Danyeli 5

Poponem tu de tigi kabira yera ne

1Maŋa kadwoŋi ne mo, Pɛ Bɛlesaza déem bwoŋi o teo kom dedɛɛra moro, se ba jeeri ba di wodi-fɔrɔ ded‑o. Pɛ wom maa tɔge de-ba o nyɔ sana dedɛ. 2Sana bam na tu o yia ne to, mo Pɛ wom pɛ ni se ba kwei sabu-seŋa de lu-nyenno zwe selo o kwo Nebukadeneza déem na jaane o nwoŋi Jerusalem Wɛ diga kam ne to ba ba.#2 Tigisim 36:7 Pɛ wom ma kuri se o dedɛɛra, de o kaana, de o bɔɔla bam kwei-se, se ba nyɔ sana se wone. 3Ba ma vo ba kwei Wɛ diga sabu-seŋa zwe sem Nebukadeneza na jaane o nwoŋi Jerusalem teo ne to, ba ba o tei. Pɛ wom, de o dedɛɛra bam, de o kaana de o bɔɔla bam maama ma bobo se ba taa nyɔ sana na-zwe sem konto wone. 4Ba jege sana bam ba nyɔ konto mo, ye ba daare ba seini ba wa yalo ba na mɛ sabu-seŋa, de lu-nyenno, de channa, de luuru, de dɛ, de kandwa ba ma ke-ya to.

5Ba na jei da ba di ywoni pɛ sɔŋɔ kom ne konto to, mo nɔɔno jeŋa pɔpɔ ka pi diga kam kabira yera ne, ka wora ka popone ka tete ne. Pɛ wom ma yɔɔre o na jeŋa kam na wora ka popone to, min-zwoŋo mo na zege da ko pae pwooni to ŋwaane. 6Bedwe baŋa ne pɛ wom ma ko de foone, ye o yibia da ka leiri. O nadwoona ma bobo se ya taa mage daane ye o yera maama da ya te. 7O ma pa ni se ba bwoŋi o yi-nara bam, de o liri-mwa tiina, de o yi-pore-nyena bam ba pa‑o.

Pɛ wom ma ta de-ba o we, “Abam wolo ná wane o ga poponem dento, ye o maŋe de kuri o bere-ne, amo wó pa kotu na zula lanyerane ye a zo‑o nenɔŋa paare gwaaro. A ta wó kwei sabu-seŋa zambili a de o ba ne ye a daare a pa o ji dedɛɛra batɔ tu a teo kom dam seeni.”

8Pɛ wom swa tiina bam maama déem ma ba o tei, ye ba wolowolo ware poponem dem se o ga. Ba maa yeiri de kuri de, se ba ta ba bere pɛ wom. 9Ko ma pa se Pɛ Bɛlesaza boboŋa maama jei, ye o yibia da ka leiri. O dedɛɛra bam de yu-punnu maama ma vugimi.

10Ka-pɛ-dwooro wom ma ni pɛ wom de o teo dedɛɛra bam sɔɔ kom na zaŋe tei to. O ma zo ba tei ye o ta de pɛ wom o we, “Pɛ, Wɛ wó pa‑m momwɛ-dɛɛre. Nam yé pa n boboŋa jei, naa n yibia de leiri. 11Nɔɔno dedoa wo nmo paare laŋa kanto ne, ye wa yalo na ye ya yera to jworo tɔge‑o lanyerane. Nmo kwo Nebukadeneza déem na ye pɛ to, o lɔre we nɔɔno wom konto tiini o jege yi-poro, de yeino, de swa, ne wa yam tete swa na ye tei to. Nmo kwo ma kwei‑o o zege o yi-nara, de o liri-mwa tiina, de o swa tiina, de o yi-pore-nyena bam maama yiga ne. 12Nɔɔno wom yere mo ye Danyeli. Nmo kwo déem ma leiri o yere se de taa ye Bɛletesaza. O jege boboŋa lanyerane pa se o yeino de o swa gaale. O maa yei se o lɔre dendwa kuri, de dende kuri, se o daare o maŋe wo-siseigiru kuri jaja. Nam toŋe se ba bwoŋi‑o se o ba ywo-seeni, se o wó wane o maŋe keim dento kuri maama o bere‑m.”

13Ba ma seene ba ja Danyeli ba ba pɛ wom tei. Pɛ wom ma bwei‑o o we, “Nmo mo seene n ye Danyeli wolo amo kwo Nebukadeneza déem na kale o woli da o ja o nwoŋi Judah teo ne o ba ywo to na? 14Amo nigi we dé wa yam jworo mo tɔge‑m lanyerane pa se n jege yi-poro, de yeino, de swa dedɛ. 15Amo nam ya tage a teo swa tiina de yi-nara bam se ba ga poponem dento, ba daare ba ta de kuri ba bere-ne. Ba wolowolo nam ware poponem dem kuri se o ta o bere-ne. 16A nam nigi we nmo wae n lɔre wonnu telo na seigi to kuri, se wo-chɛɔ dwi maama bugi. Nmo nam ná gage poponem dento n bere-ne, ye n daare n ta de kuri, amo wó pa se n na zula lanyerane ye n zo nenɔŋa paare gwaaro mo. A ta wó kwei sabu-seŋa zambili a de n ba ne ye a daare a pa n ji dedɛɛra batɔ tu a teo kom dam seeni.”

17Danyeli ma leiri pɛ wom o we, “Amo wó seene a ga poponem dem, ye a daare a ta de kuri a bere‑m. Se ko ná ye pɛɛra yalo n na boŋe se n pa-ne to, a ke nmo lei ya ŋwaane. De ko de, Pɛ, ta‑n jege-ya, naa n kwei n pa nɔn-gaa. 18Pɛ, Yuu-tu Wɛ wom déem kwei paare, de kamunni, de zula, de nenɔŋ-fɔrɔ mo o pa nmo kwo Nebukadeneza. 19N kwo dam dem déem tiini de gaale pa se balo maama na wo logo baŋa ne, ba ná maŋe ba nwoŋi dwi delo maama ne, de teo kolo maama ne, ye ba ná ŋɔɔne taane delo maama to kɔre‑o dedɛ ye ba yera sae. Nmo kwo déem ná boŋe se o go wolo, o wó go kotu mɔle mo. O maa ná we wolo taa ŋwe, kotu wó taa ŋwe mo. O ta na lage wolo to, o wó zuli‑o mo, ko daare o ná boŋe se o ke wolo chaveera, kotu wó seene o na o chaveera mo. 20O maa na bobo se o taa bere o tete, pa se o wo ke dam ye o bɛɛse nɔɔna to, mo ba jwoŋi o paare dem ba daare‑o, ye o nenɔŋa maama jei. 21Ba ta ma zeili‑o pa o nwoŋi nabiina tetare ne ye o boboŋa ji ne kago-vara boboŋa. O ma vo o zoore de gaao wo bonɛ sem. Nmo kwo déem jege gaao o done ne nabea na ke tei to mo. Nyɔnɔ de ma to o yera ne se o laam ba o lɔre we Yuu-tu Wɛ wom mo jege dam nabiina paare maama baŋa ne ye wonto mo yeini o pae balo o na kuri to di paare.

22Ko daare nmo Bɛlesaza, nmo ye wonto bu mo ye n yei wonnu tento maama ni ne. De ko de, nmo wo sɛ se n tu n tete n kɔre Wɛ. 23Nmo nam zeiŋi n tete se n dwoni de Wɛ delo na ye telaao Tu to mo. N ma‑n pa ba ja Wɛ dem konto tete diga zwe sem ba ba ba pa‑m. Nmo de n dedɛɛra, de n kaana, dedaane n bɔɔla bam laam ma nyɔ sana se wone. Á ma daare á seini wa yalo ba na mɛ sabu-seŋa, de lu-nyenno, de channa, de luuru, de dɛ, de kandwa ba ke-ya to. Wa yam konto nam ba ni taane. Ya maa ba nae ye ya ta ba jege boboŋa. Ko nam ná ye Wɛ delo na jege dam n ŋwea kam baŋa ne, ye o tiŋi chwei selo n na wó tɔge to, nmo ve se n zuli wonto. 24Jeŋa kanto nam nwoŋi wonto tei ne mo ye ka ba ka popone botare sento kabira kam yera ne. 25Poponem dem nam na bere tei to mo tento:

MENE, MENE, TEKEL, PARASIN

26Poponem dem kuri mo tento:

‘Mene’ kuri mo ye jeelim: ko bere we Wɛ jeeli nmo paare da yam maama o ja. Ya nam ti.

27‘Tekel,’ kuri mo ye dum: ko bere we Wɛ kwei nmo mo o maŋe n dum. Nmo nam wo maŋe n yi o boboŋa yam.

28‘Parasin,’ kuri mo ye popɔra: ko bere we Wɛ kwei nmo paare laŋa kam o pɔɔre o pa Medea tiina bam dedaane Peresia tiina bam mo.”#Izaya 13:17

29Bɛlesaza na nigi konto to, o ma pa ni se ba kwei nenɔŋa paare gwaaro ba zo Danyeli, se ba daare ba kwei sabu-seŋa zambili ba de o ba ne. Ba ta ma tɔɔle we Danyeli laam mo ye dedɛɛro batɔ tu Babilon teo kom dam seeni.

30Tete dem konto ne nɔɔ mo ba déem go Babilon teo pɛ Bɛlesaza. 31Darusi na ye Medea tu to laam ma lɛɛre o jwoŋi teo kom paare o jege o di. O déem nam jege nenɛɛne bena fuseredo-yalei mo ye o di paare.

Currently Selected:

Danyeli 5: KBG

Highlight

Copy