Danyeli 3

Sabu-seŋa nyenyego de min-vogo kom

1Pɛ Nebukadeneza déem ma pa ba kwei sabu-seŋa ba ma ba mɔ nyenyego ba zege Dura bwolo kom ne. Jei sem konto de déem wo Babilon kateiri dem wone mo. Nyenyego kom dedɔrem baŋa déem ye jatwogo maŋem kuni fuseredo mo. Ko kayɔlɔ baŋa maa ye jatwogo maŋem kuni beredo. 2Pɛ wom ma toŋe o bwoŋi o teo kom dedɛɛra maama, de ko yiga tiina, de balo na ye yuu tiina teo kom kateira yam ne to, de ko nakwa, de ko swa tiina, de yi-pore-nyena bam, ko ta woli de balo na di nɔɔna taane to, dedaane balo maama na nii kateira yam baŋa ne to se ba ba o tei. O déem bwoŋi banto maama se ba ba ba zuli nyenyego kolo o na pɛ ba ke ba pa‑o to mo. 3Nɔn-kamuna bam konto maama de dedɛɛra bam maama laam ma jeeri daane ba zege sabu-seŋa nyenyego kom yiga ne se ba zuli-ko.

4Kwor-tɔɔlo ma bage baŋa baŋa o we, “Abam balo na nwoŋi dwi maama ne, de teo kolo maama ne, ye á ŋɔɔne taane delo maama to, fɔge á cheigi-na ni delo dé pɛ wom na pɛ to! 5Á wó ni nɔɔna na wó wu nabwanno, de wi, de namunnu. Badwonna de maa wó ta kwanno ye badaara de jege gullu ba maga. Abam nam ná nigi sɔɔ konto dwoŋi, se á ke lela á vwi á yibi tega ne á zuli sabu-seŋa nyenyego kom Pɛ Nebukadeneza na chwi to. 6Wolo maama nam ná ve se o tiiri o jɔɔne nyenyego kom, ba wó ja kotu mo ba dole ba de gwoŋo kolo wone min-vogo na di bileim-bileim to ne.”

7Nɔɔna bam na yɔɔre ba ni nabwanno tem, de wi sem, de kwanno tem, de gullu tem, de namunnu tem kwori to mo ba maama vwi ba yibi sem tega ne. Ba maama ma bobo se ba taa jɔɔne nyenyego kom Pɛ Nebukadeneza na ke to. Ba ná maŋe ba ye dwi delo maama tiina mo, naa ba ná ŋɔɔne taane delo maama de, ba maama ke konto mo.

8Babilon teo swa tiina badwonna ma tɔge keim dem baŋa ne ba vo ba ba Juu tiina bam bebara de pɛ Wom. 9Ba déem ma ta ded‑o ba we, “Pɛ, Wɛ wó pa‑m momwɛ-dɛɛre! 10Nmo pɛ ni n we, ‘Nɔɔno maama ná nigi wi sem wum, de kwanno tem tam, de sɔɔ dwi maama, se ba maama vwi ba yibi tega ne ba jɔɔne sabu-seŋa nyenyego kom. 11N ni dem ta bere we wolo nam ná ve se o tiiri o jɔɔne nyenyego kom, se ba dole kotu ba de min-vogo wone.’ 12Juu tiina badwonna nam ba nege‑m kɔtaa. Banto maa ye balo nmo na kuri ye n pa-ba dam se ba taa nii Babilon teo kateira yam maama baŋa ne to mo. Saderake, de Mesake, de Abedenego mo konto. Ba ba zuli nmo teo wa yam. Ba ta ba sɛ se ba tiiri ba zuli nyenyego kom n na ke n zege to.”

13Pɛ Nebukadeneza na nigi konto to, o bane ma tiini de zaŋe de nɔɔna batɔ bam konto. O ma pa ni se ba ja-ba ba ba o tei. Ba na jaane-ba ba yi pɛ wom tei to, 14o ma bwei-ba o we, “Saderake, de Mesake, de Abedenego, abam mo seene á ta we á bá tɔge á zuli amo wa yam, ye á ta bá jɔɔne sabu-seŋa nyenyego kolo a na chwi to na? 15Tɔ! Boŋe-na á nii á na wó ke tei. Abam daa ná nigi wi sem wum, de kwanno tem tam, de sɔɔ dwi maama, se á vwi á yibi tega ne á jɔɔne sabu-seŋa nyenyego kom. Á nam ná yɔɔre á ve se á jɔɔne-ko, ba laam wó dole abam mo ba de min-vogo kom wone. Á boŋe we wɛ dedwoŋi wora o na wó wane o jwoŋi abam amo jeŋa ne o yage na?”

16Nɔɔna batɔ bam de ma leiri‑o ba we, “Pɛ Nebukadeneza, ko dae se dé ŋɔɔne dé jwoŋi dé tete dé yage taane dento baŋa ne. 17Dé nam yei liŋ we, n ná pɛ se ba dole debam ba de min-vogo konto wone, debam Wɛ delo dé na zuli to wó wane o liiri debam de wone, ye o daare o vere debam n jeŋa ne o yage. 18O nam ná wo jwoŋi debam o yage mo de, dé wó ta zwa-poora mo se n lɔre we, debam bá fɔge dé zuli nmo wa yam, dé nam bá jɔɔne sabu-seŋa nyenyego konto n na ke n zege to.”

19Ba taane dem ma gɔ Nebukadeneza de feiri. O bane ma tiini de zaŋe Saderake, de Mesake, de Abedenego baŋa ne, pa se o luluŋ-bea chiiri ko ŋwaane. O ma pa ni se ba pa mini dem taa dana kuni berepɛ. 20Pɛ wom laam ma ta o jar-keira nɔn-wagela bam badwonna se ba ja Saderake, de Mesake, de Abedenego ba vɔ se ba dole-ba ba yage min-vogo kom wone. 21Ba yɔɔre ba vɔ nɔɔna batɔ bam konto de gwaaro telo maama ba na zo to mo. Ko maa ye ba gare-bwori, de ba gare-kuri, de ba yuu gare-yia, de ba gwaaro maama. Ba ma dole-ba konto ba de min-vogo kom wone. 22Pɛ wom ni dem na tu de yi-seena pa se mini dem funyogo daga tei to ŋwaane, mini dem déem nwoŋi diga kam ne de go jar-keira balo na zeŋe Saderake, de Mesake dedaane Abedenego ba yi de yera se ba dole-ba ba de de wone to mo. 23Se ko ná ye nɔɔna batɔ bam konto, ba yɔɔre ba to min-vogo kom na tiini ko di to tetare ne ye ba yera ta vɔge de ŋone mo.

24Ko na ke fee to, mo pɛ wom pɛ o zaŋe ye o ni yɛ. O ma bwei o teo dedɛɛra bam o we, “Ko dae nɔɔna batɔ mo dé dole dé de mini dem wone na?” Ba ma leiri‑o ba we, “Ɛɛ, Pɛ, ko seene ko ye konto mo.”

25O daa maa we, “Ko nam ke tɛ mo ye a na nɔɔna bana na kare mini dem wone ba via? Ba yera yam daa wo vɔge, ye kolokolo ba daane-ba.” O ta ma ta o woli da we, “Nɔɔno wolo na ke bana tu to nam nye de o ye wɛ dedwoŋi mo!”

26Pɛ Nebukadeneza ma fɔɔre o yi min-vogo gwoŋo kom ni dem seeni, ye o bage de kwor-dɛa o we, “Abam balo na ye Yuu-tu Wɛ wom tontoŋena bam to, Saderake, de Mesake, dedaane Abedenego, nwoŋi-na á ba ywo-seeni!”

Saderake, de Mesake, de Abedenego ma seene ba nwoŋi mini dem wone ba yi o tei. 27Teo kom dedɛɛra bam, de ko yiga tiina, de balo na ye dedɛɛra teo kom kateira yam ne to, de ko nakwa bam ma fɔɔre ba yi ba yera. Ba na fɔge ba nii-ba to, ba nɛ we mini dem wo ke-ba zonne. Ba yera koro de ba yu-ywei de nam wo zwɛ mini dem wone. Mini wo zwɛ ba gwaaro tem de. Ba ta ma na we nyoa lwom maŋe de tere ba yera yam ne.

28Pɛ Nebukadeneza laam ma ta o we, “Ko ná ye Wɛ delo Saderake, de Mesake, dedaane Abedenego na zuli to, wonto maŋe de tia mo. Kokuri to, o toŋe o maleka mo se ka ba ka jwoŋi o tontoŋena bam konto ka yage.#Lei 34:7 Ba nam ke ba wo-dedoa ded‑o, pa se ba ve amo ni dem. Ba sɛ se ko ná ye toone de, se ba te, kolo ŋwaane ba ke ba boboŋa ne we, ba bá sɛ ba zuli wa yadwonna ba leiri ba tete Wɛ dem yuu ne. 29Amo zem mo nam pɛ ni we, nɔɔno ná nwoŋi teo kolo maama ne, naa dwi delo maama ne, ye o ná ŋɔɔne taane delo maama, kotu ná ŋɔɔne Saderake, de Mesake, de Abedenego Wɛ dem o ja o chɔge, se ba cha kotu mura-mura. O sɔŋɔ de nam wó ji di-dwoŋo mo. Kokuri to, wɛ dedwoŋi daa tera, ye de wó wane de jwoŋi de nɔɔna de yage nenɛɛne banto Wɛ dem na ke tei tento to.”

30Pɛ wom daa ma jwoori o zeiŋi Saderake, de Mesake, de Abedenego se ba taa tiini ba jege dam ba nii Babilon laŋa kam ni maama baŋa ne.

Currently Selected:

Danyeli 3: KBG

Highlight

Copy