Danyeli 4

Nebukadeneza dwɛ tio dendwɛ

1Pɛ Nebukadeneza na pɛ kwora kalo se ka yi nɔɔna balo maama na wo logo baŋa ne, ba ná maŋe ba nwoŋi dwi delo maama ne, de teo kolo maama ne, ye ba ná ŋɔɔne taane delo maama to mo tento:

Wɛ wó pa á maama yazura se ko ja gaale.

2A wo pwoli de chwoŋa na tigi ka pa-ne se a ta wo-kamunnu de wo-kenkagela yalo Yuu-tu Wɛ wom na ke o pa amo to.

3Wo-kenkagela yalo Wɛ na ke to

tiini ya bere o dam mo!

O ma yɔɔre o ke wo-kamunnu dedɛ!

O paare dem ba jege kweelim!

O maa jege dam se o taa tei nɔɔna taa wuu!

4Amo Pɛ Nebukadeneza déem jei a sɔŋɔ ne mo de yazura, ye a wo tigi lanyerane. 5A na tigi a dɔ to mo a dwɛ dendwɛ ye foone tiini de zo-ne de ŋwaane. A na nɛ veera yalo a yuu ne to pɛ se a boboŋa vugimi. 6Mo kokuri amo ma pa ni se ba bwoŋi swa tiina balo maama na wo Babilon ne to, se ba lɔre a dendwɛ dem kuri ba bere-ne.

7A teo kom liri-mwa tiina, de ko yi-nara, de ko vora, de yi-pore-nyena na tua amo tei to, a ma ta a dendwɛ dem a bere-ba. Ba nam wo wane de kuri ba ta ba bere-ne. 8Ko kwaga seeni mo Danyeli tu a tei ne, ye a ta a dendwɛ dem a bere o de. Amo déem nam kwei a jwoni yere mo a pa‑o se ba taa bwoi‑o we Bɛletesaza. Wa yalo na ye ya yera to jworo maa tɔge‑o lanyerane.

9A ma ta ded‑o a we, “Bɛletesaza, n na ye swa tiina bam maama yiga tu to, a maane we wa yalo na ye ya yera to jworo mo wo n tei ne. Konto ma pa se wo-siseigo tera nmo na yeiri ko kuri. A lage a maŋe a dendwɛ mo se n cheigi se n laam ta de kuri n bere-ne. 10Tɔ. Amo na tigi a dɔa ye a na veera yalo a yuu ne to mo tento: A nii a na tei-zɔŋɔ na yɔɔre ko maŋe de tega ni maama tetare dem ne ko zege da. Ko maa tiini ko dɔra. 11Tio kom yɔɔre ko yalese ko ke da mo ye ko jege dam. Ko ta yɔɔre ko dɔra mo pa se ko yi wɛyuu kom. Nɔɔna balo na zege tega baŋa jei maama ne to wae ba na-ko. 12Ko vɔɔro tiini te lana, ye ko yɔɔre ko leiri bia dedɛ se tega baŋa nɔɔna maama taa di ba sui. Ga-vara maa tigi tio kom woro ne, ye zuna de sɔ pworu ko nɛ sem yera ne. Wonnu telo maama na ŋwe to de yɔɔre te nae wodiiru tio kom yera ne mo te di.

13A ta na tigi a dɔ ye veera yam tui a yuu ne konto to, mo a nɛ Wɛ maleka na ye ka yera to na nwoŋi Wɛ telaao ne ka beene. 14Ka bage de kwor-dɛa ka we, ‘Gwoni-na tei-zɔŋɔ konto á de tega ne. Ta sare-na ko nɛ sem maama á yage, ye á daare á poore ko vɔɔro tem. Jage-na ko bia balo na leigi to jei maama ne. Ta daare á chiŋi-na vara bam se ba yé taa tigi ko kuri ne, se zuna bam de zaŋe ko nɛ sem ne ba viiri. 15Ko daare ko ná ye tio kom kugu, se á yage-ko tega kam ne. Abam laam wó beeri chegero mo se á kwei-te á vɔ kugu kolo na daare to yera yam ne. Luuru de channa mo ba wó ma ba ke chegero tem. Á wó pa kugu kom maŋe dáane ye ga-zuru mo gilimi-ka.

Ko nam na ye tei to, nyɔnɔ mo wó to kotu baŋa ne, ye o de vara mo wó taa zoore daane goa kam wone ba di gaaro. 16O daa bá taa jege nabiinu boboŋa, se varem boboŋa mo o wó taa jega se bena yarepɛ kɛ ya daare.

17Ni dento nwoŋi wɛyuu malese selo na nii logo baŋa to tei ne mo. Ko lage ko ke konto mo se nabiina maama lɔre we Yuu-tu Wɛ wom mo jege dam nabiina paare maama baŋa ne. O nam yeini o kwei dam o pae balo o na kuri se o pa ba di paare to mo, de nabwona de.’

18Tɔ. Bɛletesaza, amo Pɛ Nebukadeneza na dwɛ dendwɛ delo to mo konto. A teo kom swa tiina bam wolowolo nam tera se kotu wane o ta de kuri o bere-ne. A nam yei we nmo wó wane n ta de kuri n bere-ne, wa yalo na ye ya yera to jworo na wo n tei ne to ŋwaane.”

Danyeli tage dendwɛ dem kuri

19Pɛ Nebukadeneza taane dem baŋa ne, Danyeli, o yere dedwoŋi na ye Bɛletesaza to, boboŋa jei mo ye ko tiini ko daane‑o. Pɛ wom na maane konto to, mo o tage ded‑o o we, “Bɛletesaza, yé pa dendwɛ dem, de de kuri na ye tei to taa jege‑m ko daana.”

Bɛletesaza de ma leiri o we, “Pɛ, ko ya ná ke se dendwɛ dem toŋe n dona baŋa ne, konto ya mo wó taa lana. 20Nmo nɛ tio kolo na yalese mo ye ko jege dam to. Ko ta yɔɔre ko dɔra mo pa se ko yi wɛyuu kom. Nɔɔna balo na zege tega kam baŋa jei maama ne to wae ba na-ko. 21Ko vɔɔro tiini te lana, ye ko yɔɔre ko leiri bia dedɛ se tega baŋa nɔɔna maama taa di ba sui. Ga-vara maa yeini ba sii tio kom kuri ne, ye zuna de sɔ pworu ko nɛ sem yera ne. 22Pɛ, nmo tete mo ye tio kom konto. Nmo yere dem tiini de zaŋe de yi wɛyuu. N paare dem dam de jage mo de yi tega kam baŋa jei maama ne.

23Nmo ma‑n na Wɛ maleka na ye ka yera to na nwoŋi Wɛ telaao ne ka tu ka ta we, ‘Gwoni-na tio kom á de tega ne, se á daare á chɔge-ko. Nam yage-na ko kugu tega kam ne se á kwei luuru de channa á vɔ ko yera ne. Pa-na se ko maŋe da ye ga-zuru de gilimi-ko. Ko na ye tei to, nyɔnɔ mo wó to kotu baŋa ne, ye o de vara mo wó taa zoore daane goa kam wone ba di gaaro se bena yarepɛ kɛ ya daare.’

24Pɛ, cheigi n dendwɛ dem kuri. De nam ye Yuu-tu Wɛ wom na boŋe se o ke tei de nmo to mo o le o bere‑m. 25Ko bere we ba lage ba le‑m nabiina tetare ne mo, se n zo gaao ye nmo de kago-vara ta‑á zoore daane. Nmo de laam wó ta‑n done gaao, ne n ye nabea mo tei. Nyɔnɔ wó to n yera ne se bena yarepɛ kɛ ya daare. Nmo laam wó ba n lɔre we Yuu-tu Wɛ wom mo jege dam nabiina paare maama baŋa ne ye wonto nam mo yeini o pae balo o na kuri to di paare. 26Ba na pɛ ni se tio kom kugu de ko tega nɛ sem taa maŋe tega kam ne to, ko bere we n ná tu n maane we Telaao Tu Wɛ wom mo seene o ye pɛ nabiina baŋa ne, ba laam wó jwoori ba kwei n paare dem ba pa‑m se n daa‑n ta‑n jege n di. 27Konto ŋwaane, Pɛ, a lwoori‑m se n ke tei a na wó bere‑m to. Yage tusim kikia, se n daare n ta‑n ke kolo na tɔge chwoŋa to. Nam yé ta‑n jege puseŋa n ke de nɔɔna, se n daare n ta‑n jege nabwona yibwona. Kokuri to, konto mo wó wane ko pa se n na yiga-veiŋa n dáane.”#Memaŋa 16:6

Dendwɛ dem jigi chega

28Wonnu tento maama déem seene te ke Pɛ Nebukadeneza ŋwea wone mo. 29Chane fuga-selei kwaga ne mo dɛ dedwe, pɛ wom maa wo pɛ sɔŋɔ kom na wo Babilon ne to wone. O laam ma di ko nayuu kom o kare o via. 30O ma ta o we, “Nii Babilon teo kom na ye teo kamunu, ye amo tete dam-fɔrɔ mo a mɛ a lɔ-ko se ko taa jege lam tei! A nam lɔge-ko se a di a paare ko wone se ko bere a nenɔŋ-fɔrɔ kom na ye tei to mo.”

31O ni dem ta wo to tega ne de kwora na nwoŋi Wɛ telaao ne ka ta ded‑o ka we, “Pɛ Nebukadeneza, cheigi amo taane dento: Zem dɛ dem ne mo nmo paare dem ti! 32Ba lage ba le‑m nabiina tetare ne mo, se n zo gaao ye nmo de kago-vara wó taa zoore daane. Nmo de laam wó ta‑n done gaao, ne n ye nabea mo tei. Nmo wó ta‑n ye konto se bena yarepɛ kɛ ya daare. Nmo laam wó ba n lɔre we Yuu-tu Wɛ wom mo jege dam nabiina paare maama baŋa ne ye wonto nam mo yeini o pae balo o na kuri to di paare.”

33Maŋa kam konto ne nɔɔ, taane delo maama Wɛ na tage se ko vo Nebukadeneza seeni to jigi chega. Ba déem le‑o nabiina tetare ne mo se o vo o done gaao ne o ye nabea mo tei. Nyɔnɔ maa yeini ko to o baŋa ne pa se o ye-daa kam bugi. O yu-ywei sem de déem nwoŋi mo gee ne maao koro to. O ja-fwa de jigi nenɛɛne zuŋa ja-fwa dwoŋi mo.

34Maŋa kam na kɛ ka ti maama to, amo Nebukadeneza laam ma kwoni a yuu wɛɛne, ye a swa jwoori a tete ne. A ma ke Yuu-tu Wɛ wom lei, o na wora se ko taa vei wuu to. A ma tei‑o ye a pa‑o zula a we:

O jege dam se o taa tei nɔɔna taa wuu!

O paare dim dem maa wó taa wora taa!

35Tega baŋa nabiina maama

dae kolokolo yiga da o tei ne.

O maa yeini o ke o na lage tei to

de wɛyuu malese sem maama,

ko ta woli de tega baŋa nabiina de.

Nɔɔn-nɔɔno ware‑o se o cheiŋi,

naa se o bwei‑o we,

“Bɛŋwaane mo n ke tento?”

36A swa yam na tu a tete ne maŋa kalo to, mo a jwoori a na a paare dem a jege a di, pa se a dam de a nenɔŋ-fɔrɔ jwoori a tei ne. A teo kom nakwa de dedɛɛra bam de ma jeeri-ne lanyerane. Amo déem laam nɛ dam dedɛ a paare dim seeni ye a yere dem tiini de zaŋe jei maama ne. 37Amo Pɛ Nebukadeneza laam wó seini Wɛ delo na ye telaao Pɛ wom to mo. A nam ta wó zuli‑o mo, ye a zeiŋi o yere wɛɛne. O kikia maama yɔɔre ya tɔge chwoŋa mo, ye ya ye chega. Ko ná ye balo na bere ba tete kamunim to, wonto mo wae o pa se ba jwoori ba tu ba tete tega ne.

Currently Selected:

Danyeli 4: KBG

Highlight

Copy