Ezekeli 38

Goga taane

1 Baŋa Wɛ kwora daa ma yi amo we:

2“Nabiinu, pipiri n yibia n jeeri Magoga teo pɛ Goga na tei Meseka de Tubal to.#Gurim 20:8 Pworisi taane n chɔge‑o, 3se n ta we, ‘Yuu-tu Baŋa Wɛ na tage tei to mo tento: Amo dwoni de nmo mo, nmo Goga na ye Meseka de Tubal yuu tu to. 4Amo lage a pa se n za n kikia yam mo. A maa wó kwei gwoli a ja‑m n peyaa seeni, ye a daare a vaŋe nmo de n jar-keira bam maama, de á sisein-nɔɔna de balo na diini-se to. Banto maama vɔge jara-keim zela mo ba zege diŋ-diŋ. Ba maa ye kɔ-fɔrɔ zanzam, ye ba zei se-zɔɔro de jara nantane. 5Peresia tiina, de Kusi tiina, de Puti tiina de wó tɔge ba taa wo ba wone, ye ba de jege ba jara nantane de ba yu-gwonnu. 6Gomera jar-keira bam maama de maa wora, ko woli de baŋa seeni teo Bɛte-Togarama jar-keira bam maama. Ba tu ba woli abam wone, se á jar-keira kɔgɔ kom tiini ko taa daga.

7Nmo Goga, de jar-keira kɔgɔ kolo maama na wo n tei ne to nam jege se á che á tete mo. Nmo wó ta‑n nii ba baŋa ne. 8Ko ná tu ko dáane fee, ba wó bwoŋi abam se á ti á yiga jara ŋwaane. Bena yam ná yi ya ti, á laam wó vo á kwaare jara de Isarele tiina bam, de ba ya na nwoŋi jara wone ye ba ba ba sii to de. Ba ma nwoŋi sa-teene dedɛ ne mo ba jwoori sɔŋɔ, ye ba laam zoore ba tete teo peero jei sem ne mɛ ya na tigi kafɛ to de bochare-zuru. 9Nmo de n jar-keira bam, de dwi-gɛ tiina balo na wo n tei ne to nam wó vo á jeeri-ba de jara mo, ne vo-dɛɔ na pɔpɔ ko zaŋe tei to. Abam wó li tega kam baŋa maama ne kunkwoŋo dwoŋi to.

10Yuu-tu Baŋa Wɛ na tage tei to mo tento: Maŋa kam konto ne, boboŋa wó taa kare n yuu ne ya via, se n da ko ŋwaane n jeeli lwarem se n ke. 11Nmo wó ta n tete ne we, “A lage a vo a ke chichuŋu de nɔɔna bam konto ye ba zoore chemm mo. Ba teene dem tiini de bwona lage-lage, ye kabiri wo chege-de. Bworru de nam tera se ba taa pe-de. 12A nam wó vo a chɔge jei selo ya na ye di-dwonnu ye nɔɔna laam fɔge ba kwɛ-te to. A maa wó vere nɔɔna bam wonnu tem. Ba déem ye peena mo sa-teene wone, ye ba jwoori ba tete teo ba zoora tega kalo na wo logo baŋa tetare ne to wone. Ba maa jege vara de jejegero dedɛ.”

13Nmo ná nwoŋi se n kwaare jara, Seba tiina, de Dedan tiina, de pipim-piina balo na nwoŋi Tarasisi de ko nawuura yam seeni to wó bwei ba we, “Nmo tu se n vere debam mo na? N lage n jar-keira bam mo n ke daane se á ba á vere debam lu-nyenno, de sabu-seŋa, dedaane dé vara, de dé jejegero, se á zeŋe wonnu dedɛ á ja á viiri na?” ’

14Konto ŋwaane, nabiinu, pworisi n chɔge Goga we, ‘Yuu-tu Baŋa Wɛ na tage tei to mo tento: Maŋa kam konto ná yia, ye a nɔɔna Isarele tiina bam zoore ba tega kam wone chemm mo, nmo bá maane ko ni ne na? 15Nmo wó zaŋe n nwoŋi n baŋa seeni teo kom ne n tɔge de n kɔ-fɔrɔ kom na ye teene dedɛ nɔɔna to n vo n kwaare jara de Isarele tiina bam. Abam jar-keira kɔ-fɔrɔ zanzam wó taa diini sisein-nɔɔna mo ba via. 16Á wó vo á zaŋe amo nɔɔna Isarele tiina bam baŋa ne mo ne kunkwoŋo na li tega kam baŋa maama tei to. Goga, da yam ná yi ya ti, amo lage a pa se n vo n kwaare jara de a tete teo kom, se dwi-gɛ tiina bam lɔre amo na ye wolo to, ne a ná tɔge nmo baŋa ne a bere jaja we a ye wose mo ye ba na.

17Yuu-tu Baŋa Wɛ nam na tage tei to mo tento: Ko dae nmo taane mo a déem ŋɔɔne ko tɔge Isarele sampwori sem na ye a tontoŋena to baŋa ne na? Ba déem kwei bena dedɛ mo ba pworisi we, amo lage a pa nmo ke chichuŋu de-ba. 18Ko nam na wó taa ye tei maŋa kam konto ne to mo tento: Goga ná jeeri Isarele teo kom de jara, amo ban-lom dem wó wiiri ba baŋa ne. Yuu-tu Baŋa Wɛ mo tage konto. 19A lage a da a ban-zɔŋɔ kom ŋwaane a ta jaja we, dɛ dem konto ne tega kam wó tiini ka ziziŋi mo Isarele laŋa kam ne. 20Ko maa wó pa se naneo wo ywona, de zuna balo na kare ba jaane wɛɛne to, de kago-vara, de tega-veila, de logo baŋa nabiina maama wó fom amo yiga ne. Peero tem de te gugworru maama wó sirimi, ye kabiri maama de to buri-buri. 21A maa wó pa se jara ba ya jeeri Goga amo tete peero tem maama yuu ne. Yuu-tu Baŋa Wɛ na tage kolo to mo konto. Nɔɔno maama wó kwei o se-zɔɔ o beeri o dwoŋi se o go. 22Amo nam wó tɔge jawe-chɛɛro, de nɔn-gora baŋa ne mo a yɔɔre a waare‑o. A maa wó pa do-fɔrɔ ba ka mage‑o, se a ta dole do-kandwa de chilibugu a yage o yera ne, de o jar-keira bam yera ne, de dwi-gɛ tiina kɔ-fɔrɔ kom na wo o tei ne to de yera ne. 23Konto baŋa ne mo amo wó pa se logo baŋa teene dedɛ lɔre amo na ye kamunu ye a ta ye wose tei to. A maa wó veere a tete ba yiga ne. Ba laam maa wó lɔre we amo mo ye Baŋa Wɛ wom.’ ”

Currently Selected:

Ezekeli 38: KBG

Highlight

Copy