Ezekeli 28

Tura teo pɛ yera taane

1 Baŋa Wɛ kwora ma yi amo we:

2“Nabiinu, ta de Tura teo yuu tu wom we, ‘Yuu-tu Baŋa Wɛ na tage tei to mo tento:

Nmo yeini n bere n tete kamunim mo

ye n tɛ n tete ne we, “Amo ye wɛ mo.

Tura teo kom ne mo a jei a di paare,

ne wɛ dedwoŋi na di paare

naneo kom tetare ne tei to.”

Nmo nam ye nabiinu mo se n dae wɛ,

de nmo na boŋe we n jege wɛ boboŋa to de.

3Nmo bere n tete we n jege swa n dwoi Danyeli mo na?

N ta boŋe we kolokolo wo seigi n yiga ne mo na?

4Nmo kwei swa mo, de yi-poro,

ye n tɔge tento baŋa ne n beeri jejegero n pa n tete.

N ma‑n la sabu-seŋa, de lu-nyenno dedɛ

n tiŋi n di sem wone.

5Nmo tiini n yei pipiu laŋa

ye n tɔge ko baŋa ne n tiini n duni.

Nmo jejegero tem ŋwaane,

n laam ma n bere n tete.

6Konto ŋwaane, Yuu-tu Baŋa Wɛ na tage tei to mo tento:

Nmo boŋe we n jege swa,

pa n yei wonnu ne wɛ dwoŋi to.

7Mo kokuri, amo lage a pa se veira ba

ba ke chichuŋu de n teo kom.

Ba nam ye teene delo nɔɔna na ye nankɔ-nyena

ba dwoi nɔɔna maama to mo.

Nii mo! Ba wó jeeri nmo nɔɔna bam de jara,

se ba chɔge wo-laaro telo n na nɛ n swa baŋa ne to ba yage,

ye ba daare ba chɔge n nenɔŋa kam.

8Nmo dona bam konto wó pa se n te dam toone mo,

pa se n maŋe tega kuri ne,

mɛ na ye naneo kom tetare to.

9Nmo nam ná zege balo na lage ba go‑m to yiga ne,

n laam wó ta we, n ye wɛ mo na?

Ne n ná to n gora bam jeŋa ne,

n laam wó lɔre we n ye nabiinu mo,

se n dae wɛ.

10Nɔn-yɔɔro mo lage ba go‑m,

se n te balo na yeiri Wɛ to toone.

Amo Yuu-tu Baŋa Wɛ na tage kolo to mo konto.’ ”

11 Baŋa Wɛ kwora daa ta ma yi amo we:

12“Nabiinu, yɔɔre n mɔ luseim leiŋa n pa Tura teo pɛ wom ye n ta ded‑o we: ‘Yuu-tu Baŋa Wɛ na tage tei to mo tento:

Nmo déem ye nɔɔno mo chekke.

N swa gaale ye n ta ye nenɔm.

13Wɛ na ke kara kalo Eden jei sem ne to

nmo ya n zoora.

N ma‑n kwei kandwa-nyenno dwi maama

n ma n fɔge n yera.

Te maa ye: Rubi, de Topazi, de Emeraleda,

de Kirisola, de Onika, de Jasipa,

de Safira, de Tukwazi, de Berili.

Ba ta ma gɔgere sabu-seŋa wonnu ba tiŋi,

se te cheigi dɛ delo ne ba na wó lo nmo to.

14Amo ma le cherubi yuu tu se o taa yere‑m.

N déem wo amo Wɛ peo kolo na ye wose to baŋa ne mo.

N ma‑n beeri kandwa yalo na di de mini to tetare ne.

15Nmo totoŋa maama déem ba jege tusim

ko zege dɛ delo ne ba na naane‑m to.

Ko laam ma yi yiga ye n bobo se n ta‑n ke lwarem.

16Nmo na tiini n ke pipiu tei to

mo pɛ se n nankɔɔre kikia de n wɛleera laam gaale.

Amo de ma zeili‑m pa se n yage Wɛ peo kom

de n chaveera.

Cherubi tu wolo ya na yere‑m to

de laam ma le‑m kandwa yalo na di de mini to tetare ne.

17N déem bere n tete kamunim mo

n na ye nenɔm to ŋwaane.

N nenɔŋa kam ma li n swa yam.

Konto ŋwaane mo a vuvugi‑m a dole a de tega ne,

pa se n ji wo-mɔnɔ pwa badwonna yiga ne.

18N tiini n tusi dedɛ,

ye n daare n pini nɔɔna pipiu baŋa ne.

Ko ma pa se n chɔge wara-jei selo n ya na zuli-ne da to.

A ma da ko ŋwaane a pa se mini to n teo kom ne,

se de zwɛ ko maama kula!

Teo kom laam jigi tentwarem mo,

ye balo maama na nɛ nmo to zege ba nia.

19Ko ná ye dwi tiina balo ya na yei n na ye wolo to,

ba nia laam yɛ mo de kolo na yi‑m to.

Lɛɛro telo na yi nmo to kɛ jeŋa,

pa se n dwi ti taa wuu.’ ”

Sidon teo taane

20 Baŋa Wɛ kwora daa ma yi amo we:

21“Nabiinu, pa n yibia jeeri Sidon teo kom seeni se n daare n pworisi taane n chɔge-ko. 22Ta we, ‘Yuu-tu Baŋa Wɛ na tage tei to mo tento:

Sidon teo, amo dwoni dede‑m.

A nam wó pa se a nenɔŋ-fɔrɔ kom taa nae jaja n wone.

Nɔɔna wó lɔre we amo mo ye Baŋa Wɛ wom,

ne a ná yɔɔre a waare n nɔn-bia bam a ti,

ye ba sɛ we amo mo ye wo-pwoŋo tu.

23Amo wó pa se jawe-chɛɛro to ba teo kom ne

ko go ba dedɛ.

A ta wó pa se jar-keira zaŋe jei maama ne

ba kwaare jara de teo kom

pa se twa faare ko wo maama.

Ba laam wó lɔre we amo mo ye Baŋa Wɛ wom.

24Isarele tiina bam daa bá taa jege dona balo na nye de sabare de sabare-mangwoli to se ba taa jege-ba ba zɔa ye ba yaale-ba. Ba maa wó lɔre we amo mo ye Yuu-tu Baŋa Wɛ wom.

25Yuu-tu Baŋa Wɛ na tage tei to mo tento: Amo ná lage Isarele tiina bam a ja a nwoŋi teene delo a ya na yage-ba de wone to, a laam wó pa dwi-gɛ tiina bam lɔre we amo mo ye wo-pwoŋo tu de a na ke a nɔɔna bam tei to. Isarele tiina bam laam maa wó jwoori ba vo ba taa zoore ba tete tega kalo a déem na kwei a pa a tontoŋeno Jakob to wone. 26Ba maa wó taa zoore da de yazura ye ba lɔ sane ba daare ba jeiri Vini teeni. Kolokolo daa bá daane-ba, amo na wó waare ba dona balo ya na jege-ba ba yaale to ŋwaane. Konto mo ba wó lɔre we amo mo ye ba Tu Baŋa Wɛ wom.’ ”

Currently Selected:

Ezekeli 28: KBG

Highlight

Copy