Ezekeli 29

Ejipti teo taane

1Bena fuga bene dem chane fuga chana kam da fuga-yalei dɛ dem ne, mo Baŋa Wɛ kwora yi amo we:

2“Nabiinu, pipiri n jeeri Ejipti teo kom seeni, se n pworisi taane n chɔge ba pa-faro wom, de o teo kom maama. 3Ta o yera taane we, ‘Yuu-tu Baŋa Wɛ na tage tei to mo tento:

Ejipti teo pɛ, amo dwoni de nmo mo.

Nmo nye de naneo wo juru

kolo na tigi n teo kom bwi sem ne to mo.

Nmo ma‑n bere n tete we, “Amo mo tei Naili buga kam.

A nam ke-ka se a pa a tete mo.”

4A nam lage a kwei gwoli mo a ja‑m n peyaa seeni.

A ta wó pa se ywona yalo na su n bwi sem to

meeli n yera yam.

A nam lage a vaŋe‑m mo a ja a nwoŋi n bwi sem ne,

ye ywona yam maama ta yɔɔre ya meeli n yera yam.

5A nam lage a dole nmo tete

de n bwi sem wo ywona yam mo

a yage kagoa yuu ne.

Abam laam wó taa tigi pwola ne mo,

ye nɔɔn-nɔɔno daa bá wane o la abam o ke daane.

A lage a pa se á ji wodiu mo

á pa tega baŋa vara bam,

de wɛyuu zuna bam.

6Balo maama na zoore Ejipti teo wone to laam wó lɔre we amo mo ye Baŋa Wɛ.

Nmo déem nye de kasogo kolo Isarele dwi tiina bam na kwei ba ji ba nacheiga to mo. 7Ba na twe ba je se ba zii nmo ba zaŋe to, n seere mo pa se ba vɔna kaare. Ba maa na sale nmo yera ne to, mo n bwori n daare-ba pa ba nɛ sem te.#2 Pwa 18:21

8Konto ŋwaane, Yuu-tu Baŋa Wɛ na tage tei to mo tento: Amo lage a pa se jara mo to n teo kom wone, se nabiina de ba vara bam maama te. 9Ejipti teo kom wó ji di-dwonnu yerane, se ba laam lɔre we amo mo ye Baŋa Wɛ wom.

Kokuri to, nmo tage n we, “Amo mo tei Naili buga kam. Amo mo ke-ka.” 10Konto ŋwaane amo dwoni de nmo, de n bwi sem maama mo. Amo wó pa se Ejipti teo kom chɔge, ye ko ji di-dwonnu yerane, se ko zege Migidola ne ko vo ko yi Sayene#29:10 Sayene = Aswan se ko kɛ ko yi Kusi siseini dem seeni. 11Nabiina de vara daa bá de ba nɛ tega kam konto ne se ba tɔge da ba kɛ. Nɔɔn-nɔɔno de nam bá taa zoore ka wone se ko yi bena finna. 12A lage a pa Ejipti mo yɔɔre ko ji kagoa teene delo maama na chɔge to wone. Ko teene dem maama wó taa ye di-dwonnu yerane mo, ye di-dwonnu de gilimi-de. Ko wó taa ye konto mo bena finna. A maa wó jage Ejipti tiina bam pa ba vo yiga yiga, se a yage-ba logo baŋa teene dem jei maama wone.

13De ko de, Yuu-tu Baŋa Wɛ na tage tei to mo tento: Bena finna yam ni ná dia, amo wó la Ejipti tiina bam se ba nwoŋi teene delo maama ba ya na jage ba zoore de wone to mo. 14A laam maa wó pa se ba jwoori ba taa jege yu-ywoŋo. Ba wó zege sa-teo ne ba jwoori ba ba Paforosi seeni, mɛ na ye ba kugu jei to. Dáane mo ba wó maŋe ba taa ye te-balaŋa. 15Ko maa wó tiini ko taa ye te-balaŋa teene dem maama wone. Ko daa bá wane ko zeiŋi ko tete teene dedwonna baŋa ne. Ko bá di dam dwi-gɛ tiina baŋa ne, amo na wó pa ko taa bwona to ŋwaane. 16Ejipti daa bá taa ye teo kolo Isarele dwi tiina bam na ke ba teena ko wone to. Ba nam wó guli ba na tusi ye ba beeri wolim ko wone to mo. Ba laam maa wó lɔre we amo mo ye Yuu-tu Baŋa Wɛ wom.’ ”

17Bena finlei-yarepɛ bene dem boboa chana kam boboa dɛ dem ne, mo Baŋa Wɛ kwora yi amo we:

18“Nabiinu, Babilon teo pɛ Nebukadeneza déem pɛ o jar-keira bam tiini ba kwaare jara de Tura teo kom. O ma fe-ba jara yam ŋwaane pa ba yuni fe, ye ba vɔna de dɔre ŋɔna. Nebukadeneza de o jar-keira bam nam wo wane Tura teo kom se ba di nyɔɔre ko baŋa ne, de ba na toŋe tei maama de to. 19Konto ŋwaane, Yuu-tu Baŋa Wɛ na tage tei to mo tento: Amo lage a kwei Ejipti teo kom mo a pa Babilon teo pɛ Nebukadeneza se o taa tei. Wonto wó zeŋe ba jejegero o ja o viiri, ye o daare o vere ba wonnu o pa o jar-keira bam se ba jwoŋi ba ŋweero. 20A nam kwei Ejipti teo kom a pa‑o se ko taa ye o totoŋa yam ŋweero mo, o de o jar-keira bam na ke kolo maama ba pa amo to ŋwaane. Yuu-tu Baŋa Wɛ na tage kolo to mo konto.

21Maŋa kam konto ná yia, amo wó pa Isarele dwi tiina bam jwoori ba na dam. Ko daare nmo Ezekeli, a maa wó pa n ni puri se n ŋɔɔne de-ba. Ba maa wó lɔre we amo mo ye Baŋa Wɛ.”

Currently Selected:

Ezekeli 29: KBG

Highlight

Copy