Nwoŋim 13

Wo-kwe sem

1 Baŋa Wɛ déem laam ma ta de Moses o we, 2“Isarele tiina wone wo-bɛ dwi maama ná ye bu-kwe, se á pɔɔre-se á pa amo. Ko ná ye nabiina wone, naa vara wone wo-kwe selo na ye baara to maama ye amo nyem mo.”

Moses berem dem

3Moses déem ma ta o bere nɔɔna bam o we:

“Ta‑á guli-na dɛ dento gula se ko taa vei wuu. De ye dɛ delo abam na nwoŋi Ejipti teo kom ne to mo. Dáane, á déem ye kabɛ mo. Baŋa Wɛ ma kwei o dam-fɔrɔ o ma o vere abam o ja o nwoŋi jei sem konto ne. Abam ná yeini á guli-de, ko ba jege se á di bworobworo kolo na jege sabɔle ko wone to. 4Zem mo abam lage á nwoŋi Ejipti ne. Ko ye boboa chana kam mo, ko yere maa ye Abibi chana kam. 5Baŋa Wɛ nam maŋe o gwoni ni de á nabaara bam we o wó pa abam zo tega kadwoŋi mo se á ta‑á tei-ka. Ko nam ye tega kalo Kanaan tiina bam na zoore da to, de Hiti tiina bam, de Amori tiina bam, de Hivi tiina bam, dedaane Jebusi tiina bam mo. Tega kam konto ywomma mo de varem de kɔnɔ. Abam ná yi da, bene maama ne, se á di kuri dento Abibi chana kam ne. 6Abam ná yeini á di kuri dem, á wó kwei da yarepɛ mo á ma á di bworobworo kolo sabɔle na tera ko wone to. Ya kweelim dɛ dem ne, á wó di kuri dem á ma á zuli Baŋa Wɛ. 7Da yarepɛ yam konto maama wone, á wó ta‑á di bworobworo kolo sabɔle na tera ko wone to mo. Da yam konto maama wone, se á yé sɛ se bworobworo kolo na jege sabɔle to taa wo abam tei ne. Abam na zoore mɛ maama to, sabɔle bá taa wora á tei ne.

8Da yam konto ne, se á ta‑á tɛ á bere á bia we ‘Dé wora dé ke tento se dé guli Baŋa Wɛ na ke o pa debam maŋa kalo o na pɛ se dé nwoŋi Ejipti teo ne to mo.’ 9Kuri dem konto wó taa ye memaŋe mo de pae abam, nenɛɛne á na vɔge woŋo á je ne naa á tira ne se á yé swei tei to. Konto to, Baŋa Wɛ taane wó taa wo á boboŋa ne dedaane á nia ne, se á yé swei-de. Kokuri to, Baŋa Wɛ mo mɛ o dam-fɔrɔ o ma o vere abam o ja nwoŋi Ejipti ne. 10Bene maama wone, abam wó ta‑á di kuri dento mo ka maŋa ne.

11 Baŋa Wɛ wó seene o ja abam o zo tega kalo Kanaan tiina bam na zoore mɛ leile ye o pwooli de abam de á nabaara bam we o wó pa abam se á ta‑á tei to. 12Á ná zo da, á jege se á le wo-bɛ dwi maama na dɛ yiga se nwoŋi se niina puga ne to á pɔɔre-se á pa Baŋa Wɛ. Abam vara bam wone wo-kwe selo na ye baara to ye Baŋa Wɛ nyem mo. 13Ko nam ná ye bona-bea kalo na dɛ yiga ka nwoŋi ka nu puga ne to, á wó kwei pipeila mo á ma á leiri ka yuu ne á pɔɔre á pa Wɛ. Abam nam ná ba lage se á ke konto á leiri bonaga kam yuu ne, se á bwori ka ba á go-ka. Ko ná ye á tete bia, á jege se á kwei wonnu mo á leiri bu-kwe sem yuu ne á pa Baŋa Wɛ.

14Jwa seeni, abam bia ná bwei abam se ba lɔre chullu tem kuri na ye tei to, se á ta de-ba we ‘Dé déem ye kabɛ mo Ejipti teo kom ne. Baŋa Wɛ ma kwei o dam-fɔrɔ o vere debam o ja o nwoŋi dé kabɛɛne dem wone. 15Ejipti Pa-faro wom bochare déem dana mo ye o ve se o pa debam chwoŋa se dé viiri. Konto ŋwaane, Baŋa Wɛ déem go bu-kwe sem dwi maama Ejipti ne, vara dedaane nabiina maama. Konto ŋwaane mo debam yeini dé kwei vare-kwe sem dé ma ke kaanem dé pa Baŋa Wɛ. Ko daare ko ná ye debam tete bakeiri-kwe sem, dé yeini dé ma wonnu dé leiri ba yuu ne dé pa Baŋa Wɛ.’

16Chullu tento wó taa ye memaŋe mo te pae abam nenɛɛne á na vɔge woŋo á je ne naa á tira ne se á yé swei we Baŋa Wɛ mo mɛ o dam-fɔrɔ o ja debam o ja o nwoŋi Ejipti ne to.”

Isarele tiina bam kwei chwoŋa ba nwoŋi Ejipti ne

17Ejipti Pa-faro wom na pɛ nɔɔna bam chwoŋa se ba viiri to, Wɛ déem wo pɛ se ba kwei chwoŋa kalo na tɔge Filisi tiina laŋa kam to, de ka na maŋe ka ye chwo-kukua to de. Wɛ déem boŋe o tete ne we, “Nɔɔna ná jeeri Isarele tiina bam de jara, ba wó wane ba leiri ba boboŋa ye ba pipiri ba jwoori Ejipti ne.” 18Konto ŋwaane, Wɛ ma pa se ba jwoori ba gugwoli ba kwei chwoŋa kalo na tɔge kagoa kam wo ka maa vei Nane-soŋo kom seeni to. Isarele tiina bam maa vei ye ba vɔ ba tete keiri-keiri, se jara ná yi-ba, se ba ke-ya.

19Moses déem kwei Josɛf kwi sem mo o woli da se ba ja ba viiri. Kokuri to, Josɛf déem pɛ se Isarele bia bam du duuri mo, ye o ta-ba we, “Wɛ wó ba o vere abam o yage. Ko nam ná ke konto, se á ja amo kwi sem á nwoŋi da jei sento ne.”

20Isarele tiina bam ma zege Sukofa ne ba vo ba yi Etam. Jei sem konto wo kagoa kam ni ne mo. Ba ma chwi ba vwoa dáane. 21Ba na maa vei to, Baŋa Wɛ déem yeini o tɔge ba yiga mo. Wea ne o yeini o nye de kunkwoŋo mo, ko na zege deiki ba yiga ne se ba lɔre chwoŋa. Ko daare tete ne, o maa nye de mini na zege deiki mo ye de tɔge ba yiga ko bere-ba chwoŋa pa se ba via. Konto ma woli se wea de tete maama ba ta wae ba via. 22Wea maama wone, kunkwoŋo kom déem wo nɔɔna bam yiga ne mo. Mini dem de maa wo ba yiga ne tete maama ne.#Nwoŋim 40:35; Jeelim 9:15

Currently Selected:

Nwoŋim 13: KBG

Highlight

Copy