Ezekeli 39

1“Nabiinu, pworisi taane n chɔge Goga se n ta we, ‘Yuu-tu Baŋa Wɛ na tage tei to mo tento: Goga, amo dwoni de nmo, nmo wolo na ye Meseka, de Tubal yuu tu to. 2A lage a pa se n za n kikia yam mo. A maa wó kale‑m, se a pa n nwoŋi baŋa seeni teo kom mɛ n ya na wora to se n ba n kwaare jara Isarele peero tem baŋa ne. 3A laam maa wó fere taŋa kalo n na zei n jagwia ne to a de tega ne, ye a daare a pa se n chena yam n na zei n jazem ne to de lwei ya to tega ne. 4Isarele peero tem yuu ne mo n lage n te, nmo de n jar-keira bam maama, de dwi-gɛ tiina balo na wo n tei ne to. Abam yera yam laam maa wó ji duura, de zuna dwi maama, de kago-vara ni-wodiu. 5Nmo yera yam wó yɔɔre ya taa tigi pwola ne mo pare-pare. Amo Yuu-tu Baŋa Wɛ mo tage konto. 6Amo lage a tɔrege mini mo a de Magoga de balo na zoore chemm naneo kom ni ne to wone. Ba laam maa wó lɔre we amo mo ye Baŋa Wɛ wom.

7Amo lage a pa se a nɔɔna Isarele tiina bam taa yei amo yere dem ni ne mo. A daa bá pa-ba chwoŋa se ba yaale-de, de na yɔɔre de ye wose to ŋwaane. Logo baŋa teene dem maama de maa wó lɔre we amo Baŋa Wɛ mo ye Wo-pwoŋo Tu ye a nii Isarele teo kom baŋa ne. 8Nii-na! Maŋa lage ka yi se wonnu tento seene te ke! Yuu-tu Baŋa Wɛ na tage kolo to mo konto. Ko ye maŋa kalo amo na maŋe a ta ka taane to mo.

9Maŋa kam konto nam ná yia, Isarele tiina bam wó nwoŋi ba sam dem ne ba vo ba pɛ jara zela yalo jar-keira bam na tega ba daare to, se ba kwei-ya ba ma dwei mini. Ba maa wó kwei ba jara nantane sem, de ba tɛ sem, de ba chena yam, de ba jara-keim gwola yam, de ba chichwoa yam, se ba taa jege-te ba dwei mini bena yarepɛ. 10Ba daa bá vo gaao se ba puuri da-dwa, naa ba zo goa wone se ba gwoni dɛ, ba na wó taa jege jara zela yam ba ma ba dwei mini to ŋwaane. Konto to, Isarele tiina bam wó yiri ba jene balo déem na vere-ba to baŋa ne, de ba na vere banto de wonnu to. Yuu-tu Baŋa Wɛ na tage kolo to mo konto.

11Maŋa kam konto ne, amo wó kwei tega Isarele laŋa kam ne a pa Goga, se ba suli o de o jar-keira bam da. Ka maa wó taa ye chwo-veila bwolo kom ne, nɔɔna na tɔge mɛ ba vei naneo kom wɛ-puli seeni to mo. Ba yibeela yam nam wó che chwoŋa kam mo se nɔɔna daa yé wane ba tɔge da ba kɛ, ba na wó suli Goga de o kɔ-fɔrɔ kom maama da to ŋwaane. Konto ŋwaane ba wó taa bwoi jei sem we, “Goga nɔn-kɔgɔ bwolo” mo.

12Isarele tiina bam wó kwei chane serepɛ mo ba suli twa bam ba ti, se ba wane ba kwɛ tega kam. 13Teo kom nɔn-bia bam maama nam mo wó suli twa bam. Ko maa wó pa ba jwoŋi yere dɛ delo ne amo na wó bere a nenɔŋ-fɔrɔ kom jaja to. Yuu-tu Baŋa Wɛ na tage kolo to mo konto. 14Ba maa wó kuri nɔɔna se ba taa kare tega kam ni maama ba beera, se ba nii ba na twa balo ta na tigi pwola ne to. Ba maa ná nɛ-ba, nɔɔna badaara wó suli-ba mo se ko kwɛ tega kam. Ba wó taa ke konto mo chane serepɛ. 15Ba ná kare tega kam ne ba via, ye ba dedoa ná nɛ nabiinu kua, kotu wó ke maana mo o tiŋi ka yera ne. Bayɛ maa wó ba ba kwei kua kam ba vo ba suli Goga nɔn-kɔgɔ bwolo kom ne. 16Ba wó tɔge chwoŋa kam konto mo ba kwɛ tega kam. Teo kodwoŋi nam wó taa wo jei sem konto ne, ko yere na ye Hamona.’

17Ko nam ná ye nmo, nabiinu, Yuu-tu Baŋa Wɛ na tage tei de nmo to mo tento: Bwoŋi zuna dwi maama, de kago-vara bam se n ta we, ‘Nwoŋi-na jei maama á ba á jeeri daane Isarele peero tem yuu ne, se á di kaanem kuri delo a na ke se a pa abam to. Ko ye kuri-fɔrɔ mo a ke dáane, se a pa abam di nɔna, ye á daare á nyɔ jana á su. 18Á wó di babɛ ya-nɔna ye á daare á nyɔ tega baŋa dedɛɛra jana. Ba wó taa nye de pi-bale, de pipeili, de bo-bale, de na-bale mo ba pɛ abam se á di, ye ba maama nugi bigila-bigila ne Basan vara bam na ye tei to mo. 19Abam ná tu á di kuri delo amo na wó ke a pa abam to, á wó di nabiina yera lara se á yera ba ya sɔɔre, ye ba jana bam á na wó nyɔ to de maa wó pa á bugi. 20Wodiu kolo amo na wó pa abam se á di to, abam wó kuri sisein-nɔɔna de balo ya na diini-se to nɔna mo á di á boboŋa.’ Yuu-tu Baŋa Wɛ na tage kolo to mo konto.

21Amo nam wó pa se a nenɔŋ-fɔrɔ kom bere jaja logo baŋa dwi maama tetare ne. Ba maama wó na a na tɔge a dam-fɔrɔ kom ŋwaane a yɔɔre a waare-ba tei to. 22Ko maa na wó zege maŋa kam konto ne se ko taa vei to, Isarele dwi tiina bam wó lɔre we amo mo ye ba Tu Baŋa Wɛ wom. 23Dwi-gɛ tiina bam de maa wó lɔre we Isarele tiina bam na ke wɛleera ye ba nwoŋi amo kwaga ne to ŋwaane mo amo déem dole-ba a yage sa-teo ne yiga yiga. A laam ma le a yiga ba wone, ye a ke-ba ba dona jeŋa ne, pa se ba maama te jara wone. 24A déem waare-ba se ko maŋe de ba totoŋ-zɔɔna de ba zwabania kikia yam na ye tei to mo. Amo yiga daa tera ba wone.

25Konto ŋwaane, Yuu-tu Baŋa Wɛ na tage tei to mo tento: Amo wó pa se Jakob dwi dem jwoori ba taa jege yu-ywoŋo, ye a duri Isarele tiina bam maama ŋwaŋa. A maa wó seene a yia se a zeiŋi a yere dem na ye wose to wɛɛne. 26Ba ná tu ba jeini ba tete tega kam wone ye nɔɔn-nɔɔno daa ba fugi-ba, ba laam wó swei chaveera yalo maama ba ya na nɛ to, de zwabania kikia yalo ba na ke ba chɔge amo yiga to ni ne. 27Amo wó le-ba a ja a nwoŋi teene delo ba ya na zoore de wone to, se a jwoŋi-ba ba dona jeŋa ne. A maa wó tɔge ba baŋa ne a bere jaja we a ye wose, se dwi-gɛ tiina dedɛ taa zege ba nia. 28Amo nɔɔna bam laam maa wó lɔre we amo mo ye ba Tu Baŋa Wɛ wom. Kokuri, amo ya mo dole-ba a yage teene dedwonna wone, ye a nam daa wó ja-ba a jwoori a jeini ba tete teo kom wone. A daa bá yage ba dedoa tete de se kotu daare jei sem konto ne. 29Amo daa bá le a yiga ba wone. A nam lage a lwo a Jworo mo a yage Isarele dwi tiina bam baŋa ne. Yuu-tu Baŋa Wɛ na tage kolo to mo konto.”

Currently Selected:

Ezekeli 39: KBG

Highlight

Copy