó ma ba ke zwɛɛm kaanem, de wɛleere saarem kaanem, de wɛleere jene kaanem to. 40Tabollo tena ta mo wo napɔrɔ kom pwooni yiga ne, mɛ nɔɔna na diini ba tɔge baŋa seeni ni dem to. Telei maa wo ni dem saŋa dedoa seeni, ye telei de wo saŋa kakam kam ne. 41Ko maa na ye tei to, tabollo nana mo wora. Tena mo wo napɔrɔ kom wone, ye tena de wo pwooni yiga kam ne. Te maa ye se ba go kaanem vara bam mo te baŋa ne. 42Tabollo tena maa wora ba na sare kandwa ye ba ma-ya ba ke-te to. Ba mae tento mo ba chae zwɛɛm kaanem vara bam. Tabollo tem konto dedɔrem baŋa maŋem ye jatwogo de noa ni maŋem dedoa de chicheiro mo. Te kayɔlɔ baŋa maŋem de ta ye konto mo. Te wɛ-baŋa maŋem maa ye jatwogo de noa ni maŋem dedoa. Fane selo ba na mae ba gwona vara balo ba na wó ma ba ke zwɛɛm kaanem de kaanem dwi maama to mo ba kwei ba tiŋi tabollo tem konto baŋa ne. 43Gwoli de maa meeli diga kam wo kabira yera maama ne. Se ye da-yiga noa maŋem mo. Tabollo tem nam wora se ba ná go vara bam, se ba kwei nɔna yam mo ba daŋe te baŋa ne.

Kaanem tiina bam di sem

44Wɛ diga tetare konkɔlɔ kom wone di selei maa wora, se na wo konkɔlɔ ni dem pwooni yiga ne to. Se dedoa yeiri ni delo na wo baŋa seeni to mo ye ka jeeri tega-kuri seeni. Diga kadwoŋi kam de maa yeiri ni delo na wo tega-kuri seeni to, ye ka jeeri baŋa seeni. 45Nɔɔno wom laam ma ta de amo o we, “Diga kalo na jeeri tega-kuri seeni to ye kaanem tiina balo na nii Wɛ diga kam baŋa ne to nyem mo. 46Ko daare kalo na jeeri baŋa seeni to maa ye kaanem tiina balo na nii kaanem bimbini dem baŋa ne to de nyem. Banto nam ye Zadoki diga kam tiina mo. Levi dwi dem maama wone nɔɔna banto yerane mo jege chwoŋa se ba fɔɔre ba twɛ Baŋa Wɛ tei se ba taa toŋa ba pa‑o.”#2 Samuwel 8:17

47Nɔɔno wom laam ma maŋe tetare konkɔlɔ kom. Ko yɔɔre ko mae da ko mae da mo, dedɔrem baŋa, de kayɔlɔ baŋa ne. Ko maa ye jatwogo de noa ni maŋem bi bi. Kaanem bimbini dem maa zege Wɛ diga kam yiga ne.

Wɛ diga kam

48O laam ma ja-ne o vo o yi Wɛ diga kam tete napɔrɔ kom. O ma maŋe ko taala yalei yam na wo ni dem sɛ selei sem ne to. Ya na lira tei to ye jatwogo de noa ni maŋem kuni benu mo. Napɔrɔ kom ni dem maa ye jatwogo de noa ni maŋem fuga-bena kayɔlɔ baŋa ne. Ka sɛ kabiri sem ye jatwogo de noa ni maŋem betɔ betɔ saŋa maama baŋa ne mo. 49Napɔrɔ kom maa ye jatwogo de noa ni maŋem finlei kayɔlɔ baŋa ne. Ko ta ye jatwogo de noa ni maŋem fuga-belei mo dedɔrem baŋa ne. Nateina#40:49 nateina naa nateina fuga mo dɔɔle ya diini ya yi diga kam ni. Ywoa yalei na wo taala yam teiŋa ne to déem maa chwi ya zege ni dem saŋa maama ne.

Currently Selected:

Ezekeli 40: KBG

Highlight

Copy