Ezekeli 37

Kwi-kore taane

1 Baŋa Wɛ dam dem déem tu amo baŋa, pa se o tɔge o Jworo baŋa o kwei-ne o vo o zege bwolo kodwoŋi tetare ne. Kwi dedɛ jage se yɔɔre se faare bwolo kom jei maama. 2Baŋa Wɛ ma ja-ne pa dé yɛ kwi sem wone dé kare dé via. Amo ma nii a na kwi zanzam na tigi bwolo kom tega jei maama ne. Se nam tiini se ko mo. 3O ma bwei-ne o we, “Nabiinu, nmo na nɛ kwi sento to, n boŋe we se wó jwoori se na ŋwea na?” Amo de ma leiri‑o a we, “Yuu-tu Baŋa Wɛ, nmo yerane mo wó wane taane dento n ta.”

4O laam ma ta de amo o we, “Pworisi n ta taane de kwi sento we, ‘Abam kwi-kore, cheigi-na Baŋa Wɛ kwora kalo o na jege se o ta de abam to! 5Yuu-tu Baŋa Wɛ na tage tei de kwi sento to mo tento: Amo lage a pa siu mo zo abam wone, se á ta‑á jege ŋwea. 6A nam wó kwei ŋwanno a ba abam maama, ye a daare a kwei ya-nɔna de ya-tane a ma a kwoli abam. A maa wó sii siu a yage á yera ne se ko pa á ta‑á ŋwe. Abam laam maa wó lɔre we amo mo ye Baŋa Wɛ.’ ”

7Amo ma yɔɔre a pworisi taane ne Wɛ na pɛ-ne ni se a ke tei to. A ta na wora a pworisi konto to, mo a nigi sɔɔ kare-kare. Kwi sem mo bobo se se taa tui se tete ne, ye se twoŋi daane! 8A ta na zege a nii to, mo a nɛ we ŋwanno de ya-nɔna tu te meeli kwi sem, ye ya-tane de kwoli-se. De ko de, siu ta wo zo se wone.

9 Baŋa Wɛ ta ma ta de amo o we, “Nabiinu, pworisi n ta de vio kom we, ‘Yuu-tu Baŋa Wɛ na tage tei to mo tento: Vio, zaŋe n nwoŋi logo baŋa sapɛ sena sem maama ne n ba n dole siu n yage nɔɔna banto ba ya na go to wone se ba laam na ŋwea.’ ” 10Amo de ma pworisi ne o na pɛ-ne ni se a ke tei to. Siu ma seene ko zo twa bam wone. Ba ma pɛ ba zaŋe ba zege ba nɛ baŋa ne ye ba ŋwe. Ba yɔɔre ba ye jar-keira kɔ-fɔrɔ mo.#Jɔn 5:21

11 Baŋa Wɛ daa ta ma ta de amo o we:

“Nabiinu, kwi sento bere Isarele dwi tiina bam maama na nye tei to mo. Ba kare ba tɛ we, ‘Debam kwi sem koge se peere mo, ye dé teena maama ti. Debam teo kom daa ba jege jwa.’ 12Konto ŋwaane, pworisi n ta taane de-ba we: ‘Yuu-tu Baŋa Wɛ na tage tei to mo tento: Amo nɔɔna bam, amo tete mo lage a puri á yibeela yam, se a pa á bi. A laam maa wó ja abam a jwoori a ba a yage Isarele tega kam ne. 13Amo nɔɔna bam, á wó ba á lɔre we amo mo ye Baŋa Wɛ wom, ne a ná seene a puri yibeela yam á ya na tigi ya wone to pa á nwoŋi pwooni. 14A maa wó kwei a Jworo a ke abam wone se ko pa á na ŋwea, ye a daare a pa á jwoori á jeini á tete tega kam baŋa ne. Abam laam maa wó da ko baŋa ne á lɔre we amo Baŋa Wɛ mo tage konto, ye a seene a ke a na tage we a wó ke tei to. Yuu-tu Baŋa Wɛ na tage kolo to mo konto.’ ”

Isarele teo de Judah teo taane

15 Baŋa Wɛ kwora daa ma yi amo we:

16“Nabiinu, beeri daa se n popone ka baŋa ne we, ‘Judah, de Isarele tiina balo na ye o yera nɔɔna to nyem.’ Ta beeri daa kadwoŋi se n popone kanto baŋa ne we, ‘Josɛf bu Efrayim nyem, de Isarele tiina balo na ye wonto de yera nɔɔna to nyem.’ 17Laam ja se nia yam n ba n twoŋi daane se ya taa ye daa dedoa nmo jeŋa ne.

18Nmo dwi tiina bam ná bwei se ba lɔre n keim dem kuri, 19se n ta de-ba we, ‘Yuu-tu Baŋa Wɛ na tage tei to mo tento: Amo lage a kwei Josɛf daa kam na wo Efrayim jeŋa ne to mo, se a pa ka twoŋi de Judah daa kam, se banto maama ji daa dedoa. Ba laam maa wó taa ye dedoa amo jeŋa wone.’ 20Nam ta‑n zei dɛ selei sem konto n jeŋa ne se nɔɔna bam maama na. 21Nmo laam ma‑n wó ta de-ba we, ‘Yuu-tu Baŋa Wɛ na tage tei to mo tento: Amo lage a le Isarele tiina bam mo a ja a nwoŋi teene delo maama wone ba ya na zoore to. A maa wó la-ba a ja a nwoŋi logo baŋa sapɛ maama ne se ba jwoori ba jeini ba tete teo kom wone. 22Ba ná jwoori ba tega kam ne konto, a lage a pa ba maama ji teo dedoa ye ba zoore Isarele peero jei sem ne. Pɛ dedoa mo wó taa nii ba maama baŋa ne. Ba daa bá fɔge ba pɔɔre ba tete se ba ji teene delei. 23Ba nam daa bá biini ba tete de ba jwo-yɔɔro tem, de ba wo-zɔɔna de zwabania kikia yam. Amo tete mo lage a jwoŋi-ba a yage de ba na ywori a chwoŋa kam ne ba tusi tei to. Ba maa wó taa ye amo nɔɔna se amo de taa ye ba Wɛ wom.

24Amo tontoŋeno David nam mo wó taa ye ba pɛ. Nɔɔno dedoa wó taa nii ba maama baŋa ne, ne nayero na kɔne o pei sem tei to mo. A nɔɔna bam maa wó taa toŋe ba tɔge a nia yam de a bera yam. 25Ba wó taa zoore tega kalo a déem na kwei a pa a tontoŋeno Jakob to wone, mɛ seeni á nabaara de déem na zoore da to. Ba de ba dwi delo na saŋe ba kwaga to laam maa wó taa zoore tega kam konto ne se ko taa vei wuu, ye amo tontoŋeno David de taa ye ba dedɛɛro taa wuu. 26Amo nam wó gwoni ni mo de a nɔɔna bam bochare-zuru ŋwaane. Ni-gwonim dem konto wó taa zega se ko taa vei wuu. Amo lage a jeini-ba ba tega kam ne mo se ba taa wora chɔpe, ye ba puli de kɔgɔ. A maa wó pa se a wara-jei sem taa wo ba tetare ne se ko taa vei wuu. 27Amo maa wó taa zoore ba tei ne se a taa ye ba Wɛ, ye ba de ye amo tete nɔɔna.#Chullu 26:11 28Logo baŋa teene dem maa wó lɔre we amo Baŋa Wɛ mo kuri Isarele tiina bam se ba taa ye amo tete nyem, ne a wara-jei sem ná wo ba tetare ne se ko taa vei wuu.’ ”

Currently Selected:

Ezekeli 37: KBG

Highlight

Copy