Danyeli 2

Nebukadeneza dendwɛ dem taane

1Dɛ dedwe Pɛ Nebukadeneza paare dim bena yalei bene dem wone mo o dwɛ dendwɛ dedwoŋi. Dendwɛ dem ma pa se o boboŋa tiini ya daane‑o, ye o ga se o dɔ de ŋwaane. 2O ma toŋe o bwoŋi o teo kom liri-keira, de ko yi-nara, de ko vora, de yi-pore-nyena, se ba jeeri ba maŋe o dendwɛ dem kuri ba bere‑o. Ba na tu ba zege pɛ wom yiga ne to, 3o ma ta de-ba o we, “Amo dwɛ dendwɛ mo ye de jege-ne de daana. A nam yɔɔre a lage se a lɔre de kuri mo.”

4Yi-nara bam ma leiri pɛ wom de Aram tiina taane#2:4 Aram tiina taane: Nɔɔna dedɛ déem ŋɔɔne Aram tiina taane dem. Ko zege ywo-seeni se ko taa vei tɔnɔ kom popɔra berepɛ, botare-bia bam popone de Aram tiina taane dem mo, ye ko dae Hiburu tiina taane. ba we, “Pɛ, Wɛ wó pa‑m momwɛ-dɛɛre. Nam ta n dendwɛ dem n bere debam se dé maŋe de kuri dé bere‑m.” 5Pɛ wom ma leiri o we, “A boboŋa maŋe ya ja mo de taane dento. Abam mo jege se á ta a dendwɛ dem na ye tei to. Ko kwaga ne, á wó maŋe de kuri á bere-ne. Abam ná wo ke konto maama, a lage a pa ba gwoni abam mo muga-muga se á sam dem de ji di-dwonnu. 6Se á ná tage dendwɛ dem na ye tei ye á ta maŋe de kuri á bere-ne, amo wó pa abam ŋweero de pɛɛra dedɛ ko ŋwaane ye a daare a pa á tiini á na zula. Konto ŋwaane nam, yɔɔre á ta dendwɛ dem se á daare á maŋe de kuri á bere-ne.”

7Ba de daa ma leiri‑o ba we, “Pɛ, ko ye nmo ná lwoni n dendwɛ dem n bere debam yerane mo dé laam wó wane dé maŋe de kuri dé bere‑m.” 8Ba taane dem ma pa pɛ wom ta o we, “Amo yɔɔre a lɔre abam boboŋa a ti mo! Á na yei we a yia seene to mo pɛ se á jege maŋa kam á chɔga. 9Abam nam na yei we á ná wo tage dendwɛ dem kuri á bere-ne, á maama wó te to ŋwaane, mo á jege vwa á fɔe se á ma‑á gane-ne. Abam boŋe we a lage a leiri a wo mo na? Ta-na dendwɛ dem á bere-ne, se ko pa a lɔre we á wó wane á maŋe de kuri chekke á bere-ne.” 10Yi-nara bam ma leiri pɛ wom ba we, “Pɛ, nɔɔn-nɔɔno tera tega baŋa ne se kotu wane o ke n na lage se debam ke kolo to. Dé nam ta wo nɛ pɛ wolo na tage o yi-nara, naa o liri-keira, naa o yi-pore-nyena se ba ke nmo na tage tei to, ne o ná maŋe o ye pa-faro tei maama de. 11Pɛ, nmo lage se dé ke kolo na ware to mo. Ko ná dae wa yam yerane, nɔɔn-nɔɔno bá wane n dendwɛ dem o ta o bere‑m. Wa yam nam ba zoore de nabiina.”

12Ba taane dem déem ma pa pɛ wom bane tiini de zaŋe, ye o pa ni se ba go swa tiina balo maama na zoore Babilon teo ne to. 13Pɛ wom ni dem ŋwaane, ba toŋe nɔɔna se ba vo ba go swa tiina bam maama mo. Nɔɔna ma vo ba beeri Danyeli de o yuudwonna bam se ba go ba de ba woli da.

14Nebukadeneza babɛ sem yiga tu wom yere mo ye Arioki. O na vei se o go Babilon teo swa tiina bam to mo Danyeli yi o yera o lwoori‑o de swa se o lɔre kolo na ke to. 15O ma bwei Arioki o we, “Bɛ mo ke ye pɛ yɔɔre o pa ni se ba ke keim dem konto?” Arioki de déem ma lwoni kolo maama ya na ke to o bere‑o. 16Danyeli na nigi konto to, mo o yɔɔre pɛ wom tei o vo o lwoori maŋa fenfee se o jwoori o tei o ta dendwɛ dem kuri o bere‑o.

17Danyeli ta ma jwoori sɔŋɔ ye o ta kolo na ke to, o bere Hanania, de Misayeli, de Azaria. 18O déem ma ta de-ba o we, “Pa-na se dé lwoori Telaao Tu Wɛ wom se o duri debam yibwona se o le wo-siseigo konto kuri o bere debam. Konto ná kea, debam bá tɔge de Babilon teo swa tiina badaara bam dé te.” 19Tete dem konto ne mo Wɛ seene o veere wo-siseigo kom de ko kuri dem o bere Danyeli. Danyeli maa tei Telaao Tu Wɛ wom ye o we,

20“Tei-na Wɛ yere dem se ko taa vei wuu!

Kokuri, wonto mo ye yeino tu,

ye o dam gaale.

21Wonto mo pae se wonnu ke te maŋa ne.

O maa pae pwa jei ba di paare,

ye o ta pae ba badwonna ga ba paare dem.

O ye wolo mo na kwei swa o pa swa tiina to,

ye o daare o pa se yeino yi yi-pore-nyena de.

22Wonto mo le wonnu telo kuri nim na chana ye te seigi to.

O maa yei kolo maama na wo lim wone to.

Pwooni de maa kaare o maama de pu.

23Wɛ wolo a nabaara déem na zuli to,

a tei‑m mo ye a ke n lei.

Ko ye nmo mo pɛ-ne swa de dam.

Nmo ma‑n bere-ne kolo dé na lwoori‑m se n le to kuri,

de n na bere debam pɛ wom dendwɛ dem na ye tei to.”

Dendwɛ dem kuri

24Danyeli ma vo Arioki tei. Pɛ Nebukadeneza ya pɛ wonto ni mo se o go Babilon teo swa tiina bam maama. Danyeli ma ta ded‑o o we, “Yé go ba wolowolo. Nam tɔge a yiga se dé vo pɛ wom tei, se a laam maŋe o dendwɛ dem kuri a bere‑o.”

25Arioki de ma seene o ja Danyeli o vo pɛ Nebukadeneza tei, ye o ta de pɛ wom o we, “Nɔɔna balo dé na kale dé ja dé nwoŋi Judah ne dé ba ywo-seeni to wone mo a nɛ nɔɔno dedoa se o wane o ta nmo dendwɛ dem kuri o bere‑m.”

26Pɛ wom ma bwei Danyeli wolo yere dedwoŋi na ye Bɛletesaza to o we, “Ko ye chega mo we nmo wó wane n ta amo na dwɛ dendwɛ delo to se n ta lɔre de kuri n bere-ne na?”

27Danyeli ma leiri‑o o we, “Swa tu tera, naa yi-naro, naa liri-mwa tu, naa yi-pore-nyem tera, se kotu wane o lɔre wo-siseigo kolo nmo na tage to kuri o bere‑m. 28Telaao Tu Wɛ wom nam wora, ye wonto mo wae o kwei wonnu telo na seigi to o bere jaja.#Pulim 40:8 O ma kuri se o bere nmo kolo jwa na wó ke to. A laam wó ta n ya na tigi n dɔa ye n dwɛ wonnu telo to, dedaane boboŋa yalo na tu n yuu ne to kuri a bere‑m.

29Pɛ, nmo na tigi n dɔa konto to mo wonnu telo na wó ke jwa seeni to jaane n boboŋa. Wolo wom na veere wonnu telo ya na seigi to mo pɛ se n lɔre kolo na lage ko ke to. 30Nam lɔre lanyerane we a na lɔre n dendwɛ dem ya na seigi to, ko dae we amo jege swa a dwoi nɔɔna maama mo. Pɛ, ko ye Wɛ nam mo lage se n lɔre wonnu telo na kare te beeri n boboŋa ne ye te daane‑m to kuri.

31Pɛ, nmo na dwɛ to, n nii n na nabiinu nyenyego na zege n yiga ne. Nyenyego kom maa tiini ko daga! Ko ta tiini ko nyeena, ye ko laam jege foone dedɛ. 32Ba kwei sabu-seŋa na ye chekke to mo ba ma ba mɔ nyenyego kom yuu. Ko nyɔɔne dem, de ko vɔna maama ye lu-nyenno mo ba mɛ ba ke tento. Ko puga kam de ko chwa yam de ye channa mo ba mɛ ba ke-te. 33Ko nachere sem maama ye luuru mo ba mɛ ba ke-se. Ko napera yam maa ye luuru de dɔgɔ mo ba gwaane daane ba laam ma ba ke-te. 34Nmo na zege n nii nyenyego kom konto to, mo n daa‑n nɛ kandwɛ-zane na fɔge de nwoŋi peo yuu ne, ye nabiinu wo mɛ o jeŋa o sare-de. Kandwɛ dem tete mo tua de mage nyenyego kom ko napera yam seeni de mumugi-ya, luu de dɔgɔ kom maama. 35Ko laam ma pa se nyenyego kom luuru tem, de dɔgɔ kom, de channa kam, de lu-nyenno tem, de sabu-seŋa kam maama mumugi mura-mura bedwe baŋa ne. Vio de ma ba ko kale tento maama ko ja jei ne te ye swanno yerane mo tei, ye kolokolo daa wo daare. Nmo laam ma‑n na we kandwɛ dem na mage nyenyego kom de chɔge to jigi peo-kamunu mo. Peo kom konto laam ma jwoŋi tega kam baŋa jei maama.

36Nmo dendwɛ dem mo konto. A laam nam wó ta de kuri a bere‑m. 37Pɛ, nmo ye pa-faro mo pwa maama wone. Telaao Tu Wɛ wom nam mo kwei dam dedaane nenɔŋ-fɔrɔ o pa‑m, pa se n paare dem gaale.#Ezekeli 26:7 38Wɛ ma kwei nabiina de vara maama, ko woli de zuna maama o ke nmo dam kuri ne. Nmo laam ma‑n tei tento maama. Nmo mo ye nyenyego kom yuu kom na ye sabu-seŋa kam ba na mɛ ba ke to.

39Nmo paare dem nam wó kɛ, se paare dedwoŋi de leiri. Paare dem konto nam bá taa dana ne nmo paare dem na ye tei to. De de maa wó di de kɛ se paare batɔ tu laam ba. Dento mo wó taa ye channa paare dem. Paare dem konto wó jage de yi tega kam jei maama. 40Paare bana tu daa ta wó saŋe paare dedwoŋi dem kwaga. Dento nam lage de taa dana mo ne luuru na dana tei to. Paare dem konto wó chɔge paara yadwonna yam maama mo, ne luuru na bwori wonnu ye te ta chochoge-te tei to. 41Nmo nam ta n nɛ we napera yam de namimbia bam jei sedwonna ye luuru, ye sesem de maa ye dɔgɔ. Ko bere we paare dem konto lage de pɔɔre belei mo. Daa dedoa wó taa dana ne luuru na dana tei to, ye kakam daa bwona, ne dɔgɔ na ye tei to. 42Paare dem nam lage de gwaane daane mo, mɛ na bwona to de mɛ na dana to maama. 43Nmo na nɛ we luuru tem de dɔgɔ kom gwaane daane to, ko bere we paare dem konto nam wó taa kwaana se ba di da-bukwa, se ko pa ba taa ye bedwe. Ko nam bá toŋe, ko nye de luuru de dɔgɔ na ba jaane daane tei to mo.

44Ko nam na ye tei to, pwa bam konto paare dim ta ba ti, de Telaao Tu Wɛ wom na tu o chwi paare dedwoŋi. Dento paare dem nam lage de taa wora se ko taa vei wuu mo. Nɔɔn-nɔɔno bá wane-de o che. De maa wó chɔge paara yadwonna yam maama pa se ya jei. Paare dem konto tete nam wó taa wora taa wuu. 45Ko nye de nmo na nɛ kandwɛ-zane delo na fɔge de nwoŋi peo yuu ne ye nabiinu wo mɛ o jeŋa o lɔ-de to. N nɛ we kandwɛ dem konto tu de mage nyenyego kom luuru tem, de channa kam, de dɔgɔ kom, de lu-nyenno tem, de sabu-seŋa kam, ye de chɔge-te mura-mura mo. Wɛ-kamunu kom mo lage se o bere‑m kolo na wó ke jwa seeni to. Pɛ, nmo dendwɛ dem wó seene de ji chega, ye amo de na tage tei a bere‑m to ye ko yuu ne mo.”

46Pɛ Nebukadeneza na nigi konto to, o ma vwi o yibia tega ne o jɔɔne Danyeli. O ma pa ni se ba kwei wodiu pɛɛra ba ma ke kaanem ba pa Danyeli, se ba ta zwɛ talwoŋ-ywoŋa ba pa‑o. 47Pɛ wom ma ta de Danyeli o we, “Abam Wɛ dem mo seene de ye Wɛ chekke de dwoi wa yam maama. O ta ye Yuu-tu mo pwa maama yiga ne. O maa ye Wɛ delo na kwei wonnu telo na seigi to mo o le o bere jaja, bɛŋwaane nmo wane n ta amo dendwɛ dento kuri de de ya na seigi to de.”

48Pɛ wom déem ma pa Danyeli na zula lanyerane, ye o daa ta pa‑o pɛɛra dedɛ na tiini ya lamma to. O ta ma kwei Babilon teo maama o ke o jeŋa ne, ye o daare o pa o ji o swa tiina bam maama yiga tu. 49Danyeli ma lwoori chwoŋa Pɛ wom tei ne, ye ba kwei Saderake, de Mesake, de Abedenego pa se ba nii Babilon laŋa kam ni maama baŋa ne ba pa‑o. Danyeli tete déem ma maŋe pɛ sɔŋɔ kom ne.

Currently Selected:

Danyeli 2: KBG

Highlight

Copy