Nwoŋim 12
12
Atɔgebabaŋa kuri dem
Chullu 23:5-8; Jeelim 9:1-14; Nia Gulim 16:1-8
1Ejipti teo ne mo Baŋa Wɛ déem ŋɔɔne de Moses dedaane Aron ye o we, 2“Chana kanto mo wó taa ye boboa chana ka pae abam bene maama wone. 3Ta n bere Isarele tiina kɔgɔ kom maama we chana kanto, ka da fuga dɛ dem ne, sɔŋɔ maama ko ni twoo, sɔŋɔ tu wom jege se o beeri pipeila mo naa bebala se o sɔŋɔ tiina bam di kuri. 4Sɔŋɔ kolo nɔn-bia bam nam ná ba daga se ba di pipeila kam ba ti, se ba beeri ba fara balo bam na bwola de-ba to se ba pɔɔre ba pa daane. Nam jeeli-na kɔgɔ kolo na wó di pipeila kam to ni. Kokuri to, pia kam ye se ka maŋe mo, se nɔɔno maama na nɔna o di. 5Abam wó wane á kwei pia naa boŋo á ma á toŋe. Varem wom nam jege se o taa ye bene varem mo ye o ta ba jege gɛɛ o yera ne. Varem wom wó taa ye wo-bɛa mo. 6Ta‑á nii-na vara bam baŋa ne se ko vo ko yi chana kam da fuga-yana dɛ dem ne. Tega ná lage ka yi, Isarele tiina kɔgɔ kom maama wó go ba vara bam mo. 7Ba nam na wó jeini sam delo wone ba di varem wom nɔna yam to, ko jege se ba kwei o jana mo ba taare manchwo-nia sɛ sem de ya yuu ne. 8Tete dem konto ne, ba ta jege se ba wɔ nɔna yam mo, se ba laam di-ya. Ba maa jege se ba ma dwoa vɔɔ-chɛɛro mo dedaane bworobworo kolo na ba jege sabɔle ko wone to ba di varem wom. 9Ko dae se abam di ko nɔn-gwei. Á nam yé saŋe-ko. Varem maama ye se á wɔ mo: yuu, de nɛ, dedaane o wo-zela yam maama. 10Tete dem konto ne, se á di á na wae tei maama to. Kolokolo ba jege se ko daare se tega ná poore se á di. Nɔna yalo na poore tega to, abam jege se á zwɛ-ya mo. 11Abam ná lage á di wodiu kom, se á ta‑á ti á yiga nenɛɛne balo na lage ba vo chwoŋa to. Vɔ-na á gwaaro ye á zo á natera, se á daare á ta‑á zei á nachei sem. Á laam wó di wodiu kom lela. Kokuri to, ko ye Atɔgebabaŋa kuri mo abam lage á di se á ma á zuli amo Baŋa Wɛ.
12Tete dem konto ne mo amo wó beeri Ejipti teo kom maama ne, ye a go bakeiri-kwea dwi dem maama, vara dedaane nabiina maama. Amo wó ke konto a ma waare Ejipti tiina bam tangwana de ba jwona yam. Kokuri to, amo mo ye Baŋa Wɛ. 13Ko daare, jana bam mo wó taa ye memaŋe se ko bere abam na wo sam delo wone to. Amo ná boŋe se a waare Ejipti tiina bam ye a na jana bam, a laam wó tɔge á baŋa a kɛ, se abam yé na chɔgem.
14Abam de á dwi dem maama maŋe se á ta‑á guli dɛ dento gula mo maŋa maama. Á wó di kuri dem bene maama wone se ko taa vei wuu. De ye chulu dɛ mo de pae abam se á ma á zuli amo Baŋa Wɛ.
15Kwei-na da yarepɛ á di bworobworo-memene selo na ba jege sabɔle se wone to. Yanto da yam boboa dɛ dem ne, á nam jege se á kwei sabɔle delo maama na wo á sam ne to mo á dole á yage. Da yarepɛ yam wone, wolo maama ná di bworobworo kolo na jege sabɔle to, amo wó le konto tu mo a nɔɔna bam tetare ne. 16Da yam boboa dɛ dem ne, dedaane da yarepɛ dɛ dem ne, á wó jeeri daane á zuli Baŋa Wɛ mo. Nɔɔn-nɔɔno ba jege se o toŋe totoŋa da yalei yam konto ne. Abam nam wó wane á saŋe á wodiiru.
17Bene maama wone abam jege se á di Bworobworo-memene kuri dem mo. Kokuri to, ko ye dɛ dem amo na le abam kɔgɔ de kɔgɔ a ja a nwoŋi Ejipti ne to mo. De ye chulu dɛ mo se ko taa vei wuu. 18Ko zege boboa chana kam da fuga-yana dɛ dem dedaan-ni ne, se ko vo ko yi ka da finlei-dedwe dɛ dem dedaan-ni ne, se á di bworobworo kolo sabɔle na tere ko wone to. 19Da yarepɛ yam wone, sabɔle dae se de taa wo nɔɔn-nɔɔno sɔŋɔ ne. Wolo ná di bworobworo kolo na jege sabɔle ko wone to, amo wó le konto tu a nɔɔna bam tetare ne, konto tu ze ye Isarele tu naa veiru de. 20Abam na zoore jei selo maama ne to, se á yé di woŋo kolo na jege sabɔle ko wone to.”
Moses berem dem
21Moses déem ma bwoŋi Isarele nakwa bam ye o ta-ba o we, “Nɔɔno maama véi o kuri varem wolo o na wó go Atɔgebabaŋa kuri dem ŋwaane to, se o de o diga tiina wane ba di. 22Abam ta wó beeri Husopa vɔ-lɛɛro, se á de te nia yam zoŋa de ka wo jana wone. Á laam wó kwei jana bam á taare á sam dem manchwo-nia yam sɛ selei sem dedaane baŋa kam mo. Maŋe-na á sam dem ne se tega poore. Nɔɔn-nɔɔno yé nwoŋi pwooni ne. 23Baŋa Wɛ wó ba o beeri Ejipti logo kom ne se o go Ejipti tiina bam. O nam ná nɛ jana bam abam manchwo-nia ne, de ya baŋa kam, de ya sɛ sem ne, o bá pa se toone maleka kam zo á sam wone se o chɔge abam. O wó tɔge abam baŋa mo o kɛ. 24Abam de á kwaga kam maama jege se á sɛ á ta‑á ke chullu tento mo taa wuu. 25Abam nam ná tu á zo teo kom Baŋa Wɛ na gwoni ni se o pa abam to, se á guli á ta‑á ke chullu tem konto. 26Abam bia ná tu ba bwei abam we ‘Keim dento kuri mo bɛ?’, 27se abam de wane á ta de-ba we ‘Ko ye Atɔgebabaŋa kaanem mo debam wora de ke se de ma de zuli Baŋa Wɛ. Kokuri to, dé déem na wo Ejipti ne to, Baŋa Wɛ duri dé ŋwaŋa mo o tɔge debam sam dem baŋa o kɛ, ye o vo o chɔge Ejipti tiina bam.’ ”
Moses na tage konto o ti to, Isarele tiina bam ma chɔɔle ba yibia tega ne ba zuli Wɛ. 28Ba ma vo ba ke kolo maama Baŋa Wɛ na tage o bere Moses dedaane Aron to.
10. Bakeiri-kwe sem toone dem
29Tete-koro ne, Baŋa Wɛ déem ma go Ejipti teo kom bakeiri-kwe sem dwi dem maama. Ko zege Ejipti Pɛ na jei paare yituŋu kom baŋa ne to bu-kwea kam, se ko yi ŋweeno wolo na wo peena diga ne to bu-kwea kam, ko ta woli de vara dwi maama de bu-kwe sem.#Nwoŋim 4:23 30Tete dem konto ne mo Pɛ wom de o nakwa bam, dedaane Ejipti tiina bam maama zaŋe ba yɔɔre ba keeri ŋɔɔ! Ejipti tiina maama déem chɛ mo dedaane keira, kolo ŋwaane sɔŋɔ déem tera teo kom wone ye nɔɔno wo tege ko wone.
Isarele tiina bam nwoŋi Ejipti ne
31Dento tete ne Pa-faro wom ma toŋe o bwoŋi Moses de Aron. O ma ta de-ba o we, “Nwoŋi-na á viiri á daare a teo! Ja-na Isarele tiina bam maama se á vo á zuli Baŋa Wɛ nenɛɛne á na beeri chwoŋa se á ke tei to. 32Kwei-na á pei sem, de á bone dem, dedaane á naane dem maama á woli da á viiri. Á ná via, se á lwoori á Wɛ wom se o zaane taa wo amo de baŋa ne.”
33Ejipti tiina bam déem ma bobo se ba taa lwoori Isarele tiina bam se ba ke lela ba viiri. Ba ma ta ba we, “Abam ná wo viiri lela, debam maama wó ji twa mo.” 34Isarele tiina bam déem ma kwei ba muni delo sabɔle ta na wo ke de wone to, ba ke zwe selo ba na mae ba viiri muni dem to wone. Ba ma vɔ te maama ba ke ba gwaaro wone, ye ba daare ba kwei tento maama ba daŋe ba bakale baŋa ne ba ja ba kɛ. 35Isarele tiina bam déem ke kolo maama Moses ya na bere-ba to. Ba ya vei Ejipti tiina bam tei ba bwei se ba jwoŋi sabu-seŋa wonnu, de lu-nyenno wonnu, ko woli de gwaaro mo ba tei ne. 36Baŋa Wɛ déem pɛ se Isarele tiina bam kikia su Ejipti tiina bam yi mo. Ba déem yɔɔre ba pa-ba kolo maama ba na wó bwei ba tei ne to mo. Ko déem ke konto mo, ye Isarele tiina bam wane ba vere Ejipti tiina jejegero tem ba ja ba viiri.#Pulim 15:14; Nwoŋim 3:21-22
37Isarele tiina bam déem ma zege Ramesesa ne ba kwei chwoŋa ba maa vei Sukofa. Ba déem ye baara morro kuni bia yaredo (600,000) mo, ye bia de kaana de woli da. Banto maama déem nam ya vei de nɛ mo. 38Nɔɔna badwonna dedɛ de déem tɔge-ba se ba kɛ. Ba déem ta jege vara na ye pei, de bone, dedaane naane dedɛ. 39Ba ma kwei bworobworo muni delo ba na jaane ba nwoŋi Ejipti ne ye sabɔle tere de wone to ba ma fɔge bworobworo se ba di. Nɔɔna bam déem na ke lela ba zaŋe ba nwoŋi Ejipti ne to ŋwaane, ba wo nɛ pwola se ba ti wodiu kom yiga, naa se ba ke sabɔle da se ko fole.
40Isarele tiina bam déem jeini Ejipti tega kam ne bena bia yana de fintɔ (430) mo. 41Bena bia yana de fintɔ kom (430) ni déem ma ja chekke. Dɛ dem konto ne nɔɔ mo Baŋa Wɛ kɔgɔ kom déem nwoŋi da Ejipti teo ne kɔgɔ de kɔgɔ. 42Tete dem konto ne mo Baŋa Wɛ déem yere o nɔɔna bam, ye o ja-ba o nwoŋi da Ejipti teo kom ne. Bene maama wone, dɛ dem konto ná yeini de yi, se Isarele tiina bam de yere ba tete se ba yé dɔ. Ba de ba dwi dem maama wó ke konto mo se ba ma zuli Baŋa Wɛ.
Atɔgebabaŋa kuri dem chullu
43 Baŋa Wɛ déem daa ma ta de Moses dedaane Aron o we, “Atɔgebabaŋa kuri dem chullu mo tento: Dwi-gɛ tu ba jege se o tɔge o di Atɔgebabaŋa kuri dem. 44Se ko ná ye kabɛ selo abam na yeigi-se, ye ba gwoni se peina to, sento wó wane se tɔge se di. 45Veira balo na zoore abam tei ne ye ba toŋe ba pa abam ŋweero ŋwaane to ba jege se ba tɔge ba di kuri dem. 46Sɔŋɔ kolo wone abam na wó go varem wom to, mo á wó maŋe ko wone á di nɔna yam maama. Yé ja-ya á nwoŋi pwooni, nam yé bwori-na o kwi de dedoa de. 47Isarele tiina kɔ-fɔrɔ kom maama nam mo wó da daane ba di kuri dem konto. 48Dwi-gɛ tu ná zoore abam wone ye o ná boŋe se o tɔge o di Atɔgebabaŋa kuri dem o ma zuli Baŋa Wɛ, konto tu jege se o wuuri o gwoni o sɔŋɔ baara bam de bakeiri sem peina mo.#Pulim 17:10 O ná ke konto, o jege chwoŋa se o tɔge o di kuri dem, ne o na ye Isarele tu chekke to ŋwaane. Baaro wolo nam na wo gwoni o peini to bá tɔge o di kuri dem. 49Chullu tem ye bedwe mo te pae nɔɔno maama, ba ná loge konto tu ye o ye Isarele tu naa, o ná ye dwi-gɛ tu mo ye o zoore abam wone.”
50Isarele tiina bam déem ma sɛ, ye ba ke kolo maama Baŋa Wɛ na tage o bere Moses de Aron se ba ke to. 51Ko déem maa ye dɛ dem konto ne mo Baŋa Wɛ jaane Isarele tiina bam o nwoŋi Ejipti teo kom ne, ba kɔgɔ de ba kɔgɔ.
Currently Selected:
Nwoŋim 12: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
