Ezekeli 36

Isarele peero tem taane

1“Nabiinu, pworisi taane n pa Isarele teo peero tem se n ta we, ‘Abam Isarele teo peero tem, cheigi-na Baŋa Wɛ kwora. 2Yuu-tu Baŋa Wɛ na tage tei to mo tento: Abam dona bam laam chake abam ŋwaane mo ye ba tɛ ba we, “Faŋa faŋa peero tem laam jigi debam nyem mo.” ’

3Konto ŋwaane, pworisi se n ta we. ‘Yuu-tu Baŋa Wɛ na tage tei to mo tento: Á dona bam nwoŋi jei maama ne ba ba ba chɔge á laŋa kam maama, pa se ka ji dwi-gɛ tiina bam nyem. Nɔɔna maa bae bebara ba pa abam ye ba jege abam ba yaala. 4Konto ŋwaane, Isarele peero tem, cheigi-na Yuu-tu Baŋa Wɛ kwora. Yuu-tu Baŋa Wɛ tage tento mo de abam peero tem, de zwonnu tem, dedaane á gugworru de bwollu tem. O kwora kam ta wó yi á teene delo maama á dona bam na chɔge pa de ji di-dwonnu ye nɔɔn-nɔɔno daa ba zoore de wone, pa se dwi-gɛ tiina balo na gilimi abam to laam vere á wonnu ba daare ba jege abam ba twe to. 5Yuu-tu Baŋa Wɛ na tage tei to mo tento: Amo tɔge a ban-lom baŋa ne mo a ta taane a chɔge dwi-gɛ tiina bam konto maama, ko fɔge ko dae Edom teo kom. Kokuri ba chake mo abam chɔgem ŋwaane, ye ba ta kuri se ba vere tega kalo abam na kɔne á vara da to se ka taa ye banto nyem.’

6Nam ta pworisi Isarele tega kam taane n ta de ka peero de ka zwonnu tem, dedaane ka gugworru, de ka bwollu tem we, ‘Yuu-tu Baŋa Wɛ na tage tei to mo tento: Amo ŋɔɔne ko tɔge a ban-lom dem ŋwaane mo de dwi-gɛ tiina bam na tiini ba twe abam tei to. 7Konto ŋwaane, Yuu-tu Baŋa Wɛ laam nam tage tento mo: Amo dugi duuri mo de yi-seena we, amo wó pa dwi-gɛ tiina balo na gilimi abam to na ba chaveera.

8Ko daare abam Isarele peero tem, teeni daa ta wó kwi vɔɔro á yuu ne, ye te ke bia lanyerane se amo nɔɔna Isarele tiina bam taa jege ba di. Kokuri, ko bá dáane de ba na jwoori ba tete teo. 9Amo yiga wo abam wone, se a woli abam. Nɔɔna wó va tega kam ye ba du wodiiru ka baŋa ne. 10Amo wó pa Isarele dwi tiina bam puli jei maama ne. Ba maa wó fɔge ba lɔ ba teene delo ya na chɔge to ba zege, se ba taa zoore de wone. 11A ta wó pa se nabiina de vara puli de kɔgɔ dedɛ á tega kam baŋa ne, ye ba daare ba lo bia. Nɔɔna dedɛ wó taa zoore á teene dem wone mo ne faŋa kam na ye tei to, ye á tiini á na yu-ywoŋo se ko dwoni faŋa kam. Abam laam maa wó lɔre we amo mo ye Baŋa Wɛ wom. 12A maa wó pa se a nɔɔna Isarele tiina bam jwoori ba taa zoore á tega kam baŋa ne. Á tega kam wó taa ye ba nyem mo ye ba tei-ka. Te-ywoŋa kam konto nam daa bá pa se ba dwi ti.

13Yuu-tu Baŋa Wɛ na tage tei to mo tento: Nɔɔna kare ba tɛ abam taane ba we, “Á tega kam jege nabiina mo ka lira, pa se á teo kom ga ko bia.” 14Konto ŋwaane, amo Yuu-tu Baŋa Wɛ nam tage we, ko na zege leile se ko taa vei to, tega kam daa bá li nabiina, pa se á teo kom ga ko bia. 15Amo daa bá pa se á ni dwi-gɛ tiina bam na jege abam ba mɔna tei to. Nɔɔna daa bá taa jege abam ba yaala se á ni ko zonne. Á teo kom de nam daa bá jwoori kwaga abam ŋwaane. Yuu-tu Baŋa Wɛ na tage kolo to mo konto.’ ”

16 Baŋa Wɛ kwora daa ta ma yi amo we:

17“Nabiinu, maŋa kalo Isarele tiina bam ya na zoore ba tete tega kam baŋa ne to, mo ba digiri-ka de ba totoŋ-zɔɔna kikia yam. Amo nii a na ba kikia yam pa ya nye de kaane na wora o ke o chana zarem ye ko ye tei to mo. 18Amo ma yɔɔre a lwo a ban-lom ba baŋa ne a ma a waare-ba, ba na chɔge tega kam de ba nɔn-gora de ba jwona kaanem kikia yam to ŋwaane. 19Amo ma jage-ba pa ba vo yiga yiga se a yage-ba logo baŋa teene dem maama wone, ye a daare a waare-ba se ko maŋe de ba kikia yam na ye tei to. 20Ba nam na yeini ba vo ba gwaane de dwi-gɛ tiina jei selo maama ne to, ba de maa jege a yere dem na ye wose to ba yaala. Kokuri, nɔɔna yeini ba tɛ ba taane ba we, ‘Baŋa Wɛ nɔɔna bam mo tento. De ko de, o nam fe o le-ba tega kalo o ya na pɛ-ba to ne.’ 21Amo yiga nam wo a yere dem zula wone, de Isarele dwi tiina bam na pɛ dwi-gɛ tiina jege-de ba yaale tei to.

22Konto ŋwaane, ta de Isarele dwi tiina bam we, ‘Yuu-tu Baŋa Wɛ na tage tei to mo tento: Amo na lage a jwoŋi abam a yage to dae abam totoŋa ŋwaane. Ko nam ye amo na laga se a tete yere dem na zula to ŋwaane mo. Kokuri, abam tiini á pa se dwi-gɛ tiina balo á na zoore ba tetare ne to yaale-de mo. 23A nam wó yɔɔre a bere dwi-gɛ tiina bam we amo yere-kamunu kom abam na yaale ba maama yiga ne to ye wose mo. Logo baŋa teene dem maama laam maa wó lɔre we amo mo ye Baŋa Wɛ wom, ne a ná tɔge abam baŋa ne a bere-ba jaja we a seene a ye wose mo. Yuu-tu Baŋa Wɛ na tage kolo to mo konto.

24Amo nam wó ja abam a nwoŋi teene dedwonna dem maama ne, ye a la abam a ke daane se a ja abam a jwoori a ba a yage a tete teo kom ne. 25A laam maa wó lwo na-ŋona á yera ne a ma a kwɛ abam de á wo-zɔɔna de á jwona kaanem kikia yam.#Hiburu 10:22 26A ta wó pa á ta‑á jege bochare-doore de boboŋ-doora se á ma á zuli-ne. A maa wó pa se á wo daa yé ke dam, ye a daare a pa á yi taa bwona.#Ezekeli 11:19 27A nam lage a kwei a Jworo mo a ke á bochara ne. Konto maa wó pa á fera taa wo a nia yam de a bera yam tɔgem wone. 28Abam daa maa wó ta‑á zoore tega kam a na kwei a pa á nabaara bam to, se á ta‑á ye amo nɔɔna, se amo de taa ye abam Wɛ. 29A nam wó vere abam a ja a nwoŋi á wo-zɔɔna kikia yam ne. A maa wó pa se á tega kam ke wodiiru dedɛ, se kana daa yé ja abam. 30Á teeni dem wó taa ke bia dedɛ de pa abam, ye á kare wodiiru de puli lanyerane, se ko pa dwi-gɛ tiina daa yé taa jege abam ba yaale we, kana jege abam ka goe. 31Á ta maa wó guli á totoŋ-vɛɛsa yam, de á kikia yalo na wo tɔge chwoŋa to gula. Á fera nam wó nwoŋi á tete, wɛleera de totoŋ-vɛɛsa yalo maama á ya na ke to ŋwaane. 32Isarele dwi tiina bam, nam lɔre-na we ko dae abam totoŋ-laaro ŋwaane mo a lage a ke tento maama a pa abam. Abam yuni nam maŋe se de tiiri tega ne mo de chaveera á kikia yam ŋwaane. Yuu-tu Baŋa Wɛ na tage kolo to mo konto.

33Yuu-tu Baŋa Wɛ daa ta na tage tei to mo tento: Dɛ delo ne amo na wó kwɛ abam a ti de á tusim kikia yam maama to a laam wó pa á jwoori á ta‑á zoore á teene dem wone. Á maa wó fɔge á lɔ jei selo ya na jigi di-dwonnu to. 34Abam daa wó ta‑á vare á tega kalo ya na tigi kafɛ to baŋa ne, se nɔɔna daa yé taa nii-ka ne ka ga ye kagoa mo. 35Ba maa wó taa tɛ we, “Tega kanto ya na tigi kafɛ to laam nye de Eden te-laao kom déem na ye tei to mo. Nii-na! Teene delo ya na chɔge ye de sam ji di-dwonnu to laam fɔge de lɔ de pe de dam, ye nɔɔna dedɛ zoore de wone!” 36Dwi-gɛ tiina balo ta na daare ye ba gilimi abam jei sem to laam wó lɔre we amo Baŋa Wɛ mo fɔge a lɔ teo kolo maama ya na chɔge to a zege, ye a jwoori a va tega kalo maama ya na tigi kafɛ to. Amo Baŋa Wɛ mo tage konto. A nam wó seene a ke kolo a na tage se a ke to.’

37Yuu-tu Baŋa Wɛ na tage tei to mo tento: Amo daa wó pa Isarele dwi tiina bam chwoŋa se ba lwoori wolim amo tei ne. A maa wó leiri ba wɛ-lworo kom ye a pa se ba kɔgɔ kom puli ne vare-kɔgɔ na daga tei to. 38Ba nɔn-kɔgɔ kom wó taa daga lanyerane, ne vara dedɛ déem na yeini ba su Jerusalem teo kom kura dim maŋa ne se ba kwei-ba ba ma ke kaanem tei to mo. Konto mo nɔɔna wó yɔɔre ba su teene delo ya na zege di-dwonnu yerane to. Ba laam maa wó lɔre we amo mo ye Baŋa Wɛ wom.”

Currently Selected:

Ezekeli 36: KBG

Highlight

Copy